Ձեզի համար ի՞նչ կը նշանակէ ուռկանը եւ ձուկերը

«Ձեզի տրուած է գիտնալ երկնքի թագաւորութեան խորհուրդները»։—ՄԱՏԹԷՈՍ 13։11

1, 2. Ինչո՞ւ պէտք է հետաքրքրուինք Յիսուսի առակներով։

ԳԱՂՏՆԻՔ մը պարզելէն եւ հանելուկ մը լուծելէն հաճոյք կ’առնէ՞ք։ Ի՞սկ եթէ այդպէս ընելը Աստուծոյ նպատակին մէջ ձեր բաժինը աւելի յստակօրէն տեսնելու օգնէր ձեզի։ Բարեբախտաբար, այսպիսի առանձնաշնորհեալ խորաթափանց հասկացողութիւն կրնաք ձեռք ձգել Յիսուսի տուած առակի մը միջոցաւ։ Զայն լսողներէն շատեր շփոթեցան եւ անկէ ի վեր, անհամար անհատներու համար ան առեղծուած մը մնացած է, սակայն դուք կրնաք հասկնալ զայն։

² Նկատեցէք թէ Յիսուս ի՛նչ ըսաւ Մատթէոս 13րդ գլուխին մէջ, իր առակներ գործածելուն մասին։ Իր աշակերտները հարցուցին անոր. «Ինչո՞ւ համար առակներով կը խօսիս անոնց»։ (Մատթէոս 13։10) Այո, ինչո՞ւ Յիսուս առակներով կը խօսէր, զորս ունկնդիրներուն մեծամասնութիւնը չէր հասկնար։ Անոնց հետեւեալ պատասխանը տուաւ, 11–էն 13–րդ համարներուն մէջ. «Ձեզի տրուած է գիտնալ երկնքի թագաւորութեան խորհուրդները, բայց անոնց տրուած չէ։ ... Անոր համար առակներով կը խօսիմ անոնց, որ կը տեսնեն՝ ու չեն տեսներ եւ կը լսեն՝ ու չեն լսեր ու միտք չեն առներ»։

3. Յիսուսի առակները հասկնալը ի՞նչ օգուտ ունի մեզի համար։

³ Ապա ան Եսայեայ 6։9, 10–ի կիրարկուրը ըրաւ, ուր հոգեւորապէս խուլ եւ կոյր ժողովուրդ մը կը նկարագրէ։ Մենք, սակայն, կարիքը չունինք անոնց նմանելու։ Եթէ Յիսուսի առակները հասկնանք եւ անոնց համաձայն գործենք, կրնանք շատ ուրախ ըլլալ հիմա եւ յաւիտեան։ Յիսուս այս ջերմ վստահութիւնը կը հաղորդէ մեզի. «Երանի՜ է ձեր աչքերուն, որոնք կը տեսնեն ու ձեր ականջներուն, որոնք կը լսեն»։ (Մատթէոս 12։16) Այդ վստահութիւնը Յիսուսի բոլոր առակներուն համար է։ Սակայն, այժմ, Մատթէոս 13։47–50–ի մէջ արձանագրուած ուռկանին հակիրճ առակին դարձնենք մեր ուշադրութիւնը։

Խորիմաստ Առակ մը

4. Յիսուս առակով ի՞նչ սորվեցուց, ինչպէս արձանագրուած է Մատթէոս 13։47–50–ի մէջ։

⁴«Դարձեալ երկնքի թագաւորութիւնը ծովը ձգուած ուռկանի մը նման է, որ ամէն տեսակ ձուկ կը ժողվէ։ Երբ ուռկանը լեցուեցաւ, ցամաքը հանեցին ու նստան աղէկները ամաններու մէջ ժողվեցին եւ անշահը դուրս ձգեցին։ Այսպէս պիտի ըլլայ աշխարհիս վերջը։ Հրեշտակները պիտի ելլեն ու արդարներուն մէջէն չարերը պիտի զատեն։ Եւ պիտի ձգեն զանոնք կրակի հնոցին մէջ, հոն պիտի ըլլայ լալ ու ակռաներ կրճտել»։

