Աշխարհային պատրանքները մերժեցէ՛ք, Թագաւորութեան իրականութիւնները հետապնդեցէ՛ք
«Բայց առաջ խնդրեցէ՛ք Աստուծոյ թագաւորութիւնը եւ անոր արդարութիւնը ու այդ բոլոր բաներն ալ ձեզի պիտի տրուին»։—ՄԱՏԹԷՈՍ 6։33
1. Այալաբանական սրտին մասին Աստուածաշունչը ի՞նչ ազդարարութիւն կու տայ եւ անիկա մանաւանդ ի՞նչ կերպով կը խաբէ մեզ։
«ԱՄԷՆ զգուշութիւնով քու սիրտդ պահէ, քանզի կեանքի աղբիւրները անկէ են»։ (Առակաց 4։23) Սողոմոն Թագաւոր ինչո՞ւ հարկը տեսաւ այս ազդարարութիւնը տալու։ Քանի որ «սիրտը ամէն բանէն աւելի խաբեբայ ու խիստ չար է»։ (Երեմեայ 17։9) Մեր այլաբանական սրտին խաբելու կերպերէն մէկն է, մեզ աշխարհային պատրանքներու անձնատուր ընել։ Բայց ի՞նչ է պատրանքը։ Անիկա անիրապաշտ երեւակայութիւններ, բաց աչքով երազանք, մտքի ունայն թափառումներ է։ Երբ բաց աչքով երազանքը աշխարհային պատրանքներ ըլլան, անոնք պարզապէս ժամանակի կորուստ չեն ըլլար, այլ՝ շա՜տ վնասակար։ Հետեւաբար, պէտք է զանոնք բոլորովին մերժենք։ Իրականութեան մէջ, եթէ Յիսուսի նման անօրէնութիւնը պէտք է ատենք, մեր սիրտը պէտք է պահպանենք աշխարհային պատրանքներէ։—Եբրայեցիս 1։8, 9
2. Ի՞նչ են աշխարհային պատրանքները եւ ինչո՞ւ պէտք է մերժենք զանոնք։
2 Բայց ի՞նչ են աշխարհային պատրանքները։ Անոնք Սատանայի զօրութեան ներքեւ եղող աշխարհը յատկորոշող ոատրանքներ են։ Անոր մասին Յովհաննէս առաքեալ գրեց. «Ամէն բան որ աշխարհի մէջ է՝ մարմնի ցանկութիւնը ու աչքերու ցանկութիւնը եւ այս կեանքին ամբարտաւանութիւնը, Հօրմէն չէ, հապա այս աշխարհէն է»։ (Ա. Յովհաննու 2։16. 5։19) Քրիստոնեաները ինչո՞ւ պէտք է մերժեն աշխարհային պատրանքները։ Քանի որ անոնք մտքին եւ սրտին մէջ անձնասէր ցանկութիւններ կը գրգռեն։ երբ բաց աչքով կ’երազենք սխալ բան մը, իրականութեան մէջ անիկա մեր ընելիքին նկատմամբ մեր միտքը կը մարզէ։ Յակոբոս աշակերտ մեզ կը զգուշացնէ. «Ամէն մէկը կը փորձուի՝ իր ցանկութիւններէն հրապուրուած ու խաբուած. անկէ յետոյ ցանկութիւնը յղանալով՝ մեղք կը ծնանի եւ մեղքը որ կատարուի՝ մահ կը ծնանի»։—Յակոբու 1։14, 15
Ազդարարիչ Օրինակներ
3. Որո՞նք մեծագոյն օրինակները կը հանդիսանան թէ անձնասէր պատրանքները վնասակար են։
3 Օրինակներ առնենք, որոնք ցոյց կու տան թէ աշխարհային պատրանքները ինչո՛ւ պէտք է մերժենք։ Բանսարկու Սատանային պարագան, լաւագոյն օրինակը կը հանդիսանայ, թէ անձնասէր պատրանքներու անձնատուր ըլլալէ ի՛նչ վտանգներու կ’առաջնորդէ։ Ան թոյլ տուաւ որ ինքնահամարում զարգանայ իր սրտին մէջ, ա՛յն աստիճան, որ Տիեզերքի Գերիշխան Եհովայի յատուկ եղող դիրքին նախանձեցաւ եւ ուզեց պաշտուիլ։ (Ղուկաս 4։5–8) Ասիկա անիրապաշտ պատրա՞նք մըն էր։ Անշո՛ւշտ։ Անիկա անվիճելիօրէն պիտի փաստուի, երբ Սատանան կապուի հազար տարի եւ մանաւանդ երբ երկրորդ մահը ներկայացնող «կրակի լիճին» մէջ ձգուի։—Յայտնութիւն 20։1–3, 10
