Օգնութեան աշխատանքներ՝ ‘պատերազմներու ու պատերազմներու լուրերու’ ժամանակ

Այս վերջին օրերուն, մենք կ’ակնկալենք ‘լսել պատերազմներ ու պատերազմներու լուրեր’ (Մատթէոս 24։6)։ Բայց, երբ մեր եղբայրները պատերազմներուն պատճառով նեղութիւն քաշեն, պէտք եղած օգնութիւնը կը ստանան։ 2022–ի Կառավարիչ մարմինի կողմէ տեղեկագրութիւն թիւ 3–ին մէջ, քաջալերական տեղեկութիւններ լսեցինք այն օգնութեան աշխատանքներուն մասին, որոնք կը տարուին արեւելեան Եւրոպայի մէջ, օգտակար դառնալու համար անոնց՝ որոնք Ուքրանիայի պատերազմէն ազդուեցան։ Մեր եղբայրները ինչպէ՞ս իրարու կ’օգնեն, նոյնիսկ երբ դեռ պատերազմը կը շարունակուի։ Օգնութեան աշխատանքները ինչպէ՞ս օգտակար դարձած են Ուքրանիայի մէջ ապրող մեր եղբայրներուն։

Ի՞նչ բաներու պէտքը կար եւ ատոնք ինչպէ՞ս մեր եղբայրներուն տրամադրուեցան

24 Փետրուար 2022–ին, այն օրը որ պատերազմը պայթեցաւ Ուքրանիայի մէջ, Համակարգողներու յանձնախումբը հաւանութիւն տուաւ, որ գումար մը տրամադրուի՝ Ուքրանիայի մեր եղբայրներուն օգնութեան հասնելու համար։ Ուքրանիայի մասնաճիւղը շատ արագ սկսաւ կարեւոր ապրանքներ գնել եւ ատոնք բաշխել՝ Աղէտէ տուժածներուն օգնող 27 յանձնախումբերուն միջոցաւ։

Ուքրանիայի մասնաճիւղին տրամադրած օգնութենէն զատ, Եհովայի վկաներու կեդրոնատեղիին մէջ ծառայող եղբայրները սկսան մտածել, թէ ինչպէ՛ս կրնան գործնական գետնի վրայ օգտակար դառնալ։ Կառավարիչ մարմինի Համակարգողներու եւ Հրատարակչական յանձնախումբերը, Համաշխարհային գնումներու բաժանմունքէն խնդրեցին, որ աշխատին Ուքրանիայի եւ Լեհաստանի մասնաճիւղերու ներկայացուցիչներու հետ, որ տեսնեն թէ ի՛նչ բաներու պէտքը կայ եւ ատոր հիման վրայ քայլեր առնեն։ Ամէն մէկ մասնաճիւղէն՝ Գնումներու, Առաքման եւ Օրինական բաժանմունքներէն եղբայրներ ամէն օր ժողովներ գումարեցին Ուքրանիայի մասնաճիւղի յանձնախումբէն եղբօր մը եւ Համաշխարհային գնումներու բաժանմունքէն եղբայրներու հետ, որ իրարու հետ համագործակցին։

«Նախ, պէտք էր տեսնէինք որ ի՛նչ բաներու պէտքը կար», կ’ըսէ Ճէյ Սուինի, որ կը ծառայէ Համաշխարհային գնումներու բաժանմունքին մէջ։ «Մենք կ’ուզէինք ապահովել ուտելիք, հականեխիչ եւ մաքրութեան ապրանքներ, որոնք տեղացի եղբայրներուն ծանօթ են։ Բայց գիտնալը թէ ճիշդ ի՛նչ բաներու պէտքը կար, խնդիրին միայն մէկ մասն էր։ Պէտք էր նաեւ մտածէինք որ այս ապրանքները ինչպէ՛ս կրնայինք ապահովաբար եւ արագօրէն Ուքրանիա փոխադրել՝ պատերազմի ժամանակ»։

9 Մարտ 2022–ին, եղբայրները գիտցան թէ Ուքրանիայի մեր եղբայրներն ու քոյրերը ինչի՛ պէտքը ունին։ Անոնց պիտի ղրկուէր սնտուկներով ուտելիքներ,– օրինակ՝ տուփեղէն միս եւ ձուկ, հատկեղէններ եւ բրինձ,– եւ մաքրութեան կարեւոր ապրանքներ, օրինակ՝ օճառ եւ արտաքնոցի թուղթ։ Այդ ատեն, ելաւ որ մէկ անձի չորս շաբթուան այս պէտքերը ապահովելը մօտ 65 ամ. տոլարի կը նայէր։ Համակարգողներու յանձնախումբը գիտէր, որ հազարաւոր եղբայրներ այս ապրանքներուն պէտքը ունէին, անոր համար անիկա հաւանութիւն տուաւ որ մեծ գումար մը ծախսուի՝ անոնց օգնութեան հասնելու համար։ Բայց այս ապրանքները ինչպէ՞ս կարելի պիտի ըլլար փոխադրել՝ առանց մեր եղբայրներուն կեանքը անհարկի կերպով վտանգի տակ դնելու։