5. Ուռկանի առակին իմաստին մասին ի՞նչ հարցումներ կը յարուցուին։

⁵ Հաւանաբար տեսած էք ուռկանով մը ձուկ որսացող մարդիկ, գոնէ շարժապատկերի կամ հեռատեսիլի մէջ. ուստի Յիսուսի առակը մտապատկերելը դժուար չէ։ Սակայն ի՞նչ կրնանք ըսել անոր մանրամասնութիւններուն եւ իմաստին մասին։ Օրինակի համար, Յիսուս ըսաւ որ այս առակը ‘երկնքի թագաւորութեան’ մասին է։ Սակայն, վստահօրէն անիկա ըսել չէր ուզեր, որ «ամէն տեսակ» մարդիկ, թէ՛ աղէկներ եւ թէ անշահներ, կամ չարեր, Թագաւորութեանը մէջ պիտի ըլլան։ Նաեւ, որո՞նք են որսորդները։ Արդեօք այս ձկնորսութիւնը եւ զատումը Յիսուսի՞ օրերուն տեղի ունեցան, թէ ոչ մեր օրերուն ‘իրերու դրութեան վախճանին’ սահմանուած են։ Այս առակին մէջ մենք մեզ կը տեսնե՞նք։ Ինչպէ՞ս կրնանք խուսափիլ վերջապէս լացող ու իրենց ակռաները կրճտողներուն մէջ ըլլալէ։

6. (ա) Ուռկանին առակը հասկնալու համար ինչո՞ւ սուր հետաքրքրութիւն մը պէտք է ունենանք։ (բ) Զայն հասկնալու գլխաւոր բանալին ի՞նչ է։

⁶ Այսպիսի հարցումներ կը մատնանշեն որ այս առակը այդքան ալ պարզ չէ։ Չմոռնաք, սակայն հետեւեալ խօսքերը. «Երանի՜ է ձեր աչքերուն, որոնք կը տեսնեն ու ձեր ականջներուն որոնք կը լսեն»։ Տեսնենք թէ արդեօք կրնա՞նք այս առակին իմաստին թափանցել, որպէսզի մեր ականջները անտարբեր եւ աչքերը գոց չըլլան անոր կարեւորութեան նկատմամբ։ Իրականութեան մէջ, անոր իմաստը երեւան հանելու համար արդէն կենսական բանալի մը ունինք։ Նախորդ յօդուածը մեզի բացատրեց թէ ի՛նչպէս Յիսուս Գալիլիացի ձկնորսներ հրաւիրեց, որ իրենց գործը ձգեն եւ հոգեւոր գործի մը ձեռնարկեն, որպէս «մարդոց որսորդ»։ (Մարկոս 1։17) Յիսուս ըսաւ անոնց. «Ասկէ ետեւ մարդոց որսորդ պիտի ըլլաք»։—Ղուկաս 5։10.

7. Յիսուսի առակին ձուկերը ի՞նչ կը ներկայացնեն։

⁷ Հաւանաբար եզրակացուցիք, որ այս առակին ձուկերը կը ներկայացնեն մարդիկը։ Ուստի, երբ 49–րդ համարը կը խօսի չարերը արդարներէն զատելու մասին, ասիկա չի նշանակեր չար եւ արդար ծովային արարածներ, այլ՝ մարդիկ, որոնք արդար կամ չար են։ Ոչ ալ 50–րդ համարը մեզի խորհիլ պէտք է տայ որ ծովային արարածները պիտի լան եւ իրենց ակռաները կրճտեն։ Ոչ, այս առակը մարդոց ժողվուելուն ու ապա անոնց զատուելուն մասին է, ինչ որ հետեւանքէն դատելով, շատ լուրջ հարց մըն է։

8. (ա) Անշահ ձուկերուն ճակաճագրին մասին ի՞նչ կը սորվինք։ (բ) Ինչ որ ըսուեցաւ անշահ ձուկերուն մասին, Թագաւորութեան նկատմամբ ի՞նչ կրնանք եզրակացնել։