4. Սատանան ինչպէ՞ս խաբեց Եւան։
4 Առաջին կինը՝ Եւան մեզի ուրիշ ազդարարիչ օրինակ մըն է։ Սատանան իր ցանկութիւնը իրագործելու համար, Եւան խաբեց, անոր մտքին հրամցնելով այն պատրանքը, որ եթէ արգիլուած պտուղը ուտէր, պիտի չմեռնէր, այլ Աստուծոյ պէս պիտի ըլլար, բարին ու չարը գիտնալով։ Արդեօք այդ պատրանքը անիրապաշտ, անձնասէ՞ր բան մըն էր։ Արդարե՛ւ, ինչպէս կարելի է տեսնել Եւայի ու Ադամի տուած Աստուծոյ դատավճիռէն։ Որպէս հետեւանք թէ՛ իրենց եւ թէ իրենց անկատար սերունդին համար Դրախտին մէջ ապրելու իրաւունքը կորսնցուցին։—Ծննդոց 3։1–19. Հռովմայեցիս 5։12
5. Աստուծոյ կարգ մը հրեշտակային որդիներուն անկումին պատճառը ի՞նչ էր եւ ասոր հետեւանքը ի՞նչ եղաւ իրենց համար։
5 Ունինք նաեւ Աստուծոյ հրեշտակային կարգ մը որդիներուն ազդարարիչ օրինակը։ (Ծննդոց 6։1–4) Փոխանակ երկնքի մէջ Եհովայի ներկայութիւնը վայելելով գոհ ըլլալով, անոնք երկրի վրայ կիներու եւ անոնց հետ սեռային յարաբերութիւն ունենալուն որքան հաճոյալի ըլլալուն մասին պատրանքներ հիւսեցին։ Քանի որ իրենց պատրանքներուն համաձայն վարուեցան, այդ անհնազանդ հրեշտակները հիմա Տարտարոսի հոգեւոր խաւարի դատապարտուած են եւ Յիսուս Քրիստոսի Հազարամեայ Իշախնութեան վախճանին իրենց բնաջնջումին կը սպասեն։—Բ. Պետրոս 2։4. Յուդա 6. Յայտնութիւն 20։10
Աշխարհային Պատրանքները Մերժենք
6, 7. Նիւթական հարստութեան մասին աշխարհային պատրանքները ինչո՞ւ վնասակար եւ խաբէական են։
6 Հիմա նկատի առնենք Սատանայի յառաջ մղած ամենէն հասարակ եւ վտանգաւոր պատրանքներէն մէկը։ Մամուլի բոլոր ձեւերով, աշխարհային պատրանքներու միջամուխ ըլլալու քաջալերութիւն կը տրուի։ Ասոնք յաճախ կը պատճառուին հարստութեան հանդէպ տենչէ մղուած։ Ինքնին սխալ չէ հարստութիւն ունենալ։ Աստուածավախ Աբրահամ, Յոբ եւ Դաւիթ Թագաւոր շատ հարուստ էին, բայց անոնք նիւթական հարստութեան տենչը չունէին։ Նիւթապաշտական պատրանքները անհատները կը մղէ որ տարիներ տգնաջան աշխատին հարստութիւն ձեռք ձգելու համար։ Այսպիսի պատրանքներ, ամէն տեսակ բախտախաղի, ինչպէս՝ ձիարշաւի կամ բախտի տոմսեր գնելու կը մղէ։ Հարստութեան մասին որեւէ պատրանք չհիւսենք։ Եթէ կը խորհինք որ նիւթական հարստութիւնը մեզի ապահովութիւն պիտի տայ, հետեւեալ իրապաշտ առակը նկատի առէք. «Բարկութեան օրը հարստութիւնը օգուտ մը չ’ըներ, բայց արդարութիւնը մահուանէ կ’ազատէ»։ (Առակաց 11։4) Արդարեւ, նիւթական հարստութիւնը «մեծ նեղութենէն» վերապրելու համար օգուտ մը պիտի չընէ։—Մատթէոս 24։21. Յայտնութիւն 7։9, 14
