Nu Kunnasi Uffunan i Bible Study ira nga Mapprogreso ta Bawtismo​—Mekadua nga Parte

1. Ngatta makagi tam nga makepaliag-inango i trabahu nga pangngua tu disipulos?

MAKEPALIAG-INANGO i trabahu nga pangngua tu disipulos. Ngatta makagi tam yatun? Nibilin ni Jesus ta Mateo 28:19, 20, NW: “Umay kamu . . . mangngua kamu tu disipulos . . . , bawtisowannu ira.” Ngatta importante nga mappabawtiso ittam? Yatun i kuan danuri na maya nga mepaliag. Mawag nga kurugan na maski sinni nga mappabawtiso nga mepaliag laman yayya megafu ta natay si Jesus para nittam anna napaginnolay. Yatutta kinagi ni apostol Pedro ta kapangngurugna ira: ‘I kabawtiso i mamaliag sangoye nikamu gafu ta nipaginnolay ni Jesu-Cristo.’ (1 Ped. 3:21) Yari tu oras tu mabawtisowan i bagu nga disipulo, posible ngana yayya nga mapaliag.

2. Anni i mawag nga kuattam segun ta 2 Timoteo 4:1, 2 nu kayà tam nga makangngua tu disipulo?

² Mawag tu pakastattam i “istilo na panuddu” tam tapenu makangngua ittam tu disipulos. (Bibbigan i 2 Timoteo 4:1, 2, NW.) Ngatta? Megafu ta nibilin ni Jesus nittam: “Umay kamu . . . mangngua kamu tu disipulos . . . , tudduan nu ira.” Kinagi ni apostol Pablo nga ‘ikagumammu nga tuppalan’ yatun nga trabahu “ta nu kunnaw i kuammu, mepaliag mu i baggim anna i magginna ira nikaw.” Rasonable gafu yaw nga kinagi ni Pablo: “Immuguram-mu i . . . attuttuddum.” (1 Tim. 4:16) Mawag nga tudduattam i totolay nu kayà tam ira nga mabbalin tu disipulo, yatutta pakastattam nakuan i panuddu tam.

3. Taw nga artikulo, anni i gigiammuattam meyannung ta pab-Bible study?

³ Ta interu mundo, mangikokkondukta ittam tu minillion nga Bible study. Nagigiammu tam ta nappasa nga artikulo nu anni i kuattam tapenu mas aru paga nira i moffunattam nga mabawtisowan. Taw nga artikulo, gigiammuattam paga i lima nga mawag nga kuan na mangistudy tapenu moffunanna i Bible study-na nga mapprogreso ta bawtismo.

PAGURAYAMMU NGA I BIBLIA I MANUDDU

4. Ngatta fugaddan nakuan na mangikondukta i baggina nu mab-Bible study yayya? (Innan gapa i footnote.)

⁴ Kakayà tam i ituddu tam maggafu ta Uvovug na Dios. Yatutta baka napakaru i kagiattam meyannung tatun. Ngem ta Paggigiammu tu Passifusifutan, Paggigiammu na Kongregasion tu Biblia, onu ta pab-Bible study, ari nakuan nga napakaru i kagian na mangikondukta. Pagurayanna nakuan nga i Biblia mismu i manuddu. Fugaddattam gafu i baggi tam anna ariattam nakuan nga iyesplika i ngamin nga ammu tam meyannung ta tadday nga teksto onu topiko.b (Juan 16:12) Nu ikumparam i pakannammum ta Biblia tagga ta nabawtisowakka ta pakannammum ta sangawe, siguradu nga primeru laman ira nga doktrina i malippawa mu dati. (Heb. 6:1) Piga ragun nga ginigiammum i ammum ngana ira sangawe yatutta ariammu fuersan nga pamittanan nga ituddu i ngamin ta Bible studym.

5. (a) Ta 1 Tesalonica 2:13, anni i kayà tam nga malippawa na estudiante tam meyannung ta magiggigiammuna? (b) Kunnasi tam mapagaram i estudiante tam nga ikagi nittam i nagigiammuna?

