MATTOLAY NGA CRISTIANO

Lillitan Danaw nga Kamali ta Pangikondukta tu Paggigiammu tu Biblia

Neyimprenta nga Edision

Napakaru i kaga-kagian na brother ta estudiantena

Napakaru i Kinagim: Ariammu nonopan nga mawag tu ipakanawagmu i ngamin. Nangusa si Jesus tu pakkiavu ira tapenu uffunan i totolay nga mannono anna makadde ta fustu nga konklusion. (Mt 17:24-27) Gukaban na pakkiavu ira, mabbalin tu aktibo i estudiante anna makoffun yatun nikaw nga mammuan i malippawa anna kuruganna. (be-TG 253 ¶3-4) Nu makkiavu ka, mapasensia nga maginnag ta tabbag. Nu mali i tabbag na estudiante, igiyam yaya ta fustu nga konklusion gukaban na pangusa tu karuan paga nga pakkiavu imbes nga kagian sa i fustu nga tabbag. (be-TG 238 ¶1-2) Ikonsideram i paspas na pangiyesplikam tapenu malippawa na estudiante i bagu ira nga ideya.—be-TG 230 ¶4.

Aru nga komplikadu nga detalye nu ngatta mallakay anna mabbako ittam

Kingnguam tu Komplikadu: Lillitammu nakuan i tendensia nga kagian i ngamin nga ammum ta topiko. (Jn 16:12) Maffokus ta pinakapunto na parapo. (be-TG 226 ¶4-5) Maski makapa-interes i karuan ira nga detalye, awayyana nga mapalibbag i pinakapunto ira. (be-TG 235 ¶3) Nu nalippawa ngana na estudiante i pinakapunto, magali ngana ta tumunug nga parapo.

Aru nga informasion i kinagi na brother yari tu naguluan i estudiante

Kinagim Laman i Informasion: I gakkag tam ay madde i futu, ari nga basta kagian i informasion. (Lu 24:32) Usan i pakapangngua na Uvovug na Dios gukaban na paffokus ta primero ira nga teksto ta leksion. (2Co 10:4; Heb 4:12; be-TG 144 ¶1-3) Mangusa tu simple ira nga ilustrasion. (be-TG 245 ¶2-4) Ikonsidera i personal ira nga problema anna kuru-kurugan na estudiante, anna ibagay sa i leksion. Makkiavu tu kunnaw: “Anni i makagim ta nagigiammum taw?” “Anni i itudduna yaw nittam meyannung kani Jehova?” “Ngatta pammakapianammu nu iyaplikam yaw nga tabarang?”—be-TG 238 ¶3-5; 259 ¶1.