Եհովայի պաշտամունքին պատշաճ տեղը մեր կեանքին մէջ
«Ամէն օր քեզ պիտի օրհնեմ եւ քու անունդ յաւիտեանս յաւիտենից պիտի գովեմ»։—ՍԱՂՄՈՍ 145։2
1. Պաշտամունքի առնչութեամբ Եհովա ի՞նչ կ’ակնկալէ։
«ԵՍ ՔՈՒ Տէր Աստուածդ նախանձոտ [բացարձակ պաշտամունք պահանջող (ՆԱ)] Աստուած եմ»։ (Ելից 20։5) Մովսէս այդ յայտարարութիւնը Եհովայէ լսեց եւ հետագային զայն կրկնեց, երբ Իսրայէլ ազգին կ’ուղղէր իր խօսքը։ (Բ. Օրինաց 5։9) Մովսէսի մտքին մէջ որեւէ կասկած չկար թէ Եհովա Աստուած իր ծառաներէն կ’ակնկալէր, որ բացարձակ պաշտամունք մատուցանեն Իրեն։
2, 3. (ա) Իսրայելացիները ինչպէ՞ս հասկցան թէ Սինա Լերան մօտ տեղի ունեցածը արտակարգ էր։ (բ) Իսրայելացիներուն եւ Աստուծոյ ներկայ ծառաներուն մատուցած պաշտամունքին մասին ի՞նչ հարցումներ պիտի քննենք։
2 Սինա Լերան մօտ բանակած ըլլալով, Իսրայելացիները եւ անոնց հետ Եգիպտոսը ձգած «խառն բազմութիւն»ը անսովոր բանի մը ականատեսներ եղան։ (Ելից 12։38) Անիկա Եգիպտոսի չաստուածներու պաշտամունքին չէր նմաներ, որոնք այն ատեն նուաստացած էին տասը հարուածներով, կամ պատուհասներով։ Երբ Եհովա իր ներկայութիւնը Մովսէսին յայտնեց, վախազդու երեւոյթներ պատահեցան. որոտումներ, կայծակներ եւ փողի խլացուցիչ ձայն մը որոնք ամբողջ բանակատեղին զարհուրեցուցին։ Ապա կրակ ու մուխ երեւցան, մինչ ամբողջ լեռը կը դողար։ (Ելից 19։16–20. Եբրայեցիս 12։18–21) Եթէ որեւէ Իսրայելացի յաւելեալ ապացոյցի պէտք ունեցած ըլլար թէ ի՛նչ արտակարգ բան մը կը պատահէր, ան շատ սպասած պիտի չըլլար։ Շատ չանցած, Մովսէս լեռնէն իջաւ Աստուծոյ օրէնքներուն երկրորդ օրինակ մը ստանալէ ետք։ Ըստ ներշնչուած արձանագրութեան, «[Մովսէսի] երեսին մորթը լուսափայլ էր, ուստի [Իսրայելացիները] անոր մօտենալու վախցան»։ Իրապէս, անմոռանալի, գերմարդկային երեւոյթ մըն էր ասիկա։—Ելից 34։30
3 Աստուծոյ այդ տիպական ազգին համար, կասկած չկար թէ Եհովայի պաշտամունքը ի՛նչ տեղ պէտք էր գրաւէր։ Աստուած անոնց Ազատարարն էր։ Անոնք իրենց կեանքերը կը պարտէին անոր։ Ան նաեւ անոնց Օրէնսդիրն էր։ Բայց անոնք շարունակեցի՞ն Եհովայի պաշտամունքին առաջին տեղը տալ։ Իսկ ի՞նչ ըսել Աստուծոյ այժմու ծառաներուն մասին։ Անոնց կեանքին մէջ Եհովայի պաշտամունքը ի՞նչ տեղ կը գրաւէ։—Հռովմայեցիս 15։4
Եհովայի Պաշտամունքը Իսրայէլի մէջ
4. Անապատին մէջ իրենց կեցութեան ընթացքին, Իսրայելացիներուն բանակատեղի յատակագիծը ի՞նչ էր, եւ անոր կեդրոնը ի՞նչ կար։
