Համեստ ու Գովելի Անձնական Երեւոյթ

1. Նահանգային համաժողովին առ ի պատրաստութիւն, ինչո՞ւ մեր երեւոյթին մասին պէտք է մտածենք։

¹ «Եհովայի Վկաները լաւագոյն մարդիկն են։ Ձեր անդամները ազնիւ են ու արտաքին լաւ երեւոյթ ունին, եւ խոր յարգանք կը ցուցաբերեն»։ Այսպէս ըսաւ պանդոկի մը ներկայացուցիչը, անցեալ տարի նահանգային համաժողովի մը ներկայ գտնուող եղբայրներուն ու քոյրերուն մասին։ Ուրիշ համաժողովի մը նկատմամբ, պանդոկի մը մէկ պաշտօնեան ըսաւ. «Բացայայտ է թէ կ’ուզէք որ ձեր հագուելակերպը Աստուած հաճեցնէ»։ Այո, ուրիշներ կը նկատեն համաժողովի պատուիրակները։ Հետեւաբար կ’ուզենք «աւետարանին ինչպէս կը վայլէ»՝ այնպէս հագնիլ, եւ ասիկա յաճախ դրսեցիները կը մղէ մեզ գովաբանելու եւ բացայայտ կը դարձնէ թէ մենք Աստուծոյ ծառաներն ենք։ (Փիլ. 1։27) Մինչ նահանգային համաժողովին համար կը պատրաստուինք, պատշաճ է որ մեր երեւոյթին մասին նախապէս մտածենք։

2. Համեստութեամբ հագուիլն ու յարդարուիլը ինչո՞ւ մարտահրաւէր մըն է։

² «Երկնային իմաստութիւնը ունեցող մարդը նախ որ մաքուր կ’ըլլայ», գրեց Յակոբոս աշակերտ։ (Յակ. 3։17, Անթիլիաս) Մեր արտաքին երեւոյթով ողջախոհութիւն արտացոլացնելը կրնայ մարտահրաւէր մը ըլլալ։ Սատանայի անբարոյ աշխարհը մարդոց վրայ ազդեցութիւն կը բանեցնէ որ անհամեստ, կրքոտ ու այլանդակ ոճեր որդեգրեն, որ անվայել են։ (Ա. Յովհ. 2։15-17) Հետեւաբար, երբ հագուստի ու յարդարանքի նկատմամբ որոշումներ կը կայացնենք, պէտք է անսանք Աստուածաշունչի սա խրատին. ‘Ամբարշտութիւնն ու աշխարհային ցանկութիւնները ուրացէք եւ զգաստութիւնով ապրեցէք այս աշխարհի մէջ’։ (Տիտ. 2։12) Երբեք պիտի չուզենք ուրիշները նեղացնել մեր երեւոյթով, ըլլան անոնք մեր եղբայրները, պանդոկի անձնակազմ ու ճաշարանի պաշտօնեաներ, կամ այլ դիտողներ։—Ա. Կորն. 10։32, 33

3. Ի՞նչ հարցումներ կ’օգնեն որ մեր անձնական երեւոյթը քննենք։

³ Համեստ ու Վայելուչ Հագուստ. Երբ համաժողովին համար պատրաստութիւն կը տեսնէք, դուք ձեզի հարց տուէք. ‘Հագուելակերպս համեստութիւն կ’արտացոլացնէ՞, թէ ոչ անտեղի ուշադրութիւն կը հրաւիրէ վրաս։ Անիկա ուրիշներու զգացումներուն հանդէպ յարգանք ցոյց կու տա՞յ։ Պլուզ–իս վիզի մասի կտրուածքը շատ մե՞ծ է, կամ պլուզ–ը շատ կա՞րճ է։ Հագուստս պատշաճօրէն մարմինս չի՞ ծածկեր, կամ շատ նե՞ղ է։ Հագուստս մաքո՞ւր է եւ նեղացուցիչ հոտերէ զե՞րծ է։ Երբ պանդոկին մէջ պիտի նախաճաշեմ կամ համաժողովէն ետք պիտի հանգստանամ, քարոզիչի մը վայել մաքուր ու կոկիկ երեւոյթը պիտի ունենա՞մ, թէ ոչ՝ հագուստս պիտի ըլլայ թափթփած, չափազանց նորոյթէն, բոլորովին ոչ–պաշտօնական, եւ լանջանշան կրող պատուիրակի մը համար անպատշաճ։ Ժամանցի ատեն հագած հագուստս արգելք պիտի հանդիսանա՞յ անպաշտօն կերպով վկայելու’։—Հռովմ. 15։2, 3. Ա. Տիմ. 2։9

4. Ուրիշներ ի՞նչպէս կրնան մեզի օգնել որ համեստ հագուելակերպ ունենանք։

⁴ Հասուն Քրիստոնեաներու դիտողութիւնները կրնան օգտակար ըլլալ մեզի։ Կիներ իրենց ամուսիններուն պէտք է հարցնեն թէ ուրիշներ ի՞նչպէս կրնան նկատել իրենց հագուելակերպը։ Բարեպաշտ ծնողներ կրնան իրենց դեռատի զաւակներուն օգնել այս ուղղութեամբ։ Նմանապէս աստուածավախ տարեց քոյրեր կրնան ‘խրատել նորահասակ կիները՝ որպէս զի խոհեմ ու [իրենց երեւոյթին նկատմամբ] ողջախոհ ըլլան, որ չըլլայ թէ Աստուծոյ խօսքին հայհոյուի’։ (Տիտ. 2։3-5) Մեր գրականութիւնները կը բովանդակեն օգտակար պատկերներ, որոնք ցոյց կու տան համեստ ու վայելուչ հագուելակերպը։

5. Ի՞նչպէս կրնանք բոլորս համաժողովի ընթացքին Եհովայի փառք բերել։

⁵ Եհովայի Փառք Բերէք. Նահանգային համաժողովը Եհովան փառաբանելու հոյակապ պատեհութիւն մը կը ներկայացնէ, ո՛չ միայն յայտագրին մէջ մասնակցութիւն բերողներուն, այլ նաեւ մեր բոլորին։ Անշուշտ մեր քրիստոնէական վարքը եւ խօսելակերպը զինք պիտի պատուեն։ Բայց առաջին բանը որ դիտողներէն շատեր կը նկատեն, մեր հագուելակերպն ու յարդարանքն է։ Թող որ բոլորս մեր համեստ ու գովելի երեւոյթով Եհովայի փառք բերենք։—Սաղմ. 148։12, 13

[Շրջանակ՝ էջ 6]

Օգնութիւններ՝ Գովելի Երեւոյթի մը Համար

◼ Աստուծոյ Խօսքը

◼ Անձնաքննութիւնը

◼ Ուրիշներու դիտողութիւնները

◼ Քրիստոնէական գրականութիւնները