Ուրիշներու հետ հմտութեա՛մբ պատճառաբանէ
1. Աստուածաշունչի ո՞ր հատուածը պիտի քննարկենք եւ ինչո՞ւ։
1 Պիսիդիայի Անտիոքի մէկ ժողովարանին մէջ Պօղոս առաքեալի տուած ճառը, որ արձանագրուած է Գործք Առաքելոց 13։16-41–ի մէջ, ուրիշներու հետ ի՛նչպէս պատճառաբանելու ընտիր օրինակ կը հայթայթէ։ Պօղոս իր ունկնդիրներուն ենթահողն ու մտածելակերպը նկատի առաւ եւ ըստ այնմ յարմարցուց բարի լուրի իր ներկայացումը։ Մինչ այս արձանագրութիւնը աչքէ կ’անցընենք, նկատի առնենք թէ ի՛նչպէս կրնանք մեր ծառայութեան մէջ նոյնը ընել։
2. Իր ճառը սկսելու Պօղոսի կերպէն ի՞նչ կը սորվինք։
2 Հասարակաց գետին պատրաստէ՛. Թէեւ իր պատգամը կեդրոնացաւ Աստուծոյ նպատակին իրագործման մէջ Յիսուսի գլխաւոր դերին վրայ, սակայն Պօղոս ճառը չսկսաւ այս կէտը նշելով։ Փոխարէն, ան հասարակաց նիւթի մը մասին խօսեցաւ,– Հրեայ ժողովուրդին պատմութիւնը։ (Գործք 13։16-22) Նոյնպէս, ուրիշներուն վկայելու մէջ աւելի ազդու պիտի ըլլանք, եթէ անոնց հետ հասարակաց գետին գտնենք։ Ուստի փափկանկատ հարցումներ ուղղելով զանոնք քաջալերենք որ արտայայտուին եւ ուշի–ուշով մտիկ ընենք, որպէսզի կարենանք զատորոշել թէ իրենց համար ի՛նչ բան իրապէս կարեւոր է։
3. Պօղոսի ունկնդիրներուն համար ինչո՞ւ դժուար էր ընդունիլ թէ Յիսուս խոստացեալ Մեսիան էր։
3 Երբ Հրեաներուն պատմութիւնը վերաքաղ կ’ընէր, Պօղոս ունկնդիրներուն յիշեցուց Դաւիթի զարմէն Փրկիչ մը հանելու Աստուծոյ խոստումը։ Սակայն շատ մը Հրեաներ զինուորական հերոսի մը կը սպասէին, որ հռովմէական տիրապետութեան լուծը պիտի ջնջէր եւ Հրեայ ազգը միւս ժողովուրդներէն վեր պիտի բարձրացնէր։ Անկասկած անոնք տեղեակ էին թէ Յիսուս Երուսաղէմի Հրեայ կրօնական առաջնորդներէն մերժուեցաւ, հռովմէական իշխանութիւններուն յանձնուեցաւ ու մահուան դատապարտուեցաւ։ Պօղոս ի՞նչպէս կրնար զանոնք համոզել թէ ա՛յս Յիսուսը խոստացեալ Մեսիան էր։
4. Պօղոս ի՞նչպէս Հրեայ ունկնդիրներուն հետ հմտօրէն պատճառաբանեց։
4 Մօտեցումդ յարմարցո՛ւր. Իր ունկնդիրներուն մտածելակերպը գիտնալով, Պօղոս Սուրբ Գրութիւնները գործածեց անոնց հետ պատճառաբանելու համար՝ իրենց արդէն ընդունած բաներուն հիման վրայ։ Օրինակ, ան Յիսուսը ներկայացուց որպէս Դաւիթի զարմը եւ ընդհանուրին կողմէ Աստուծոյ մարգարէ նկատուած Յովհաննէս Մկրտիչին բնորոշած անհատը։ (Գործք 13։23-25) Պօղոս նշեց թէ Յիսուսը մերժելով եւ զինք մահուան դատապարտելով, կրօնական առաջնորդները ‘մարգարէներուն գրածները կատարեցին’։ (Գործք 13։26-28) Ասկէ զատ, ան բացատրեց թէ Յիսուսի յարութեան ականատեսներ կան, եւ ուշադրութեան յանձնեց աստուածաշնչական ծանօթ հատուածներ, որոնք Յիսուսի յարութեամբ կատարուեցան։—Գործք 13։29-37
5. (ա) Պօղոս իր մօտեցումը ի՞նչպէս յարմարցուց, երբ Յոյն ունկնդիրներու հետ կը խօսէր։ (բ) Ի՞նչպէս կրնանք Պօղոսի օրինակին հետեւիլ, երբ մեր թաղամասին մէջ կը վկայենք։
5 Միւս կողմէ, երբ Աթէնքի Արիսպագոսի մէջ Յոյն ունկնդիրներու կը խօսէր, Պօղոս տարբեր մօտեցում մը գործածեց։ (Գործք 17։22-31) Այսուհանդերձ ան նոյն հիմնական պատգամը ներկայացուց, եւ երկու պարագաներուն ալ իր ջանքերը լաւ արդիւնք տուին։ (Գործք 13։42, 43. 17։34) Նոյնպէս այսօր, մեր ծառայութեան մէջ աւելի ազդու պիտի ըլլանք, եթէ մեր ունկնդիրներուն հետ հասարակաց գետին գտնենք եւ մեր մօտեցումը անոնց ենթահողին ու մտածելակերպին յարմարցնենք։