Ari Magimmang nga Magayaya nga Masserbi Kani Jehova
ANNI i pinaka-magayaya nga aggaw ta pattolem? I aggaw kari na kasalmu onu turi ta neyana i kaka nga anamu? Onu i aggaw nga nabawtisowakka bilang Saksi ni Jehova? Awayyana tu yatun i pinaka-importante anna pinaka-makapagayaya nga aggaw ta pattolem. Siguradu nga magayaya i kapangngurugmu ira ta nepasingammu nga ayatammu i Dios ta interu futu, kararua, nono, anna sikammu!—Mar. 12:30.
Awayyana tu kuruga magayaya ka ta passerbim kani Jehova mamegafu turi ta nabawtisowakka. Ngem nawawan na karuan i pagayaya nga egga nira turi ta gafu. Ngatta nesimmu yatun? Anni ira i rasottam tapenu ariattam magimmang nga masserbi kani Jehova nga sigga-pagayaya?
NU NGATTA NAWAWAN NA KARUAN I PAGAYAYADA
Mangiyawa nittam tu pagayaya i mensahe na Pappatulan. Ngatta? Megafu ta nipromesa ni Jehova nga aranni ngana nga pangultimuanna i maddaggun nga marake nga sistema anna igiyana ittam ta napabagu nga mundo. Ipasiguradu gapa nittam na Zefanias 1:14: “Aranni ngana i dakal nga aggaw ni Jehova! Aranni ngana anna talaga mabbibibi nga duttal!” Ngem nu ta pagabbo tam ay nabayag tam ngana nga aggi-innag, awayyana tu mawawan i pagayaya tam anna matalakag tam ngana nga masserbi ta Dios.—Prov. 13:12.
Mapagaram tam nga sigga-pagayaya anna tulu-tuloy nga masserbi ta Dios nu kavulu tam i kapangngurug tam ira. Kakuruganna, baka i makasta nga kondukta na aripan ira ni Jehova i namaguyu nittam nga mangurug anna nakoffun nittam nga mamegafu nga masserbi ta Dios nga sigga-pagayaya. (1 Ped. 2:12) Ngem kunnasi nu nadisiplina i tadday ta kapangngurug tam megafu ta arianna sinuttul i estandarte na Dios? Egga karuan nga nadismaya anna nawawadda i pagayayada.
Awayyana gapa nga mawawan i pagayaya tam megafu ta komersial nga propaganda na marake nga sistema ni Satanas. Usan ni Satanas i mundona tapenu nonopattam nga kawagattam i ganna-gannug nga ari gamma importante. Ngem takkilalattam i kinagi ni Jesus: “Awan tu tolay nga mapparehu i passerbi na ta dua nga pakiyafuan. Ta awayya na tu ikalussaw na i tadday anna iddukan na i tadday. Onu mas napasikkal i passerbi na ta tadday anna uyu-uyawan na i tadday. Arian na nga awayya tu maggiddan i pangaya ta Dios anna pangaya ta kuartu.” (Mat. 6:24) Ariattam sigga-pagayaya nga makapasserbi kani Jehova nu mappuppursigi tam gapa nga mapeggan tu ngamin nga kayà tam taw ta mundo.
‘MAGAYAYA TA DIOS NGA MAMALIAG NITTAM’
Para ta mangaya ira kani Jehova, ari nga mamakadammo i passerbi sa. (1 Juan 5:3) Daddammammu nga kinagi ni Jesus: “Umay kamu niakan, sikamu ngamin nga nabanna-bannag anna agga-kattu ta madammo, ta pagibannagat-takamu. Kattuan nu i takkilù anna maggigiammu kamu niakan ta masippo anna minappakalinno ngà. Ta kunnuri, maleran nu i hustu nga pagibannag. Ta alappaw laman i takkilù anna malogon laman i ipakattù.” (Mat. 11:28-30) Makapabannay anna makapagayaya i takkilu na pabbalin tu Cristiano. Siguradu gapa nga egga dakal nga pagayaya tam ta passerbi kani Jehova. Ammuattam i tallu nga importante nga rason nu ngatta awayya tam makapasserbi nga ‘magayaya ta Dios nga mamaliag nittam.’—Hab. 3:18.
Massesserbi tam ta Minangngiyawa-Inango, i magayaya nga Dios. (King. 17:28; 1 Tim. 1:11) Gatù tam ta Namaratu nittam i inango tam. Yatutta, tulu-tuloy nga masserbi tam sa nga sigga-pagayaya maski nu nabayag tam ngana nga nabawtisowan.
Kanayun nga magayaya si Héctor megafu ta nononopanna i iddanama ta Pappatulan anna kanayun yaya nga aktibo
Kagitta ni Héctor nga 40 dagun nga nasserbi bilang traveling overseer. Magayaya yaya nga masserbi kani Jehova “maski laka-lakay ngana.” (Sal. 92:12-14) Limitadu ngana laman i makua ni Héctor ta passerbina ta Dios megafu ta egga taki na atawana, ngem ari vuluvuga nga nawawan i pagayayana. Kinagina: “Maraddam ngà megafu ta sesenu nga makkafi i gawagawayyan na atawà anna marigatannà nga manangngaw sa, ngem ariakku nipamavulun nga yatun i makalsa ta pagayaya ku ta passerbi ta kurug nga Dios. Gatù ku i inango ku kani Jehova anna egga gakkagna ta pamaratu ta totolay. Makalanno ngana yatun nga rason tapenu mas ayatan anna napafutuan nga passerbiakku yaya. Mappuppursigi ngà nga aktibo ta trabahu nga pallayyagayya, anna kanayun nga nononopakku i iddanama ta Pappatulan tapenu ari mawawan i pagayaya ku.”