⁵ Kayà tam nga malippawa na Bible study tam nga naggafu ta Biblia i magiggigiammuna. (Bibbigan i 1 Tesalonica 2:13.) Kunnasi tam makua yatun? Pagaramman yayya nga ikagi nikaw nu anni i magiggigiammuna. Imbes tu sikaw i kanayun nga mangiyesplika ta teksto, iyavu mu nisa nu anni i makagina tatun. Uffunammu yayya tapenu masinganna nu kunnasi nga makoffun nisa i magiggigiammuna ta Uvovug na Dios. Mangusa tu pakkiavu ira tapenu medirektam i tabbag anna mammuan i pagimamma, nononopan, anna mataga-tagenona ta teksto nga nabibbig. (Luc. 10:25-28) Iyavu mu: “Taw nga teksto, anni i nagigiammum nga kualidad ni Jehova?” “Anni i meyuffun nikaw naw nga teksto?” “Anni i makagim taw nga nagigiammum?” (Prov. 20:5) Ari tu i karu na pakannammu na Bible studym i pinaka-importante, nu ari, i pangiddu anna pangiyaplikana ta nammuanna.

6. Ngatta makasta nu mangivulu ittam ta pab-Bible study tam tu wagi nga malalaki nga manuddu?

⁶ Nangivulu ka ngana kari ta Bible studym tu wagi nga malalaki nga manuddu? Puedem nga iyavu nisa nu anni i makagina ta pangikonduktam tu Bible study anna nu usu-usammu kari tu mapia i Biblia ta panuddum. Nu kayà mu nga mabbalin tu malalaki nga manuddu, mawag tu minappakalinno ka. (Ikumpara i Kingngua 18:24-26.) Kabalin na Bible study-nu, iyavu mu i opinionna nu nalippawa kari na Bible studym i ginigiammunu. Tapus nu egga ira i tiempo nga ari ka nga makapab-Bible study, awayyam nga ikiddaw nisa nga yayya labbi i mangikondukta. Nu kunnatun, regular lagapa i pagistudy-nu anna masingan na Bible studym nga importante yatun. Ariammu nakuan nonopan nga “sikaw laman” i makab-Bible study tannisa anna ari nga puede nga ikondukta yatun na tanakuan. Nonopammu lallagu i pammakapianan na Bible studym tapenu ari nga magimmang i papprogresona.

IPASINGAN NGA AYATAN ANNA KURUGAMMU I ITUTTUDDUM

7. Anni i makoffun ta Bible study tapenu mas maginteres yayya ta giggigiammuanna?

⁷ Mawag nga masingan na estudiante nga ayatan anna kurugammu i ituttuddu na Biblia. (1 Tes. 1:5) Nu kunnatun, mas maginteres yayya ta giggigiammuanna. Awayyam nga istorian nisa nu kunnasi nakoffun mismu nikaw i Biblia. Nu kuammu yatun, masinganna gapa nga makoffun nisa i Biblia.

8. Anni paga i makuam tapenu moffunan i Bible studym, anna ngatta kuammu yatun?

⁸ Ta pab-Bible study-nu, istoriammu nisa i ekspiriensa na wawwaragi nga kaparehuna ta problema anna nu kunnasida nga nalampasan yatun. Puedem nga mangivulu tu kakongregasiommu nga awayya nga papparigan na Bible studym. Awayyam gapa magaleg tu makapagaram ira nga ekspiriensa ta jw.org ta serye nga “Pakastan na Biblia i Pattolay.”c Makoffun i kunnatun ira nga artikulo anna video tapenu masinganna nga makkasta i pattolena nu iyaplikana i prinsipio ira na Biblia.

9. Kunnasi tam nga pagaramman i Bible study tam nga ibillay ta kafamilia anna kokkofunna i magiggigiammuna?

⁹ Nu egga i atawa na Bible studym, Bible study kari gapa yayya? Nu ari, imbitan yayya nga makisali ta paggigiammunu. Pagaramman i Bible study tam nga iyistoria ta kafamilia anna kokkofunna i magiggigiammuna. (Juan 1:40-45) Kunnasi? Awayyam nga iyavu: “Kunnasim nga ipakanawag yaw nga kinakurug ta kafamiliam?” onu “Anni nga teksto i awayyam nga usan tapenu mapakurug yaw ta kofummu?” Nu kunnaw i kuattam, matudduattam gapa yayya nga manuddu. Tapus sonu kualipikadu ngana yayya, awayyana ngana nga mevulu nga mallayyagayya bilang tadday nga unbaptized publisher. Awayya tam nga pakkiavutan i Bible study tam nu egga i ammuna nga kayàna i mappa-Bible study. Nu egga, kontakan insigida yatun nga tolay anna iyofer i paggigiammu tu Biblia. Ipagiraw i video nga Kunnasi i Paggigiammu tu Biblia?d

