Եհովայի դատաստանը սուտ ուսուցիչներուն դէմ
«Երուսաղէմի մարգարէներուն մէջ սոսկալի բան մը տեսայ. անոնք շնութիւն կ’ընեն ու ստութեան մէջ կը քալեն։ ... Անոնք ինծի Սոդոմի պէս ու անոր բնակիչները Գոմորի պէս եղան»։—ԵՐԵՄԵԱՅ 23։14
1. Ինչո՞ւ շատ լուրջ պատասխանատուութիւն մը կը ստանձնէ ան որ աստուածային ուսուցումին կը ձեռնարկէ։
ԱՆ ՈՐ աստուածային ուսուցումին կը ձեռնարկէ, շատ լուրջ պատասխանատուութիւն մը կը ստանձնէ։ Յակոբու 3։1–ը կը զգուշացնէ. «Եղբայրներս, շատ վարդապետող [ուսուցանող] մի՛ ըլլաք, գիտնալով որ աւելի մեծ դատաստան պիտի ընդունինք»։ Այո, ընդունելի հաշիւ մը տալու համար, Աստուծոյ Խօսքին ուսուցիչները շատ աւելի լուրջ պատասխանատուութիւն մը ունին քան միւս Քրիստոնեաները։ Ասիկա ի՞նչ պիտի նշանակէ սուտ ուսուցիչներուն համար։ Տեսնենք թէ Երեմիայի օրերուն ի՛նչ էր պարագան։ Նկատի պիտի առնենք թէ անիկա ի՛նչպէս ներկայիս տեղի ունեցող բաներուն նախաշուքն էր։
2, 3. Երեմիայի միջոցաւ, Եհովա ի՞նչ դատաստան տուաւ Երուսաղէմի սուտ ուսուցիչներուն նկատմամբ։
2 Հ.Դ.Ա. 647–ին, Յովսիա Թագաւորին իշխանութեան 13–րդ տարին, Երեմիան յանձնարարութիւն ստացաւ որպէս Եհովայի մարգարէն։ Եհովա գանգատ մը ունէր Յուդայի դէմ, ուստի ան Երեմիան ղրկեց ասիկա յայտնելու։ Երուսաղէմի սուտ մարգարէները, կամ ուսուցիչները, Աստուծոյ աչքին «սոսկալի բան»եր կ’ընէին։ Անոնց չարութիւնը ա՛յնքան մեծ էր որ Աստուած Երուսաղէմը եւ Յուդան նմանցուց Սոդոմին ու Գոմորին։ Երեմեայ գլուխ 23–ը այս մասին կը խօսի։ 14–րդ համարը կ’ըսէ.
3 «Երուսաղէմի մարգարէներուն մէջ սոսկալի բան մը տեսայ. անոնք շնութիւն կ’ընեն ու ստութեան մէջ կը քալեն, չարագործներուն ձեռքերը կ’ուժովցնեն, որպէսզի ետ չդառնան իրենց չարութենէն. անոնք ինծի Սոդոմի պէս ու անոր բնակիչները Գոմորի պէս եղան»։
4. Երուսաղէմի ուսուցիչներուն բարոյական գէշ օրինակին զուգահեռը ինչպէ՞ս կը տեսնուի ներկայ Քրիստոնեայ Աշխարհին մէջ։
4 Այո, այս մարգարէները, կամ ուսուցիչները, բարոյական շատ գէշ օրինակներ եղան եւ ժողովուրդն ալ քաջալերեցին, որ նոյնը ընէ։ Ներկայ Քրիստոնեայ Աշխարհի վիճակին նայեցէք։ Անոնք ալ Երեմիայի օրուան մարդոց չե՞ն նմանիր։ Այսօր կղերները թոյլ կու տան որ պոռնկացողները եւ միասեռականները շարունակեն իրենց շարքերուն մէջ մնալ, մինչեւ իսկ արտօնելով որ անոնք եկեղեցական սպասարկութիւններ կատարեն։ Զարմանալի՞ է որ եկեղեցիի անդամներուն մեծամասնութիւնն ալ անբարոյ է։
5. Քրիստոնեայ Աշխարհի անբարոյական վիճակը ինչո՞ւ Սոդոմէն ու Գոմորէն ալ վատ է։
