Կարդալու դժուարութիւն ունեցողներուն ինչպէ՛ս օգնել

1. Կարդալու դժուարութիւն ունեցողներուն Աստուածաշունչը սորվեցնելը ի՞նչ մարտահրաւէր կը ներկայացնէ։

¹ Կարդալու դժուարութիւն ունեցող տանտէրերը կրնայ ըլլալ որ հոգեւոր բաներով հետաքրքրուին, բայց Աստուածաշունչը եւ ա՛յլ գիրքեր սերտելը կրնայ զիրենք վախցնել։ Այսպիսիներուն սկիզբէն Աստուածաշունչը կը սորվեցնէ գիրքը առաջարկելը թերեւս շատ յաջողութիւն չգտնէ։ Ինչպէ՞ս կրնանք անոնց հոգեւորապէս օգնել։ Աւելի քան 20 երկիրներու մէջ գտնուող փորձառու հրատարակիչներու հարցուցինք թէ իրենք ի՛նչ կ’ընեն։ Անոնց առաջարկները վարը նշուած են։

2. Կարդալու դժուարութիւն ունեցողին օգնելու համար, ո՞ր գործիքները ազդու են։

² Եթէ աշակերտը կարդալու սահմանափակ կարողութիւն ունի կամ բնաւ կարդալ չի գիտեր, կրնաս անոր հետ սկսիլ կա՛մ Աստուծոյ մտիկ ըրէ եւ կամ Աստուծոյ մտիկ ըրէ եւ յաւիտեան պիտի ապրիս գրքոյկով։ Միացեալ Նահանգներէն ռահվիրայ մը անհատին ցոյց կու տայ երկու գրքոյկները եւ անոր կ’առաջարկէ որ իր նախընտրած գրքոյկը զատէ։ Քենիայի մասնաճիւղը կը տեղեկագրէ, թէ այս գործիքները շատ ազդու եղած են, քանի որ հինէն ի վեր ափրիկեցիները պատմութիւն լսելով կը սորվին եւ ոչ թէ հարց–պատասխան քննարկութեամբ։ Մինչ ուսեալ անհատը թերեւս դիւրաւ ընդունի կարդալ եւ ապա հարցումին պատասխանել, սահմանափակ ուսում ունեցողը այս մեթոտէն կրնայ անհանգիստ զգալ։ Եթէ աշակերտը կարդալու սահմանափակ կարողութիւն ունի, բազմաթիւ հրատարակիչներ կը նախընտրեն ուսումնասիրութիւնը սկսիլ Աստուծոյ կողմէ ուրախ լուրեր կամ Աստուծոյ բարեկամը կրնա՛ք ըլլալ գրքոյկով, կամ թերեւս Աստուածաշունչի պատմութիւններու հաւաքածոյ գրքով։

3. Կարդալ չգիտցողներուն պարագան հասկնալը ինչպէ՞ս մեզի պիտի օգնէ, որ անոնց սորվեցնելու մէջ ազդու ըլլանք։

³ Գովէ։ Կարդալ չգիտցողները թերեւս ամչնան, իսկ անոնցմէ շատեր՝ անարժէք զգան։ Յաճախ, այսպիսիներուն ճշմարտութիւնը սորվեցնելու առաջին քայլն է՝ օգնել իրենց որ հանգիստ զգան։ Կարդալ չգիտցողներուն մեծամասնութիւնը ուշիմ կ’ըլլայ եւ սորվելու ընդունակ կ’ըլլայ։ Անոնց հանդէպ պատշաճ յարգանք ցուցաբերէ եւ անոնց հետ արժանապատուութեամբ վարուէ (Ա. Պետ. 3։15)։ Այսպիսով, անոնք պիտի մղուին ուսումնասիրութիւնը շարունակելու, եթէ զգան թէ իրենց ջանքերը արժէքաւոր են եւ թէ հոգեւորապէս կը յառաջդիմեն։ Ուստի, առատօրէն զիրենք գովէ։

4. Ինչպէ՞ս կրնանք քաջալերել կարդալու սահմանափակ կարողութիւն ունեցողները որ իրենց դասը պատրաստեն։

⁴ Նոյնիսկ եթէ աշակերտը կարդալու սահմանափակ կարողութիւն ունի, զինք քաջալերէ որ իր դասը պատրաստէ։ Հարաւային Ափրիկէի մէջ, հրատարակիչներէն ոմանք իրենց աշակերտները կը քաջալերեն, որ օգնութիւն խնդրեն ընտանիքի անդամէ մը կամ բարեկամէ մը, որ լաւ կերպով կրնայ կարդալ։ Բրիտանիոյ մէջ հրատարակիչ մը իր աշակերտներուն թոյլ կու տայ, որ ուսումնասիրութեան ընթացքին քանի մը պարբերութիւն ի՛ր գիրքէն հետեւին, որպէսզի տեսնեն թէ որքա՜ն աւելի դիւրին կ’ըլլայ պատասխանները գտնել, երբ անոնք ընդգծուած են. այսպիսով անոնք կը քաջալերուին դասը պատրաստելու։ Հնդկաստանի մէջ եղբայր մը իր աշակերտները կը քաջալերէ, որ յաջորդ շաբթուան դասին պատկերներուն կանխաւ նային եւ անոնց վրայ խոկան։

