Բնական Ըլլալ

ԲՆԱԿԱՆ կերպով արտայայտուիլը ուրիշներուն վստահութիւնը շահելու կը նպաստէ։ Դուք պիտի վստահէի՞ք անհատի մը խօսքերուն, որ դիմակի մը ետեւէն կը խօսէր ձեզի։ Եթէ դիմակին արտայայտութիւնը ձեզի հետ խօսող անհատին դէմքէն գեղեցիկ ըլլար, ասիկա տարբերութիւն պիտի ընէ՞ր ձեզի համար։ Հաւանաբար ոչ։ Ուստի, փոխանակ ծպտուելու, բնական եղէք։

Բնական ըլլալը անփոյթ ըլլալուն հետ պէտք չէ շփոթել։ Խեղճ քերականութիւն մը, սխալ հնչում մը եւ անյստակ խօսակցութիւն մը վայել չեն։ Ռամիկ խօսակցութենէ ալ պէտք է զգուշանալ։ Միշտ կ’ուզենք պատշաճ յարգանք ցոյց տալ թէ՛ մեր խօսակցութեամբ եւ թէ կեցուածքով։ Անհատ մը որ այսպիսի բնականութիւն կը ցուցաբերէ, ո՛չ շատ պաշտօնական է, ո՛չ ալ չափազանց հետաքրքրուած է ուրիշները տպաւորելով։

Դաշտի Ծառայութեան Մէջ։ Երբ տան մը, կամ հանրային վայրի մը մէջ մէկու մը կը մօտենաք վկայութիւն տալու համար, ջղագրգիռ կը զգա՞ք։ Շատերուս պարագան այս է, բայց մեզմէ ոմանց մօտ այս զգացումը կը գոյատեւէ։ Լարուածութիւնը կրնայ պատճառ ըլլալ որ ձայնը անբնական կամ դողդոջուն ելլէ, կամ ջղագրգռութիւնը կրնայ ձեռքի կամ գլխի նեղացուցիչ շարժումով ի յայտ գալ։

Հրատարակիչ մը կրնայ կարգ մը պատճառներով այս խնդիրը ունենալ։ Թերեւս կը խորհի թէ ի՛նչ տպաւորութիւն պիտի ձգէ, կամ՝ իր ներկայացումը յաջող պիտի ըլլայ թէ ոչ։ Ասոնցմէ ո՛չ մէկը արտասովոր է, բայց խնդիրներ կը յարուցուին, երբ այսպիսի բաներու չափազանց ուշադրութիւն տրուի։ Եթէ ծառայութեան սկսելէ առաջ ջղագրգիռ զգաք, ի՞նչ բան կրնայ օգնել ձեզի։ Բծախնդիր պատրաստութիւնը եւ Եհովայի ջերմեռանդօրէն աղօթելը։ (Գործք 4։29) Մտածեցէք Եհովայի մեծ ողորմութեան մասին, երբ մարդիկը կը հրաւիրէ որ կատարեալ առողջութիւն եւ յաւիտենական կեանք վայելեն Դրախտին մէջ։ Խորհեցէք այն անհատներուն մասին որոնց կը ջանաք օգնել, եւ բարի լուրը լսելու անոնց կարիքին մասին։

Յիշեցէք նաեւ որ մարդիկ ազատ կամք ունին, ուստի կրնան ընդունիլ կամ մերժել պատգամը։ Նոյնն էր պարագան, երբ Յիսուս կը վկայէր վաղեմի Իսրայէլի մէջ։ Ձեր նշանակումը պարզապէս քարոզել է։ (Մատթ. 24։14) Նոյնիսկ երբ մարդիկ թոյլ չեն տար որ խօսիք, ձեր ներկայութիւնը ինքնին վկայութիւն մըն է։ Դուք յաջողած կ’ըլլաք, քանի որ թոյլ կու տաք որ Եհովա ձեզ գործածէ իր կամքը իրագործելու համար։ Այս առիթներով երբ խօսելու պատեհութիւն ունենաք, ձեր խօսակցութիւնը ի՞նչ բնոյթ պիտի ստանայ։ Եթէ սորվիք ուրիշներու կարիքին մասին մտածել, ձեր խօսակցութիւնը գրաւիչ եւ բնական պիտի ըլլայ։

Վկայութիւն տալու ատեն, երբ սովորական կերպով վարուիք ու խօսիք, ասիկա ձեր ունկնդիրները հանգիստ վիճակի մէջ պիտի դնէ։ Անոնք թերեւս աւելի դիւրաւ ընկալեն սուրբ գրային այն գաղափարները, զորս կ’ուզէք իրենց հետ բաժնել։ Փոխանակ պաշտօնական դասախօսութիւն մը տալու, անոնց հետ զրուցեցէք։ Բարեկամական եղէք։ Անոնց հանդէպ հետաքրքրութիւն ցոյց տուէք եւ անոնց մեկնաբանութիւնները գնահատեցէք։ Անշուշտ, հոն ուր լեզուն կամ տեղական մշակոյթը օտարներու հետ խօսելու ատեն յարգանք ցոյց տալու որոշ վարուելակերպ կը պահանջէ, պէտք չէ զայն անտեսէք։ Բայց հանգստացնող ժպիտը թող միշտ պատրաստ ըլլայ ձեր դէմքին վրայ։

