Ստեղծագործութեան սքանչելիքները Աստուծոյ փառքը կը յայտնեն
Շատեր հաճոյք կը զգան ստեղծագործութիւնը դիտելով։ Բայց քիչեր կ’անդրադառնան թէ ստեղծագործութիւնը շատ մը բաներ կը յայտնէ մեր Մեծ Արարիչի մտածումներուն ու զգացումներուն մասին (Հռով. 1։20)։ Անցեալին, Դաւիթ Եհովայի մասին սորվեցաւ անոր ներշնչեալ Խօսքէն։ Բայց ան նաեւ «տեսաւ» եւ անոր մօտեցաւ ստեղծագործութեան միջոցով (Սաղ. 8։3, 4)։ Ստեղծագործութեան սքանչելիքները Աստուծոյ փառքը կը յայտնեն տեսաֆիլմը կ’օգնէ մեզի, մեր զաւակներուն եւ Աստուածաշունչի մեր աշակերտներուն, որ աւելի մօտէն քննենք Եհովայի կարգ մը ստեղծագործութիւնները, տեսնենք մեր Մեծ Արարիչին յատկութիւններն ու անձնաւորութիւնը, եւ որպէս արդիւնք՝ անոր աւելի մօտենանք։ Տեսաֆիլմը դիտելէ ետք, փորձէ՛ պատասխանել հետեւեալ հարցումներուն։
1) Տիեզերքի չափն ու կարգուկանոնը ինչպէ՞ս կը խորացնէ գնահատութիւնդ Եհովայի հանդէպ (Եսա. 40։26)։ 2) Երբ մօտէն ջուրին նայինք, զայն Ծրագրողին մասին ի՞նչ կրնանք սորվիլ (Յայտ. 14։7)։ 3) Երկրագունդին չափն ու արեւէն անոր հեռաւորութիւնը ինչպէ՞ս ցոյց կու տան Եհովայի իմաստութիւնը։ 4) Լուսինը ի՞նչ նպատակի կը ծառայէ (Սաղ. 89։37)։ 5) Եհովան ինչպէ՞ս ծրագրած է մարդիկը որ կեանքը վայելեն։ 6) Ի՞նչ է Տի.Էն.Էյ.–ը (Սաղ. 139։16)։ 7) Մարդիկ ինչպէ՞ս կը տարբերին Եհովայի երկրային միւս ստեղծագործութիւններէն (Ծն. 1։26)։ 8) Նոր աշխարհին մէջ ի՞նչ բաներու անձկագին կը սպասես։
Յաւելեալ երեսակներ. 9) Գոյները ուրկէ՞ կու գան։ 10) Ջուրը ինչպէ՞ս կը յաղթահարէ ձգողական ուժը՝ ծառերուն վերին մասերը հասնելու համար։ 11) Ջուրը ի՞նչ դեր կը խաղայ մեր մարմիններուն մէջ։ 12) Ապրող էակներու միջեւ եղող ներդաշնակութեան օրինակներ տո՛ւր։ 13) Արարածներն ինչպէ՞ս գիտեն իրարու հետ համագործակցիլ։ 14) Ի՞նչ է «Ոսկիէ անկիւնը», եւ անիկա ինչպէ՞ս ցուցադրուած է ստեղծագործութեան մէջ։
«Նայեցէք» Եհովայի ձեռքի գործերուն։ Յիսուս մեզ քաջալերեց որ նայինք «երկնքի թռչուններուն» եւ «դաշտի շուշաններուն» (Մատ. 6։26, 28)։ Ասիկա ընելը կրնայ մեր հաւատքը խորացնել, Արարիչին հանդէպ մեր վստահութիւնը զօրացնել եւ Եհովայի իմաստութեան, փրկարար ուժին եւ սիրոյն հանդէպ գնահատութիւն կերտել։ Այս աշխարհին գործերով չափազանց զբաղած ըլլալու տեղ, ժամանակ տրամադրէ ու ջանա՛ Եհովայի ստեղծագործութեան սքանչելիքներուն նայիլ ու մտածել թէ ստեղծագործութիւնը մեզի ի՛նչ կ’ըսէ մեր Աստուծոյն մասին (Սաղ. 19։1)։