4 Եթէ անապատը բանակած Իսրայելացիները վերէն դիտէիք, ի՞նչ տեսարան պիտի պարզուէր ձեր աչքին։ Հաւանաբար երեք միլիոն կամ աւելի անհատներ պատսպարող վրաններու ընդարձակ, բայց կոկիկ, շարան մը, երեքական ցեղերու բաժանումներուն համաձայն խմբաւորուած դէպի հիւսիս, հարաւ, արեւելք եւ արեւմուտք։ Աւելի մօտէն դիտելով, բանակատեղի կեդրոնամասին աւելի մօտ եղող ուրիշ խումբ մըն ալ պիտի նկատէիք։ Վրաններու այս աւելի պզտիկ չորս խումբերը Ղեւիի ցեղին ընտանիքները կը պատսպարէին։ Իսկ բանակատեղին ճիշդ կեդրոնը, վարագոյրէ պատով անջատուած մասի մը մէջ, անզուգական կառոյց մը կար։ Անիկա «վկայութեան վրան»ն էր, զոր «սրտով իմաստուն» Իսրայելացիներ շինած էին Եհովայի ծրագրին համաձայն։—Թուոց 1։52, 53. 2։3, 10, 17, 18, 25. Ելից 35։10
5. Իսրայէլի մէջ տաղաւարը ի՞նչ նպատակի կը ծառայէր։
5 Անապատին մէջ իրենց տեղափոխութեան ընթացքին, շուրջ 40 բանակավայրերու իւրաքանչիւրին, Իսրայելացիները տաղաւարը կը կանգնէին, որ անոնց բանակատեղին կեդրոնը կ’ըլլար (Թուոց գլուխ՝ 33)։ Պատշաճօրէն, Աստուածաշունչը Եհովան կը նկարագրէ որպէս թէ ան իր ժողովուրդին մէջ, բանակատեղին ճիշդ կեդրոնը կը բնակէր։ Անոր փառքը տաղաւարը կը լեցնէր։ (Ելից 29։43–46. 40։34. Թուոց 5։3. 11։20. 16։3) Գիրք մը (Our Living Bible) կը բացատրէ. «Այս դիւրատար սրբարանը մեծագոյն կարեւորութիւնը ունէր, քանի որ անիկա ցեղերուն համար կը ներկայացնէր պաշտամունքային համախմբութեան կեդրոն մը։ Այսպիսով, անապատին մէջ թափառումի երկար տարիներուն ընթացքին, անիկա զանոնք միութեան մէջ պահեց ու համագործակցութիւնը կարելի դարձուց»։ Անկէ աւելին, տաղաւարը Իսրայելացիներուն անդադար կը յիշեցնէր թէ իրենց Ստեղծիչին պաշտամունքը իրենց կեանքերուն կորիզը կը կազմէր։
6, 7. Պաշտամունքի ի՞նչ կառոյց տաղաւարը փոխարինեց, եւ անիկա ի՞նչ նպատակի ծառայեց Իսրայէլ ազգին համար։
6 Իսրայելացիները Աւետեաց Երկիրը հասնելէ ետք, տաղաւարը շարունակեց Իսրայէլի պաշտամունքին կեդրոնը ըլլալ։ (Յեսուայ 18։1. Ա. Թագաւորաց 1։3) Հետագային, Դաւիթ Թագաւոր առաջարկեց մնայուն կառոյց մը շինել։ Ատիկա այն տաճարը եղաւ զոր, իրմէ ետք, իր Սողոմոն որդին կառուցանեց։ (Բ. Թագաւորաց 7։1–10) Անոր նաւակատիքին ընթացքին ամպ մը իջաւ, այդ կառոյցին վրայ Եհովայի հաճութիւնը ապացուցանելու համար։ «Քեզի բնակութեան համար տուն ու յաւիտեան նստելու համար քեզի տեղ շինեցի», աղօթեց Սողոմոն։ (Գ. Թագաւորաց 8։12, 13. Բ. Մնացորդաց 6։2) Այլեւս նոր կառուցուած տաճարը դարձաւ ազգին պաշտամունքի գլխաւոր կեդրոնը։