Niyawa ni Jehova i sakrifisio nga tavvu, yari tu posible nga mapeggattam tu makapagayaya nga pattolay. “Kuruga iddukan na Dios i mundo. Yatun tu zinog na i tattadday nga Ana na, tapenu ngamin i mangurug sa ay ari nga matay nu ari matolay ira adde ta ngangangay.” (Juan 3:16) Wan, mapakoma tam ta liwi-liwa tam anna awayya tam mapeggan tu mannanayun nga inango nu mangurug tam ta tavvu nga regalu na Dios. Ari kari tu makakkasta nga rason yatun tapenu mappabalo tam? Megafu ta pappabalo tam ta tavvu, ari kari tu mapagaram tam gapa nga masserbi kani Jehova nga sigga-pagayaya?
Pinasimple ni Jesús i pattolena anna aru nga dagun nga magayaya nga nasserbi kani Jehova
Kinagi ni Jesús, tadday nga brother ta Mexico: “Aripannà na trabahù. Nu karuan mattrabahu ngà ta lima nga natturunug nga shift maski nu ari gamma kawagan. Kuakku yatun para laman ta kuartu. Turi kua, nagigiammù i meyannung kani Jehova anna i pinangiyawana ta ideddukanna nga Ana para ta totolay. Kakayà ku nga masserbi kani Jehova. Yari tu, naddedika ngà sa. Kabalin na 28 dagun nga nattrabahu ngà ta kompanya, nar-resign ngà tapus nasserbi tu ngamin-tiempo ta ministerio.” Yatun i namegafuanan na makapagayaya nga daga-ragun nga serbisiò kani Jehova.
Dakal nga pagayaya, ari nga daddam, i resulta na passerbi tam. Meraddammammu kari nu kunnasi i pattolem turi ta ariammu paga nammammu si Jehova? Niperaddam ni apostol Pablo ta Cristiano ira ta Roma nga ‘nammagurayan ira na katagarulian’ gari ngem nabbalin ira tu ‘aripan na Dios tapenu kuadda i matunung.’ Mavvunga ira tu “masanto nga attolay,” nga mattuppal ta mannanayun nga inango. (Roma 6:17-22) Megafu ta tuttuttulattam gapa i masanto nga attolay, melilli ittam ta daddam nga resulta na madaping ta moral nga attolay onu marake nga kondukta. Talaga makapagayaya yatun!
“I pinaka-makapagayaya nga tiempo ta pattolè ay i daga-ragun nga nasserbi ngà kani Jehova.”—Jaime
Si Jaime ay boksingero nga ateista anna ebolusionista. Turi ta namegafu nga naki-study, nagustuanna i aya nga nasinganna. Tapenu molina i dati nga kata-katolena, nipakimallona kani Jehova nga uffunanna yaya nga mangurug Sa. “Sesenu nga nammuakku nga egga gabba minaggiddu nga Yama anna minaggallallo nga Dios,” kunni Jaime. “Nabbalin tu proteksiokku i kanayun nga panuttul ta matunung nga estandarte ni Jehova. Nu ariakku inuli i pattolè, baka natay ngà ngana kagitta na dati nga kokkofukku nga boksingero. I pinaka-makapagayaya nga tiempo ta pattolè ay i daga-ragun nga nasserbi ngà kani Jehova.”
ARI KA MAGIMMANG!
Anni nakuan i matageno tam durante nga ini-innaggattam i pangultimo na marake nga sistema na ganna-gannug? Daddammammu nga ‘karagatan na Espiritu i pammulattam’ anna ‘gatabattam i ngangangay nga inango.’ Yatutta “ari ittam nga molang nga mangngua tu mapia; ta nu ari nga makkafi i nono tam, gatabat-tam i balo tam noka nu duttal i tiempo na.” (Gal. 6:8, 9) Gukaban na uffun ni Jehova, paray nakuan tu makapagattam ittam, mappursigi tam nga mapeggan tu kualidad ira nga kawagan tapenu mapaliag ittam ta “nepallo nga kadara-darum,” anna mattulu-tuloy nga sigga-pagayaya nga masserbi kani Jehova maski nu mepa-arubang ta problema ira.—Nep. 7:9, 13, 14; Sant. 1:2-4.
Siguradu nga bala-balakkan ni Jehova i pagattam tam, megafu ta ammu na Dios i kukukuattam anna i aya tam sa anna ta ngaganna. Nu ariattam molang nga masserbi kani Jehova nga sigga-pagayaya, mabbalittam tu kagitta ni salmista David nga nakkagi: “Ammù tu kanayun nga kavulu ku i YAFU; aranni yaya, ay awan tu pakavurungak-ku. Yatun tu mabbala-balo ngà anna mammula-mugang; ammù tu awan vuluvuga tu manganni niakan.”—Sal. 16:8, 9.