7 Նիւթական հարստութիւնը շատ դիւրութեամբ կրնայ մեզ խաբել։ Անոր համար մեզի ըսուած է. «Հարուստին ստացուածքը իր ամուր քաղաքն է ու անոր երեւակայութեանը մէջ բարձր բերդի պէս է»։ (Առակաց 18։11) Այո, միայն իր «երեւակայութեանը մէջ», քանի որ նիւթական հարստութիւնը շատ քիչ պաշտպանութիւն մը կու տայ յարաճուն դրամահոսկի, տնտեսական փլուզումի, քաղաքական վերիվայրումներու, կամ անբուժելի հիւանդութեան պարագային։ Յիսուս Քրիստոս մեզ զգուշացուց մեր վստահութիւնը նիւթական հարստութեան վրայ դնելու յիմարութեան դէմ։ (Ղուկաս 12։13–21) Ունինք նաեւ Պօղոս առաքեալի հետեւեալ ազդարարութիւնը. «Բոլոր չարութիւններուն արմատը արծաթասիրութիւնն է, որուն մէկ քանիները անձնատուր ըլլալով՝ հաւատքէն մոլորեցան ու ինքզինքնին շատ ցաւերով խոցեցին»։—Ա. Տիմոթէոս 6։10
8. Սեռային գետնի վրայ աշխարհային պատրանքները որքան համատարած են եւ ասիկա ի՞նչ վտանգ կը սպառնայ։
8 Ուրիշ պատրանքներ կապ ունին անօրէն սեռի հետ։ Հեռախօսի թիւ մը դարձնելով եւ պոռնկագրական պատգամներ մտիկ ընելով բանաւոր պղծութիւններուն ժողովրդական ըլլալը ցոյց կու տայ, թէ մարդկային մեղաւոր բնոյթը ո՛ր աստիճան կը սիրէ սեռային պատրանքներով ապրիլ։ Միացեալ Նահանգներու մէջ բազմամիլիառաւոր տոլարի առուտուր մըն է հեռաձայնային պոռնկագրութիւնը։ Եթէ թոյլ տանք որ մեր մտքերը անօրէն սեռի վրայ կեդրոնանան, կեղծաւորներ պիտի չըլլա՞նք, միայն մաքուր Քրիստոնեաներ ըլլալու երեւոյթը առնելով։ Իսկ վտանգ չկա՞յ որ այսպիսի պատրանքներ մեզ անբարոյ մտերմութիւններու առաջնորդեն։ Ասիկա ոմանց պատահած է եւ որոնք պոռնկութիւն կամ շնութիւն գործելով Քրիստոնէական ժողովքէն վտարուած են։ Ըստ Մատթէոս 5։27, 28–ի Յիսուսի խօսքերուն, այսպիսի պատրանքներու անձնատուր եղողները, իրենց սրտին մէջ արդէն պոռնկութիւն չե՞ն գործեր։
9. Աշխարհային պատրանքներու դէմ մեզ զգուշացնելու համար Աստուածաշունչը ի՞նչ լաւ խրատներ կու տայ։
9 Այսպիսի պատրանքներու անձնատուր ըլլալու մեր մեղաւոր սրտի հակումին դէմ դնելու համար, պէտք է միշտ ի մտի ունենանք Պօղոսի հետեւեալ ազդարարութիւնը. «Չկայ արարած մը որ անոր [Աստուծոյ] առջեւ չերեւնայ, հապա ամէն բան բաց ու յայտնի է անոր աչքերուն առջեւ, որուն պիտի տրուի մեր հաշիւը»։ (Եբրայեցիս 4։13) Միշտ Մովսէսի նման ըլլալ պէտք է փափաքինք, որ «համբերեց՝ որպէս թէ Անտեսանելին կը տեսնէր»։ (Եբրայեցիս 11։27) Այո, պէտք է շարունակենք մենք մեզի յիշեցնել, թէ աշխարհային պատրանքները Եհովայի հաճելի չեն եւ միայն վնաս կը հասցնեն մեզի։ Աստուծոյ հոգիին պտուղները՝ մանաւանդ ժուժկալութիւնը, մշակելով հետաքրքրուած պէտք է ըլլանք, քանի որ չենք կրնար խուսափիլ. եթէ մարմնին սերմանենք, այդ մարմինէն ապականութիւն պիտի հնձենք։—Գաղատացիս 5։22, 23. 6։7, 8