7 Տարին երեք անգամ, Իսրայելացի բոլոր արուները Երուսաղէմ պէտք էր ելլէին տաճարին մէջ կազմակերպուած ուրախ տօնակատարութիւններուն ներկայ ըլլալու համար, առ ի երախտագիտութիւն Աստուծոյ օրհնութիւններուն։ Տեղին ըլլալով, այս հաւաքումները կոչուած էին «Տէրոջը տօներ», ուշադրութիւնը Աստուծոյ պաշտամունքին վրայ հրաւիրելով։ (Ղեւտացւոց 23։2, 4) Բարեպաշտ կիներ, ընտանիքի միւս անդամներուն հետ մէկտեղ, ներկայ կ’ըլլային։—Ա. Թագաւորաց 1։3–7. Ղուկաս 2։41–44
8. Սաղմոս 84։1–12–ը ինչպէ՞ս կը վկայէ Եհովայի պաշտամունքին կարեւորութեան։
8 Ներշնչուած սաղմոսերգուները պերճախօսութեամբ արտայայտուեցան թէ անոնք իրենց կեանքին մէջ պաշտամունքը որքա՜ն կարեւոր կը նկատէին։ «Ի՜նչպէս սիրելի են քու բնակարաններդ, ո՛վ զօրաց Տէր», երգեցին Կորխի որդիները։ Անոնք վստահաբար պարզապէս կառոյց մը չէին փառաբաներ։ Ընդհակառակը, անոնք իրենց ձայները կը բարձրացնէին Եհովա Աստուած գովաբանելու համար, յայտարարելով. «Իմ սիրտս ու մարմինս ցնծութեամբ կ’աղաղակեն կենդանի Աստուծոյն»։ Ղեւտացիներուն ծառայութիւնը մեծ ուրախութիւն կը բերէր անոնց։ «Երանի՜ անոնց որ քու տանդ մէջ կը բնակին», բացագանչեցին անոնք։ «Անոնք անդադար քեզ պիտի օրհնեն»։ Իրականութեան մէջ, բոլոր Իսրայելացիները կրնային երգել. «Երանի՜ այն մարդոց, որոնց զօրութիւնը քեզմէ է ու իրենց սրտին մէջ տանդ ճամբաները կան։ ... Անոնք զօրութենէ զօրութիւն պիտի երթան, մինչեւ որ Սիօնի մէջ Աստուծոյ առջեւ երեւնան»։ Թէեւ Իսրայելացիի մը դէպի Երուսաղէմ ճամբորդութիւնը կրնար երկար ու յոգնեցուցիչ ըլլալ, բայց անոր զօրութիւնը կը վերանորոգուէր, երբ ան մայրաքաղաք հասնէր։ Անոր սիրտը ուրախութեամբ կը լեցուէր, մինչ ան Եհովան պաշտելու իր առանձնաշնորհումը կը մեծարէր. «Վասնզի քու սրահներուդ մէջ մէկ օրը ուրիշ տեղի հազարէն աղէկ է։ Աւելի նախընտրեցի իմ Աստուծոյս տանը շեմին վրայ կենալ, քան թէ ամբարիշտներու վրաններուն մէջ բնակիլ։ ... Ո՛վ զօրաց Տէր, երանելի՜ է քեզի յուսացող մարդը»։ Այսպիսի արտայայտութիւններ կը յայտնեն որ Իսրայելացիները Եհովայի պաշտամունքին նախապատուութիւնը կու տային։—Սաղմոս 84։1–12
9. Իսրայէլ ազգին ի՞նչ կը պատահէր, երբ անիկա Եհովայի պաշտամունքը առաջնագոյն տեղը չէր պահեր։
9 Դժբախտաբար, Իսրայելացիները ճշմարիտ պաշտամունքը առաջնագոյն տեղը չպահեցին։ Անոնք թոյլ տուին որ սուտ աստուածներու պաշտամունքը նուազեցնէ Եհովային հանդէպ իրենց նախանձախնդրութիւնը։ Հետեւաբար, Եհովա անոնց թշնամիներուն մատնեց զանոնք, արտօնելով որ անոնք Բաբելոն աքսորուին։ Երբ, 70 տարի ետք, անոնք իրենց հայրենիքը վերադարձան, Եհովա Իսրայելացիներուն դրդիչ յորդորներ տուաւ հաւատարիմ Անգէ, Զաքարիա եւ Մաղաքիա մարգարէներուն միջոցով։ Եզրաս Քահանան ու Նէեմիա Կառավարիչը մղեցին Աստուծոյ ժողովուրդը որ տաճարը վերաշինէ ու հոն ճշմարիտ պաշտամունքը վերահաստատէ։ Բայց մինչ դարերը անցան, ճշմարիտ պաշտամունքը դարձեալ նուազ կարեւոր նախապատուութիւն ստացաւ ազգին մէջ։
