«Սպասեցէ՛ք ու տեսէք Տէրոջը փրկութիւնը»
«Տէրը ինծի հետ է, չեմ վախնար, մարդը ինծի ի՞նչ կրնայ ընել»։—ՍԱՂՄՈՍ 118։6
1. Մարդկութիւնը ի՞նչ ծանր դէպքեր պիտի դիմագրաւէ։
ՄԱՐԴԿՈՒԹԻՒՆԸ աննախընթաց տարողութեամբ աղիտալի դէպքեր դիմագրաւելու վրայ է։ Մեր օրերուն մասին նախագուշակելով, Յիսուս իր հետեւորդները զգուշացուց. «Այն ատեն այնպիսի մեծ նեղութիւն պիտի ըլլայ, որու նմանը աշխարհի սկիզբէն մինչեւ հիմա եղած չէ, ո՛չ ալ պիտի ըլլայ։ Եթէ այն օրերը չքիչնային, բնաւ մարմին մը պիտի չապրէր. բայց ընտրեալներուն համար այն օրերը պիտի քիչնան»։—Մատթէոս 24։21, 22
2. Ի՞նչ բան մեծ նեղութեան սկսիլը ետ կը պահէ։
2 Մարդկային աչքերուն անտեսանելի եղող երկնային ուժեր, այժմ այդ մեծ նեղութիւնը ետ կը պահեն։ Յովհաննէս առաքեալ առանձնաշնորհում ունեցաւ այս զսպումին պատճառը տեսնելու, Յիսուսի կողմէ իրեն տրուած յայտնութեան մը մէջ։ Տարեց առաքեալը նկարագրեց. «Տեսայ չորս հրեշտակներ, որոնք երկրին չորս անկիւնը կեցեր էին ու երկրին չորս հովերը բռներ էին։ . . . Ուրիշ հրեշտակ մը տեսայ, որ արեւելքէն եկաւ ու Կենդանի Աստուծոյ կնիքը ունէր եւ մեծ ձայնով աղաղակեց այն չորս հրեշտակներուն . . . ու ըսաւ. ‘Երկրին վնաս մի՛ ընէք, ո՛չ ծովուն, ո՛չ ծառերուն, մինչեւ մեր Աստուծոյն ծառաներուն ճակատները կնքենք’»։—Յայտնութիւն 7։1-3
3. Մեծ նեղութեան առաջին երեսակը ի՞նչ պիտի ըլլայ։
3 «Աստուծոյ [օծեալ] ծառաներուն» վերջնական կնքումը իր աւարտին կը մօտենայ։ Չորս հրեշտակները այդ կործանարար հովերը արձակելու պատրաստ են։ Երբ ասիկա ընեն, նախ ի՞նչ տեղի պիտի ունենայ։ Հրեշտակ մը այս հարցումին կը պատասխանէ. «Ուժով վար պիտի ձգուի Բաբելոն մեծ քաղաքը ու ա՛լ պիտի չգտնուի»։ (Յայտնութիւն 18։21) Երբ Մեծ Բաբելոնը՝ սուտ կրօնքի համաշխարհային կայսրութիւնը կործանի, երկնքի մէջ ի՜նչ մեծ ցնծութիւն պիտի ըլլայ։—Յայտնութիւն 19։1, 2
4. Տակաւին ի՞նչ զարգացումներ տեղի պիտի ունենան։
4 Երկրի բոլոր ազգերը միացած պիտի ըլլան Եհովայի ժողովուրդին դէմ։ Անոնք պիտի կարենա՞ն հաւատարիմ Քրիստոնեաները բնաջնջել։ Թերեւս թուի թէ ասիկա կարելի է։ Բայց Քրիստոս Յիսուսի հետեւող երկնային բանակները այդ մարդկային զօրքերը պիտի կործանեն։ (Յայտնութիւն 19։19-21) Ի վերջոյ, Բանսարկուն ու իր հրեշտակները անգործունէութեան անդունդին մէջ պիտի նետուին։ Անոնք այլեւս պիտի չկարենան մարդկութիւնը մոլորեցնել, քանի որ հազար տարի պիտի արգելափակուին։ Վերապրող մեծ բազմութեան համար ասիկա ի՜նչ հանգստութիւն պիտի նշանակէ։—Յայտնութիւն 7։9, 10, 14. 20։1-3
