Ngahino eṱunḓu roye ri ku pirukira poo we ripunguha omuini kutja o ha kara novimariva ovingi noviṋa vyarwe kutja u yenene okutwa po Ouhona wa Mukuru poruveze orutenga mehupo roye. (Mat. 6:33) Tji pe ri nao, tjiwa kutja Jehova u tjiwa oviṋa avihe mbi we mu tjitira. (Hebr. 6:10) Mape ya ove wa muna ouatjiri womambo wa Jesus nga: “Auhe ngu ma isa onganda ye poo omarumbi novangu ve poo ovaṱena poo ina poo ihe poo ovanatje ve poo omahi we womakunino mena randje na mena rOmbuze Ombwa, eye, nambano mouye mbwi, ma mwine po ovingi potumasere, okutja ozonganda, noovangu nomarumbi, novaṱena, nooina novanatje, nomahi womakunino pamwe nomatatumisiro omengi; nu mouye wokombunda eye ma kamuna omuinyo waaruhe.” (Mar. 10:​29, 30) Ozondaya ove nḓu wa muna za kapita ozongondjero azehe ove nḓu wa tjita.—Eps. 37:4. w24.03 9 ¶5

Indu Ovakriste mba ri moJudea tji va munine ourumbu ounene, ovakambure ovakwao mombongo moAntiokie “va tya kutja auhe wawo ma yenene okuhinda po otjiṋa otja pu ma sora okuvatera ovakambure ovakwao mba tura mehi raJudea.” (Oviung. 11:​27-30) Nandarire kutja va turire kokure, Ovakriste moAntiokie va tya okuvevatera. (1 Joh. 3:​17, 18) Eṱe wina matu yenene okuraisa otjari ndino indu tji twa tjiwa kutja ovakambure ovakwetu va munu ouzeu mena romipupo, poo omauzeu warwe. Eṱe tu hakahana okuyandja ombatero mokupura kovanene vombongo kutja matu yenene okuvatera notjiungura kaaṋi, mokuyandja oviyandjewa vyouharupu koviungura vyouye auhe nokukumbira imba mba ṱunwa i youzeu mbwo. Ovakambure ovakwetu wina mape ya ave hepa ombatero novihepwa vyawo. Indu Ombara yetu Jesus Kristus tji me ya okuyekupangura ovandu, matu vanga kutja me tu vaze amatu raisa otjari, nu me tu ṋange kutja tu “rumate ouhona.”—Mat. 25:​34-40. w23.07 4 ¶9-10; 6 ¶12

Jesus wa horera komuano Jehova maa tjiti omarundurukiro indu tje ri ohepero nokupuratena koumune wavarwe. Eye wa hindwa kombanda yehi okuzuvarisa “kozonḓu nḓa pandjara porwazo, ihi otjiwaṋa tjalsrael.” Posi yokutja eye wa tjita omarundurukiro nokupuratena koumune wavarwe otja tjaa zuvarisa. Otjotjihorera, omukazendu ngu ha ri Omuisrael we riheka ku ye okuverura omuatje we omukazona ngwaa ri ‘nombepo ohakohoke nu ngwaa ri momuhingo omuvi tjinene.’ Jesus wa ṱotjari na tjiti imbi omukazendu mbye mu ningira okutjita, na verura omuatje we. (Mat. 15:​21-28) Tara kotjihorera tjarwe. Indu tjaa zuvarisa, Jesus wa tja: “Ngu me Ndji pataṋa . . . , Ami wina otjinga me mu pataṋa.” (Mat. 10:33) Posi yokutja eye ka pataṋene Petrus, nandarire kutja Petrus we mu pataṋa ovikando vitatu. Jesus aa tjiwa kutja Petrus we rimuna ondjo tjinene ku imbi mbya tjita nokutja wa ri omurumendu omuṱakame. Kombunda yombendukiro, Jesus we rimunikisa ku Petrus ne mu raere kutja we mu isire nu ngamba we mu suvera. (Luk. 24:​33, 34) Jehova Mukuru na Jesus Kristus ve tjita omarundurukiro indu tje ri ohepero nokupuratena koumune wavarwe. Hapo kweṱe ku undjirwa ko tjike? Jehova u undjira ko kutja tu tjite omarundurukiro indu tje ri ohepero nokupuratena koumune wavarwe. w23.07 21 ¶6-7