5 Եհովա Երուսաղէմի բնակիչները նմանցուց Սոդոմի ու Գոմորի բնակիչներուն։ Սակայն Քրիստոնեայ Աշխարհի անբարոյ վիճակը Սոդոմէն ու Գոմորէն ալ վատ է։ Այո, անիկա նոյնիսկ աւելի մեղադրելի է Եհովայի աչքին։ Անոր ուսուցիչները կ’անարգեն Քրիստոնէական բարոյական օրէնքը։ Իսկ ասիկա բարոյական անկումի մթնոլորտ մը յառաջ կը բերէ, որ չարութիւն ընելու ամէն տեսակ գձուձ հրապոյրով լեցուն է։ Այս բարոյական վիճակը ա՛յնքան տիրական է որ ներկայիս չարութիւնը բնական նկատուած է։
«Ստութեան մէջ կը Քալեն»
6. Երեմիա ի՞նչ ըսաւ Երուսաղէմի մարգարէներուն չարութեան մասին։
6 Արդ նայինք թէ 14–րդ համարը ի՛նչ կ’ըսէ Երուսաղէմի մարգարէներուն մասին։ Անոնք ‘ստութեան մէջ կը քալէին’։ Իսկ 15–րդ համարին վերջին մասը կ’ըսէ. «Երուսաղէմի մարգարէներէն ամբարշտութիւն ելաւ ու բոլոր երկրին մէջ տարածուեցաւ»։ Ապա, 16–րդ համարը կ’աւելցնէ. «Զօրքերու Տէրը այսպէս կ’ըսէ. ‘Ձեզի մարգարէութիւն ընողներուն խօսքերուն մտիկ մի՛ ընէք. անոնք ունայնութեան կը տանին ձեզ, իրենց սրտին տեսիլքը կը խօսին, ո՛չ թէ Տէրոջը բերնէն’»։
7, 8. Քրիստոնեայ Աշխարհի կղերները ինչո՞ւ Երուսաղէմի սուտ մարգարէներուն նման են, եւ ասիկա ինչպէ՞ս ազդած է եկեղեցի յաճախողներուն։
7 Երուսաղէմի սուտ մարգարէներուն նման, Քրիստոնեայ Աշխարհի կղերներն ալ ստութեան մէջ կը քալեն հաւատուրաց վարդապետութիւններ տարածելով, ուսուցումներ՝ որոնք Աստուծոյ Խօսքին մէջ գոյութիւն չունին։ Այդ սուտ ուսուցումներէն ոմանք ի՞նչ են։ Հոգիի անմահութիւնը, Երրորդութիւնը, Քաւարանը եւ մարդիկը յաւիտեան չարչարող դժոխքի կրակը։ Անոնք նաեւ իրենց ունկնդիրներուն հաճելի եղող բաներ կը քարոզեն։ Անոնք անդադար կը կրկնեն թէ ո՛չ մէկ փորձանք կը սպասէ Քրիստոնեայ Աշխարհին, քանի որ անիկա Աստուծոյ խաղաղութիւնը ունի։ Բայց կղերները «իրենց սրտին տեսիլքը կը խօսին»։ Անիկա սուտ է։ Այս սուտերուն հաւատացողները հոգեւորապէս թունաւորուած են։ Անոնք մոլորած են ու հետեւաբար կործանումի ճամբուն վրայ են։
8 Նայեցէք թէ Եհովա այս սուտ ուսուցիչներուն մասին ի՛նչ կ’ըսէ, 21–րդ համարին մէջ. «Այս մարգարէները ես չղրկեցի, բայց անոնք կը վազեն։ Ես անոնց չխօսեցայ, բայց անոնք կը մարգարէանան»։ Նմանապէս ներկայիս, կղերները Աստուծոյ կողմէ չեն ղրկուած, ոչ ալ անոր ճշմարտութիւնները կը սորվեցնեն։ Հետեւանքը ի՞նչ եղած է։ Եկեղեցի յաճախողներուն մէջ Աստուածաշունչի հանդէպ ահաւոր տգիտութիւն մը գոյութիւն ունի, քանի որ իրենց քարոզիչները աշխարհային փիլիսոփայութիւններով կը սնուցանեն զանոնք։
9, 10. (ա) Երուսաղէմի սուտ ուսուցիչները ի՞նչպիսի երազներ ունեցան։ (բ) Նմանապէս Քրիստոնեայ Աշխարհի կղերները ինչպէ՞ս «սուտ երազներ» սորվեցուցած են։