5. Ի՞նչ ուրախութիւն կը սպասէ անոնց, որոնք Եհովայի հաւատարիմ կը մնան։
5 Շուտով ականատես պիտի ըլլանք այս սքանչելի եւ երկիւղ ներշնչող դէպքերուն, որոնք կապ ունին Եհովայի իշխելու իրաւունքը՝ իր տիեզերական գերիշխանութիւնը ջատագովելուն հետ։ Իսկ պահ մը խորհէ. Եթէ Եհովայի հաւատարիմ մնանք եւ իր գերիշխանութեան կողքին հաստատուն կենանք, Եհովայի անուան սրբացման եւ իր նպատակին կատարման մէջ բաժին բերելու պատեհութիւնը պիտի ունենանք։ Ասիկա ի՜նչ անգին ուրախութիւն մը պիտի ըլլայ։
6. Մօտահաս դէպքերուն ի տես, ի՞նչ նկատի պիտի առնենք։
6 Այդ ծանրակշիռ դէպքերուն համար պատրա՞ստ ենք։ Եհովայի փրկարար զօրութեան հանդէպ հաւատք ունի՞նք։ Վստա՞հ ենք թէ ան մեզի պիտի օգնէ յարմար ժամանակին եւ լաւագոյն կերպով։ Այսպիսի անհատական հարցումներու պատասխանելու համար, կրնանք ի մտի ունենալ Հռովմի Քրիստոնեաներուն ուղղուած Պօղոս առաքեալի խօսքերը. «Ինչ որ առաջուընէ գրուեցաւ, գրուեցաւ որ սորվիք, որպէսզի համբերութիւնով ու գրքերուն մխիթարութիւնով մենք յոյս ունենանք»։ (Հռովմայեցիս 15։4) Ասոր մէկ օրինակն է այն արձանագրութիւնը թէ ի՛նչպէս Եհովա Իսրայելացիները ազատեց Եգիպտացի հարստահարողներէն։ Այս հետաքրքրաշարժ դէպքերը մօտէն քննելը մեզ մեծապէս պիտի քաջալերէ, մինչ անձկագին կը սպասենք արագօրէն մօտեցող մեծ նեղութեան։
Եհովա իր ժողովուրդը կը փրկէ
7. Հ.Դ.Ա. 1513–ին, Եգիպտոսի մէջ ի՞նչ լարուած վիճակ մը կը զարգանայ։
7 Հ.Դ.Ա. 1513–ն է։ Եհովա արդէն Եգիպտացիներուն վրայ ինը հարուած բերած է, եւ Փարաւոն Մովսէսի կ’ըսէ. «Քովէս գնա՛, զգուշութիւն ըրէ անձիդ, անգամ մըն ալ իմ երեսս չտեսնես. քանզի այն օրը որ իմ երեսս տեսնես, պիտի մեռնիս»։ Իսկ Մովսէս կը պատասխանէ. «Աղէ՛կ ըսիր, անգամ մըն ալ քու երեսդ պիտի չտեսնեմ»։—Ելից 10։28, 29
8. Վերապրումի համար ի՞նչ ցուցմունքներ կը տրուին Իսրայելացիներուն, եւ արդիւնքը ի՞նչ կ’ըլլայ։
8 Այժմ Եհովա Մովսէսի կը յայտնէ թէ Փարաւոնին ու բոլոր Եգիպտացիներուն դէմ վերջնական հարուած մը պիտի ըլլայ։ Ապիպ (Նիսան) ամսուն 14–ին, բոլոր Եգիպտացիներուն եւ անասուններուն անդրանիկները պիտի մեռնին։ Բայց Իսրայելացի ընտանիքները կրնային խնայուիլ՝ Մովսէսի տրուած Աստուծոյ ցուցմունքներուն բծախնդրաբար հետեւելով։ Անոնք արու գառնուկի մը արիւնը առնելով պիտի քսեն իրենց