Աղքատութեան մնայուն լուծումը գտնել
ՀԱԿԱՌԱԿ աղքատութեան մասին աշխարհի չորս կողմէն եկած ժխտական տեղեկագրութիւններուն, ոմանք լաւատես են՝ յոյս ունին որ լուծում մը կարելի է գտնել։ Օրինակ, Manila Bulletin–ի մէկ վերնագրին համաձայն, Ասիայի Զարգացման Դրամատունը տեղեկագրեց թէ «Ասիա կրնայ 25 տարուան միջոցին աղքատութիւնը արմատախիլ ընել»։ Դրամատունը առաջարկեց տնտեսական աճումը որպէս մեթոտ մը մարդիկը ազատելու աղքատութեան ճիրաններէն։
Այլ կազմակերպութիւններ ու կառավարութիւններ այս խնդիրը լուծելու համար թելադրութիւններու ու ծրագիրներու երկար ցանկ մը պատրաստած են։ Անիկա կը պարփակէ. ընկերային ապահովագրութեան յայտագիրներ, բարելաւուած ուսում, զարգացումի վրայ եղող երկիրներու պարտքերը չեղեալ նկատել, ներածման արգելքները վերցնել՝ որպէսզի մեծ թիւով աղքատներ ունեցող երկիրները կարենան իրենց արտադրութիւնները աւելի դիւրաւ ծախել, եւ աղքատներուն պատսպարաններ հայթայթել կառավարութեան կողմէ։
2000 թուականին, Միացեալ Ազգերու Ընդհանուր Համագումարը նպատակակէտեր դրաւ, որոնք պէտք է իրագործուին մինչեւ 2015 թուականը։ Անոնք կը պարփակեն՝ արմատախիլ ընել չափազանց աղքատութիւնն ու անօթութիւնը եւ երկիրներու մէջ եկամուտի հսկայ տարբերութիւնը։ Այսպիսի նպատակակէտեր որքա՛ն ալ ազնիւ ըլլան, շատեր չեն հաւատար որ զանոնք կարելի է իրագործել այս պառակտուած աշխարհին մէջ։
Գործնական Քայլեր՝ Աղքատութեան Հետ Գլուխ Ելլելու
Որովհետեւ համաշխարհային տարողութեամբ իսկական յառաջդիմութիւն արձանագրելը անհաւանական է, անհատ մը օգնութեան համար ո՞ւր կրնայ դիմել։ Ինչպէս նախապէս յիշուեցաւ, գործնական իմաստութեան աղբիւր մը կայ, որ կրնայ մարդոց հիմա իսկ օգնել։ Անիկա Աստուծոյ Խօսքը՝ Աստուածաշունչն է։
Աստուածաշունչը տեղեկութեանց միւս բոլոր աղբիւրներէն տարբեր դարձնողը ի՞նչ է։ Անիկա գերագոյն հեղինակութեան՝ մեր Ստեղծիչին՝ կողմէ եկած է։ Ան անոր էջերուն մէջ իմաստութեան գոհարներ պարփակած է. գործնական սկզբունքներ, որոնք բոլոր մարդոց, ամէնուրեք ու ամէն ժամանակ կիրարկելի են։ Եթէ կիրարկուին, այս սկզբունքները կրնան աղքատներուն օգնել որ աւելի գոհացուցիչ կեանք մը վայելեն նոյնիսկ հիմա։ Քանի մը օրինակներ նկատի առնենք։
Դրամի հանդէպ պատշաճ տեսակէտ մը ունեցէք։ Աստուածաշունչը կ’ըսէ. «Իմաստութեան հովանաւորութիւնը արծաթին հովանաւորութեան պէս է։ Բայց գիտութեան օգուտն այս է, որ իմաստութիւնը զինք ստացողները կ’ապրեցնէ»։ (Ժողովողի 7։12) Ի՞նչ է այս խօսքին միտք բանին։ Դրամը ամէն բան չէ։ Ճիշդ է որ անիկա որոշ չափով ապահովութիւն կը հայթայթէ։ Անիկա մեզ կարող կը դարձնէ որ մեզի պէտք եղած բաները գնենք, բայց սահմանափակումներ ունի։ Աւելի արժէքաւոր բաներ կան, որ դրամով չենք կրնար գնել։ Այս իրողութեան գիտակցիլը պիտի օգնէ մեզի որ նիւթական բաներուն հանդէպ հաւասարակշռուած տեսակէտ մը ունենանք, խուսափելով այն անհատներուն յուսախաբութիւններէն, որոնք դրամ դիզելը իրենց կեանքի առանցքը դարձուցած են։ Դրամը կեանք չի գներ, բայց իմաստութեամբ վարուիլը կրնայ հիմա կեանքը պաշտպանել եւ նոյնիսկ ճամբան հարթել անվերջ կեանքի մը կարելիութեան։