Թագաւորութեան Իրողութիւնները
10, 11. (ա) Ի՞նչ իրողութիւններ կ’ապացուցանեն Ստեղծիչի մը գոյութիւնը։ (բ) Ի՞նչ փաստ կայ թէ Աստուածաշունչը իրապէս Աստուծոյ Խօսքն է։ (գ) Աստուծոյ Թագաւորութեան Թագաւորին իրական ըլլալուն համար ի՞նչ ապացոյց կայ։
10 Աշխարհային պատրանքները մերժելու լաւագոյն կերպն է Թագաւորութեան իրողութիւնները հետապնդել։ Աստուծոյ մատակարարած Թագաւորութեան իրողութիւնները, աշխարհային պատրանքներուն ճիշդ հակառակն են։ Աստուած իրողութի՞ւն մըն է։ Իր գոյութեան մասին կասկած չկայ։ Տեսանելի ստեղծագործութիւնը կը վկայէ այդ իրողութեան։ (Հռովմայեցիս 1։20) Աւելի քան հարիւր տարի առաջ, Դիտարանի Ընկերութեան կողմէ հրատարակուած Դարերու Աստուածային Ծրագիրը գրքին մէջ նշուած էր. «Այդ անհատը որ հեռադիտակով կամ իր բնական աչքերով երկինքը կը քննէ եւ հոն կը տեսնէ ստեղծագործութեան անհունութիւնը, անոր համաչափութիւնը, գեղեցկութիւնը, կարգապահութիւնը, ներդաշնակութիւն եւ այլազանութիւնը եւ սակայն կասկածի թէ անոնց Ստեղծիչը իմաստութեամբ եւ զօրութեամբ գերակայ է, կամ պահ մը ենթադրէ թէ այս բոլոր կարգապահութիւնը դիպուած մըն է ու Ստեղծիչ մը չունի, իր տրամաբանութիւնը կորսնցուցած, կամ տգէտ է. Աստուածաշունչի լեզուով՝ յիմար (մէկը որ տգէտ է կամ անբան է) է»։—Սաղմոս 14։1
11 Թագաւորութեան մասին ամէն բան Սուրբ Գիրքէն կրնանք սորվիլ։ Աստուածաշունչը իրապէս Աստուծոյ գրաւոր Խօ՞սքն է։ Երբ անոր ներդաշնակութիւնը, գիտական ճշգրտութիւնը եւ մարդոց կեանքերը փոխելու անոր զօրութիւնը եւ մանաւանդ անոր մարգարէութիւններուն կատարումը տեսնենք, վստահաբար այո՛ կրնանք ըսել։a Իսկ ի՞նչ կրնանք ըսել Աստուծոյ Թագաւորութեան Թագաւորին՝ Յիսուս Քրիստոսի մասին։ Ան իրապէս գոյութիւն ունեցա՞ծ է։ Աւետարանին պատմութիւնները եւ Քրիստոնէական Յունարէն գրութիւններուն ներշնչուած նամակները յստակօրէն եւ պերճախօսօրէն կը վկայեն Յիսուս Քրիստոսի պատմական անձնաւորութիւն մը ըլլալուն։ Յիսուսի պատմական անձնաւորութիւն մը ըլլալուն մասին կը վկայէ նաեւ Հրէական Թալմուտը։ Նոյնը կ’ընեն նաեւ Հ. Դ. առաջին դարու Հրեայ եւ Հռովմէացի պատմաբանները։
a Տես՝ Աստուածաշունչը Իրապէ՞ս Աստուծոյ Խօսքն է գիրքը, հրատարակուած Նիւ Եորքի Դիտարանի, Սուրբ Գրքի եւ Թերթիկի Ընկերութեան կողմէ։
12, 13. Ի՞նչ իրողութիւններ կը վկայեն Աստուծոյ Թագաւորութեան իրողութիւն մը ըլլալուն։