տան երկու դրանդիներուն եւ վերի սեմին վրայ ու տունէն դուրս պիտի չելլեն։ Այդ գիշեր ի՞նչ կը պատահի։ Մովսէս կը պատմէ. «Կէս գիշերին Տէրը Եգիպտոսի երկրին մէջ ամէն անդրանիկ զարկաւ»։ Փարաւոն անմիջապէս կը հակազդէ։ Ան Մովսէսն ու Ահարոնը կը կանչէ ու կ’ըսէ. «Ելէ՛ք իմ ժողովուրդիս մէջէն . . . ու գացէ՛ք պաշտեցէ՛ք Եհովան՝ ինչպէս ըսիք»։ Արդարեւ Իսրայելացիները կը մեկնին, հաւանաբար աւելի քան երեք միլիոն հոգի, եւ անոնց հետ Իսրայելացի չեղող «խառն բազմութիւն» մըն ալ կը բարձրանայ։—Ելից 12։1-7, 29, 31, 37, 38
9. Աստուած Իսրայելացիները ո՞ր ճամբայէն կ’առաջնորդէ եւ ինչո՞ւ։
9 Միջերկրական ծովուն եզերքէն ու Փղշտացիներուն երկրէն անցնող ճամբան ամենամօտն է Իսրայելացիներուն համար։ Բայց անիկա թշնամիներուն շրջանն է։ Ուստի, հաւանաբար իր ժողովուրդը պատերազմի չբռնուելու համար, Եհովա զանոնք Կարմիր ծովուն անապատին ճամբայէն կ’առաջնորդէ։ Թէեւ միլիոնաւորներ կը քալեն, բայց անկարգ ամբոխ մը չեն։ Աստուածաշունչի արձանագրութիւնը կ’ըսէ. «Իսրայէլի որդիները գունդ գունդ Եգիպտոսի երկրէն ելան»։—Ելից 13։17, 18
«Տեսէք Տէրոջը փրկութիւնը»
10. Աստուած ինչո՞ւ Իսրայելացիներուն կ’ըսէ որ Փիաիրօթի դիմաց բանակին։
10 Ապա ապշեցուցիչ զարգացում մը տեղի կ’ունենայ։ Եհովա Մովսէսի կ’ըսէ. «Ըսէ՛ Իսրայէլի որդիներուն, որ դառնան ու Փիաիրօթի առջեւ, Մագդողին ու ծովուն մէջտեղ բանակ դնեն, Բէեղսեփոնին առջեւ»։ Այս հրահանգին հետեւելով, մեծ բազմութիւնը ինքզինք կը գտնէ արգելափակուած՝ լեռներուն եւ Կարմիր ծովուն միջեւ։ Այնպէս կը թուի թէ փախուստի ճամբայ չկայ։ Սակայն Եհովա գիտէ թէ ի՛նչ կ’ընէ։ Ան Մովսէսի կ’ըսէ. «Փարաւոնին սիրտը պիտի կարծրացնեմ ու ձեր ետեւէն պիտի իյնայ ու ես Փարաւոնին վրայ եւ անոր բոլոր զօրքերուն վրայ պիտի փառաւորուիմ, Եգիպտացիները պիտի գիտնան թէ՝ ես եմ Տէրը»։—Ելից 14։1-4
11. (ա) Փարաւոն ի՞նչ քայլ կ’առնէ, եւ Իսրայելացիները ի՞նչպէս կը հակազդեն։ (բ) Մովսէս Իսրայէլի գանգատներուն ի՞նչպէս կ’ընդառաջէ։
11 Փարաւոն, զգալով թէ սխալ մը գործած է՝ թոյլ տալով որ Իսրայելացիները Եգիպտոսէն ելլեն, 600 ընտիր ռազմակառքերով զանոնք կը հետապնդէ։ Եգիպտական բանակը տեսնելով, Իսրայելացիները կը սարսափին ու Մովսէսի կ’ըսեն. «Եգիպտոսի մէջ գերեզմաններ չըլլալո՞ւն համար մեզ անապատին մէջ մեռնելու բերիր»։ Եհովայի փրկութեան վստահելով, Մովսէս կը պատասխանէ. «Մի՛ վախնա՛ք, սպասեցէ՛ք ու տեսէք Տէրոջը փրկութիւնը, որ այսօր պիտի ընէ ձեզի։ . . . Տէրը ձեզի համար պիտի պատերազմի։ Դուք լո՛ւռ կեցէք»։—Ելից 14։5-14
