‘Umay Kamu Gafu ta Ngamin nga Totolay Anna Pabbalinannu Ira tu Disipulos’

1-2. Anni i kinagi na anghel ta babbay nga minay ta livun ni Jesus, anna anni i nidog ni Jesus nira?

UMMUMMA na Nisan 16, 33 C.E., egga i babbay nga minaggiddu ta Dios nga minay ta livun nga nepallo i daddamda. Tatun nga livun i netanamman na Yafu nga Jesu-Cristo maturu tu tadday gaddua aggaw ngana i nappasa. Minay ira tapenu iyaffa i bangug ira ta baggi ni Cristo, ngem nakaddag ira megafu ta awan tu naddian na livun! Tadday nga anghel i nakkagi ta babbay nga naginnolay si Jesus, anna kunna paga: “Mappollu yaya anne nikamu nga umay ta Galilea, ay masingan nu yaya tari!”​—Mat. 28:1-7; Luc. 23:56; 24:10.

² Ta panaw na babbay ta livun, inarannian ira ni Jesus anna nidogna nira: “En-nu nga kagian ta wawwagì tu umay ira ta Galilea. Tari i paningannad-da niakan.” (Mat. 28:10) Siguradu nga kuruga importante ira nga instruksion i iyawa ni Jesus ta disipulosna, megafu ta yaw nga paggarammammung i ollu nga niyunnugna kabalinna nga napaginnolay!

NANGIBILINAN NI JESUS TA PANGNGUA TU DISIPULOS?

3-4. Ngatta makagi tam nga i bilin nga nerekord ta Mateo 28:19, 20 ay ari laman nga neyawa ta apostoles ira? (Innan i letratu ta vungun.)

³ Bibbigan i Mateo 28:16-20. Ta paggarammammung nga inorganisa ni Jesus, kinagina i importante nga trabahu nga ituppal na disipulos tatun nga tiempo nga yatun gapa i trabahu nga kukukuattam ta maddaggun. Kinagi ni Jesus: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò. . . . Tudduan nu ira tu parulattad-da ngamin i bili-bilik-ku nikamu.”

⁴ Kayà ni Jesus nga mallayyagayya i ngamin nga disipulosna. Arianna laman nibilin yaw ta 11 nga matalo nga apostolesna. Kunnasi ittam makasiguradu? Bueno, danatun nga apostoles laman kari i presente turi ta neyawa i bilin nga mangngua tu disipulos ta vukig na Galilea? Daddamman nga kinagi na anghel ta babbay: “Masingan nu yaya [ta Galilea]!” Yari tu presente gapa gafu danatun nga matalo nga babbay tatun nga paggarammammung. Ngem ari laman tu yatun. Nitura ni apostol Pablo nga si Jesus ay “nappasingan gapa ta nattaradday nga mangurug ira nga maturu tu lima-gatu.” (1 Cor. 15:6) Sitaw?

5. Ngatta kurugattam nga tuktukuyan na 1 Corinto 15:6 i paggarammammung ta Galilea nga mabibbig ta Mateo kapitulo 28?

⁵ Egga ira i makasta nga rasottam tapenu kurugan nga ta 1 Corinto 15:6, tuktukuyan ni Pablo i paggarammammung ta Galilea nga mabibbig ta Mateo kapitulo 28. Anni ira nga rason? Ollu, magaru ta disipulos ni Jesus i taga-Galilea. Yatutta mas mabi nga makipaggarammammung ta aru nga totolay ta vukig na Galilea imbes nga ta balay ta Jerusalem. Mekadua, kabalin nga napaginnolay si Jesus, nakipaggarammammung ngana yayya ta 11 nga apostolesna ta tadday nga balay ta Jerusalem. Nu yari i 11 nga apostoles laman i kayà ni Jesus nga iddan tu instruksion nga mallayyagayya anna mangngua tu disipulos, ta Jerusalem ngana laman nakuan nga kingnguana yatun imbes nga ikagi nira nga massirimmu ira na babbay tuange ta tanakuan paga ta Galilea.​—Luc. 24:33, 36.