12 Իսկ ի՞նչ կրնանք ըսել ուղղակի Թագաւորութեան իրողութեան մասին։ Քրիստոնեայ Աշխարհը շատ անտեսած է զայն, ինչպէս կը տեսնուի կարկառուն Երիցականի մը հետեւեալ արտայայտութենէն. «Վստահաբար աւելի քան երեսուն տարի առաջ լսեցի որ քարոզիչ մը կը բացատրէր իր ժողովուրդին, թէ Թագաւորութիւնը իրողութիւն մըն էր իրենց համար»։ Սակայն, Աստուածաշունչին գլխաւոր բնաբանն է՝ Եհովայի անուան սրբացումը իր Թագաւորութեան միջոցաւ։ Աստուած ի՛նք Թագաւորութեան մասին առաջին խոստումը տուաւ, երբ ըսաւ. «Քու ու կնոջ մէջտեղ, քու սերունդիդ ու անոր սերունդին մէջտեղ թշնամութիւն պիտի դնեմ։ Ան քու գլուխդ պիտի ջախջախէ եւ դուն անոր գարշապարը պիտի խայթես»։ (Ծննդոց 3։15) Թագաւորութեան նախաշուքն էր Իսրայէլ ազգը, մանաւանդ Սողոմոն Թագաւորի իշխանութեան ընթացքին։ (Սաղմոս 72) Թագաւորութիւնը Յիսուսի քարոզչութեան կորիզը կը կազմէր։ (Մատթէոս 4։17) Իր առակներէն շատերը անոր շուրջ կը դառնան, ինչպէս կը տեսնուի Մատթէոս 13րդ գլուխին մէջ։ Յիսուս ըսաւ որ Թագաւորութեան համար աղօթենք եւ ամէն բանէ առաջ զայն փնտռենք։ (Մատթէոս 6։9, 10, 33) Աստուծոյ Թագաւորութիւնը գրեթէ 150 անգամ յիշուած է Քրիստոնէական Յունարէն գրութեանց մէջ։
13 Թագաւորութիւնը՝ զօրութիւն եւ հեղինակութիւն ունեցող իրական կառավարութիւն մըն է եւ անիկա մարդոց իրաւացի ակնկալութիւններուն գոհացում պիտի տայ։ Անիկա օրէնսդրութիւն մը ունի, զոր Աստուածաշունչին մէջ կը գտնենք։ Թագաւորութիւնը արդէն շատ մը բաներ իրականացուցած է։ Անիկա հաւատարիմ հպատակներ ունի, աւելի քան՝ 4,000,000 Եհովայի Վկաներ։ 211 երկիրներու մէջ անոնք կը քարոզեն Թագաւորութեան բարի լուրը, կատարելով Մատթէոս 24։14–ը։ Իրենց 1991 ծառայութեան տարուան ընթացքին, անոնք Թագաւորութեան պատգամը քարոզելու համար 951,870,021 ժամեր տրամադրած են։ Այս գործունէութիւնը շօշափելի, մնայուն արդիւնքներ յառաջ կը բերէ, քանի որ ամբոխներ Աստուածաշունչի «մաքուր լեզուն» կը սորվին։—Սոփոնեայ 3։9
Թագաւորութեան Իրողութիւնները Հետապնդել
14. Թագաւորութիւնը իրողութիւն մը ըլլալուն նկատմամբ ինչպէ՞ս կրնանք մեր գնահատութիւնը զօրացնել։
14 Արդ, ինչպէս կրնանք Թագաւորութեան իրողութիւնները հետապնդել։ Մեր յոյսը զօրաւոր համազումներու վրայ հաստատուած պէտք է ըլլայ։ Աստուծոյ խոստացած նոր աշխարհը, իրական պէտք է ըլլայ մեզի համար։ (Բ. Պետրոս 3։13) Իսկ պէտք է հաւատանք այն խոստումին, թէ Աստուած «անոնց աչքերէն բոլոր արցունքները պիտի սրբէ եւ ա՛լ մահ պիտի չըլլայ։ Ո՛չ սուգ եւ ո՛չ աղաղակ եւ ո՛չ ցաւ պիտի ըլլայ ասկէ յետոյ, վասնզի առաջուան բաները անցան»։ (Յայտնութիւն 21։4) Ինչպէ՞ս կրնանք վստահ ըլլալ որ ասիկա պատրանք մը չէ։ Ասիկա պիտի