12. Եհովա ի՞նչպէս իր ժողովուրդը կը փրկէ։
12 Ինչպէս Մովսէս ըսաւ թէ Եհովա Իսրայելացիներուն համար պիտի պատերազմի, այժմ գերմարդկային ուժեր կ’ընդմիջեն։ Եհովայի հրեշտակը Իսրայէլի բանակը առաջնորդող ամպի սիւնը հրաշալիօրէն անոնց ետեւը կը փոխադրէ։ Սիւնը պատճառ կ’ըլլայ որ Եգիպտացիներուն խաւար ըլլայ, բայց Իսրայելացիներուն լոյս կու տայ։ (Ելից 13։21, 22. 14։19, 20) Աստուծոյ հրամանին հնազանդելով, այժմ Մովսէս իր ձեռքը կ’երկարէ։ Արձանագրութիւնը կը շարունակէ. «Տէրը արեւելեան սաստիկ հովով ետ դարձուց ծովը եւ բոլոր գիշերը ջուրերը ճեղքուեցան, . . . եւ Իսրայէլի որդիները ծովուն մէջէն ցամաքով անցան։ Ջուրերը անոնց աջ կողմէն ու ձախ կողմէն պարիսպ եղան»։ Եգիպտացիները կը սկսին հետապնդել, բայց Եհովա իր ժողովուրդին կողքին է։ Ան Եգիպտացիներուն բանակը խուճապի կը մատնէ, ապա Մովսէսի կ’ըսէ. «Ձեռքդ ծովուն վրայ երկնցուր, որպէս զի ջուրերը Եգիպտացիներուն, անոնց կառքերուն ու անոնց ձիաւորներուն վրայ դառնան»։ Փարաւոնի բանակին կործանումը ա՛յնքան ամբողջական է որ ո՛չ մէկ զինուոր ողջ կը մնայ։—Ելից 14։21-28. Սաղմոս 136։15
Իսրայէլի փրկութենէն սորվիլ
13. Իսրայէլի որդիները իրենց ազատման ի՞նչպէս հակազդեցին։
13 Այս հրաշալի ազատումը ի՞նչ ազդեցութիւն ունեցաւ վերապրողներուն վրայ։ Մովսէս եւ Իսրայէլի որդիները ինքնաբերաբար երգով Եհովան փառաբանեցին։ Անոնք տաղերգեցին. «Պիտի երգեմ Տէրոջը, քանզի փառքով փառաւորեալ է։ . . . Տէրը պիտի թագաւորէ յաւիտեանս յաւիտենից»։ (Ելից 15։1, 18) Արդարեւ, անոնք նախ ուզեցին Աստուած գովաբանել։ Այդ պարագային, Եհովայի գերիշխանութիւնը ապացուցանուած էր։
14. (ա) Իսրայէլի փորձառութենէն ի՞նչ կը սորվինք Եհովայի մասին։ (բ) Ի՞նչ է 2008–ի տարուան համարը։
14 Այս ոգեւորիչ դէպքերէն ի՞նչ ցուցմունք, մխիթարութիւն եւ յոյս կը քաղենք։ Վստահաբար կրնանք տեսնել թէ Եհովա պատրաստ է իր ժողովուրդին դիմագրաւած փորձութիւնները ձեռք առնելու եւ որեւէ խնդիր լուծելու։ Կարմիր ծովը այլեւս Իսրայէլի համար խոչընդոտ մը չէր, երբ Եհովա պատճառ եղաւ որ արեւելեան սաստիկ հովը փչէ։ Ան նաեւ պատճառ եղաւ որ նոյն Կարմիր ծովը Փարաւոնի բանակին գերեզմանը դառնայ։ Ասոր մասին խորհրդածելով, կրնանք սաղմոսերգուին խօսքերը երկրորդել. «Տէրը ինծի հետ է, չեմ վախնար, մարդը ինծի ի՞նչ կրնայ ընել»։ (Սաղմոս 118։6) Նաեւ կրնանք մխիթարուիլ Հռովմայեցիս 8։31–ի մէջ արձանագրուած Պօղոսի խօսքերով. «Եթէ Աստուած մեր կողմն է, ո՞վ պիտի ըլլայ մեզի հակառակ»։ Այս ներշնչեալ խօսքերը ի՜նչ վստահութիւն կու տան մեզի։ Անոնք մեր վախերն ու կասկածները կը փարատեն ու մեզ յոյսով կը լեցնեն։ Հետեւաբար, ո՜րքան տեղին է 2008–ի մեր տարուան համարը. «Սպասեցէ՛ք ու տեսէք Տէրոջը փրկութիւնը»։—Ելից 14։13
15. Իսրայէլի ազատման համար հնազանդութիւնը ո՞րքան կարեւոր էր, իսկ ներկայիս ո՞րքան կարեւոր է։
15 Իսրայէլի Ելքէն նաեւ կրնանք սորվիլ թէ Եհովայի պէտք է հնազանդինք, ի՛նչ որ ալ պահանջէ մեզմէ։ Իսրայելացիները հնազանդ ըլլալով՝ Պասեքին համար բծախնդրաբար պատրաստութիւն տեսան եւ Նիսան 14–ի գիշերը տունէն դուրս չելան։ Իսկ երբ մեկնեցան, անոնք «գունդ գունդ Եգիպտոսի երկրէն ելան»։ (Ելից 13։18) Ներկայիս, շատ կարեւոր է որ հետեւինք այն ուղղութեան, զոր կը ստանանք «հաւատարիմ ու իմաստուն ծառայ»ին միջոցաւ։ (Մատթէոս 24։45) Ուշի–ուշով պէտք է մտիկ ընենք Աստուծոյ խօսքը, որ կ’ըսէ. «Ասիկա է ճամբան, ասկէ քալեցէք»։ (Եսայի 30։21) Մինչ մեծ նեղութեան սկսելուն կը մօտենանք, շատ հաւանական է որ մանրամասն ցուցմունքներ ստանանք։ Այդ տագնապալից օրերէն ապահովաբար դուրս գալը կախեալ պիտի ըլլայ Եհովայի միւս հաւատարիմ ծառաներուն հետ քայլ պահելէն։
16. Իսրայելացիները ազատելու ատեն՝ հարցերը ուղղելու Աստուծոյ կերպէն ի՞նչ կրնանք սորվիլ։
16 Նաեւ մտաբերէ թէ Եհովա Իսրայելացիները այնպիսի կացութեան մը մէջ դրաւ, որ անոնք զգացին թէ ծուղակ ինկան,– մէկ կողմը լեռներ, իսկ միւս կողմը՝ Կարմիր ծովը։ Այնպէս թուեցաւ թէ ասիկա շիտակ քայլը չէր։ Բայց Եհովա հարցերը իր հակակշռին տակ առած էր, եւ ամէն բան նպաստեց իր փառաբանութեան ու իր ժողովուրդին փրկութեան։ Այսօր, թերեւս մեզի յստակ չըլլայ թէ ինչո՛ւ կազմակերպչական կարգ մը հարցեր որոշ կերպով ձեռք կ’առնուին, սակայն ամէն պատճառ ունինք վստահելու Եհովայի առաջնորդութեան, հաղորդակցութեան իր հաւատարիմ խողովակին միջոցաւ։ Երբեմն այնպէս կրնայ թուիլ թէ մեր թշնամիները յաջողութիւն կը գտնեն։ Մեր սահմանափակ տեսահորիզոնին պատճառաւ, կրնանք լման պատկերը չտեսնել։ Բայց Եհովա կրնայ հարցերուն որոշ ուղղութիւն տալ յարմար ժամանակին, ինչպէս ըրաւ Իսրայէլի որդիներուն ի նպաստ։—Առակաց 3։5
Եհովայի հանդէպ վստահութիւն ունեցիր
17. Ինչո՞ւ կրնանք Աստուծոյ առաջնորդութեան հանդէպ բացարձակ վստահութիւն ունենալ։