6. Kunnasi ipasingan na Mateo 28:20 nga magaplika maski ta maddaggun i bilin nga mangngua tu disipulos, anna kunnasi tuttuppalan na totolay yatun ta maddaggun?

⁶ Innan i mekatallu nga importante nga rason. Ari laman nga i Cristiano ira tagga ta ollu-siglo i binilinan ni Jesus nga mangngua tu disipulos. Ngatta makagi tam yatun? Niyultimu ni Jesus i instruksionna ta disipulosna ta kunnaw: “Kanayun ngà makitappaddian nikamu adde ta panuppalan na mundo.” (Mat. 28:20) Kagitta na kinagi ni Jesus, aru nga totolay i magaggangngua tu disipulos ta maddaggun. Fugurammu! Maggi 300,000 nga totolay kada dagun i mabawtisowan bilang Saksi ni Jehova anna mabbalin nga disipulos ni Jesu-Cristo!

7. Anni i gigiammuattam, anna ngatta?

⁷ Aru nga Bible study i mapprogreso adde ta bawtismo. Ngem egga karuan nga regular nga maki-Bible study nittam i maganassing nga mabbalin tu disipulo. Kakayàda i magistudy, ngem ariadda mapprogreso ta bawtismo. Nu mangikondukta ka tu Bible study, siguradu kami nga kakayà mu nga uffunan i studym nga iyaplika i nagigiammuna anna mabbalin tu disipulo ni Cristo. Ipakanawag naw nga artikulo nu kunnasi tam madde i futu na Bible study ira anna nu kunnasi tam ira moffunan nga mapprogreso ta espiritual. Ngatta mawag tam nga gigiammuan yaw nga topiko? Gafu ta duttal noka i tiempo nga mawag tu desisionattam nu ituloy tam paga i Bible study onu iyemmattam ngana.

UFFUNAN I BIBLE STUDYM NGA AYATAN SI JEHOVA

8. Ngatta mariga nu mittan nga duffunan i estudiante tam ira nga ayatan si Jehova?

⁸ Kayà ni Jehova nga passerbian yayya na totolay megafu ta ayatadda yayya. Yari tu gakkag tam nga ipalippawa ta Bible study tam ira nga kuruga ikavurungan ira ni Jehova bilang indibidual anna iddedduna ira. Kayà tam ira uffunan tapenu imammatadda si Jehova bilang “yama na abbing nga awan tu yamada anna minangngiyegu ta balu nga babbay.” (Sal. 68:5, NW ) Durante nga malippawa na Bible studym ira nga iddeddu ira na Dios, siguradu nga ayatadda gapa yayya. Marigatan i karuan nga Bible study nga imammatan si Jehova bilang minaggiddu nga Yama megafu ta i mismu nga yamada ay ari nakepasingan nira tu aya anna pagiddu. (2 Tim. 3:1, 3) Ta pangikonduktam tu Bible study nira, ipasigo mu gafu nira i kakkarasta nga kualidad ni Jehova. Duffunammu i estudiantem ira nga alippawatan nga kayà na minaggiddu nga Dios nga mapeggan ira tu mannanayun nga inango, anna sigga-paran yayya nga uffunan ira tapenu madde yatun. Anni paga i makua tam?

9-10. Anni nakuan ira nga publikasion i usattam ta pangikondukta tu Bible study, anna ngatta?

⁹ Usan i libru ira nga “Anni i Ituddu na Biblia Nittam?” anna i “Nu Kunnasi Mattalupaddian ta Aya na Dios.” Nadisenio danatun nga libru tapenu moffunan ittam nga addetan i futu na tudduattam ira. Angngariganna, tabbagan na kapitulo 1 na libru nga Ituddu na Biblia danaw nga pakkiavu: Ayatan kari ittam na Dios?, Anni i matageno na Dios nu mazziga-riga i totolay?, anna Awayyam kari makikkofun kani Jehova? Nadisenio gapa i libru nga Mattalupaddian ta Aya na Dios tapenu moffunan i estudiante nga malippawa i prinsipio ira na Biblia nga makoffun nisa tapenu makkasta i pattolena anna maddukko yayya kani Jehova. Maski paga netuddum ngana danaw nga libru ta tanakuan, mapprepara ka lagapa tu mapia ta kada Bible study, anna sigga-nono ka nakuan ta espesipiko nga pakawagan na Bible studym.

¹⁰ Anni i kuammu nu interesadu i Bible study ta topiko nga magigiammu ta tadday nga publikasion nga ari nelagum ta Teaching Toolbox tam? Awayyam ipagaram nisa nga personal nga bibbiganna yatun nga publikasion tapenu metuloynu lagapa i pab-Bible study ta libru ira nga Ituddu na Biblia onu Mattalupaddian ta Aya na Dios.

11. Kanni tam nga igafu i pangivuka anna pangiserra ta pakimallo ta paggigiammu, anna kunnasi tam yatun nga ikagi ta Bible study tam?

¹¹ Igafu i paggigiammu ta pakimallo. Piga nga ligguan kabalin nga negafu i regular nga Bible study, maruddu nga makasta nu ivuka anna iserra i paggigiammu ta pakimallo. Duffunattam i estudiante tam nga matindian nga malippawa tam laman i Uvovug na Dios ta uffun na masanto nga espiritu na Dios. Egga karuan nga manuddu nga ikagida ta Bible study-da i meyannung ta topiko nga pakimallo gukaban na pabbibbig ta Santiago 1:5, nga kunna: “Nu egga nikamu i makkurang ta ka-uto, mawag tu makimallo ta Dios.” Tapus iyavuna ta study-na, “Kunnasi ittam makakiddaw ta Dios tu ka-uto onu sirib?” Magga umanugu i Bible study nga mawag tu makimallo ittam ta Dios.

12. Kunnasim meyusa i Salmo 139:2-4 tapenu uffunan i Bible study nga mevuvvuna i mayan na futuna kani Jehova?

¹² Tudduan i Bible studym nu kunnasi makimallo. Ipasiguradu nisa nga kayà ni Jehova nga ginnan i napafutuan nga pakimallona. Ipakanawag nga ta personal ira nga pakimallo tam, awayya tam ivuvvu i mayan na futu tam kani Jehova. Mekagi tam nisa i mataga-tageno tam anna i gannug ira nga ariattam mekagi ta tanakuan. Daddamman nga ammu ngana ni Jehova maski i personal ira nga nononopattam. (Bibbigan i Salmo 139:2-4.) Mapagaram tam gapa i Bible study tam nga mappoffun ta Dios nga ulian i mali nga appanono anna labanan i marake nga ugu-ugali. Angngariganna, baka kakayàna i tadday nga selebrasion nga ari nakuan pakipartisipan na tadday nga Cristiano. Ammuna nga mali yatun, ngem egga ira i aspeto natun nga kakayàna. Pagaramman yayya nga espesipiko nga ikagina kani Jehova i mataga-tagenona anna mappoffun yayya nga iddukan laman i iddukan na Dios.​—Sal. 97:10.

13. (a) Ngatta insigida tam nakuan nga imbitan i Bible study tam ira nga magatende ta study? (b) Anni i kuattam tapenu ari ngana sangaw nga mappasiran i Bible study tam ta pagatende ta Kingdom Hall?

¹³ Imbitan insigida i Bible studym nga magatende ta study ta Kingdom Hall. Mapaguyu nga masserbi kani Jehova i Bible studym ta maginna anna masinganna ta study ira anna makoffun yatun ta papprogresona. Ipagiraw i video nga Anni Kukukuadda ta Kingdom Hall? anna meddu nga pagaramman yayya nga mevulu nikaw ta study. Mangiyofer tu transportasion nu posible. Makasta gapa nu magimbita tu nadduruma nga publisher nga mevulu nikaw ta pab-Bible study. Nu kunnatun, makilala na Bible studym i wawwaragi ta kongregasion, anna ari ngana yayya kuruga mappasiran sonu magatende ta study ira.

