Շարունակէ՛ համարձակութեամբ քարոզել Աստուծոյ խօսքը
1 Որպէս Քրիստոնեայ քարոզիչներ, գիտենք թէ բոլորը մեզի ականջ պիտի չտան։ (Մատթ. 10։14) Սակայն թոյլ չենք տար որ ոմանց ժխտական ընդառաջումը պատճառ ըլլայ որ բարի լուրը ծանուցանելէ ետ կենանք։ (Առ. 29։25) Ի՞նչ բան մեզի կ’օգնէ որ շարունակենք համարձակութեամբ քարոզել Աստուծոյ խօսքը։
2 Պօղոս առաքեալ «Քրիստոս Յիսուսին գերազանց գիտութիւնը» արժեւորեց։ Ասիկա զինք մղեց «լման վստահութեամբ» քարոզելու։ (Փիլ. 3։8. Ա. Թես. 1։5, ԱՎ) Թէեւ ոմանք իր քարոզած պատգամը տկար ու անիմաստ նկատեցին, սակայն Պօղոս գիտէր թէ «Աստուծոյ զօրութիւնն է ան՝ բոլոր հաւատացեալներուն փրկութեան համար»։ (Հռովմ. 1։16) Հետեւաբար, նոյնիսկ հակառակութեան դիմաց, ան շարունակեց ‘համարձակութեամբ քարոզել Տէրոջմով’։—Գործք 14։1-6. 20։18-21, 24
3 Մեր զօրութեան աղբիւրը. Պօղոս իր անձնական ուժով չէր որ կրցաւ համարձակութեամբ վկայել։ Շիղայի եւ իր մասին խօսելով, Պօղոս գրեց. «Նախապէս Փիլիպպէի մէջ չարչարուելէ եւ նախատուելէ ետք, ինչպէս գիտէք, Աստուծմով համարձակեցանք քարոզել ձեզի Աստուծոյ աւետարանը՝ շատ պայքարելով»։ (Ա. Թես. 2։2, ԱՎ. Գործք 16։12, 37) Ասկէ զատ, մինչ Հռովմի մէջ բանտարկուած էր, Պօղոս ուրիշներէ խնդրեց որ իրեն համար աղօթեն, որպէսզի շարունակէ բարի լուրին մասին ‘համարձակութեամբ խօսիլ՝ ինչպէս պէտք է’։ (Եփ. 6։18-20) Եհովայի ապաւինելով եւ ոչ թէ իր անձին, Պօղոս շարունակեց համարձակութեամբ քարոզել Աստուծոյ խօսքը։—Բ. Կորն. 4։7. Փիլ. 4։13
4 Պարագան նոյնն է այսօր։ Եղբայր մը որ իր գործատեղիին մէջ Վկայ ըլլալը գիտցնելը եւ անպաշտօն կերպով վկայելը շատ դժուար կը նկատէր, ասոր մասին աղօթեց եւ սկսաւ քարոզել։ Սկիզբը գործակից մը իր ջանքերը մերժեց, բայց ետքը Աստուածաշունչի ուսումնասիրութիւն մը ընդունեց, երբ յարութեան յոյսին շուրջ նիւթ դարձաւ։ Անկէ ետք, եղբայրը ամէն առիթ օգտագործեց վկայութիւն մը տալու համար։ Իր յաջորդ գործատեղիին մէջ, ան 14 տարուան ընթացքին 34 հոգիի օգնեց մինչեւ մկրտութեան քայլը։ Կրնանք վստահ ըլլալ թէ Եհովա նոյնպէս պիտի զօրացնէ մեզ որ շարունակենք ‘լման համարձակութեամբ քարոզել իր խօսքը’։—Գործք 4։29, ԱՎ