5. Ուսումնասիրութիւն վարելու ատեն ինչպէ՞ս կրնանք համբերատար ըլլալ։

⁵ Համբերատար եղիր։ Ինչ հրատարակութիւն ալ որ գործածես, գլխաւոր կէտերուն վրայ կեդրոնացիր եւ աշակերտիդ օգնէ որ ատոնք լա՛ւ հասկնայ։ Սկիզբը, 10–էն 15 վայրկեան տեւող քննարկութիւններ վարելը թերեւս լաւագոյն բանն է։ Մի՛ փորձեր շատ կէտեր ծածկել, այլ՝ իւրաքանչիւր նիստին միայն քանի մը պարբերութիւն նկատի առ։ Եթէ աշակերտը շատ դանդաղ կը կարդայ, համբերատար եղիր։ Մինչ Եհովայի հանդէպ իր գնահատութիւնը կը խորանայ, հաւանաբար ան մղուի իր կարդալու կարողութիւնը բարելաւելու։ Այս նպատակաւ, աշակերտիդ օգնելու համար լաւ կ’ըլլայ որ սկիզբէն իսկ իրեն ժողովներու հրաւիրես։

6. Ինչպէ՞ս կրնանք անհատներուն օգնել որ կարդալ սորվին։

⁶ Եթէ Աստուածաշունչի աշակերտները կարդալ սորվին, հոգեւորապէս աւելի արագ պիտի յառաջդիմեն (Սաղ. 1։1-3)։ Շատեր իրենց աշակերտներուն օգնած են, իւրաքանչիւր դասի վերջաւորութեան քանի մը վայրկեան Միտք դիր կարդալու եւ գրելու հրատարակութիւնը գործածելով։ Եթէ աշակերտը վհատի, թերեւս կրնաս իր ինքնավստահութիւնը կերտել՝ նշելով այն կարգ մը բաները որ կրցաւ իրագործել։ Անոր վստահեցուր թէ Եհովան իր ջանքերը պիտի օրհնէ, եւ զինք քաջալերէ որ աղօթքով օգնութիւն խնդրէ (Առ. 16։3. Ա. Յովհ. 5։14, 15)։ Բրիտանիոյ մէջ կարգ մը հրատարակիչներ իրենց աշակերտները կը քաջալերեն որ տրամաբանական բայց յառաջդիմական նպատակակէտեր դնեն,– թերեւս նախ այբուբենին տիրապետել, ապա ընտրուած համարները բանալ եւ կարդալ եւ ի վերջոյ Աստուածաշունչի պարզուած հրատարակութիւնները կարդալ։ Կարդալ սորվեցնելը յաճախ կը պարփակէ զիրենք մղել, որ ուզեն այս մէկը ընել, եւ ոչ թէ պարզապէս կերպը սորվեցնել։

7. Ինչո՞ւ պէտք չէ ետ կենանք կարդալու դժուարութիւն ունեցողները ճշմարտութեան ծանօթացնելէ։

⁷ Եհովան սահմանափակ աշխարհիկ ուսում ունեցողներուն ցած աչքով չի նայիր (Յոբ 34։19)։ Ան մարդ արարածին սիրտը կը քննէ (Ա. Մն. 28։9)։ Ուստի, ետ մի՛ կենար՝ կարդալու դժուարութիւն ունեցողները ճշմարտութեան ծանօթացնելէ։ Սկսելու համար բազմաթիւ հոյակապ գործիքներ ունիս։ Ի վերջոյ, կրնաս դասը շարունակել Աստուածաշունչը կը սորվեցնէ գիրքով, եւ անոր օգնել որ Սուրբ Գիրքը աւելի մանրամասնօրէն հասկնայ։

[Մէջբերում՝ էջ 6]

Կարդալ չգիտցողները թերեւս ամչնան, իսկ անոնցմէ շատեր՝ անարժէք զգան։ Յաճախ, այսպիսիներուն ճշմարտութիւնը սորվեցնելու առաջին քայլն է՝ օգնել իրենց որ հանգիստ զգան

[Շրջանակ՝ էջ 6]

Եթէ տանտէրը կարդալ չի գիտեր, հետեւեալը փորձէ.

• Սկիզբը գործածէ՝ Աստուծոյ մտիկ ըրէ, Աստուծոյ մտիկ ըրէ եւ յաւիտեան պիտի ապրիս, եւ կամ ուրիշ յարմար հրատարակութիւն մը։

• Անոր հետ արժանապատուութեամբ վարուէ եւ առատօրէն զինք գովէ։

• Քննարկութիւնները հակիրճ պահէ, եւ մի՛ փորձեր շատ կէտեր ծածկել։

• Օգնէ իրեն որ կարդալու հմտութիւնը բարելաւէ։

Երբ ցոյց տայ թէ ճշմարտութիւնը կը գնահատէ եւ սորվելու ախորժակ ունի, թերեւս կարենաս դասը շարունակել Աստուածաշունչը կը սորվեցնէ գիրքով։