⁸ Նկատեցի՞ք որ անշահ ձուկերը, այսինքն՝ չարերը՝ կրակի հնոցին մէջ պիտի ձգուին, ուր պիտի լան եւ իրենց ակռաները կրճտեն։ Ուրիշ տեղեր, Յիսուս այսպիսի լացը եւ ակռաներ կրճըտելը կցեց Թագաւորութենէն դուրս ձգուելուն։ (Մատթէոս 8։12. 13։41, 42) Իսկ Մատթէոս 5։22–ին եւ 18։9–ին մէջ, ան նոյնիսկ խօսեցաւ «Գեհենի կրակին» մասին, որ վերջնական կործանումի կ’ակնարկէ։ Արդեօք ասիկա ցոյց չի՞ տար թէ որքան կենսական է այս առակին իմաստը ըմբռնել եւ անոր համաձայն գործել։ Բոլորս ալ գիտենք թէ Աստուծոյ Թագաւորութեան մէջ ո՛չ չարեր կան, ո՛չ ալ պիտի ըլլան։ Ուստի, երբ Յիսուս ըսաւ որ «երկնքի թագաւորութիւնը ... ուռկանի մը նման է», ան հաւանաբար ըսել ուզեց, թէ Աստուծոյ Թագաւորութեան հետ կապակցաբար զանազան տեսակի ձուկեր ժողվելու համար, ծովը ձգուած ուռկանի մը նման կարգադրութիւն մը կայ։

9. Ուռկանի առակին մէջ հրեշտակները ի՞նչ դեր ունին։

⁹ Ուռկանը ծովը ձգուելէն եւ ձուկերը ժողվուելէն ետք, զատելու գործ մը պիտի ըլլար։ Ըստ Յիսուսի, որո՞նք պարփակուած էին այս գործին մէջ։ Մատթէոս 13։49–րդ համարը, ցոյց կուտայ, որ այս զատումը կատարող ձկնորսները՝ հրեշտակներ էին։ Ուստի, Յիսուս մեզի կը խօսէր, հրեշտակային վերակացութեան ներքեւ, երկրային գործիքի մը մասին, որ պիտի գործածուէր մարդիկը բնորոշելու—ոմանք որպէս աղէկ եւ շահաւոր երկնքի Թագաւորութեան համար, մինչ ուրիշներ՝ անշահ, կամ անյարմար այդ կոչումին։

Ձկնորսութիւնը. Ե՞րբ

10. Ո՞ր պատճառաբանութիւնը մեզի կ’օգնէ որոշելու որ ձկնորսութիւնը երկար ժամանակամիջոցի մը մէջ պիտի կատարուէր։

¹⁰ Ընդհանուր բովանդակութիւնը մեզի կ’օգնէ գտնելու թէ ասիկա ե՛րբ տեղի կ’ունենայ։ Այս առակէն առաջ, Յիսուս ուրիշ առակ մը տուաւ. արտի մը մէջ՝ որ աշխարհը կը պատկերացնէ՝ բարի սերմ կը ցանուի, բայց անկէ ետք անոր մէջ որոմներ կը ցանուին։ Մատթէոս 13։38–ին մէջ, ան բացատրեց որ բարի սերմը «թագաւորութեանը որդիներն են, բայց որոմը չարին որդիներն են»։ Դարեր շարունակ, ասոնք քով քովի աճեցան, մինչեւ՝ իրերու դրութեան վախճանին հունձքի ժամանակը։ Ապա որոմը, ժողվուեցաւ ու այրուեցաւ։ Այս առակը զուգորդելով ուռկանին առակին հետ, կը տեսնենք որ ուռկանին մէջ արարածներ քաշելը երկար ժամանակաշրջանի մը մէջ պիտի կատարուէր։—Մատթէոս 13։36–43

11. Առաջին դարուն, միջազգային ի՞նչ ձկնորսութիւն սկսաւ։

¹¹ Ըստ Յիսուսի, ձուկերը անխտրաբար պիտի ժողվուէին, այսինքն, ուռկանը թէ՛ աղէկ եւ թէ անշահ ձուկեր պիտի բռնէր։ Մինչ առաքեալները ողջ էին, ձկնորսութեան գործողութիւնը առաջնորդող հրեշտակները, Աստուծոյ Քրիստոնէական կազմակերպութիւնը գործածեցին «ձուկ»երը որսալու համար, որոնք օծեալ Քրիստոնեաներ եղան։ Թերեւս ըսէք որ մեր հասարակ դարաշրջան 33–ի Պէնտէկոստէէն առաջ, Յիսուս շուրջ 120 աշակերտներ որսացած էր։ (Գործք 1։15) Սակայն, անգամ մը որ օծեալ Քրիստոնեաներու ժողովքը հաստատուեցաւ, ուռկանը որպէս գործիք ունենալով, ձկնորսութեան գործողութիւնը սկսաւ եւ հազարաւոր աղէկ ձուկեր բռնուեցան։ Մեր հասարակ դարաշրջան 36–էն սկսեալ, այս ձկնորսութիւնը տարածուեցաւ միջազգային ջուրերու մէջ, երբ հեթանոսներ Քրիստոնէութեան կը բերուէին եւ Քրիստոսի օծեալ ժողովքին անդամները կ’ըլլային։—Գործք 10։1, 2, 23–48