Ձեր ունեցած միջոցներուն համաձայն ապրեցէք։ Մեր ուզած բաները անպայմանօրէն մեր պէտքերը չեն։ Նախապատուութիւնը մեր պէտքերուն պէտք է տրուի։ Դիւրաւ կրնանք մենք մեզ համոզել թէ բանի մը կարիքը ունինք, մինչ իրականութեան մէջ անիկա փափաք մըն է։ Իմաստուն անհատը շահուած եկամուտը նախ կը յատկացնէ անմիջական պէտքերուն. ուտելիք, հագուելիք, բնակարան, եւայլն։ Ետքը, յաւելեալ բան մը չգնած, ան վստահ կ’ըլլայ թէ մնացեալ դրամը բաւարա՞ր է։ Իր առակներէն մէկուն մէջ, Յիսուս յանձնարարեց որ անհատը ‘առաջ նստի ու հաշիւ ընէ ծախքը, ճշդելու համար թէ կարողութիւն ունի՞’։—Ղուկաս 14։28
Ֆիլիփփիններու մէջ, Եուֆրոսինա անունով երեք զաւկի տէր առանձին ծնող մը, ապրուստ ճարելու եւ խնայողութեամբ ապրելու դժուարութիւնը ունեցած է, իր ամուսինը տարիներ առաջ զինք լքելէն ի վեր։ Ան իր զաւակները մարզած է որ ընտանիքին պիւտճէն բծախնդրութեամբ գործածեն։ Օրինակ, եթէ զաւակները բան մը տեսնեն եւ ուզեն գնել, փոխանակ միայն ո՛չ ըսելու, ան կը պատճառաբանէ անոնց հետ, ըսելով. «Կրնաք զայն ունենալ, բայց նախ որոշում մը պէտք է կայացնէք։ Մեր ունեցած դրամը միայն մէկ բանի կը բաւէ։ Կրնանք կա՛մ ձեր սիրած այս բանը գնել եւ կամ քիչ մը միս կամ բանջարեղէն գնել, մեր այս շաբթուան բրինձին հետ ուտելու համար։ Ի՞նչ կը նախընտրէք։ Դուք որոշեցէք»։ Սովորաբար երախաները շուտով կը հասկնան կէտը եւ կ’ուզեն ուտելիք ունենալ քան՝ ուրիշ բան մը։
Գոհունակ եղէք։ «Կերակուր ու հանդերձ ունենալով՝ անոնցմով բաւականանանք», կ’ըսէ Աստուածաշունչի ուրիշ մէկ սկզբունքը։ (Ա. Տիմոթէոս 6։8) Դրամը ինքնին ուրախութիւն չի բերեր։ Շատ մը հարուստներ ապերջանիկ են, մինչ բազմաթիւ աղքատներ շատ ուրախ են, բաւականանալով կեանքի մէջ անհրաժեշտ եղած պարզ բաներով։ Յիսուս խօսեցաւ ‘պարզ աչք’ ունենալու մասին, որ աւելի կարեւոր բաներու վրայ կը կեդրոնանայ։ (Մատթէոս 6։22) Ասիկա անհատին կ’օգնէ որ գոհ ըլլայ։ Շատ մը աղքատներ բաւական գոհունակ են, քանի որ Աստուծոյ հետ լաւ յարաբերութիւն մը մշակած են եւ ընտանեկան երջանիկ կեանք մը ունին. բաներ՝ որոնք դրամով չեն գնուիր։
