Թագաւորութիւնը կը ծանուցանուի դարէ մը ի վեր
1. Շուրջ դար մը առաջ, Եհովայի ժողովուրդը քաջալերուեցաւ որ ի՞նչ ընէ։
1 «Ահաւասի՛կ Թագաւորը կ’իշխէ։ Դուք անոր ներկայացուցիչներն էք։ Հետեւաբար, ծանուցանեցէ՛ք, ծանուցանեցէ՛ք, ծանուցանեցէ՛ք Թագաւորը եւ անոր թագաւորութիւնը»։ Շուրջ դար մը առաջ, եղբայր Ռատըրֆորտ այս ոգեւորիչ խօսքերով Եհովայի ժողովուրդը քաջալերեց, որ Թագաւորութեան պատգամը ամէնուրեք տարածեն։ Եւ ճիշդ այս է որ ըրած ենք։ Նախկին քրիստոնեաներուն նման, Թագաւորութեան բարի լուրը քարոզած ենք «երկնքի տակ եղած բոլոր ստեղծուածներուն» (Կող. 1։23)։ Վերջին դարուն վրայ յետադարձ ակնարկ մը նետելով, Աստուծոյ Թագաւորութիւնը ծանուցանելու համար ի՞նչ ըրած ենք։ Եւ ինչպէ՞ս կրնանք շարունակել զայն ծանուցանել, մինչ կը մօտենանք Թագաւորութեան հաստատման 100–ամեակին։
2. Մեր հրատարակութիւնները Աստուծոյ Թագաւորութիւնը ինչպէ՞ս յառաջ մղած են։
2 Ակնարկ մը դէպի ետեւ։ Տասնամեակներ շարունակ, մեր հրատարակութիւնները Աստուծոյ Թագաւորութիւնը յառաջ մղած են։ 1939–էն ի վեր, մեր գլխաւոր պարբերաթերթը հետեւեալ անունը կը կրէ. Դիտարան կը ծանուցանէ Եհովայի Թագաւորութիւնը։ Այս պարբերաթերթը յաճախ կը քննարկէ Թագաւորութիւնը եւ անոր գալիք իրագործումները։ Զարթի՛ր պարբերաթերթը նաեւ կը շեշտէ, թէ Աստուծոյ Թագաւորութիւնը մարդկութեան միակ յոյսն է։ Յարմարօրէն, այս երկու պարբերաթերթերը այժմ ամէնէն շատ թարգմանուած եւ բաշխուած պարբերաթերթերն են աշխարհի վրայ (Յայտ. 14։6)։
3. Թագաւորութիւնը ծանուցանելու համար, ի՞նչ կարգ մը մեթոտներ գործածած ենք։
3 Թագաւորութիւնը ծանուցանելու համար, Եհովայի ժողովուրդը զանազան մեթոտներ գործածած է։ Սկիզբը գործածեցինք ձայնի սարքով օժտուած ինքնաշարժներ, ձայնասփռումներ եւ դիւրատար ֆոնոկրաֆներ։ Այս մեթոտները մեզի օգնեցին բարի լուրը տարածելու բազմաթիւ մարդոց, երբ Թագաւորութիւնը ծանուցանողներուն թիւը տակաւին քիչ էր (Սաղ. 19։4)։ Վերջերս, մեր կայքին մէջ (jw.org) զետեղած ենք տեղեկութիւններ, այսպիսով Թագաւորութիւնը միլիոնաւորներու ծանուցանելով,– ներառեալ՝ անոնց որոնք կ’ապրին երկիրներու մէջ, ուր մեր գործունէութիւնը սահմանափակուած է։
4. Ի՞նչ մասնայատուկ կերպեր գործածած ենք։
4 Եհովայի ժողովուրդը նաեւ մասնայատուկ կերպեր գործածած է՝ Թագաւորութեան պատգամը ծանուցանելու համար։ Օրինակ, 1990–ական թուականներէն սկսեալ, ջանք թափեցինք տունէ տուն ծառայութեան կողքին վկայել հանրային պարտէզներու, կառատուներու եւ առեւտրական շրջաններու մէջ։ Վերջերս, աշխարհի տարածքին կազմակերպած ենք մեծ քաղաքներու համար ծրագրուած հանրային մասնայատուկ վկայութիւն։ Ասկէ զատ, բազմաթիւ ժողովքներ իրենց թաղամասին մէջ հանրային վկայութեան կը մասնակցին՝ զետեղելով հրատարակութիւններու սայլակներ եւ ցուցասեղաններ այ՛ն վայրերը, ուր շատ անցորդներ կ’ըլլան։ Անշուշտ, տունէ տուն ծառայութիւնը մեր քարոզչութեան առանցքը կը պահենք (Գործք 20։20)։
5. Ծառայութեան նոր տարին ի՞նչ պատեհութիւններու դուռ պիտի բանայ շատերուս համար։
5 Ակնարկ մը դէպի առջեւ։ Երբ ծառայութեան նոր տարին սկսի սեպտեմբերին, շատեր պիտի սկսին ծառայել որպէս կանոնաւոր ռահվիրաներ։ Դուն ալ կրնա՞ս անոնց միանալ։ Եթէ ոչ, կրնա՞ս ատենէ ատեն ծառայել որպէս օժանդակ ռահվիրայ։ Ռահվիրայութեան կարենաս ձեռնարկել կամ ոչ, Եհովան վստահաբար քեզ պիտի օրհնէ այն բոլոր զոհողութիւններուն համար որ կ’ընես, որպէսզի Թագաւորութիւնը ծանուցանելու մէջ լիովին բաժին բերես (Մաղ. 3։10)։
6. 2014–ի հոկտեմբեր ամիսը ինչո՞ւ յատկանշական պիտի ըլլայ։
6 2014–ի հոկտեմբեր ամիսը պիտի նշէ Թագաւորութեան հաստատման 100–ամեակը։ Յարմարօրէն, Դիտարան–ի հանրամատչելի հրատարակութիւնը այդ ամիս կը կեդրոնանայ Աստուծոյ Թագաւորութեան վրայ։ Կրնա՞ս ջանք թափել որ այս թիւը կարելի եղածին չափ շատ մարդոց բաշխես։ Մինչ ապագային կը նայինք, թող որ իւրաքանչիւրս շարունակէ ‘Աստուծոյ Թագաւորութիւնը քարոզել’ բոլոր անոնց՝ որոնք լսելու ընդունակութիւն ունին (Գործք 8։12)։