13 Մարտին, Լեհաստանէն երկու եղբայրներ ապրանքներ փոխադրելու փորձ մը ըրին Լեհաստանի մասնաճիւղէն դէպի մթերանոց մը Լվովի մօտ, Ուքրանիա։ Մեկնելէ քանի մը օր առաջ, Լեհաստանի եւ Ուքրանիայի մասնաճիւղի անդամներ այս երկու կամաւորներուն օգնեցին, որ այս ճամբորդութեան համար պատրաստուին։ Լեհաստանի մասնաճիւղը պէտք եղած օրինական թուղթերը պատրաստեց, որ մեր եղբայրները կարենան սահմանը անցնիլ՝ մարդասիրական օգնութիւն տրամադրելու համար։ Ասկէ զատ, ատիկա վստահ եղաւ որ եղբայրներուն ինքնաշարժներուն վրայ յստակ նշաններ կան, որոնք ցոյց կու տան թէ օգնութիւն տալու կ’երթան, ինչպէս նաեւ ուքրանացի եղբայրներու հետ ժողովներ գումարեց, որ տեսնէ թէ սահմանը անցնելէ ետք մթերանոցը հասնելու ամէնէն արագ ճամբան ո՛ր մէկն է։ Լաւ պատրաստուելով եւ Եհովային օրհնութեամբ, ապրանքները տրուեցան Աղէտէ տուժածներուն օգնող յանձնախումբերուն՝ Լվով հասնելէ ետք՝ 24 ժամուան մէջ։ Ետքը, մեր եղբայրները ապահովաբար Լեհաստան վերադարձան։

Ճիշդ է որ առաջին ճամբորդութիւնը յաջող էր, բայց եղբայրները փոխադրեցին միայն 1 թոնէ պակաս ապրանքներ։ Դեռ պէտք պիտի ըլլար մօտ 220 թոն ապրանքներու։ Ինչպէ՞ս կարելի պիտի ըլար այսքան հսկայ քանակով ապրանքներ շատ արագ փոխադրել եւ եղբայրներուն բաժնել։

‘Ժողովուրդդ յօժարակամ պիտի ըլլայ’

Ամբողջ աշխարհի մէջ, երբ անհատներ jw.org կայքին վրայ կարդացին, թէ Ուքրանիայի դէպքերը ինչպէ՛ս կ’ազդեն մեր եղբայրներուն, ուզեցին անոնց օգնել։ Շատեր, որոնք հեռաւոր շրջաններու մէջ կ’ապրին, նուիրատուութիւններ ըրին Եհովայի վկաներու համաշխարհային գործին, քանի որ գիտեն թէ նուիրատուութիւնները լաւագոյն կերպով պիտի գործածուին։ Իսկ անոնք՝ որոնք Ուքրանիայի մօտ երկիրներու մէջ կ’ապրին, կրցան իրենց ժամանակը, ուժը եւ անձնական միջոցները տրամադրել՝ եղբայրներուն օգտակար դառնալու համար։ Տեսնենք քանի մը օրինակներ։

Լեհաստանի մէջ, կամաւորներ տասնեակ հազարաւոր օգնութեան սնտուկներ պատրաստեցին, իսկ պզտիկները քարտեր գծեցին։ «Սաղմոս 110։3–ը շատ անգամ կարդացած էի, ուր կ’ըսէ որ Եհովային ‘ժողովուրդը յօժարակամ պիտի ըլլայ’», կ’ըսէ Պարթոշ Քոշչիելնիաք՝ որ Լեհաստանի մասնաճիւղի Գնումներու բաժանմունքին մէջ կը ծառայէ։ «Բայց երբ անձամբ տեսայ որ ինչպէ՛ս հարիւրաւոր կամաւորներ շատ արագ եկան եւ պատրաստ էին աշխատելու, անդրադարձայ որ այդ խօսքը որքա՜ն ճիշդ է»։