Ճշմարիտ Պաշտամունքին Հանդէպ Նախանձախնդրութիւն՝ Առաջին Դարուն
10, 11. Յիսուս երկրին վրայ եղած ժամանակ, հաւատարիմներուն կեանքին մէջ Եհովայի պաշտամունքը ի՞նչ տեղ կը գրաւէր։
10 Եհովայի սահմանած ժամանակին, Մեսիան յայտնուեցաւ։ Հաւատարիմ անհատներ Եհովայի կը սպասէին փրկութեան համար։ (Ղուկաս 2։25. 3։15) Ղուկասի Աւետարանին արձանագրութիւնը շեշտակիօրէն կը նկարագրէ 84 տարեկան որբեւարի Աննան որ «տաճարէն չէր զատուեր, հապա ծոմով եւ աղօթքով Աստուծոյ ծառայութիւն կ’ընէր գիշեր ու ցորեկ»։—Ղուկաս 2։37
11 Յիսուս ըսաւ. «Իմ կերակուրս այն է, որ ես զիս ղրկողին կամքը ընեմ եւ անոր գործը կատարեմ»։ (Յովհաննու 4։34) Յիշեցէք թէ Յիսուս ի՛նչպէս հակազդեց, երբ տաճարին մէջ ստակ փոխողներուն հանդիպեցաւ։ Ան դարձուց անոնց սեղանները, ինչպէս նաեւ՝ աղաւնի ծախողներուն աթոռները։ Մարկոս կը պատմէ. «[Յիսուս] թող չտուաւ, որ մէկը տաճարին մէջէն աման մը անցնէ եւ սորվեցուց անոնց ու ըսաւ. ‘Գրուած չէ՞ թէ «Իմ տունս աղօթքի տուն պիտի կոչուի բոլոր ազգերուն». բայց դուք անիկա աւազակներու այր ըրիք’»։ (Մարկոս 11։15–17) Այո, Յիսուս նոյնիսկ թոյլ չէր տար որ ոեւէ անհատ տաճարի գաւիթէն անցնէր որպէս կտրուկ ճամբայ քաղաքին ուրիշ մէկ մասը իրեր տանելու համար։ Յիսուսի արարքները կը զօրացնէին նախապէս տուած իր խրատը. «Առաջ խնդրեցէք Աստուծոյ թագաւորութիւնը եւ ... արդարութիւնը»։ (Մատթէոս 6։33) Եհովայի բացարձակ պաշտամունք տալու մէջ Յիսուս մեզի հոյակապ օրինակ կը հանդիսանայ։ Ան իրապէս գործադրեց իր քարոզածը։—Ա. Պետրոս 2։21
12. Յիսուսի աշակերտները ինչպէ՞ս ցոյց տուին թէ իրենք Եհովայի պաշտամունքին նախապատուութիւնը կու տային։
12 Յիսուս նաեւ իր աշակերտներուն օրինակ հանդիսացաւ հարստահարուած, բայց հաւատարիմ, Հրեաները սուտ կրօնքի սովորութիւններու բեռներէն ազատելու իր պաշտօնը կատարելու իր կերպովը։ (Ղուկաս 4։18, 19) Աշակերտելու ու զանոնք մկրտելու Յիսուսի պատուէրին հնազանդելով, նախկին Քրիստոնեաները խիզախօրէն ծանուցանեցին իրենց յարուցեալ Տիրոջ կապակցաբար Եհովայի կամքը։ Եհովա կ’ուրախանար տեսնելով որ անոնք իր պաշտամունքին նախապատուութիւնը կու տային։ Ուստի, Աստուծոյ հրեշտակը Պետրոս եւ Յովհաննէս առաքեալները բանտէն հրաշալիօրէն ազատեց եւ անոնց հրահանգեց. «Գացէ՛ք եւ տաճարին մէջ կայնելով ժողովուրդին յայտնեցէք այս կենաց պատգամը»։ Իրենց ոյժը վերարծարծուած, անոնք հնազանդեցան։ Ամէն օր, թէ՛ Երուսաղէմի տաճարին մէջ եւ թէ տունէ տուն, անոնք «չէին դադարիր սորվեցնելէ ու Յիսուս Քրիստոսը քարոզելէ»։—Գործք 1։8. 4։29, 30. 5։20, 42. Մատթէոս 28։19, 20