9 Ասկէ զատ, ներկայ կղերները սուտ յոյսեր կու տան։ Նկատի առէք 25–րդ համարը. «Իմ անունովս սուտ մարգարէութիւն ընող մարգարէներուն ըսածները լսեցի, որոնք կ’ըսեն. ‘Երազ տեսայ, երազ տեսայ’»։ Ի՞նչպիսի երազներ են անոնք։ 32–րդ համարը մեզի կ’ըսէ. «‘Ահա ես այն սուտ երազներ մարգարէացողներուն դէմ եմ’, կ’ըսէ Տէրը, ‘որ զանոնք պատմելով իմ ժողովուրդս կը մոլորեցնեն իրենց ստութիւններովն ու սնապարծութիւնովը։ Ես զանոնք չղրկեցի եւ անոնց չպատուիրեցի։ Անոնք այս ժողովուրդին ամենեւին օգուտ մը պիտի չընեն’, կ’ըսէ Տէրը»։
10 Կղերները ի՞նչ սուտ երազներ կամ յոյսեր սորվեցուցած են։ Անոնք սորվեցուցած են որ մարդուն համար խաղաղութեան ու ապահովութեան միակ յոյսը Միացեալ Ազգերն է։ Այս վերջին տարիներուն, անոնք ՄԱԿ–ը կոչած են «Ներդաշնակութեան ու խաղաղութեան վերջին յոյսը», «Խաղաղութեան ու արդարութեան գերագոյն ատեանը», «Աշխարհի խաղաղութեան համար քաղաքական գլխաւոր յոյսը»։ Ի՜նչ պատրանք։ Մարդկութեան միակ յոյսը Աստուծոյ Թագաւորութիւնն է։ Բայց կղերները Յիսուսի քարոզչութեան գլխաւոր բնաբանը եղող երկնային կառավարութեան մասին ճշմարտութիւնը չեն քարոզեր ու չեն սորվեցներ։
11. (ա) Երուսաղէմի սուտ ուսուցիչները ի՞նչ գէշ ազդեցութիւն ունեցած են Աստուծոյ անուան վրայ։ (բ) Երեմիա դասակարգին հակառակը, այսօրուայ կրօնական սուտ ուսուցիչները ի՞նչ ըրած են աստուածային անուան առնչութեամբ։
11 27–րդ համարը մեզի կ’ըսէ. «Անոնք իրենց երազներովը, որոնք իրարու կը պատմեն, իմ անունս իմ ժողովուրդիս մոռցնել կը խորհին, ինչպէս իրենց հայրերը Բահաղի պատճառով իմ անունս մոռցան»։ Երուսաղէմի սուտ մարգարէները պատճառ եղան որ ժողովուրդը Աստուծոյ անունը մոռնայ։ Այսօրուայ կրօնական սուտ ուսուցիչներն ալ նոյնը չե՞ն ըրած։ Աւելի գէշը, անոնք Աստուծոյ անունը՝ Եհովա՝ պահած են։ Անոնք կը սորվեցնեն որ անհրաժեշտ չէ զայն գործածել եւ նոյնիսկ իրենց Աստուածաշունչի թարգմանութիւններէն կը վերցնեն։ Երբ ոեւէ մէկը մարդոց սորվեցնէ որ Աստուծոյ անունը Եհովա է, անոնք բուռն կերպով կը հակառակին անոր։ Բայց Երեմիա դասակարգը՝ հոգիէն օծուած Քրիստոնեաներու մնացորդը՝ իր ընկերակիցներուն հետ, Յիսուսի օրինակին հետեւած է։ Անոնք միլիոնաւոր անհատներու սորվեցուցած են Աստուծոյ անունը։—Յովհաննու 17։6
Անոնց Այպանելի Ըլլալը Երեւան Հանել
12. (ա) Կրօնական սուտ ուսուցիչներուն վրայ ինչո՞ւ մեծ արիւնապարտութիւն կայ։ (բ) Երկու համաշխարհային պատերազմներուն մէջ կղերներուն դերը ի՞նչ եղած է։