12. Առաքեալներուն մահուընէ ետք ի՞նչ բան երեւան եկաւ։

¹² Առաքեալները երկրային թատերաբեմը ձգելուն յաջորդող դարերուն, կարգ մը հաւատարիմ Քրիստոնեաներ գտնուեցան, որոնք կը ջանային աստուածային ճշմարտութիւնը գտնել եւ անոր կառչիլ։ Անոնցմէ առնուազն ոմանք Աստուծոյ հաճութիւնը ունեցան եւ Ան սուրբ հոգիովը օծեց զանոնք։ Սակայն, առաքեալներուն մահը արգելիչ ազդեցութիւնը վերցուց, թոյլ տալով որ լայնատարած հաւատուրացութիւն մը զարգանայ։ (Բ. Թես. 2։7, 8) Կազմակերպութիւն մը մէջտեղ եկաւ, որ անարժանօրէն դաւանեցաւ Աստուծոյ ժողովքը ըլլալ։ Անիկա կեղծօրէն դաւանեցաւ Յիսուսի հետ իշխելու համար Աստուծոյ հոգիով օծուած սուրբ ազգը ըլլալ։

13. Ինչո՞ւ կրնանք ըսել որ ուռկանի գործողութեան մէջ Քրիստոնեայ Աշխարհը դեր մը ունի։

¹³ Կը խորհի՞ք որ Քրիստոնէութիւն դաւանող այդ անհաւատարիմները, որեւէ բաժին ունէին ուռկանին առակին մէջ։ Լաւ պատճառ ունինք դրական կերպով պատասխանելու։ Այլաբանական ուռկանը կը պարփակէր Քրիստոնեայ Աշխարհը։ Ճիշդ է որ Կաթողիկէ Եկեղեցին, դարեր շարունակ, ջանաց Աստուածաշունչը հասարակ ժողովուրդէն հեռու պահել։ Այսուհանդերձ, դարերու ընթացքին, Քրիստոնեայ Աշխարհի անդամները մեծ դեր մը խաղացին Աստուծոյ Խօսքը թարգմանելու, ընդօրինակելու եւ տարածելու մէջ։ Հետագային, Եկեղեցիները Աստուածաշունչի ընկերութիւններ կազմեցին, կամ անոնց թիկունք կանգնեցան, որոնք Աստուածաշունչը երկրի հեռաւոր մասերուն մէջ ապրողներուն լեզուներով թարգմանեցին։ Անոնք նաեւ բժշկական միսիոնարներ եւ ուսուցիչներ ղրկեցին, որոնք բրինձի Քրիստոնեաներ կերտեցին։ Այս գործողութիւնը հսկայական թիւով անշահ ձուկեր ժողվեց, որոնք Աստուծոյ հաճութիւնը չունէին։ Սակայն գոնէ Քրիստոնեայ չեղողներ շփման մէջ մտան Աստուածաշունչին եւ թէեւ եղծանուած՝ Քրիստոնէութեան մէկ ձեւին հետ։

14. Աղէկ ձուկերուն ձկնորսութեան ինչպէ՞ս նպաստեցին Քրիստոնեայ Աշխարհի եկեղեցիները։