13, 14. (ա) Քրիստոնէութեան սկիզբի ժամանակներէն ի վեր, Սատանան փորձած է ի՞նչ ընել Աստուծոյ ծառաներուն։ (բ) Աստուծոյ հաւատարիմ ծառաները շարունակած են ի՞նչ ընել։
13 Մինչ իրենց քարոզչութեան հանդէպ հակառակութիւնը կ’աւելնար, Աստուած առաջնորդեց իր հաւատարիմ ծառաները որ այժմէական խրատներ գրեն. «Ձեր ամէն հոգը անոր [Եհովայի] վրայ ձգեցէ՛ք, վասնզի անիկա ձեզի համար կը հոգայ», գրեց Պետրոս, Հ.Դ. 60–էն քիչ ետք։ «Արթո՛ւն կեցէք, հսկեցէ՛ք, վասնզի ձեր հակառակորդը, Սատանան՝ մռնչող առիւծի պէս կը պտըտի ու կը փնտռէ թէ ո՛վ կլլէ։ Անոր դէմ կեցէ՛ք հաւատքով հաստատուած, գիտնալով որ ձեր եղբայրներն ալ աշխարհի մէջ նոյն չարչարանքները կը կրեն»։ Անկասկած նախկին Քրիստոնեաները այս խօսքերով սրտապնդուեցան։ Անոնք գիտէին որ, քիչ մը ատեն նեղութիւն կրելէ ետք, Աստուած իրենց մարզումը պիտի ամբողջացնէր։ (Ա. Պետրոս 5։7–10) Իրերու Հրէական դրութեան այդ վերջին օրերուն ընթացքին, ճշմարիտ Քրիստոնեաները Եհովայի սիրալիր պաշտամունքը նոր բարձունքներու հասցուցին։—Կողոսացիս 1։23
14 Ինչպէս Պօղոս առաքեալ գուշակած էր, հաւատուրացութիւնը՝ ճշմարիտ պաշտամունքէն հեռացումը՝ տեղի ունեցաւ։ (Գործք 20։29, 30. Բ. Թեսաղոնիկեցիս 2։3) Առաջին դարու վերջին տասնամեակներէն եկած վկայութիւնը առատօրէն կ’ապացուցանէ ասիկա։ (Ա. Յովհաննու 2։18, 19) Սատանան յաջող կերպով կեղծ Քրիստոնեաներ ցանեց անկեղծ Քրիստոնեաներուն մէջ, ցորենանման Քրիստոնեաներէն «որոմ»ը զանազանելը դժուարացնելով։ Այսուհանդերձ, անցեալ դարերուն, կարգ մը անհատներ Աստուծոյ պաշտամունքը առաջին տեղը դրին, նոյնիսկ իրենց կեանքին գնով։ Բայց միայն «ազգերուն սահմանուած ժամանակներ»ու վերջին տասնամեակներուն է որ Աստուած իր ծառաները ետ հաւաքեց ճշմարիտ պաշտամունքը բարձրացնելու համար։—Մատթէոս 13։24–30, 36–43. Ղուկաս 21։24, ՆԱ։
Եհովայի Պաշտամունքը Բարձրացուած՝ Այսօր
15. 1919–էն ի վեր, Եսայեայ 2։2–4–ի եւ Միքիա 4։1–4–ի մարգարէութիւնները ինչպէ՞ս կատարուած են։
15 1919–ին, Եհովա օծեալ Քրիստոնեաներու մնացորդը զօրացուց, որպէսզի անոնք համայն աշխարհի մէջ վկայութեան խիզախ արշաւի մը ձեռնարկեն, որ ճշմարիտ Աստուծոյ պաշտամունքը բարձրացնելու նպաստեց։ 1935–էն ի վեր, խորհրդանշական «ուրիշ ոչխարներ»ու ներխուժումով, հոգեւոր առումով «Տէրոջը տանը լեռը» բարձրացող մարդոց բազմութիւնը երթալով աւելցած է։ 1994–ի ծառայութեան տարուան ընթացքին, 4,914,094 Եհովայի Վկաներ զինք գովաբանեցին ուրիշները հրաւիրելով, որ իր բարձրացուած պաշտամունքին միանան։ Ի՜նչ մեծ հակադրութիւն մը սուտ կրօնքի համաշխարհային կայսրութեան, մանաւանդ Քրիստոնեայ Աշխարհին, աղանդական «բլուրներ»ուն հոգեւորապէս վատթարացած վիճակին հետ։—Յովհաննու 10։16. Եսայեայ 2։2–4. Միքիա 4։1–4