12 Երեմիա դասակարգը կրկին անգամ կղերները քօղազերծած է որպէս սուտ ուսուցիչներ որոնք իրենց հօտը կործանումի տանող լայն ճամբուն մէջ կ’առաջնորդեն։ Այո, մնացորդը յստակօրէն բացատրած է թէ այդ երազողները ի՛նչու Եհովայի դատապարտութեան արժանի են։ Օրինակի համար, Եհովայի ծառաները յաճախ ակնարկած են Յայտնութիւն 18։24–ին, որ կ’ըսէ թէ Մեծն Բաբելոնին մէջ «երկրի վրայ բոլոր սպաննուածներուն արիւնը» գտնուած է։ Պահ մը խորհեցէք այդ բոլոր պատերազմներուն մասին, որոնք կրօնական տարբերութիւններու համար մղուած են։ Կրօնական սուտ ուսուցիչները որքա՜ն արիւնապարտ են։ Անոնց ուսուցումները պառակտումներ պատճառած են եւ տարբեր հաւատքի ու ազգի պատկանողներուն հանդէպ ատելութիւն հրահրած են։ Ա. Աշխարհամարտին մասին, Քարոզիչները Զէնքեր կը Ներկայացնեն խորագրով գիրքը (Անգլ.) կ’ըսէ. «Կղերները պատերազմին տուին հոգեւոր կրքոտ իմաստ մը եւ մղում մը։ ... Այս կերպով եկեղեցին պատերազմի դրութեան շատ կարեւոր մասը եղաւ»։ Նոյնն էր պարագան Բ. Աշխարհամարտին։ Կղերները լիովին զօրավիգ կանգնեցան պատերազմող ազգերուն եւ անոնց բանակները օրհնեցին։ Երկու համաշխարհային պատերազմներն ալ սկսան Քրիստոնեայ Աշխարհէն, ուր հաւատակիցներ իրար սպաննեցին։ Քրիստոնեայ Աշխարհի մէկ աշխարհային եւ կրօնական հատուածները մինչեւ օրս կը շարունակեն արիւնահեղութիւն պատճառել։ Իրենց սուտ ուսուցումները ի՜նչ ահաւոր ազդեցութիւններ ունեցած են։
13. Երեմեայ 23։22–ը ինչպէ՞ս կը փաստէ թէ Քրիստոնեայ Աշխարհի կղերները Եհովային հետ որեւէ յարաբերութիւն չունին։
13 Հաճեցէք նկատի առնել Երեմեայ 23–րդ գլուխին 22–րդ համարը. «Իսկ եթէ անոնք իմ խորհուրդիս մէջ կեցած ըլլային, այն ատեն իմ խօսքս իմ ժողովուրդիս պիտի յայտնէին եւ զանոնք իրենց չար ճամբաներէն ու իրենց չար գործերէն պիտի դարձնէին»։ Եթէ Քրիստոնեայ Աշխարհի կրօնական մարգարէները Եհովայի խորհուրդին մէջ կեցած ըլլային, իրեն հետ սերտ յարաբերութիւն մը ունենալով հաւատարիմ եւ իմաստուն ծառայի մը նման, այն ատեն իրենք ալ Աստուծոյ չափանիշներով ապրած պիտի ըլլային։ Իրենք ալ Քրիստոնեայ Աշխարհի ժողովուրդներուն Աստուծոյ խօսքերը լսել պիտի տային։ Ընդհակառակը, արդի սուտ ուսուցիչները իրենց հետեւորդները Աստուծոյ Հակառակորդին՝ Բանսարկու Սատանային՝ կոյր ծառաները դարձուցած են։
14. Քրիստոնեայ Աշխարհի կղերներուն դէմ ի՞նչ ուժգին յայտարարութիւն մը եղաւ 1958–ին։
