Կոյրերուն օգնէ որ Եհովային մասին սորվին

1. Յիսուս կոյրերուն հանդէպ ինչպէ՞ս կարեկցութիւն ցոյց տուաւ։

¹ Յիսուսի մահէն քանի մը օր առաջ, մինչ ան Երիքով քաղաքէն կը հեռանար, երկու կոյր մուրացկաններ իրեն աղաչեցին ըսելով. «Ողորմէ մեզի, Տէ՛ր»։ Թէեւ Յիսուս իր կրելիք ծանր փորձութիւններով շատ մտազբաղ էր, բայց կանգ առաւ, այդ մարդիկը իրեն կանչեց եւ զանոնք բուժեց (Մատ. 20։29-34)։ Կոյրերու հանդէպ Յիսուսի կարեկցութիւնը ինչպէ՞ս կրնանք ընդօրինակել։

2. Ինչպէ՞ս կրնանք կոյր անհատի մը վկայութիւն տալ։

² Օգտակար դարձիր։ Եթէ կոյր անհատի մը հանդիպիս, դուն քեզի ծանօթացուր եւ առաջարկէ իրեն օգնել։ Քանի որ մարդիկ ընդհանրապէս այսպիսիները կը շահագործեն, անհատը թերեւս սկիզբը քեզի հանդէպ կասկածներ ունենայ։ Բայց քու բարեկամական մօտեցումդ եւ անկեղծ հետաքրքրութիւնդ կրնան զինք հանգստացնել։ Նաեւ ի մտի ունեցիր որ կուրութեան տարբեր աստիճաններ կան, եւ ասիկա կ’որոշէ թէ ո՛ր տարողութեամբ կրնանք անհատին օգնել։ Օգնութիւն մատուցանելէ ետք, թերեւս իրեն նշես թէ Աստուածաշունչի կրթական գործի մը կը մասնակցիս։ Առաջարկէ իրեն կարդալ համար մը, ինչպէս՝ Սաղմոս 146։8 կամ Եսայի 35։5, 6։ Եթէ ան կրնայ պրայլ կարդալ, հարցուր եթէ կը փափաքի ունենալ պրայլ հրատարակութիւն մը, որ իրեն պիտի օգնէ Աստուածաշունչին մասին աւելի՛ն սորվելու։ Կրնաս նաեւ իրեն օգնել որ ձայնագրութիւններ բեռնէ jw.org կայքէն։ Եթէ իր համակարգիչը ունի պաստառի ընթերցիչ ծրագիրը, որ յօդուած մը լսելի կերպով կարդացուիլը կարելի կը դարձնէ, ան թերեւս նոյնիսկ գնահատէ jw.org կայքէն տպուած հրատարակութիւնները, ինչպէս նաեւ՝ այն հրատարակութիւնները, որոնք RTF–ով (Հարուստ բնագրական ձեւաչափով) կարելի է բեռնել (տե՛ս «Երբ կոյր անհատի մը կ’օգնես...» շրջանակը)։

3. Ինչպէ՞ս կրնանք մեր թաղամասին մէջ կոյրերը փնտռել։

³ Կոյրերը փնտռէ։ Երբ տունէ տուն ծառայութեան կը մասնակցինք, քիչ անգամ կոյր մարդոց կը հանդիպինք, քանի որ անոնցմէ շատեր հանգիստ չեն զգար օտարներու հետ խօսելու։ Անոր համար շատ ջանք կը պահանջէ այսպիսիները ‘փնտռել’, անոնց վկայելու համար (Մատ. 10։11, ՆԱ)։ Կոյր գործակից կամ դպրոցակից մը ունի՞ս։ Նախաձեռնութիւնը առ իրեն հետ խօսելու։ Եթէ թաղամասիդ մէջ կոյրերու դպրոց կայ, առաջարկէ մեր պրայլ հրատարակութիւններէն դնել դպրոցի գրադարանին մէջ։ Կը ճանչնա՞ս անհատ մը որուն ընտանիքին մէկ անդամը կոյր է։ Թաղամասիդ մէջ կա՞ն կուրանոցներ կամ հաստատութիւններ, որոնք կոյրերուն համար ծառայութիւններ կ’ընեն։ Ընտանիքի անդամին, կուրանոցի ընդունարանի պաշտօնեային կամ պատասխանատուին բացատրէ թէ Եհովայի վկաները շատ հետաքրքրուած են կոյրերուն օգնելով, եւ կ’առաջարկեն պրայլ հրատարակութիւններ կամ ձայնագրութիւններ բերել։ Իրեն ցոյց տուր Աստուածաշունչին խոստումը թէ Աստուած շուտով մնայուն կերպով կուրութիւնը պիտի վերացնէ։ Թերեւս նաեւ փափաքիս jw.org կայքէն իրեն ցոյց տալ «Առանց անոր կորսուած պիտի զգայի» տեսաերիզը, որ ցոյց կու տայ կոյր անհատի մը փորձառութիւնը, որ ինչպէ՛ս պրայլ Աստուածաշունչ ունենալով օգտուած է։ Այցելութեանդ նպատակը յայտնելը կրնայ ճամբան հարթել որ կոյր անհատներու հետ կապի մէջ մտնես։

