Nu Ngatta Nakapattalupaddian i Biblia

Nakapattalupaddian i Biblia. Yatutta egga malà anna mabibbig tam nga kopiana ta kaggawattam. Nu makasta nga bersion na Biblia i napilim, makasiguraduka nga bibbibbigammu i kagitta lagapa na orihinal nga kopia.a Ngem ngatta kappabbaw nga nakapattalupaddian i Biblia maski nu posible nga mavunno, sobra i pangokkontra, anna naplano nga matalianan i mensahena? Anni i kuruga espesial meyannung tatun nga libru?

Kagitta na nitura ni apostol Pablo i konklusion na aru nga estudiante na Biblia: “Ngamin i egga ta Masanto nga Tura ay naggafu ta Dios.” (2 Timoteo 3:16) Mangurug ira nga nakapattalupaddian i Biblia megafu ta yatun ay nerumu-ruma nga Uvovug na Dios anna siniguradu na Dios nga nemmuguran yatun adde ta kaggawattam. Naddesision si Faizal nga nakagi ta ollu nga artikulona yaw nga serye, nga ammuan mismu nu kurug i nakagi ira sa gukaban na paggigiammuna ta Biblia. Nakaddag yaya ta nadiskubrena. Nammuanna nga awan ta Biblia i aru ta ituttuddu na makkakkagi nga Cristiano ira. Kuruga naappresiana gapa i gakkag na Dios ta davvun kagitta na nakagi ta Biblia.

“Kumbinsidu ngà ngana nga i Biblia nga egga niakan ay regalu na Dios,” kunna. “Tutal, nu nakua na Dios i uniberso, ari kari tu awayyana gapa i mangiyawa nittam tu libru anna siguraduanna nga memmuguran yatun? Nu ari tam mangurug tatun, gittana ikakkagi tam nga egga limitasion na pakapangngua na Dios nga Makapangngua-ta-ngamin! Sinni ngà gapa tapenu limitan i pakapangngua na Dios?”​—Isaias 40:8.