Բեմին Վրայ։ Երբ խումբի մը կը խօսիք, սովորաբար նախընտրելի է բնական, խօսակցական ոճ մը որդեգրել։ Անշուշտ, երբ ունկնդիրներուն խումբը մեծ է, ձեր ձայնը աւելի բարձրացնելու կարիքը կ’ունենաք։ Եթէ փորձէք ձեր դասախօսութիւնը գոց սորվիլ, կամ եթէ ձեր նոթերը շատ մանրամասն ըլլան, հաւանաբար ձեր գլխաւոր մտահոգութիւնը պիտի ըլլայ ձեր բառերը ճիշդ գրուածին պէս ըսել։ Բառերու շիտակ գործածութիւնը կարեւոր է, բայց երբ անոր շատ կարեւորութիւն տրուի, դասախօսութիւնը անճկուն եւ անհարազատ կը դառնայ։ Բնականութիւնը կը կորսուի։ Ձեր գաղափարները պէտք է նախապատրաստէք, բայց շատ աւելի ուշադրութիւն ըրէք գաղափարներուն, քան թէ ճիշդ ո՛ր բառերը գործածելուն։

Նոյնն է պարագան երբ ժողովի մը մէջ հարցազրոյց կը կատարուի ձեզի հետ։ Լաւ պատրաստուեցէք, բայց ձեր պատասխանները մի՛ կարդաք, ո՛չ ալ գոց սորվեցէք։ Բնական ձայներանգով խօսեցէք, որպէսզի ձեր խօսքերը հաճելի կերպով ինքնաբուխ ըլլան։

Նոյնիսկ խօսակցութեան փափաքելի յատկութիւններ եթէ չափազանցուին, կրնան անբնական հնչել։ Օրինակ, պէտք է յստակ խօսիք՝ պատշաճ առոգանութեամբ, բայց ո՛չ այն աստիճան որ խօսակցութիւնը անճկուն կամ շինծու հնչէ։ Շեշտողական կամ նկարագրական շարժուձեւերը երբ լաւ կերպով կատարուին, կրնան կեանք տալ ձեր դասախօսութեան, բայց այն շարժուձեւերը, որոնք շինծու կամ չափազանցուած են, ձեր խօսքերուն արժէքը կը նսեմացնեն։ Աւելի բարձր ձայնածաւալ գործածեցէք, բայց մի՛ փորձէք պոռալ։ Լաւ է պարբերաբար կրակ դնել ձեր դասախօսութեան մէջ, բայց պէտք է զգուշանաք պոռոտախօս ըլլալէ։ Ձայներանգը, խանդավառութիւնը եւ զգացումը, բոլորն ալ պէտք է գործածուին այնպիսի կերպով մը, որ ուշադրութիւնը ձեր անձին վրայ չկեդրոնանայ, կամ ձեր ունկնդիրները չանհանգստանան։

Ոմանք բնականաբար ճշգրիտ կերպով կ’արտայայտուին, նոյնիսկ երբ դասախօսութիւն մը չեն ներկայացներ։ Ուրիշներ աւելի դիւրասահ խօսողներ են։ Կարեւոր է որ ամէ՛ն օր լաւ խօսիք եւ քրիստոնէավայել վարք մը ունենաք։ Այդ պարագային երբ բեմ բարձրանաք, ձեզի համար աւելի դիւրին պիտի ըլլայ գրաւիչ եւ բնական կերպով խօսիլ ու վարուիլ։

Երբ Հանրային Ընթերցանութիւն կ’Ընէք։ Հանրային ընթերցանութիւն ընելու ատեն բնական ըլլալը ջանք կը պահանջէ։ Ասիկա իրագործելու համար, ձեր ընթերցելիք նիւթին գլխաւոր գաղափարները բնորոշեցէք եւ տեսէք թէ անոնք ի՛նչպէս մշակուած են։ Անոնք թող յստակ ըլլան ձեր մտքին մէջ. այլապէս՝ պարզապէս բառեր պիտի կարդաք։ Ձեզի անծանօթ եղող բառերուն հնչումը ստուգեցէք։ Բարձրաձայն կարդալու փորձ ըրէք, որպէսզի պատշաճ ելեւէջ ունենաք եւ կարենաք կարգ մը բառեր իրարու կապել, գաղափարները յստակօրէն հաղորդելու համար։ Ասիկա շատ անգամ կրկնեցէք, մինչեւ որ ձեր ընթերցանութիւնը սահուն ըլլայ։ Ձեր նիւթին շատ լաւ ծանօթ եղէք, որպէսզի երբ բարձրաձայն կարդաք, ձեր ընթերցանութիւնը վառ խօսակցութեան բնոյթ ստանայ։ Ասիկա՛ է բնական ըլլալը։

Անշուշտ, մեր հանրային ընթերցանութեան մեծ մասը Աստուածաշունչի վրայ հիմնուած մեր գրականութիւններէն է։ Աստուածպետական Ծառայութեան Դպրոցին մէջ ընթերցանութեան նշանակումներէն զատ, դաշտի ծառայութեան մէջ եւ բեմէն դասախօսութիւններ տալու ժամանակ՝ համարներ կը կարդանք։ Եղբայրներու նշանակում կը տրուի որ Դիտարան–ի Ուսումնասիրութեան եւ Ժողովքի Գրքի Ուսումնասիրութեան մէջ նկատի առնուած նիւթը ընթերցեն։ Կարգ մը որակելի եղբայրներու համաժողովի մէջ ընթերցանելի դասախօսութիւններ կը նշանակուին։ Երբ Աստուածաշունչը կամ այլ նիւթեր կը կարդաք, հատուածներ որոնք չակերտուած մասեր ունին, անոնց մէջ կեանք դնելով կարդացէք։ Եթէ տարբեր անձեր մէջբերուած են, կերպով մը ձեր ձայնը փոխեցէք իւրաքանչիւր պարագային։ Բայց զգո՛յշ եղէք. շատ թատերական մի՛ ըլլաք, հապա բնական կերպով կեանք դրէք ձեր ընթերցանութեան մէջ։

Բնական կերպով կատարուող ընթերցանութիւնը խօսակցական է։ Անիկա արուեստական չի հնչեր, այլ համոզում ունի։