Եհովայի վկայ մը, որ միջազգային փոխադրութեան ընկերութեան մը տէրն է եւ իր բեռնակառքերը տրամադրեց օգնութեան աշխատանքներուն համար, ինչպէս նաեւ ատոնց պենզինի ծախսերը, կ’ըսէ. «Ինծի համար, ասիկա առիթ է որ եղբայրներուն եւ Եհովային ցոյց տամ իմ սէրս։ Ուրախ եմ որ կրցայ օգտակար դառնալ»։ Կ’ենթադրուի որ տարբեր անհատներ աւելի քան 7700 լիթր (2034 կալոն) պենզին նուիրեցին եւ եղբայրները իրենց ժամանակը եւ ուժը տրամադրեցին, որ գրեթէ 48,000 քիլոմեթր քշեն՝ այս ապրանքները փոխադրելու համար։

Մեր կամաւոր եղբայրներուն ու քոյրերուն եւ անոնց սիրալիր աշխատանքին շնորհիւ, մինչեւ 28 մարտ,– առաջին ճամբորդութենէն միայն 15 օր վերջ,– 110 թոն ուտելիք, հականեխիչ եւ մաքրութեան ու բժշկական ապրանքներ փոխադրուեցան Ուքրանիա։ Ասկէ զատ, եղբայրներուն եւ ուրիշներուն առատաձեռն նուիրատուութիւններուն շնորհիւ, օգնութեան աշխատանքներուն համար տրամադրուած դրամէն միայն քիչ գումար ծախսուեցաւ։ Մինչեւ օրս, Եհովայի վկաները Ուքրանիա ղրկած են աւելի քան 209 թոն օգնութիւն։ Այս օգնութեան աշխատանքները ի՞նչ ազդեցութիւն ունեցան եղբայրներուն վրայ։

«Ատոնց մէջ կար նաեւ ձեր սէրը»

Երբ որ սնտուկներով այս օգնութիւնները Լվով հասան, Ուքրանիայի Աղէտէ տուժածներուն օգնող յանձնախումբերը ատոնք կարիքաւոր անհատներու բաժնեցին։ Այդ սնտուկները ղրկուեցան տարբեր քաղաքներ, որոնցմէ ոմանք Լվովէն աւելի քան 1300 քիլոմեթր հեռու են։ Հակառակ անոր որ այս աշխատանքը կարելի եղածին չափ ազդու կերպով տարուեցաւ, բայց ժամանակ առաւa։

Ուքրանիայի Մասնաճիւղի յանձնախումբի անդամ՝ Մարքուս Ռայնհարթ, կ’ըսէ. «Այս դժուար պարագաներուն տակ, շատ մը եղբայրներ իրենց մորթին վրայ զգացին Եհովային սէրը եւ կազմակերպութեան ուղղութիւններուն մօտէն հետեւելու օգուտները,– նոյնիսկ աղէտ մը հարուածելէ առաջ։ Օրինակ, միշտ բոլորին քաջալերութիւն կը տրուի, որ տունը քանի մը շաբթուան համար ուտելիքի եւ ջուրի պահեստ ունենան։ Այս ուղղութեան նկատմամբ, Անթոն անունով երէց մը, որ կը ծառայէ Քիեվի մէջ, ըսաւ. ‘Եհովային կազմակերպութիւնը մեզի դժուար պարագաներու համար պատրաստա՛ծ է, եւ մենք ասոր համար շատ երախտապարտ ենք։ Ուտելիքի եւ ջուրի պահեստ ունենալը, ինչպէս նաեւ տունը ռատիօ ունենալը ուղղակի մեր կեանքը փրկեց’։ Մենք շատ երախտապարտ ենք որ եղբայրները այդ ուղղութեան հնազանդեցան, քանի որ ասանկով մասնաճիւղը ժամանակ շահեցաւ օգնութեան աշխատանքները կազմակերպելու»։

Մեր եղբայրները ի՞նչ զգացին, երբ որ ապրանքները ստացան։ Մուիքոլան եւ Զինայտան, որոնք կ’ապրին Խարքովի մէջ, այսպէս արտայայտուեցան. «Ձեր հոգատարութիւնը շա՜տ ազդեց մեզի։ Շատ շնորհակալ ենք ուտելիքներուն եւ դեղերուն համար։ Վստահաբար, Եհովային ձեռքը կրնանք զգալ ասոր մէջ»։ Վալընթինան, որ նոյն շրջանին մէջ կ’ապրի, ըսաւ. «Պատերազմին առաջին օրերէն իսկ, մարդիկ երկար ժամեր շարքի կը կենային որ ուտելիք գնեն։ Միշտ կարելի չէր պէտք եղած ապրանքները գնել։ Բայց Եհովան աս խնդիրին մասին գիտէր եւ կը տեսնէր ի՛նչ կ’անցնէր–կը դառնար։ Ան եղբայրներ նշանակեց, որ մարդասիրական օգնութիւն ղրկէ, եւ այդ սնտուկներուն մէջ կային ճիշդ այն ինչ որ պէտք ունէինք։ Այս տեսակ դժուար պարագաներու մէջ, երբ անյոյս վիճակ կը տիրէ, յատուկ կերպով կը զգաս Եհովային եւ իր կազմակերպութեան հոգատարութիւնը... Շատ աղուոր է իր օգնութիւնը զգալ ճիշդ այն ատեն, երբ ամէնէն շատ ատոր պէտք ունենաս»։