Ասոնք Աստուածաշունչի գործնական թելադրութիւններէն միայն քանի մը հատն են, որոնք կրնան աղքատներուն օգնել որ իրենց պարագային հետ գլուխ ելլեն։ Անշուշտ շատ աւելի թելադրութիւններ կան։ Օրինակ, ծխելու եւ բախտախաղ խաղալու նման մոլութիւններէն խուսափեցէք, որոնք ձեր դրամը կը վատնեն. կեանքի մէջ աւելի կարեւոր բաները բնորոշեցէք, մանաւանդ՝ հոգեւոր նպատակակէտերը. հոն ուր անգործութիւն կայ, փորձեցէք հմտութիւն կամ ծառայութիւն մը մատուցանել, որու ուրիշները կարիք ունին։ (Առակաց 22։29. 23։21. Փիլիպպեցիս 1։9-11) Աստուածաշունչը կը յանձնարարէ այսպիսի «իմաստութիւն ու խոհեմութիւն» ի գործ դնել, քանի որ անոնք ‘քու հոգիիդ կեանք պիտի ըլլան’։—Առակաց 3։21, 22
Թէեւ Աստուածաշունչի թելադրութիւնները կրնան որոշ չափով հանգստացնել աղքատութեան հետ մարտնչողները, սակայն ապագայի նկատմամբ հարցեր կան՝ որոնք պատասխանի կը կարօտին։ Աղքատները դատապարտուա՞ծ են աղքատութեան ճիրաններուն մէջ յաւիտեան մնալու։ Մեծահարուստներուն եւ չափազանց աղքատներուն միջեւ անհաւասարութիւնը երբեք պիտի շտկուի՞։ Նկատի առնենք լուծում մը, որմէ շատեր տեղեակ չեն։
Աստուածաշունչը Յոյս Ունենալու Պատճառ կու Տայ
Շատեր կ’ընդունին որ Աստուածաշունչը լաւ գիրք մըն է։ Սակայն անոնք յաճախ չեն անդրադառնար որ անիկա մասնայատուկ տեղեկութիւններ կը ներկայացնէ, որոնք կը մատնանշեն շուտով տեղի ունենալիք մեծ փոփոխութիւններ։
Աստուած մտադրած է քայլեր առնել լուծելու համար մարդկային խնդիրները՝ ի ներառեալ աղքատութիւնը։ Որովհետեւ մարդկային կառավարութիւնները փաստօրէն անկարող են կամ չեն ուզեր ասիկա ընել, Աստուած մտադրած է զանոնք փոխարինել։ Ի՞նչպէս։ Աստուածաշունչը Դանիէլ 2։44–ի մէջ շեշտակի կ’ըսէ. «Երկնքի Աստուածը ուրիշ թագաւորութիւն մը պիտի հանէ, որ յաւիտեան պիտի չաւերուի։ Այս թագաւորութիւնը ուրիշ ժողովուրդի պիտի չթողուի։ Անիկա այս բոլոր թագաւորութիւնները պիտի փշրէ ու պիտի հատցնէ ու ինք յաւիտեան պիտի մնայ»։
Այս «թագաւորութիւնները»՝ կամ կառավարութիւնները՝ մէջտեղէն վերցուելէ ետք, Աստուծոյ կողմէ նշանակուած Կառավարիչը գործի պիտի լծուի։ Այս Կառավարիչը մարդկային արարած մը չէ, այլ՝ Աստուծոյ նման երկնային զօրաւոր հոգեղէն անձ մըն է, որ ներկայ անհաւասարութիւնը չքացնելու համար հարկ եղած արմատական փոփոխութիւնները ընելու կարողութիւնը ունի։ Աստուած իր Որդին ընտրած է ասիկա ընելու համար։ (Գործք 17։31) Սաղմոս 72։12-14–ը կը նկարագրէ այս Կառավարիչին ընելիք բաները, ըսելով. «Աղքատը պիտի փրկէ աղաղակելու ատենը, խեղճն ալ ու զանիկա ալ, որ օգնական չունի։ Պիտի խղճայ աղքատին ու տնանկին եւ տնանկներուն անձերը պիտի ազատէ։ Հարստահարութենէ ու բռնութենէ պիտի փրկէ անոնց անձը եւ անոնց արիւնը պատուական պիտի ըլլայ իր առջեւ»։ Ի՜նչ սքանչելի հեռանկար մը։ Վե՜րջապէս հանգստութիւն։ Աստուծոյ կողմէ նշանակուած Կառավարիչը աղքատներուն եւ տնանկներուն ի նպաստ պիտի գործէ։