14 Երեմիա դասակարգը ուժգին կերպով քօղազերծած է կղերները։ Օրինակի համար, 1958–ին, Նիւ Եորքի մէջ Աստուածային Կամք բնաբանով Եհովայի Վկաներու Միջազգային Համաժողովին, Դիտարանի Ընկերութեան փոխ նախագահը յայտարարութիւն մը ներկայացուց, որ մասամբ կ’ըսէր. «Առանց կասկածի կամ վարանումի, կը յայտնենք որ ամէն ոճիրի, յանցագործութեան, ատելութեան, կռիւի, նախապաշարումի ... եւ խելագար շփոթութեան բուն պատճառը սխալ, կամ սուտ, կրօնքն է, որու ետին կայ մարդուն անտեսանելի թշնամին՝ Բանսարկու Սատանան։ Աշխարհի վիճակներուն գլխաւոր պատասխանատուներն են կրօնական ուսուցիչները եւ առաջնորդները. իսկ անոնց մէջ ամենէն այպանելին, Քրիստոնեայ Աշխարհի կրօնական առաջնորդներն են։ ... Ա. Աշխարհամարտէն ի վեր, այս բոլոր տարիներէն ետք, Աստուծոյ հանդէպ Քրիստոնեայ Աշխարհի կեցուածքը Երեմիայի օրուան Իսրայէլի ունեցած կեցուածքին կը նմանի։ Այո, Քրիստոնեայ Աշխարհին շատ աւելի ահաւոր կործանում մը կը սպասէ քան ինչ որ Երուսաղէմի վրայ եկաւ, որու ականատես եղաւ Երեմիա»։
Սուտ Ուսուցիչներուն Դատաստանը
15. Կղերները խաղաղութեան ի՞նչ մարգարէութիւններ ըրած են։ Անոնք պիտի կատարուի՞ն։
15 Հակառակ այս ազդարարութեան, անկէ ի վեր կղերները ինչպէ՞ս վարուած են։ Ճիշդ ինչպէս 17–րդ համարը կ’ըսէ. «Անոնք զիս անարգողներուն կը խօսին ու կ’ըսեն, ‘Տէրը ըսաւ. «Ձեզի խաղաղութիւն պիտի ըլլայ»’ եւ իրենց սրտին կամակորութեանը մէջ քալողներուն կ’ըսեն՝ ‘Ձեր վրայ չարիք պիտի չգայ’»։ Ասիկա ճի՞շդ է։ Ո՛չ։ Եհովա կղերներու այս մարգարէութիւններուն սուտ ըլլալը երեւան պիտի հանէ։ Ան պիտի չկատարէ ինչ որ անոնք Իր անունով կ’ըսեն։ Հետեւաբար, Աստուծոյ հետ խաղաղութեան մէջ ըլլալու մասին կղերներուն տուած կեղծ վստահութիւնը շա՜տ խաբուսիկ է։
16. (ա) Այս աշխարհի բարոյական մթնոլորտը ի՞նչ է, եւ անոր համար ո՞վ պատասխանատուութիւն կը կրէ։ (բ) Երեմիա դասակարգը ի՞նչ կ’ընէ այս աշխարհի նուաստացուցիչ բարոյական տեսակէտներուն առնչութեամբ։
16 Արդեօք կը խորհի՞ք. ‘Ես կղերներուն սուտ ուսուցումներով խաբուի՞մ. բնաւ երբեք’։ Այդքան ինքնավստահ մի՛ ըլլաք։ Յիշեցէք որ կղերներուն սուտ ուսուցումները նպաստած են բարոյական գձուձ ու ահաւաոր մթնոլորտին։ Անոնց թոյլատու ուսուցումները գրեթէ ամէն բան կ’արդարացնեն, որքան ալ անբարոյ ըլլան անոնք։ Իսկ այս բարոյական այլասեր մթնոլորտը ներթափանցած է զբօսանքի բոլոր մարզերուն, շարժապատկերներուն, հեռատեսիլին, պարբերաթերթերուն եւ երաժշտութեան մէջ։ Հետեւաբար, չափազանց ուշադիր պէտք է ըլլանք, ապա թէ ոչ կրնանք խորամանկ կերպով գրաւիչ թուող բարոյական այլասեր մթնոլորտին ազդեցութեան ներքեւ գալ։ Պատանիներ կրնան որոգայթը իյնալ նուաստացուցիչ պատկերիզներով եւ երաժշտութեամբ։ Մի՛ մոռնաք որ ներկայ մարդոց ամէն բան կը քալէ կեցուածքը ուղղակի արդիւնքն է կղերներուն սուտ ուսուցումներուն եւ Աստուծոյ արդար չափանիշները անտեսելուն։ Երեմիա դասակարգը այս անբարոյ տեսակէտներուն դէմ կը պայքարի եւ Եհովայի ծառաներուն կ’օգնէ, որ մերժեն այն չարութիւնը որ պատած է Քրիստոնեայ Աշխարհը։