4. Ժանէթին փորձառութիւնը մեզի ի՞նչ կը սորվեցնէ։

⁴ Ժանէթ անունով կոյր քոյր մը այցելեց հաստատութիւն մը, ուր կոյրեր կը բնակին։ Ան սկսաւ խօսակցիլ երիտասարդ կոյր կնոջ մը հետ եւ ըսաւ. «Յիսուս կոյրեր բուժեց, ցոյց տալու համար թէ բոլոր կոյրերը պիտի բուժէ»։ Անոնք միասնաբար նկատի առին Յայտնութիւն 21։3, 4–ը, եւ Ժանէթ բացատրեց թէ այս խոստումը ինչպէ՛ս պիտի իրականանայ Աստուծոյ Թագաւորութեան միջոցով։ Կինը պահ մը լուռ կեցաւ, ապա ըսաւ. «Ես այս մէկը բնա՛ւ կոյր անհատի մը տեսանկիւնէն չէի լսած։ Տեսողութիւն ունեցող մարդոց մեծամասնութիւնը կը կարծէ որ կոյր անհատները կոյր են, քանի որ իրենք կամ իրենց նախահայրերը որոշ բան մը ըրած են»։ Ժանէթ ե–նամակով կնոջ ուղարկեց Աստուածաշունչը կը սորվեցնէ գրքին կապը (link–ը), եւ այժմ անոնք միասնաբար Աստուածաշունչը կը սերտեն շաբաթը երկու անգամ։

5. Թէեւ չենք կրնար Յիսուսին պէս կոյրերը բուժել, բայց անոնցմով հետաքրքրուիլը ի՞նչ օրհնութիւններ պիտի բերէ։

⁵ Անշուշտ, չենք կրնար մարդիկը կուրութենէ բուժել ինչպէս Յիսուս ըրաւ։ Բայց կրնանք օգնել թէ՛ մտքով կուրցած անհատներուն եւ թէ բառացի կոյրերուն, որ Աստուծոյ Խօսքին ճշմարտութիւնը հասկնան (Բ. Կոր. 4։4)։ Յիսուս Երիքովի մօտ այդ երկու տղամարդիկը բուժեց, քանի որ անոնց վրայ ‘խղճաց’ (Մատ. 20։34)։ Եթէ մենք ալ կոյրերով հետաքրքրուինք, կրնանք ոմանց օգնել որ սորվին Եհովային մասին, որ կուրութիւնը յաւիտենապէս պիտի վերացնէ։

[Շրջանակ՝ էջ 3]

Երբ կոյր անհատի մը կ’օգնես...

• Իրեն հետ ուղղակի խօսէ, բայց ո՛չ բարձր ձայնով։ Կոյրերը չեն տեսներ, բայց ընդհանրապէս լաւ լսողութիւն կ’ունենան։

• Եթէ զինք կ’առաջնորդես, թեւդ տուր։ Եթէ կէս քայլաչափ իրմէ առաջ քալես, ան պիտի կարենայ քեզի հետեւիլ։ Երբ տեսնես որեւէ արգելք, ինչպէս՝ դարձուածք, սիւն, աստիճան եւ այլն, կարեւոր է որ զինք զգուշացնես։

• Ազատ զգայ գործածելու տեսողութեան վերաբերող բառեր, ինչպէս՝ «տես» եւ «նայէ»։ Կոյրերն ալ այս բառերը կը գործածեն։ Անոնք իրենց միւս զգայարանքներով «կը տեսնեն», նոյնիսկ մտային պատկերներ կը ստեղծեն իրենց տրուած բացատրութիւններէն։

• Հանդարտ տեղ մը իրեն հետ զրուցէ։ Կոյրերը յաճախ անհանգիստ կը զգան, երբ աղմուկով լեցուն վայրերու մէջ գտնուին, քանի որ չեն գիտեր թէ իրենց շուրջը ի՛նչ կը պատահի։

• Եթէ պիտի մեկնիս, զինք տեղեակ պահէ։ Ասիկա պիտի օգնէ որ նեղ կացութեան չմատնուի, խօսելով մէկու մը հետ որ ա՛լ ներկայ չէ։

• Հաճեցէք այցելել (S-43) պատճէնը լեցուր, եւ զայն քարտուղարին տուր, եթէ հետաքրքրութիւն ցուցաբերող կոյր անհատը թաղամասիդ մէջ չ’ապրիր։