Ուրիշներուն օգնէ՛ որ ‘սրտանց հնազանդին’
1. Եհովա իր երկրպագուներէն ի՞նչ կը պահանջէ։
1 Եհովան ընդունելի կերպով պաշտելու համար, հնազանդութիւնը էական է։ (Բ. Օր. 12։28. Ա. Պետ. 1։14-16) Շուտով Աստուծոյ դատաստանը պիտի գայ անոնց վրայ, որոնք «Աստուած չեն ճանչնար եւ մեր Տէր Յիսուս Քրիստոսին աւետարանին չեն հնազանդիր»։ (Բ. Թես. 1։8) Ի՞նչպէս կրնանք ուրիշներուն օգնել որ Աստուծոյ Խօսքին ուսուցումներուն ‘սրտանց հնազանդին’։—Հռովմ. 6։17
2. Ինչո՞ւ կարեւոր է ուրիշներուն օգնել որ զօրաւոր հաւատք կերտեն։
2 Օգնելով որ հաւատք եւ սէր կերտեն. Սուրբ Գրութիւններուն մէջ, հնազանդութիւնը սերտօրէն առնչուած է հաւատքին հետ։ Պօղոս առաքեալ խօսեցաւ «մշտնջենաւոր Աստուծոյ հրաման»ին մասին, որ «ամէն ոք հաւատայ եւ հնազանդի Քրիստոսի»։ (Հռովմ. 16։26, Անթիլիաս) Եբրայեցիս 11–րդ գլուխը հաւատքի բազմաթիւ օրինակներ կը յիշէ, որոնցմէ շատեր պարփակեցին Եհովայի յայտնուած կամքին հետ ներդաշնակ գործել։ (Եբր. 11։7, 8, 17) Միւս կողմէ, ըմբոստութիւնը անհաւատութեան հետ առնչուած է։ (Յովհ. 3։36. Եբր. 3։18, 19) Աստուծոյ Խօսքը գործածելու մեր հմտութիւնները պէտք է սրենք, որպէսզի ուրիշներուն օգնենք որ հնազանդութիւն յառաջ բերող հաւատք մը զարգացնեն։—Բ. Տիմ. 2։15. Յակ. 2։14, 17
3. (ա) Հնազանդութիւնը ի՞նչպէս առնչուած է սիրոյ հետ։ (բ) Ի՞նչպէս կրնանք Աստուածաշունչի աշակերտներուն օգնել Եհովայի հանդէպ սէր մշակելու։
3 Հնազանդութիւնը նաեւ առնչուած է Աստուծոյ հանդէպ սէր ունենալուն հետ։ (Բ. Օր. 5։10. 11։1, 22. 30։16) Ա. Յովհաննու 5։3–ը կ’ըսէ. «Ասիկա է Աստուծոյ սէրը, որ անոր պատուիրանքները պահենք եւ անոր պատուիրանքները ծանր բան չեն»։ Ի՞նչպէս կրնանք Աստուածաշունչի աշակերտներուն օգնել Եհովայի հանդէպ սէր մշակելու։ Ուսումնասիրութեան ընթացքին պատեհութիւններ փնտռէ՝ Եհովայի յատկութիւններուն հանդէպ գնահատութիւն կերտելու համար։ Աստուծոյ հանդէպ խոր զգացումներդ արտայայտէ։ Աշակերտին օգնէ որ Եհովայի հետ անձնական յարաբերութիւն մշակելու մասին խորհի։ Ամէն բանէ աւելի, Եհովայի հանդէպ սէրը թէ՛ մեզ եւ թէ ուրիշները պիտի մղէ սրտանց իրեն հնազանդելու։—Մատթ. 22։37
4. (ա) Մեր օրինակը ինչո՞ւ կարեւոր է։ (բ) «Հնազանդ սիրտ մը» մշակելու համար, ի՞նչ պէտք է ընենք։
4 Մեր օրինակով. Մեր օրինակը ազդու միջոց մըն է, որով կրնանք ուրիշները քաջալերել որ բարի լուրին հնազանդին։ Սակայն «հնազանդ սիրտ մը» մշակելու համար, յարատեւ ջանք պէտք է թափենք։ (Գ. Թագ. 3։9, ՆԱ. Առ. 4։23) Ասիկա ի՞նչ կը պարփակէ։ Սիրտդ սնուցանէ՝ կանոնաւորաբար Աստուածաշունչը ուսումնասիրելով եւ ժողովներուն ներկայ գտնուելով։ (Սաղմ. 1։1, 2. Եբր. 10։24, 25) Ընկերակցէ անոնց հետ, որոնց սիրտերը ճշմարիտ պաշտամունքին մէջ միացած են։ (Առ. 13։20) Կանոնաւորաբար դաշտի ծառայութեան մասնակցէ, թաղամասիդ մէջ գտնուող մարդոց օգնելու անկեղծ փափաքով։ Աղօթքով Եհովայէ խնդրէ որ քեզի օգնէ բարի սիրտ մը մշակելու։ (Սաղմ. 86։11) Խուսափէ այն բաներէն, որոնք կրնան սիրտդ ապականել, ինչպէս՝ անբարոյ կամ վայրագ ժամանցը։ Հետամուտ եղիր այն բաներուն, որոնք քեզ Աստուծոյ կը մօտեցնեն եւ իրեն հետ յարաբերութիւնդ կ’ամրացնեն։—Յակ. 4։7, 8
5. Հնազանդ անհատները ի՞նչպէս կ’օրհնուին։
5 Եհովա իր վաղեմի ժողովուրդը հաւաստիացուց թէ իրենց վրայ օրհնութիւններ պիտի գային, եթէ իր խօսքը մտիկ ընէին։ (Բ. Օր. 28։1, 2) Նոյնպէս այսօր, Եհովա առատօրէն կ’օրհնէ «իրեն հնազանդ եղողներ»ը։ (Գործք 5։32) Հետեւաբար, մեր ուսուցումով եւ օրինակով ուրիշներուն օգնենք որ սրտանց հնազանդին։