17. (ա) Ըստ Երեմիային, ամբարիշտ Երուսաղէմի վրայ ի՞նչ դատաստան պիտի իրագործուէր։ (բ) Շուտով ի՞նչ պիտի պատահի Քրիստոնեայ Աշխարհին։
17 Քրիստոնեայ Աշխարհի սուտ ուսուցիչները ի՞նչ դատաստան պիտի ստանան Եհովայէ՝ մեծ Դատաւորէն։ 19, 20, 39 եւ 40–րդ համարները կը պատասխանեն. «Ահա Տէրոջը մրրիկը սրտմտութեամբ ելաւ. անիկա սաստիկ մրրիկ է, ամբարիշտներուն գլխուն վրայ պիտի յարձակի։ Տէրոջը բարկութիւնը ետ պիտի չդառնայ, մինչեւ որ իր սրտին խորհուրդները չկատարէ ու չհաստատէ։ ... Ես ձեզ բոլորովին պիտի մոռնամ ու երեսէ պիտի ձգեմ ձեզ եւ այն քաղաքը, որ ձեզի ու ձեր հայրերուն տուի։ Ձեր վրայ յաւիտենական նախատինք ու յաւիտենական անարգանք պիտի դնեմ, որ պիտի չմոռցուի»։ Այս բոլորը ամբարիշտ Երուսաղէմին եւ անոր տաճարին վրայ եկան եւ շատ շուտով նոյնանման աղէտ մը պիտի գայ ամբարիշտ Քրիստոնեայ Աշխարհին վրայ։
‘Եհովայի Բեռը’ Ծանուցանել
18, 19. Ի՞նչ էր «Տէրոջը բեռը» զոր Երեմիա ծանուցանեց Յուդայի, եւ ի՞նչ ակնարկութիւններով։
18 Ուստի, Երեմիա դասակարգին եւ իրենց ընկերակիցներուն պատասխանատուութիւնը ի՞նչ է։ 33–րդ համարը կ’ըսէ. «Երբ այս ժողովուրդէն մէկը՝ կամ մարգարէ մը կամ քահանայ մը քեզի հարցնէ ու ըսէ թէ՝ ‘Տէրոջը բեռը ի՞նչ է’, այն ատեն անոնց ըսէ. ‘«Դուք էք Տէրոջը բեռը։ Ես ձեզ անշուշտ պիտի լքեմ», կ’ըսէ Տէրը’»։
19 Եբրայերէնի մէջ «բեռ» բառը կրկին իմաստ ունի։ Անիկա կրնայ ակնարկել աստուածային ծանրակշիռ պատգամի մը, կամ բանի մը, որու ծանրութեան ներքեւ անհատը կը կքի կամ կը յոգնի։ Հոս՝ «Տէրոջը բեռը» արտայայտութիւնը կ’ակնարկէ ծանրակշիռ մարգարէութեան. Երուսաղէմ կործանումի դատապարտուած ըլլալու ծանուցման։ Բայց ժողովուրդը կ’ախորժէ՞ր այսպիսի ծանրակշիռ մարգարէական խօսքերէն զորս Երեմիա անդադար անոնց կ’ըսէր Եհովայի կողմէ։ Ո՛չ. ժողովուրդը կը ծաղրէր Երեմիան, ըսելով. ‘Հիմա ի՞նչ մարգարէութիւն (բեռ) ունիս։ Վստահ ենք որ մարգարէութիւնդ յոգնեցուցիչ ուրիշ բեռ մը պիտի ըլլայ’։ Բայց Եհովա ի՞նչ ըսաւ անոնց։ Հետեւեալը. «Դուք էք ... բեռը։ Ես ձեզ անշուշտ պիտի լքեմ»։ Այո, այս ժողովուրդը բեռ մըն էր Եհովայի համար եւ ան իր ուսէն վար պիտի նետէր զանոնք։
20. Այսօր «Տէրոջը բեռը» ի՞նչ է։