PAGARAMMAN I BIBLE STUDYM NGA MAKIKKOFUN TA WAWWARAGI

10. Ta 1 Tesalonica 2:7, 8, kunnasi nga maparigan na mangistudy i ehemplo ni Pablo?

¹⁰ Ipasingattam nakuan i personal nga interes ta Bible study tam. Ibilang tam ira nga potensial nga wawwaragi tam. (Bibbigan i 1 Tesalonica 2:7, 8.) Mariga para nira nga panawan i dati nga kokkofudda anna mangngua tu panguli tapenu mabbalin nga aripan ni Jehova. Uffunattam ira nga makaleg tu kurug nga kokkofun ta unag na kongregasion. Mabbalittam nakuan nga kofun ta Bible study tam ari laman ta tiempo na pab-Bible study. Mepasingattam gapa nga ikavurungattam yayya nu tawagan, itext, onu bisitattam yayya ta baleda.

11. Anni i ikaya tam nga malegan na Bible study tam ira ta kongregasion, anna ngatta?

¹¹ Egga i akkagianan: “Madduruffun i interu nga bario ta pamadakal ta tadday nga abbing.” Makagi tam gapa: “Madduruffun i interu nga kongregasion nga magangngua tu tadday nga disipulo.” Yatutta iyammammu na tadday nga efektibo nga mangistudy i Bible study-na ta wawwaragi nga makoffun nisa nga mapeggan tu madukko nga relasion kani Jehova. Megafu tatun, awayyana nga magayayya nga makikavulu ta wawwaragi nga makeyawa nisa tu espiritual anna emosional nga suporta. Ikaya tam nga matageno na Bible study tam nga parte yayya na kongregasion anna espiritual nga familia tam. Ikaya tam gapa nga makiddukko yayya ta ngamin nga meddu nga wawwaragi tam. Nu kunnatun, mas malogon tannisa nga iyemmang i makikkofun turi ta ari nga makoffun nisa nga ayatan si Jehova. (Prov. 13:20) Maski nu panawan yayya na dati nga kokkofunna, makasiguradu yayya nga makaleg yayya tu kurug nga kokkofun ta unag na organisasion ni Jehova.​—Mar. 10:29, 30; 1 Ped. 4:4.

IPASIGO NGA IMPORTANTE I DEDIKASION ANNA BAWTISMO

12. Ngatta ipakiyuvovug tam nakuan i meyannung ta dedikasion anna bawtismo ta Bible study tam?

¹² Ariammu mappasiran nga ipakiyuvovug ta Bible studym i meyannung ta dedikasion anna bawtismo. I gakkag mabba talaga na pangikondukta tu Bible study ay tapenu moffunan i tadday nga tolay nga mabbalin tu bawtisadu nga disipulo. Nu piga vulan ngana i regular nga pab-Bible study anna nu magata-atende ngana gapa i Bible study tam ta study ira, mawag tu malippawana nga mab-Bible study yayya tapenu moffunan yayya nga mabbalin tu Saksi ni Jehova.