Այդ ժամանակ՝ աղքատութեան հետ առնչուած բազմաթիւ խնդիրներ պիտի լուծուին։ Սաղմոս 72։16–ը կ’ըսէ. «Ցորենի առատութիւն պիտի ըլլայ երկրի մէջ՝ լեռներուն գլուխը»։ Այլեւս սովի, դրամական նեղութեան կամ թերի վարչութեան պատճառաւ ուտելիքի պակաս պիտի չըլլայ։
Այլ խնդիրներ ալ պիտի լուծուին։ Օրինակ, ներկայիս երկրի բնակչութեան մեծ տոկոսը անձնական տուն չունի։ Սակայն Աստուած կը խոստանայ. «Տուներ պիտի շինեն ու պիտի բնակին, այգիներ պիտի տնկեն ու անոնց պտուղը պիտի ուտեն։ Անոնք պիտի չշինեն, որպէս զի ուրիշները բնակին, անոնք պիտի չտնկեն, որպէս զի ուրիշները ուտեն. վասն զի իմ ժողովուրդիս օրերը ծառի օրերու չափ պիտի ըլլան եւ իմ ընտրածներս իրենց ձեռքերուն գործերը պիտի հինցնեն»։ (Եսայեայ 65։21, 22) Ամէն ոք իր անձնական տունը պիտի ունենայ եւ իր գործէն հաճոյք պիտի առնէ։ Ուստի Աստուած աղքատութեան համար ամբողջական ու մնայուն լուծում մը կը խոստանայ։ Հարուստներուն եւ աղքատներուն միջեւ այլեւս հսկայ խրամատ մը պիտի չըլլայ, եւ մարդիկ այլեւս իրենց ապրուստը դժուարաւ պիտի չճարեն։
Երբ անհատ մը Աստուածաշունչի այս խոստումները առաջին անգամ լսէ, կրնայ զանոնք անիրապաշտական նկատել։ Սակայն Աստուածաշունչը մօտէն քննելը ցոյց կու տայ թէ անցեալին Աստուծոյ բոլոր խոստումները իրականացած են։ (Եսայեայ 55։11) Ուստի հարցը այն չէ թէ ասիկա պիտի կատարուի՞ կամ ոչ։ Այլ, իսկական հարցումն է՝ Ի՞նչ պէտք է ընէք որպէսզի օգտուիք, երբ ասիկա պատահի։
Հոն Պիտի Ըլլա՞ք
Որովհետեւ կառավարութիւնը Աստուծոյ կողմէ է, այնպիսի անհատներ պէտք է ըլլանք, որոնց Աստուած պիտի ընդունի իբր հպատակներ այդ իշխանութեան ներքեւ։ Իսկ ի՛նչպէս որակելի ըլլալու մասին, ան ուղեգծեր հայթայթած է Աստուածաշունչին մէջ։
Նշանակուած Կառավարիչը՝ Աստուծոյ Որդին՝ արդար է։ (Եսայեայ 11։3-5) Ուստի այս կառավարութեան ներքեւ ապրելու համար ընդունուած անհատներէն ալ կ’ակնկալուի որ արդար ըլլան։ Առակաց 2։21, 22–ը կ’ըսէ. «Ուղիղները երկրի վրայ պիտի բնակին եւ կատարեալները անոր մէջ պիտի մնան։ Բայց ամբարիշտները երկրէն պիտի կորսուին ու անօրէնները անկէ պիտի մերժուին»։
Այս պահանջներուն ի՛նչպէս գոհացում տալու մասին սորվելու համար կերպ մը կա՞յ։ Այո՛։ Աստուածաշունչը ուսումնասիրելով եւ անոր ուղղութիւնները կիրարկելով, կրնաք այս հոյակապ ապագան վայելել։ (Յովհաննու 17։3) Եհովայի Վկաները սիրով պիտի փափաքին ձեզի օգնել որ Աստուածաշունչը ուսումնասիրէք։ Կը հրաւիրենք ձեզ որ այս պատեհութիւնը օգտագործէք՝ ընկերութեան մը մաս կազմելու համար, որ երբեք աղքատութենէ ու անիրաւութենէ պիտի չտառապի։
[Նկար՝ էջ 5]
Եուֆրոսինա. «Խնայողութիւնը ընտանիքիս կ’օգնէ որ իրենց պէտք եղածը ունենան»
[Նկարներ՝ էջ 6]
Աստուծոյ հետ լաւ յարաբերութիւնը եւ ընտանեկան երջանիկ կեանքը դրամով կարելի չէ գնել