իրականանայ Աստուծոյ որոշած ժամանակին, քանի որ անկարելի է որ Ան ստէ։ (Տիտոս 1։1, 2. Եբրայեցիս 6։18) Պէտք է խոկանք այս խոստումներուն վրայ։ Մենք մեզ Աստուծոյ նոր դրութեան մէջ պատկերացնելը եւ անոր օրհնութիւնները վայելելը անիրապաշտ պատրանքներ չեն, այլ հաւատքի ապացոյց է։ Ինչպէս Պօղոս բացատրեց. «Հաւատաքը յուսացուած բաներուն երաշխաւորուած ակնկալութիւնը եւ չերեւցած իրողութիւններուն հաստատ ապացոյցն է»։ (Եբրայեցիս 11։1) Մեր հաւատքը զօրացնենք կանոնաւորաբար կերակրուելով Աստուծոյ Խօսքով եւ Քրիստոնէական հրատարակութիւններով, որոնք մեզի կ’օգնեն որ զայն հասկնանք ու գործադրենք։ Իսկ ուրիշներուն թագաւորութեան մասին խօսելու համար որքան շատ ժամանակ յատկացնենք՝ թէ պաշտօնական եւ թէ անպաշտօն կերպով՝ այդքան աւելի մեր հաւատքը կը զօրացնենք եւ անոր վրայ մեր յոյսը վառ կը պահենք։
15. Քրիստոնէական ծառայութեան նկատմամբ ի՞նչ ստիպողականութիւն ունինք։
15 Թագաւորութեան իրողութիւններուն համաձայն պէտք է գործենք նաեւ, մեր ծառայութեան որակը բարելաւելով։ Քանի որ տակաւին ընելիք շատ բան կայ, ինչպէ՞ս կրնանք ասիկա ընել։ (Մատթէոս 9։37, 38) Ճիշդ է այդ առածը թէ՝ սորվելու համար շատ ծեր չենք։ Հոգ չէ թէ քանի տարի մասնակցած ենք վկայութեան գործին, տակաւին կրնանք բարելաւումներ ընել։ Երբ Աստուծոյ Խօսքը աւելի ազդեցիկ կերպով գործածել գիտնանք, ուրիշներուն աւելի լաւ կերպով կրնանք օգնել որ Թագաւոր Յիսուս Քրիստոսի ձայնը լսեն։ (Բաղդատել Յովհաննու 10։16) Երբ նկատի ունենանք որ մարդոց յաւիտենականութիւնը խնդրոյ առարկայ է, այդ պարագային մեր թաղամասը լիովին պիտի աշխատինք, որպէսզի անոնք կրկնակի պատեհութիւն ունենան տեսնելու թէ ի՛նչ է իրենց դիրքը, «այծ»՝ թէ «ոչխար»։ (Մատթէոս 25։31–46) Անշուշտ, ասիկա կը նշանակէ բացականերու ինչպէս նաեւ Թագաւորութեան պատգամով հետաքրքրուողներու մասին հոգածու արձանագրութիւն մը պահել։
Շարունակենք Թագաւորութիւնը Հետապնդել
16. Թագաւորութեան իրողութիւնները հետապնդելու մէջ որո՞նք օրինակ հանդիսացած են եւ անոնք Թագաւորութիւնը ինչպէս «կը յափշտակեն»։
16 Թագաւորութեան իրողութիւնները հետապնդելու համար տգնաջան ջանքեր կը պահանջուին։ Օծեալ Քրիստոնեաներու մնացորդին եռանդուն օրինակը մեզի համար քաջալերութեան աղբիւր մը չէ՞։ Անոնք տասնեակ տարիներէ ի վեր Թագաւորութեան իրողութիւնները կը հետապնդեն։ Այս հետապնդումը նկարագրուած էր Յիսուսի խօսքերուն մէջ. «Յովհաննէս Մկրտիչի օրերէն մինչեւ հիմա երկնքի թագաւորութիւնը ուժով կ’առնուի եւ ուժեղները [անոնք որ առաջ կը նետուին] կը յափշտակեն զանիկա»։ (Մատթէոս 11։12) Հոս այն միտքը չ’արտայայտեր թէ թշնամիները