Նոյնիսկ հիմա կարելի է երջանիկ ըլլալ

ԳՈՀՈՒՆԱԿՈՒԹԻՒՆ ԳՏՆԵԼ

Սուրբ Գիրքին խրատը. «Բարքերնիդ արծաթասէր չըլլա՛յ, բաւական սեպեցէք որչափ բան որ ձեռքերնիդ կայ» (Եբրայեցիս 13։5)։

Այսօր շատ բաներ կան, որոնք մարդիկ կ’ըսեն թէ պէ՛տք է ունենանք։ Սակայն Սուրբ Գիրքը կ’ըսէ, որ ‘բաւական սեպենք որչափ բան որ ձեռքերնիս կայ’, այսինքն մեր ունեցածովը գոհանանք։ Ինչպէ՞ս։

‘Արծաթասիրութենէ’ խուսափէ։ Շատեր իրենց առողջութիւնը, ընտանիքը, բարեկամութիւնները, բարոյականութիւնը եւ նոյնիսկ արժանապատուութիւնը կը զոհեն ‘արծաթասիրութեան’ պատճառով (Ա. Տիմոթէոս 6։10)։ Վճարելիք ի՜նչ սուղ գին։ Ի վերջոյ, «արծաթ սիրողը արծաթէն չի կշտանար» (Ժողովող 5։10)։

Արժեւորէ մարդիկը, եւ ոչ թէ նիւթական բաները։ Ճիշդ է որ նիւթական բաները իրենց տեղը ունին։ Բայց անոնք չեն կրնար մեզ սիրել կամ գնահատել. միայն մարդիկ կրնան ատիկա ընել։ Իսկական «բարեկամ» ունենալը կ’օգնէ, որ մեր կեանքին մէջ գոհունակ ըլլանք (Առակաց 17։17)։

ՀԻՒԱՆԴՈՒԹԵԱՆ ՏՈԿԱԼ

Սուրբ Գիրքին խրատը. «Ուրախ սիրտը դեղի պէս օգտակար է» (Առակաց 17։22)։

«Դեղի պէս», ուրախութիւնը մեզի կ’օգնէ որ հիւանդութեան տոկանք։ Բայց ինչպէ՞ս կրնանք ուրախ ըլլալ երբ հիւանդ ենք։

Գնահատող եղիր։ Եթէ միայն մտածենք մեր խնդիրներուն մասին, մեր «բոլոր օրերը» գէշ պիտի երեւին (Առակաց 15։15)։ Փոխարէն, Սուրբ Գիրքը կ’ըսէ. «Շնորհակա՛լ եղէք» (Կողոսացիս 3։15, ԱԾ)։ Սորվէ լաւ բաները գնահատել, որքա՛ն ալ պզտիկ ըլլան անոնք։ Օրինակ, գեղեցիկ արեւամուտը, զեփիւռը եւ սիրելիի մը ժպիտը կրնան կեանքդ ճոխացնել։

Ուրիշներուն համար բաներ ըրէ։ Նոյնիսկ եթէ վատառողջ ենք, «աւելի երանելի է տա՛լը, քան թէ առնելը» (Գործք 20։35)։ Երբ ուրիշներ մեր ջանքերը կը գնահատեն, մեծ գոհունակութիւն կը զգանք, ինչ որ կ’օգնէ մեր խնդիրներուն վրայ չկեդրոնանալու։ Կրնանք մեր կեանքը բարելաւել՝ ուրիշներուն օգնելով որ իրենց կեանքը բարելաւեն։

ԱՄՈՒՍՆՈՒԹԻՒՆԸ ԶՕՐԱՑՆԵԼ

Սուրբ Գիրքին խրատը. «Աւելի կարեւոր բաները ընտրե[ցէք]» (Փիլիպպեցիս 1։10, ՆԱ)։

Այն զոյգերը, որոնք իրարու հետ քիչ ժամանակ կ’անցընեն, իրենց փոխյարաբերութիւնը կը վտանգեն։ Ուրեմն, իմաստութիւն է որ ամուսինն ու կինը իրենց ամուսնութեան նախապատուութիւն տան, այսինքն զայն իրենց կեանքին մէջ աւելի կարեւոր բաներէն մէկը սեպեն։

Միասին բաներ ըրէք։ Միասին բաներ ընելու ծրագիրներ դրէք, փոխանակ ձեզմէ ամէն մէկը ի՛ր հետապնդումներով զբաղելու։ Սուրբ Գիրքը կ’ըսէ. «Երկուքը մէկէն աղէկ է» (Ժողովող 4։9)։ Կրնաք միասին ճաշ եփել, մարզանք ընել, պտըտիլ կամ ձեր սիրած ժամանցով զբաղիլ։

Ձեր սէրը արտայայտեցէք։ Սուրբ Գիրքը ամուսինն ու կինը կը քաջալերէ, որ իրար սիրեն ու յարգեն (Եփեսացիս 5։28, 33)։ Ջերմ ժպիտ մը, սիրալիր փաթթուկ մը կամ պզտիկ նուէր մը, մեծապէս կ’օգնէ որ ամուսնութեան կապը զօրանայ։ Անշուշտ, կողակիցները սեռային մտերմութիւնը պէտք է միայն իրարու համար պահեն (Եբրայեցիս 13։4)։