Ուրիշներուն սորվեցուր Եհովան սիրել
1. Ի՞նչ բան շատեր Եհովայի կը քաշէ։
1 Կը յիշե՞ս առաջին անգամը երբ Եհովայի մասին լսեցիր։ Ի՞նչ բան քեզ իրեն քաշեց։ Պարկեշտամիտ անհատներէն շատեր քեզի պիտի ըսեն, թէ մեր Ստեղծիչին մօտեցան երբ իր աննման յատկութիւններուն մասին գիտութիւն ձեռք ձգեցին, յատկապէս՝ իր կարեկցութիւնն ու սէրը (Ա. Յովհ. 4։8)։
2, 3. Ի՞նչպէս կրնանք Աստուածաշունչը կը սորվեցնէ գիրքը գործածել Աստուածաշունչի աշակերտներուն օգնելու որ Եհովայի հանդէպ իրենց սիրոյն մէջ աճին։
2 «Ահա մեր Աստուածը»։ Աստուածաշունչը կը սորվեցնէ գիրքը կ’ընդգծէ Եհովայի սէրը եւ իրեն հետ անձնական յարաբերութիւն ունենալու կարիքը։ Ի՞նչպէս կրնանք այս գիրքը գործածել ուրիշներուն սորվեցնելու որ Աստուծոյ հանդէպ իրենց սիրոյն մէջ աճին։ Երբ նոր կէտի մը վրայ կը կեդրոնանանք, կրնանք միտք գրգռող հարցումներ ուղղել, ինչպէս՝ «Այս ճշմարտութիւնը Եհովայի մասին ի՞նչ կը յայտնէ», կամ «Այս կէտը ի՞նչ կերպով կ’ապացուցանէ թէ Եհովա լաւագոյն Հայրն է»։ Այս կերպով ուսուցանելը կրնայ աշակերտին օգնել որ Եհովայի հետ կենսատեւ յարաբերութիւն մը սկսի։
3 Երբ Աստուածաշունչի աշակերտներուն կ’օգնենք գիտակցելու թէ միակ ճշմարիտ ու ապրող Աստուծոյն մասին գիտութիւն ստանալը մեծ առանձնաշնորհում մըն է, անոնք Եսայիի սա խօսքին հետ համաձայն պիտի գտնուին. «Ահա մեր Աստուածը» (Եսա. 25։9)։ Երբ Աստուծոյ Խօսքը կը բացատրենք, պէտք է շեշտենք թէ մարդկութիւնը ի՛նչպէս պիտի օրհնուի, երբ Եհովայի նպատակները կատարուին՝ Քրիստոս Յիսուսի յանձնուած Իր արքայական կառավարութեան միջոցաւ (Եսա. 9։6, 7)։
4, 5. Եհովայի սէրը ի՞նչ կը նշանակէ։
4 Եհովայի հանդէպ սիրոյ ապացոյց։ Գիտենք թէ Եհովան ամբողջ սրտով, հոգիով ու մտքով սիրելը Աստուծոյ հանդէպ զօրաւոր զգացումներ ունենալէն շա՜տ աւելին կը պարփակէ։ Պէտք է իր մտածելակերպը որդեգրենք եւ անոր կառչինք (Սաղ. 97։10)։ Աստուծոյ հանդէպ սէրը բացայայտ կ’ըլլայ, երբ անոր բոլոր պատուիրաններուն հնազանդինք եւ շարունակենք «սուրբ վարմունքով ու բարեպաշտութեամբ» վարուիլ, նոյնիսկ փորձութիւններու եւ հակառակութեան դիմաց (Բ. Պետ. 3։11. Բ. Յովհ. 6)։
5 Աստուծոյ կամքը սէրէ մղուած կատարելը մեզի համար հաճոյք է (Սաղ. 40։8)։ Աստուածաշունչի աշակերտը պէտք է գիտակցի թէ Աստուծոյ բոլոր պատուիրանները Իր ծառաներուն յաւիտենական բարօրութեան համար ծրագրուած են (Բ. Օր. 10։12, 13)։ Եհովայի առաջնորդութեան համաձայն ապրելով, անհատ մը Անոր բոլոր սքանչելի գործերուն հանդէպ խոր գնահատութիւն ցոյց կու տայ։ Աշակերտին օգնէ հասկնալու թէ Եհովայի արդար ճամբաներուն մէջ քալելը զինք շատ մը ցաւերէ ու սրտատանջութենէ զերծ պիտի պահէ։
6. Անհատ մը Եհովան սիրելով ի՞նչ օրհնութիւններ կրնայ ստանալ։
6 Օրհնութիւններ՝ Աստուած սիրողներուն։ Եհովա զինք սիրող խոնարհ անհատները մեծապէս կը հոգայ եւ «Աստուծոյ խորունկ բաներ»ը անոնց կը յայտնէ (Ա. Կոր. 2։9, 10)։ Եհովայի նպատակներուն մասին այս գիտութիւնը ունենալով, անոնք ապագայի նկատմամբ յստակ հայեցակէտ մը եւ ստոյգ յոյս մը ունին (Եր. 29։11)։ Եհովան սիրողները իր արտակարգ քաղցրութիւնը կը վայելեն (Ել. 20։6)։ Անոնք կ’արժեւորեն յաւիտենական կեանքի յոյսը, որ Աստուծոյ մեծ սիրոյն դրսեւորումն է (Յովհ. 3։16)։
7. Ուրիշներուն Եհովան սիրել սորվեցնելը ի՞նչպէս կը նկատես։
7 Մեր երկնաւոր Հօր մասին ո՛րքան աւելի սորվինք, ա՛յնքան աւելի բաներ կ’ունենանք ուրիշներուն խօսելիք (Մատ. 13։52)։ Ի՜նչ անգին առանձնաշնորհում մըն է ուրիշներուն սորվեցնել Եհովան սիրել, մանաւանդ մեր զաւակներուն (Բ. Օր. 6։5-7)։ Թող մենք եւ մեր Աստուածաշունչի աշակերտները շարունակենք Եհովան փառաբանել, մինչ իր ‘մեծ բարերարութիւնը’ կը վայելենք (Սաղ. 145։7)։