16. Եսայեայ 2։10–22–ին մէջ գուշակուած բաներուն ի տես, Աստուծոյ բոլոր ծառաները ի՞նչ պէտք է ընեն։
16 Սուտ կրօնքին յարողները իրենց եկեղեցիներն ու մայր տաճարները եւ նոյնիսկ իրենց կղերները կը նկատեն որպէս «բարձր», անոնց վեհաշուք տիտղոսներ ու պատուոյ դիրքեր վերագրելով։ Բայց նկատի առէք թէ Եսայի ի՛նչ գուշակեց. «Մարդուն ամբարտաւան աչքերը պիտի խոնարհին, մարդոց հպարտութիւնը պիտի ցածնայ։ Այն օրը միայն Տէրը [Եհովան (ՆԱ)] պիտի բարձրանայ»։ Ասիկա ե՞րբ պիտի իրականանայ։ Վերահաս մեծ նեղութեան ընթացքին, երբ «կուռքերը բնաջինջ պիտի ըլլան»։ Այդ վախազդու ժամանակին մօտալուտ ըլլալուն ի տես, Աստուծոյ բոլոր ծառաները լրջօրէն պէտք է քննեն թէ իրենց կեանքին մէջ Եհովայի պաշտամունքը ի՛նչ տեղ կը գրաւէ։—Եսայեայ 2։10–22
17. Եհովայի ծառաները այսօր ինչպէ՞ս ցոյց կու տան որ իրենք Եհովայի պաշտամունքին նախապատուութիւնը կու տան։
17 Միջազգային եղբայրակցութիւն մը կազմելով, Եհովայի Վկաները հանրածանօթ են Թագաւորութիւնը քարոզելու իրենց նախանձախնդրութեան համար։ Անոնց պաշտամունքը ձեւական կրօնք մը չէ, որու շաբաթը շուրջ մէկ ժամու չափ կը տրամադրուի։ Ո՛չ, անիկա անոնց ամբողջ ապրելակերպն է։ (Սաղմոս 145։2) Արդարեւ, անցեալ տարի աւելի քան 636,000 Վկաներ իրենց գործերը կարգի դրին Քրիստոնէական ծառայութեան լիաժամօրէն մասնակցելու համար։ Միւսները վստահաբար չեն անտեսեր Եհովայի պաշտամունքը։ Անիկա գլխաւոր տեղը կը գրաւէ թէ՛ անոնց առօրեայ խօսակցութիւններուն եւ թէ անոնց հանրային քարոզչութեան մէջ, նոյնիսկ երբ անոնց ընտանեկան պարտաւորութիւնները կը պահանջեն որ անոնք ծանր աշխատին իրենց աշխարհային գործին մէջ։
18, 19. Վկաներու կենսագրութիւննները կարդալէն ձեր քաղած քաջալերութիւններուն մասին օրինակներ յիշեցէք։
18 Դիտարանին մէջ հրատարակուած Վկաներու կենսագրութիւնները մեզի կ’օգնեն ըմբռնելու թէ մեր եղբայրներն ու քոյրերը իրենց կեանքին մէջ Եհովայի պաշտամունքը ի՛նչպէս առաջին տեղը պահած են։ Երիտասարդ քոյր մը, որ վեց տարեկանին Եհովայի նուիրուած էր, իր նպատակակէտը ըրած էր միսիոնարական ծառայութիւնը։ Ո՛վ երիտասարդ եղբայրներ ու քոյրեր, դուք ի՞նչ նպատակակէտ կրնաք ընտրել, որ թոյլ տայ ձեզի որ ձեր կեանքին մէջ Եհովայի պաշտամունքը առաջնագոյն տեղը պահէք։—Տես «Վեց Տարեկանիս Ըրած Նպատակակէտ մը կը Հետապնդեմ» յօդուածը, հրատարակուած՝ Դիտարան Մարտ 1, 1992–ի Անգլերէն թիւին մէջ, էջ 26–30։