20 Այսօր «Տէրոջը բեռը» ի՞նչ է։ Անիկա Աստուծոյ Խօսքին մէջ գտնուող ծանրակշիռ մարգարէական պատգամն է։ Անիկա դատապարտութեամբ ծանրաբեռնուած է, ծանուցանելով Քրիստոնեայ Աշխարհի մօտալուտ կործանումը։ Իսկ որպէս Եհովայի ծառաներ, մենք ‘Եհովայի բեռը’ ծանուցանելու ծանր պատասխանատուութիւնը ունինք։ Մինչ վախճանը կը մօտենայ, բոլորին պէտք է ըսենք որ Քրիստոնեայ Աշխարհի կամակոր ժողովուրդները «բեռ» մըն են, այո եւ ի՜նչ բեռ Եհովա Աստուծոյ համար. բայց ան շուտով պիտի ձերբազատուի այդ «բեռ»էն, Քրիստոնեայ Աշխարհը աղէտի մատնելով։
21. (ա) Երուսաղէմ ինչո՞ւ կործանուեցաւ Հ.Դ.Ա. 607–ին։ (բ) Երուսաղէմի կործանումէն ետք, ի՞նչ պատահեցաւ սուտ մարգարէներուն եւ Եհովայի ճշմարիտ մարգարէին, մեզի ի՞նչ երաշխիք տալով այսօր։
21 Եհովայի դատաստանը ի գործ դրուեցաւ Երեմիայի օրերուն, երբ Բաբելոնացիները կործանեցին Երուսաղէմը, Հ.Դ.Ա. 607–ին։ Ինչպէս մարգարէացուած էր, անիկա այդ յամառ, անհաւատարիմ Իսրայելացիներուն համար ‘նախատինք եւ անարգանք’ մը եղաւ։ (Երեմեայ 23։39, 40) Անիկա ապացուցանեց որ Եհովան, որու անոնք անդադար անարգած էին, վերջապէս լքած էր զիրենք, որպէսզի իրենց չարութեան հետեւանքները քաղեն։ Անոնց սնապարծ սուտ մարգարէներուն բերանները վերջապէս պապանձած էին։ Բայց Երեմիայի բերանը կը շարունակէր մարգարէանալ։ Եհովան չէր լքած զինք։ Այս օրինակին համաձայն, Եհովա պիտի չլքէ Երեմիա դասակարգը, երբ իր ծանրակշիռ վճիռը ջախջախէ Քրիստոնեայ աշխարհի կղերները եւ անոնց սուտերուն հաւատացողները։
22. Եհովայի դատաստաններուն պատճառաւ, Քրիստոնեայ Աշխարհը ի՞նչ վիճակի պիտի մատնուի։
22 Այո, կրօնասէր Քրիստոնեայ Աշխարհը ճիշդ պիտի նմանի Հ.Դ.Ա 607–էն ետք Երուսաղէմի աւերակ, ամայի վիճակին, երբ իր հարստութիւնը կողոպտուի եւ անիկա ամօթալի կերպով մերկացուի։ Եհովա սուտ ուսուցիչները այս դատաստանին արժանի տեսած է։ Այդ դատաստանը պիտի չձախողի։ Ինչպէս որ անցեալին Երեմիայի բոլոր ներշնչուած ազդարարութիւնները շիտակ ելան, անոնք իրենց արդի կատարման մէջ ալ շիտակ պիտի ելլեն։ Ուստի, Երեմիայի նմանինք։ Մարդոց անվախօրէն ծանուցանենք Եհովայի մարգարէական բեռը, որպէսզի անոնք գիտնան թէ ի՛նչու իր արդար դատաստանին ամբողջ ծանրութիւնը պիտի գայ կրօնական բոլոր սուտ ուսուցիչներուն վրայ։
Վերաքաղի Հարցումներ
◻ Վաղեմի Երուսաղէմը որքա՞ն գէշ էր Եհովայի տեսանկիւնէն դիտուած։
◻ Քրիստոնեայ Աշխարհը ի՞նչ կերպերով ‘ստութեան մէջ քալեց’։
◻ Այժմու կղերներուն մեղադրելիութիւնը ինչպէ՞ս քօղազերծուած է։
◻ Ի՞նչ է «Տէրոջը բեռը» որ այժմ կը ծանուցանուի։
[Նկար՝ էջ 8]
Երուսաղէմի մարգարէները«սոսկալի բան»եր ըրին
[Նկար՝ էջ 9]
Անոնք «իրենց սրտին տեսիլքը կը խօսին»
[Նկար՝ էջ 10]
Երուսաղէմ իր կործանումէն ետք կը պատկերացնէ Քրիստոնեայ Աշխարհի վերջին վիճակը