Եվհենը, Իրինան եւ Միքիթան, որոնք Մարիուփոլէն փախան, ըսին. «Շատ երախտապարտ ենք որ մեր ընտանիքին հոգ տարիք եւ օգնեցիք։ Իրաւ, շատ տեղին էր։ Գիտէ՞ք, սկիզբը կարծեցինք որ աս սնտուկներուն մէջ միայն ապրանքներ կան, բայց երբ որ ատոնք բացինք, անդրադարձանք որ ատոնց մէջ կար նաեւ ձեր սէրը»։

Անկասկած, կրնաք տեսնել որ Եհովան իր սուրբ հոգիին միջոցաւ ուղղութիւն տուաւ իր ժողովուրդին, որ անոնք ալ կարենան սիրով օգնութեան աշխատանքներ տանիլ ‘պատերազմներու ու պատերազմներու լուրերու’ ժամանակ։ Ձեր առատաձեռն նուիրատուութիւններն ալ, որոնց մեծ մասը ղրկուեցան donate.jw.org կայքին միջոցաւ, մեծ դեր խաղցան։ Շատ կը գնահատենք ձեր առատաձեռն հոգին։

Կարելի եղածին չափ արագ եւ ապահով օգնութեան աշխատանքներ

1. 

   24 Փետրուար 2022։ Համակարգողներու յանձնախումբը հաւանութիւն կու տայ, որ գումար մը մէկ կողմ դրուի Ուքրանիայի եղբայրներուն օգնելու համար։ Ասիկա մասնաճիւղին կ’օգնէ որ օգնութեան աշխատանքներուն սկսի

2. 

   24 Փետրուար–8 մարտ 2022։ Ուքրանիայի մասնաճիւղը երկրին մէջ կը գնէ ապրանքներ եւ կը սկսի ատոնք բաշխել Աղէտէ տուժածներուն օգնող յանձնախումբերուն միջոցաւ։ Մասնաճիւղը նաեւ պատրաստութիւններ կը տեսնէ, որ Լեհաստանէն ապրանքներ ստանայ եւ բաշխէ

3. 

   9 Մարտ 2022։ Համակարգողներու յանձնախումբը կը համաձայնի մարդասիրական օգնութիւն ղրկել Ուքրանիա

4. 

   10-12 Մարտ 2022։ Կարգադրութիւններ կ’ըլլան որ եղբայրները ուտելիք եւ կարեւոր ապրանքներ փոխադրելու փորձ մը ընեն Լեհաստանէն Լվով (Ուքրանիա)

5. 

   13 Մարտ 2022։ Լեհաստանէն Լվով (Ուքրանիա) ապրանքներ փոխադրելու փորձը կ’ըլլայ

6. 

   14-16 Մարտ 2022։ Համաժողովի սրահի մը մէջ, Փոզնանի մօտ (Լեհաստան), Տեղական ծրագրման/շինարարութեան մէջ ծառայող կամաւորներ կը նշանակուին, որ ուտելիք, հականեխիչ եւ մաքրութեան ապրանքներ դնեն սնտուկներու մէջ

7. 

   17 Մարտ 2022։ Ուքրանիա ապրանքներ փոխադրելու փորձէն չորս օր ետք, 14 թոն ապրանք կը սկսի փոխադրուիլ Ուքրանիոյ սահմանը

8. 

   21-27 Մարտ 2022։ Նոյն կերպով, մնացեալ օգնութեան ապրանքները կարգի կը դրուին Լեհաստանի մէջ, Ուքրանիա կը ղրկուին եւ 24 ժամուան մէջ կարիքաւոր շրջաններ կը հասնին

9. 

   28 Մարտ 2022։ Հաւանութիւն առնելէ 20 օր ետք, արդէն իսկ 110 թոն ուտելիք, հականեխիչ, եւ մաքրութեան ու բժշկական ապրանքներ Ուքրանիա ղրկուած էին

Մինչեւ օրս, Եհովայի վկաները աւելի քան 209 թոն օգնութեան ապրանքներ ղրկած են Ուքրանիա։