¹⁴ Միեւնոյն ժամանակ, ցիրուցան եղած եւ Աստուծոյ Խօսքին կառչած հաւատարիմներ, ամէն ջանք կը թափէին իրենց լաւագոյնը ընելու։ Անոնք, որեւէ տուեալ ժամանակին մէջ, Աստուծոյ ճշմարիտ օծեալ ժողովքը կը կազմէին երկրի վրայ։ Կրնանք վստահ ըլլալ որ անոնք ալ ձուկեր կամ մարդիկ կ’որսային, որոնցմէ շատերը Աստուած աղէկ պիտի նկատէ եւ իր սուրբ հոգիովը պիտի օծէ։ (Հռովմայեցիս 8։14–17) Քրիստոնէութիւն դաւանող այս աղէկ անհատները, կրցան Աստուածաշունչի ճշմարտութիւնը գիտցնել եւ հասկցնել շատերու, որոնք բրինձի Քրիստոնեաներ եղած էին, կամ որոնք սուրբ գրային սահմանափակուած գիտութիւն մը ձեռք ձգած էին, Քրիստոնեայ Աշխարհի Աստուածաշունչի ընկերութիւններու կողմէ իրենց լեզուով թարգմանուած Սուրբ Գրութիւններէն։ Ճիշդ է որ աղէկ ձուկերու հաւաքումը կը շարունակուէր, նոյնիսկ երբ ժողվուածներուն մեծամասնութիւնը անշահ էր Աստուծոյ հայեացքով։

15. Առակին մէջի ուռկանը ճշգրտօրէն ի՞նչ կը պատկերացնէ։

¹⁵ Ուստի, ուռկանը կը ներկայացնէ երկրային գործիք մը, որ կը դաւանի Աստուծոյ ժողովքը ըլլալ եւ ձուկեր կը ժողվէ։ Անիկա կը պարփակէ թէ՛ Քրիստոնեայ Աշխարհը եւ թէ հարազատ օծեալ Քրիստոնեաներու ժողովքը, այս վերջինը շարունակելով աղէկ ձուկեր ժողվել հրեշտակներու անտեսանելի առաջնորդութեան ներքեւ, ըստ Մատթէոս 13։49–ի։

Մասնայատուկ Ժամանակի մը մէջ կ’Ապրինք

16, 17. Մեր ժամանակը ինչո՞ւ շատ կարեւոր է Յիսուսի ուռկանի առակին գործունէութեան համար։

¹⁶ Հիմա նկատի առնենք ժամանակի հարցը։ Դարեր շարունակ, ուռկանանման գործիքը թէ՛ աղէկ ձուկեր եւ թէ անշահ կամ չար ձուկեր ժողվեց։ Ապա ժամանակը եկաւ, երբ հրեշտակները զատումի ճակատագրական գործին ձեռնարկեցին։ Ե՞րբ էր ասիկա։ 49–րդ համարը յստակօրէն կ’ըսէ թէ ասիկա «աշխարհիս վերջ»ին կամ իրերու դրութեան վախճանին ընթացքին պիտի ըլլար։ Ասիկա կը յարմարի ոչխարներու եւ այծերու առակին մէջ Յիսուսի ըսածին. «Երբ Որդին մարդոյ իր փառքովը գայ եւ բոլոր սուրբ հրեշտակները իրեն հետ, այն ատեն իր փառաց աթոռը պիտի նստի։ Անոր առջեւ պիտի ժողվուին բոլոր ազգերը ու զանոնք իրարմէ պիտի զատէ, ինչպէս հովիւ մը ոչխարները այծերէն կը զատէ»։—Մատթէոս 25։31, 32

¹⁷ Ուստի, Մատթէոս 13։47–50–ի հետ ներդաշնակ ըլլալով, հրեշտակային առաջնորդութեան ներքեւ, ճակատագրական զատումի գործ մը տեղի կ’ունենայ, 1914–ին «աշխարհի վերջ»ը կամ իրերու դրութեան վախճանը սկսելէն ի վեր։ Ասիկա մասնաւորաբար բացայայտ եղաւ 1919–էն ետք, երբ օծեալներու մնացորդը ազատագրուեցաւ ժամանակաւոր հոգեւոր կապանքէ կամ գերութենէ եւ ձկնորսութեան գործը կատարելու համար, աւելի ազդեցիկ գործիք մը դարձաւ։