UFFUNAN I BIBLE STUDYM NGA MAPPROGRESO TA ESPIRITUAL

14. Anni makoffun ta Bible study tapenu mapprogreso ta espiritual?

¹⁴ Gakkag tam nga moffunan i Bible study tam nga mapprogreso ta espiritual. (Efe. 4:13) Nu egga i maya nga mappa-Bible study nittam, baka interesadu laman yayya nu kunnasi nga personal nga mammakapia tatun. Ngem durante nga dumakal i ayana kani Jehova, siguradu nga nonopanna ngana nu kunnasi yayya makoffun ta tanakuan, nelagum danuri parte ngana na kongregasion. (Mat. 22:37-39) Ta mepangngo nga tiempo, ari magalangan nga ikagi nisa i pribilehio nga suportan ta finansial i trabahu na Pappatulan.

15. Kunnasi tam moffunan i Bible study nga kuan i fustu nu egga i luttuag ira nga problemana?

¹⁵ Tudduan i Bible studym nu anni i kuanna nu egga luttuag nga problema. Angngariganna, kinagi nikaw na Bible studym nga unbaptized publisher nga natakitan yayya ta tadday nga wagi ta kongregasion. Ariammu ikagi nisa nu sinni i fustu onu mali, ngem iyesplikam i kagian na Biblia nga mawag tu kuanna. Awayyana nga pakoman yatun nga wagi onu, nu arianna mapalampas yatun, masippo anna medduna nga kibbidan yatun nga wagi nga gakkagna nga ‘mapattoli i pia na pawwagida.’ (Ikumpara i Mateo 18:15.) Duffunan i Bible studym nga mapprepara nu anni i kagianna. Ipasingan nisa nu kunnasi usan i JW Library^® application, i Tulong sa Pag-aaral ng mga Saksi ni Jehova, anna i jw.org^® tapenu makagigiammu tu praktikal ira nga gannug nu kunnasi solban i problema. Nu magigiammuna nu kunnasi solban i ari pakkarantindian nigena mabawtisowan, siguradu nga mapeggan yayya tu makasta nga relasion ta kongregasion kabalinna nga mabawtisowan.

16. Ngatta makasta nu imbitan i tanakuan nga publisher ta pab-Bible study?

¹⁶ Imbitan i tanakuan ta kongregasion nga vulunaddaka nga mab-Bible study kunne na gapa i manangngal ta sirkito nu bisitana ta kongregasion. Ngatta? Fuera paga ta rason ira nga nakagi ta nappasa, awayyana nga egga paga i meyuffun na tanakuan nga wagi ta Bible studym. Angngariganna, baka namippiga ngana nga pinurueban na Bible studym nga magimmang ta passigariliu ngem nanoli lagapa. Mangivulu tu wagi nga nalampasanna i kunnatun nga bisiu, nga neyemmanna i passigariliu kabalin na namippiga nga appursigi nga kuan yatun. Awayyana nga makeyawa yatun nga wagi tu praktikal ira nga tabarang nga kawagan na Bible studym nga maginna. Nu ari ka komfortable nga mangikondukta tu Bible study kavulu i ekspiriensadu nga brother onu sister, ikiddaw nisa nga yayya i mangikondukta. Nu imbitammu i tanakuan nga mevulu nikaw ta pab-Bible study, mammakapia i Bible studym ta ekspiriensada. Daddamman, gakkag tam nga moffunan i Bible study tam nga mapprogreso ta espiritual.

IYEMMAKKU NGANA KARI I PANGIKONDUKTA TA BIBLE STUDY?

17-18. Anni nakuan i ikonsideram nu maddesisiokka nga iyemmang i Bible study?