19 Որբեւարի տարեց քոյր մը Եհովայի պաշտամունքը իր պատշաճ տեղը դնելու մէջ ուրիշ լաւ օրինակ կը հանդիսանայ։ Այն անհատները, որոնց ան ճշմարտութիւնը սորվելու մէջ օգնած էր, համբերութեան մեծ քաջալերանքի աղբիւր մը եղան իրեն։ Անոնք իր «ընտանիք»ն էին։ (Մարկոս 3։31–35) Եթէ դուք նոյն պարագաներու մէջ գտնուիք, ժողովքին մէջ աւելի երիտասարդ եղողներուն աջակցութիւնն ու օգնութիւնը պիտի ընդունի՞ք։ (Հաճեցէք նկատի առնել թէ Քոյր Ուինըֆրետ Ռեմմին ի՛նչպէս արտայայտուեցաւ «Հունձքին Համար Եղած Կոչին Ընդառաջեցի» յօդուածին մէջ, հրատարակուած՝ Դիտարան Յուլիս 1, 1992–ի Անգլերէն թիւին մէջ, էջ 21–3։) Ո՛վ լիաժամ ծառաներ, դուք ցոյց տուէք որ ձեր կեանքին մէջ Եհովայի պաշտամունքը իրապէս առաջին տեղը կը գրաւէ խոնարհաբար ծառայելով՝ ուր որ նշանակուած էք, աստուածպետական առաջնորդութեան կամաւ ենթարկուելով։ (Հաճեցէք նկատի առնել Եղբայր Ռօյ Ռայընի օրինակը, ինչպէս յիշուած է «Աստուծոյ Կազմակերպութեան Սերտօրէն Կառչած» յօդուածին մէջ, հրատարակուած՝ Դիտարան Դեկտեմբեր 1, 1991–ի Անգլերէն թիւին մէջ, էջ 24–7։) Յիշեցէք որ երբ մենք Եհովայի պաշտամունքին նախապատուութիւնը տանք, երաշխիք ունինք թէ ան մեզի համար պիտի հոգայ։ Կարիքը չունինք մտահոգուելու թէ կեանքի անհրաժեշտ բաները ո՛ւրկէ ձեռք պիտի ձգենք։ Օլիվ եւ Սոնիա Սփրինկէթ Քոյրերուն փորձառութիւնները կը պատկերացնեն ասիկա։—Տես «Առաջ Թագաւորութիւնը Փնտռած Ենք» յօդուածը, հրատարակուած՝ Դիտարան Փետրուար 1, 1994–ի Անգլերէն թիւին մէջ, էջ 20–5։
20. Մենք մեր անձին ի՞նչ պատշաճ հարցումներ պէտք է ընենք։
20 Արդ, տեղին չէ՞ որ մենք մեր անձին կարգ մը պատշաճ հարցումներ ընենք. Կեանքիս մէջ Եհովայի պաշտամունքը ի՞նչ տեղ կը գրաւէ։ Աստուծոյ կամքը ընելու նուիրումիս համաձայն կ’ապրի՞մ, կարողութիւններուս լաւագոյնը գործածելով։ Կեանքի ո՞ր մարզերուն մէջ կրնամ բարելաւումներ ընել։ Յաջորդ յօդուածը խորազնին կերպով նկատի առնելը պատեհութիւն պիտի տայ մեզի որ հանդարտօրէն խորհինք թէ մեր նիւթական միջոցները ի՛նչպէս կը գործածենք կեանքի մէջ մեր ընտրած նախապատուութեան համաձայն. Գերիշխան Տէր Եհովայի՝ մեր սիրալիր Հօր՝ պաշտամունքը։—Ժողովողի 12։13. Բ. Կորնթացիս 13։5
Վերաքաղ
◻ Պաշտամունքին առնչութեամբ Եհովա ի՞նչ կ’ակնկալէ։
◻ Տաղաւարը Իսրայելացիներուն ի՞նչ կը յիշեցնէր։
◻ Հ.Դ. առաջին դարուն, ճշմարիտ պաշտամունքին հանդէպ որո՞նք նախանձախնդրութեան տիպարներ էին, եւ ինչպէ՞ս։
◻ 1919–էն ի վեր, Եհովայի պաշտամունքը ինչպէ՞ս բարձրացուած է։