13. Anni ira nga dakkua i mawag nga kuan na Bible study tapenu mapprogreso yayya ta bawtismo?

¹³ Egga ira i dakkua nga mawag tu kuan na tadday nga Bible study nigena nga madde i bawtismo. Ollu, mawag tu kannammuan anna ayatanna si Jehova tapus mangurug yayya nisa. (Juan 3:16; 17:3) Megafu tatun, mapeggan ngana yayya tu relasion kani Jehova anna makikkofun ngana gapa yayya ta wawwaragi ta kongregasion. (Heb. 10:24, 25; Sant. 4:8) Sonu kua, lillitanna ngana i marake ira nga annangngua anna mabbabawi ngana gapa yayya ta liwi-liwana. (King. 3:19) Kunne na gapa, megafu ta pangurugna, ikagina ngana gapa i kinakurug ta tanakuan. (2 Cor. 4:13) Tapus idedikana ngana i baggina kani Jehova anna isimbolona yatun gukaban na bawtismo. (1 Ped. 3:21; 4:2) Kuruga makapagayayya yatun nga aggaw para ta ngamin! Nu kukukuan na Bible studym i kada dakkua nga mappange ta bawtismo, kanayummu yayya nga komendan anna pagarammammu yayya nga itulu-tuloyna i papprogresona.

REGULAR NGA INNAN I PAPPROGRESO NA BIBLE STUDYM

14. Kunnasi tam nga masingan i papprogreso na Bible study?

¹⁴ Mawag tu pasensiattam nga uffunan i Bible study tam tapenu mapprogreso yayya ta dedikasion anna bawtismo. Ngem duttal noka i tiempo nga mawag tu ammuammu nu kayàna talaga i masserbi kani Jehova nga Dios. Masingammu kari nisa nga tuttuttulanna i bilin ni Jesus? Onu kayàna laman nga makagigiammu tu interesante ira nga gannug ta Biblia?

15. Anni ira i mangipasingan nga kualipikadu ngana nga mappabawtiso i Bible studym?

¹⁵ Regular nga innan i papprogreso na Bible studym. Angngariganna, ikakkagina kari i mataga-tagenona meyannung kani Jehova? Makikkimallo kari yayya nisa? (Sal. 116:1, 2) Kakayàna kari nga bibbigan i Biblia? (Sal. 119:97) Kanayun kari yayya nga makistudy? (Sal. 22:22) Egga ngana kari i inulina ta pattolena? (Sal. 119:112) Ikagina ngana kari i magiggigiammuna ta kafamilia anna kokkofunna? (Sal. 9:1) Pinaka-importante, kayàna kari i mabbalin tu Saksi ni Jehova? (Sal. 40:8) Nu ari nga mappopprogreso i Bible studym ta maski anni tatun ira nga gannug, mataktika nga ammuammu i rason tapus masippo ngem prangka nga ipakiyuvovug mu yatun nisa.e

16. Anni ira i mangipasingan nga mawag tu iyemmammu ngana i pab-Bible study?

¹⁶ Pannonopammu nu ituloy mu paga i pab-Bible studym ta tadday nga tolay. Iyavu mu ta baggim: ‘Ari kari mapprepara i estudiantè ta Bible study-mi? Manakina kari i makistudy? Egga kari paga i bisiuna? Miembro kari paga yayya na falsu nga relihion?’ Nu wan i tabbag tatun ira nga pakkiavu tapus ituloy mu lagapa i pab-Bible study-nu, gittam i manuddu tu pattanniaw onu pattafug ta tolay nga manakina i mabasa! Ngatta pagalaman ta ituloy mu i pab-Bible study-nu nu arianna nga appresian i magiggigiammuna anna manakina i manguli?

17. Segun ta 1 Timoteo 4:16, anni i mawag nga kuan na ngamin nga mangistudy?

¹⁷ Mawag tu seriosowattam i responsibilidad tam nga mangngua tu disipulos. Kayà tam nga uffunan i Bible study tam ira nga mapprogreso ta bawtismo yatutta pagurayattam nga i Biblia i manuddu anna ipasingattam nga ayatan anna kurugattam i ituttuddu tam. Pagarammattam gapa i Bible study tam nga makikkofun ta wawwaragi. Tapus, ipasigo tam nga importante i dedikasion anna bawtismo anna regular nga innan i papprogreso na Bible study tam. (Innan i kahon nga “Nu Anni i Mawag tu Kuan na Mangistudy Tapenu Mapprogreso ta Bawtismo i Bible Study.”) Magayayya ittam nga parte ittam naw nga makepaliag-inango nga trabahu! Determinadu ittam gafu nga kuan i ngamin nga mawayya tam tapenu uffunan i Bible study tam ira tapenu makualipika para ta bawtismo.