¹⁷ Nu ari tulu-tuloy i papprogreso na Bible studym, baka duttal i tiempo nga kawagammu nga iyavu ta baggim, ‘Iyemmakku ngana kari i pangikondukta ta Bible study?’ Nige mu maddesision, ikonsideram nakuan i abilidad na Bible studym. Mabayag nga mapprogreso i karuan kumpara ta tanakuan. Iyavu mu ta baggim: ‘Rasonable kari i papprogreso na estudiantè segun ta situasionna?’ ‘Igafuna kari ngana nga ‘parulattan,’ onu iyaplika i nagigiammuna ira?’ (Mat. 28:20) Awayyana nga mabayag i papprogreso na tadday nga Bible study, ngem tulu-tuloy nakuan i papprogresona.

¹⁸ Kunnasi gafu nu egga i tuttudduammu ta Biblia anna masingammu nga baddi laman i pattagibalorna ta Bible study onu awan paga lagu? Ikonsidera yaw nga situasion: Nabalin ngana na Bible studym nga gigiammuan i libru nga Ituddu na Biblia, anna baka nigafuna ngana paga i libru nga Mattalupaddian ta Aya na Dios, ngem arianna paga vuluvuga nga nagatende ta study​—maski ta Memorial! Anna kanayunna nga ikansela i Bible study gafu laman ta ari importante ira nga rason. Nu kunnatun i Bible studym, pabbidannu tu mapia i situasionna.b

19. Anni i puedem nga ikagi ta tadday nga arianna tagibaloran i Bible study, anna anni nakuan i ikonsideram?

¹⁹ Awayyam igafu i pabbidanu gukaban na pangiyavu nisa: ‘Anni i pinaka-mariga nga gannug nga makefugag nikaw ta pabbalin tu tadday nga Saksi ni Jehova?’ Baka kagian na Bible study, ‘Okay laman niakan i mab-Bible study, ngem ariakku vuluvuga mabbalin tu Saksi ni Jehova!’ Nu kunnatun i pagimammana maski nu nabayag ngana yayya nga mab-Bible study, mepangngo kari paga nga ituloy yatun? Ngem ta tanakuan gapa nga situasion, baka yatun pagalaman i tiansa nga mekagi nikaw na Bible studym i talaga makefugag nisa. Angngariganna, matagenona nga arianna vuluvuga nga makapallayyagayya ta babalay. Sangaw, gafu ta ammum ngana i mataga-tagenona, mas ammum ngana nu kunnasi yayya nga uffunan.

20. Kunnasi ittam uffunan na Kingngua 13:48 tapenu mammuan nu sinni i ituloy tam ta Bible study?

²⁰ Kaddaraddam, megitta ta Israelita ira ta kaggawan ni Ezekiel i karuan nga Bible study. Sifutan i kinagi ni Jehova kani Ezekiel meyannung nira: “Para nira, tadday ka nga romantiko nga kansion nga kakkansionan na minakkansion nga makasta i ngaralna anna malalaki nga mattugtug tu instrumento nga de-kuerdas. Maginnada i uvovug mu, ngem awan tu manuttul tatun.” (Eze. 33:32) Baka marigatan ittam nga ikagi ta Bible study tam nga iyemmattam ngana i pab-Bible study nira. Ngem “kuruga ababba ngana i nabattang nga tiempo.” (1 Cor. 7:29) Imbes nga ufutan i oras tam ta ari progresibo nga paggigiammu, mas makasta nu alegattam danuri mangipasingan nga tadday ira ta “mepangngo nga mangalawa tu mannanayun nga inango.”​—Bibbigan i Kingngua 13:48, NW.

21. Anni i teksto tam ta dagun 2020, anna kunnasi ittam uffunan natun?

²¹ Duffunan ittam na teksto tam ta dagun 2020 nga maffokus nu kunnasi ittam mabbalin tu mas efektibo ta pangngua tu disipulos. Nelagum tatun i kinagi ni Jesus durante ta importante nga paggarammammung ta vukig ta Galilea: ‘Umay kamu gafu ta ngamin nga totolay anna pabbalinannu ira tu disipulos. Bawtisowannu ira.’​—Mat. 28:19.