կը յափշտակեն Թագաւորութիւնը, այլ, կ’ակնարկէ Թագաւորութեան համար նշանակուածներուն գործունէութեան։ Աստուածաշունչի ուսումնական մը կ’ըսէ. «Այս կերպով նկարագրուած է թէ ժրաջան եւ անդիմադրելի կերպով պէտք է տենչալ եւ պայքարիլ Մեսիական մօտալուտ թագաւորութեան համար»։ Օծեալները ո՛չ մէկ ջանք խնայած են Թագաւորութեան մասնակից ըլլալու համար։ Աստուծոյ երկնային Թագաւորութեան երկրային հպատակներ ըլլալու որակելի ըլլալու համար, «ուրիշ ոչխարներ»էն ալ նոյնանման տգնաջան աշխատանք պահանջուած է։—Յովհաննու 10։16
17. Աշխարհային պատրանքներ հետապնդողներուն ի՞նչ վերապահուած է։
17 Իրապէս, պատեհութեան մասնաւոր ժամանակաշրջանի մը մէջ կ’ապրինք։ Անոնք որ աշխարհային պատրանքներ կը հետապնդեն, օր մը պիտի զարթնին եւ իրողութիւնը դիմագրաւեն։ Անոնց վիճակուած է հետեւեալ բաժինը. «Ինչպէս անօթի եղողը երազին մէջ կը տեսնէ թէ կերակուր կ’ուտէ, բայց արթննալէն ետքը փորը անօթի կը մնայ, ինչպէս ծարաւ մարդը երազին մէջ կը տեսնէ թէ ջուր կը խմէ, բայց արթննալէն ետքը կը մարի ու հոգին կը պապակի»։ (Եսայեայ 29։8) Որոշ է որ աշխարհի պատրանքները ոեւէ մէկուն գոհունակութիւն եւ ուրախութիւն չեն կրնար տալ։
18. Քանի որ Թագաւորութիւնը իրողութիւն մըն է, ի՞նչ ընթացքի պէտք է հետեւինք եւ ի՞նչ ակնկալութեամբ։
18 Եհովայի Թագաւորութիւնը իրողութիւն մըն է։ Անիկա եռանդուն կերպով կը տիրէ, մինչդեռ իրերու այս ամբարիշտ դրութիւնը վաղահաս ու վերջնական կործանման մը կը դիմէ։ Ուստի, սրտանց մտիկ ընենք Պօղոսի խրատը. «Ուրեմ չքնանանք ինչպէս ուրիշները, հապա արթուն ու զգաստ ըլլանք»։ (Ա. Թեսաղոնիկեցիս 5։6) Մեր սրտերը եւ մտքերը սեճեռենք Թագաւորութեան իրողութիւններուն վրայ, եւ վայելենք յաւիտենական օրհնութիւնները։ Իսկ թող որ այդ Թագաւորութեան Թագաւորը մեզի ալ ըսէ՝ «Եկէք իմ Հօրս օրհնածները, աշխարհի սկիզբէն ձեզի համար պատրաստուած թագաւորութիւնը ժառանգեցէք»։—Մատթէոս 25։34
Ինչպէ՞ս Պիտի Պատասխանէիք
◻ Ի՞նչ են աշխարհային պատրանքները եւ ինչո՞ւ պէտք է մերժենք զանոնք։
◻ Ի՞նչ օրինակներ ցոյց կու տան թէ աշխարհային պատրանքներու միջամուխ ըլլալը վտանգաւոր է։
◻ Որ իրողութիւնները կը փաստեն թէ Ստեղծիչը, իր գրաւոր Խօսքը, Յիսուս Քրիստոս եւ Թագաւորութիւնը իրողութիւններ են։
◻ Ինչպէ՞ս կրնանք մեր հաւատքը զօրացնել Թագաւորութեան իրողութիւններուն նկատմամբ։
[Նկար՝ էջ 24]
Աշխարհային պատրանքներուն պատճառը յաճախ նիւթական հարստութեան տենչն է
Բարի լուրը քարոզելը Թագաւորութեան իրողութիւնները հետապնդելու կերպերէն մէկն է
[Նկար՝ էջ 26]
Աստուծոյ Խօսքը ժրաջանօրէն սերտելով Թագաւորութեան իրողութիւնները կը հետապնդէ՞ք