17 Կրնա՞ս երեւակայել Իսրայելացիներուն վստահութեան զգացումը, մինչ կը խոկային ցերեկուան ամպի սիւնին եւ գիշերուան կրակի սիւնին մասին, որ ապացոյց էր թէ «Աստուծոյ հրեշտակը» իրենց ճամբորդութիւնը կ’առաջնորդէր։ (Ելից 13։21, 22. 14։19) Ներկայիս, կրնանք վստահ ըլլալ թէ Եհովա իր ժողովուրդին հետ է, զանոնք առաջնորդելու, պաշտպանելու եւ ազատելու համար։ Ի մտի ունենանք սա խոստումը. «[Եհովա] իր սուրբերը երեսէ չի ձգեր. յաւիտեան կը պահուին անոնք»։ (Սաղմոս 37։28) Երբեք չմոռնանք հրեշտակային հզօր զօրքերը, որոնք ներկայիս Աստուծոյ ծառաներուն թիկունք կը կանգնին։ Անոնց աջակցութեամբ, կրնանք ‘սպասել ու տեսնել Տէրոջը փրկութիւնը’։—Ելից 14։13
18. Ինչո՞ւ «Աստուծոյ ամբողջ զրահը» պէտք է հագնինք։
18 Ի՞նչպէս կրնանք ճշմարտութեան ճամբուն մէջ «հաստատուն կայնիլ»։ Հագնելով հոգեւոր սպառազինութիւնը, զոր Պօղոս կը նկարագրէ Եփեսացիներուն յղուած նամակին մէջ։ Նկատի առ թէ առաքեալը մեզ կը յորդորէ որ հագնինք «Աստուծոյ ամբողջ զրահը» (ԱՎ)։ Այս հոգեւոր սպառազինութեան բոլոր մասերը հագա՞ծ ենք։ Յառաջիկայ տարուան ընթացքին, լաւ կ’ըլլայ որ իւրաքանչիւր անհատ ինքզինք քննէ, վստահ ըլլալու համար թէ այդ սպառազինութեան իւրաքանչիւր մասը պատշաճօրէն հագած է։ Մեր թշնամին՝ Բանսարկուն, մեր տկարութիւնները կը ճանչնայ եւ կը փորձէ մեզ անակնկալի բերել կամ անպաշտպան կողմին վրայ յարձակիլ։ Չար ոգիներուն հետ «պատերազմ» ունինք։ Այսուհանդերձ, Եհովայի զօրութեամբ կրնանք յաղթական դուրս գալ։—Եփեսացիս 6։11-18. Առակաց 27։11
19. Եթէ տոկանք, ի՞նչ առանձնաշնորհում կրնանք վայելել։
19 Յիսուս իր հետեւորդներուն ըսաւ. «Ձեր համբերութիւնովը հոգինիդ պիտի փրկէք»։ (Ղուկաս 21։19) Թող ըլլանք անոնց մէջ, որոնք իրենց դիմագրաւած դժուարութիւններուն հաւատարմօրէն կը տոկան, եւ այսպէս Աստուծոյ շնորհքով առանձնաշնորհում ունենանք ‘սպասելու եւ տեսնելու Տէրոջը փրկութիւնը’։
Ի՞նչպէս պիտի պատասխանես
• Շուտով ի՞նչ հետաքրքրաշարժ դէպքեր տեղի պիտի ունենան։
• Հ.Դ.Ա. 1513–ին, Եհովա իր փրկարար զօրութիւնը ի՞նչպէս ցոյց տուաւ։
• Ի՞նչ վճռած ես ընել։
[Մէջբերում՝ էջ 10]
2008–ի տարուան համարը. «Սպասեցէ՛ք ու տեսէք Տէրոջը փրկութիւնը»։—Ելից 14։13
[Նկար՝ էջ 8]
Փարաւոնին յամառութիւնը Եգիպտոսի վրայ աղէտ բերաւ
[Նկար՝ էջ 9]
Իսրայելացիները վերապրեցան՝ երբ Եհովայի պատուիրած բոլոր բաները կատարեցին