18. Աղէկ ձուկերը ինչպէ՞ս ամաններու մէջ ժողվուած են։

¹⁸ Զատուած աղէկ ձուկերուն ի՞նչ պիտի պատահէր։ 48–րդ համարը կ’ըսէ թէ զատումը կատարող հրեշտակ–ձկնորսները «աղէկները [աղէկ ձուկերը] ամաններու մէջ ժողվեցին եւ անշահը դուրս ձգեցին»։ Ամանները պահեստամաններ են, որոնց մէջ աղէկ ձուկերը կը պահուին։ Այսպիսի գործողութիւն մը տեղի ունեցա՞ծ է մեր օրերուն։ Անշո՛ւշտ։ Երբ այլաբանական աղէկ ձուկեր ողջ բռնուած են, անոնք ճշմարիտ Քրիստոնեաներու ժողովքներուն մէջ ժողվուած են։ Համաձայն չէ՞ք որ այս ամանանման ժողովքները զանոնք պահպանած եւ աստուածային ծառայութեան համար զատած են։ Սակայն մէկը կրնայ հարցնել. ‘Այս բոլորը լաւ են, բայց անոնք ի՞նչ կապ ունին իմ ներկայ եւ ապագայ կեանքիս հետ’։

19, 20. (ա) Ինչո՞ւ ներկայիս կենսական է առակին իմաստը հասկնալ։ (բ) 1919–էն ի վեր ի՞նչ կաերւոր ձկնորսութիւն մը կատարուած է։

¹⁹ Այս առակին կատարումը առաքեալներուն ժամանակէն մինչեւ 1914–ին միջեւ եղած դարերուն սահմանափակուած չէր։ Այդ ժամանակամիջոցին, ուռկան գործիքին մէջ բռնուեցան թէ՛ սուտ եւ թէ ճշմարիտ Քրիստոնեաներ։ Այո, թէ՛ անշահ եւ թէ աղէկ ձուկեր հաւաքուեցան։ Ասկէ զատ, հրեշտակներու կողմէ կատարուած զատումի գործը վերջ գտա՞ւ 1919–ին։ Բնա՛ւ երբեք։ Կարգ մը երեսակներով, ուռկանին այս առակը մեր օրերուն ալ կիրարկելի է։ Մենք եւ մեր անմիջական ապագան պարփակուած է անոր մէջ։ Մեզի համար պայման է հասկնալ այս առակին ի՛նչուն եւ ի՛նչպէսը, եթէ կը փափաքինք որ Յիսուսի հետեւեալ խօսքերը մեզի համար ալ ըսուած ըլլան. «երանի՜ է ձեր աչքերուն, որոնք կը տեսնեն եւ ձեր ականջներուն որոնք կը լսեն»՝ հասկացողութեամբ։

²⁰ Հաւանաբար գիտէք, թէ 1919–էն ետք, մնացորդը քարոզչութեամբ պարապեցաւ, հրեշտակներու հետ համագործակցելով, որոնք շարունակեցին գործածել խորհրդանշական ուռկանը, ձուկեր քաշելու դէպի ծովափը, աղէկները անշահներէն զատելու համար։ Այդ ժամանակուան վիճակագրութիւնները ցոյց կու տան թէ Աստուծոյ հոգիովը օծուելու համար աղէկ ձուկերու որսը շարունակուեցաւ, մինչ 144,000–ի վերջին անդամները կը ժողվուէին այլաբանական ուռկանին մէջ։ (Յայտնութիւն 7։1–4) Սակայն, 1930–ական թուականներու կիսուն, սուրբ հոգիով օծուելու համար աղէկ ձուկերու հաւաքումը հիմնականօրէն վերջ գտաւ։ Արդեօք օծեալ մնացորդին ժողովքը, այլեւս ուռկանը մէկդի նետելով անգործ պիտի նստէ՞ր, երկնային վարձատրութեան սպասելով։ Ամենեւին։

Ձկնորսութեան մէջ Մեր Մասնակցութիւնը

21. Ուրիշ ի՞նչ ձկնորսութիիւն կատարուած է մեր օրերուն։ (Ղուկաս 23։43)

²¹ Յիսուսի ուռկանին առակը իր ուշադրութիւնը կեդրոնացուց աղէկ ձուկերուն վրայ, որոնք պիտի վարձատրուէին, երկնքի Թագաւորութեանը մէջ տեղ մը ունենալով։ Սակայն, այդ առակէն զատ, հսկայական տարողութեամբ ուրիշ այլաբանական ձկնորսութիւն մըն ալ կը կատարուի, ինչպէս նախորդ յօդուածին մէջ տեսանք։ Այս ձկնորսութիւնը, Յիսուսի առակին մէջ յիշուած օծեալ աղէկ ձուկերուն համար չէ, այլ՝ այն այլաբանական ձուկերուն համար է, որոնք ողջ պիտի բռնուին եւ որոնց դրախտ երկրի մը վրայ ապրելու սքանչելի յոյսը պիտի տրուէր։—Յայտնութիւն 9։9, 10. բաղդատել Մատթէոս 25։31–46–ին հետ։

22. Ի՞նչ ուրախ հեռանկար մը կրնանք ունենալ, ապա թէ ոչ ի՞նչ կը սպասէ մեզի։

²² Եթէ այդ յոյսը կը սնուցանէք, այն ատեն կրնաք ուրախ ըլլալ որ Եհովա թոյլ տուաւ որ այս կենսապահ ձկնորսութեան գործը մինչեւ հիմա շարունակուի։ Ասիկա ձեզի կարելիութիւն տուած է որ հոյակապ հեռանկար մը ունենաք։ Հեռանկա՞ր մը։ Այո, պատշաճ արտայայտութիւն մըն է այդ, քանի որ անիկա կախեալ պիտի ըլլայ, տակաւին շարունակուող ձկնորսութեան ջանքերը Ղեկավարողին հանդէպ մեր ցուցաբերած յարատեւ հաւատարմութենէն։ (Սոփոնեայ 2։3) Ըստ առակին, յիշեցէք որ ուռկանին մէջ բռնուած ամէն ձուկ նպաստաւոր ճակատագիր մը չունենար։ Յիսուս ըսաւ որ անշահ ձուկերը կամ չարերը, պիտի զատուէին արդարներէն։ Ի՞նչու համար։ Մատթէոս 13։50–ի մէջ, Յիսուս նկարագրեց անշահ կամ չար ձուկերուն սպասող լուրջ հետեւանքը։ Անոնք, կրակի հնոցին մէջ պիտի ձգուին, որ կը նշանակէ յաւիտենական կործանում։—Յայտնութիւն 21։8

23. Ինչո՞ւ ներկայիս շատ կարեւոր է ձկնորսութեան գործը։

²³ Օծեալ, աղէկ ձուկերուն, ինչպէս նաեւ երկրի վրայ յաւիտեան ապրելիք այլաբանական ձուկերուն, փառաւոր ապագայ մը կը սպասէ։ Լաւ պատճառով, ուրեմն, հրեշտակները ուշադրութիւն կ’ընեն որ ճիշդ հիմա արդիւնաբեր ձկնորսութեան գործողութիւն մը կատարուի համայն երկրագունդին վրայ։ Իսկ ի՜նչ հոյակապ ձկնորսորդութիւն մը տեղի ունեցած է։ Տեղին է ըսել, որ ձեւով մը, այս ձկնորսութիւնն ալ առաքեալներուն վայելած հրաշալի որսին կը նմանի, երբ Յիսուսի առաջնորդութեան ներքեւ, իրենց ուռկանները ծովուն մէջ ձգեցին։

24. Հոգեւոր ձկնորսութեան առնչութեամբ ի՞նչ պէտք է ընենք։

²⁴ Դուք ալ կարելի եղած չափով աշխուժօրէն կը մասնակցի՞ք այս կենսապահ հոգեւոր ձկնորսութեան։ Մեր անձնական մասնակցութիւնը ի՛նչ որ ալ եղած է մինչեւ հիմա, ամէն մէկս կրնանք օգտակար կերպով նայիլ թէ համայն երկրի վրայ այս հոյակապ ձկնորսութեան կենսապահ գործը ի՛նչ իրագործած է, որ տակաւին կը շարունակուի։ Այսպէս ընելը մեզ պէտք է մղէ որ մեր ուռկանները աւելի նախանձախնդրութեամբ ձգենք յառաջիկայ օրերուն։—Բաղդատել Մատթէոս 13։23. Ա. Թեսաղոնիկեցիս 4։1

Կը Յիշէ՞ք Այս Կէտերը

◻ Յիսուսի ուռկանի առակին մէջի երկու տեսակ ձուկերը ի՞նչ կը ներկայացնեն։

◻ Ուռկանի գործողութեան մէջ, Քրիստոնեայ Աշխարհի եկեղեցիները ի՞նչ առումով մասնակցած են։

◻ Ինչո՞ւ մեր օրերուն կատարուած ձկնորսութիւնը ճակատագրական է։

◻ Ուռկանի առակը, իւրաքանչիւրս անձնական ի՞նչ վերլուծում կատարելու պէտք է առաջնորդէ։