Nu Kunnasi Uffunan i Bible Study ira nga Mapprogreso ta Bawtismo​—Ollu nga Parte

1. Segun ta 2 Corinto 3:1-3, ngatta pribilehio tam nga tudduan i tanakuan tu Biblia tapus masingan i kabawtisoda? (Innan i letratu ta vungun.)

ANNI i matageno mu nu mabawtisowan i tadday nga Bible study ta kongregasionnu? Siguradu nga magayayya ka. (Mat. 28:19) Nu sikaw i nanuddu tatun nga bagu nga disipulo, magga magayayya ka nga masingan i kabawtisona! (1 Tes. 2:19, 20) I bagu ira nga nabawtisowan nga disipulos ay makasta nga ‘tura nga mangipakannammu anna mangidayaw’ turi ira ta nanuddu nira anna ta interu nga kongregasion.​—Bibbigan i 2 Corinto 3:1-3.

2. (a) Anni nga pakkiavu i mawag tu pannonopattam, anna ngatta? (b) Anni i Bible study? (Innan i footnote.)

² Ta nappasa nga appa nga ragun, magayayya ittam nga mammuan nga egga i 10,000,000 nga Bible studyb nga mereport ta kada vulan ta interu mundo. Tatun gabbalaman ira nga ragun, egga i ma-280,000 nga mabawtisowan kada dagun. Kunnasi tam moffunan i mas aru paga tatun nga minillion nga maggigiammu tu Biblia tapenu mabawtisowan? Adde sangawe, iddiddan lagapa ni Jehova i totolay tu tiansa tapenu mabbalin tu Saksina. Yatutta kuattam nakuan i adde na mawayya tam tapenu moffunattam ira nga mapprogreso ta bawtismo ta kalistuan nga tiempo. Ababba ngana i nabattang nga tiempo!​—1 Cor. 7:29a; 1 Ped. 4:7.

3. Anni i gigiammuattam taw nga artikulo meyannung ta pab-Bible study?

³ Kuruga importante i pangngua tu disipulos. Yatutta nassurvey i Manangngal nga Baggi ta panga ira nga ofisina nu anni ira i makua tam tapenu moffunattam i mas aru nga Bible study tam ira nga mapprogreso ta bawtismo. Taw nga artikulo anna ta tumunug, ammuattam nu anni ira i magigiammu tam ta ekspiriensa na payunir, misionero ira, anna manangngal ta sirkito.c (Prov. 11:14; 15:22) Iyesplikada nu anni i makua na mangi-Bible study anna na study-na tapenu mas makabenefisio i pab-Bible study. Taw nga artikulo, gigiammuattam i lima nga mawag tu kuan na tadday nga Bible study tapenu mapprogreso yayya ta bawtismo.

MAB-BIBLE STUDY KADA LIGGUAN

4. Ngatta ari nga makalanno i pangikondukta tu Bible study ta lawan laman na balay?

⁴ Aru nga wawwaragi tam i mangikondukta tu Bible study durante nga agga-taddag ira ta lawan laman na balay. Maski nu makasta nga pamegafu yatun ta pangultiba ta interes ta Biblia, maruddu nga ababba laman danaw nga paggigiammu anna ari paga lagu nga makua kada ligguan. Tapenu mas maginteres i karuan, apan na karuan nga wawwaragi i cellphone number na interesadu nga tolay tapus i-text onu tawagadda yatun nige na tumunug nga passinoli tapenu mangibillay tu ababba nga informasion maggafu ta Biblia. Awayyana nga mattulu-tuloy tu piga nga vulan i kunnatun ira nga pabbirida ngem ari nga marresulta ta progresibo nga Bible study. Talaga kari nga mapprogreso i Bible study mappange ta dedikasion anna bawtismo nu kurang i tiempo anna appursigina nga gigiammuan i Uvovug na Dios? Siempre ari.

5. Anni i kinagi ni Jesus ta Lucas 14:27-33 nga meyusa tam tapenu moffunan i Bible study tam ira?

⁵ Niyesplika ni Jesus i mawag nga kuan na tadday nga tolay tapenu mabbalin tu disipulona. Nangiyusa yayya tu ilustrasion—tadday nga tolay nga maya nga mappataddag tu torre anna i patul nga umay nga makiggerra. Kinagina nga mawag tu ‘magitubang labbi anna karkulan na mamataddag nu piga i magasto’ tapenu mabalinna i torre. Kinagina paga nga mawag tu ‘magitubang labbi i patul anna mannono’ nu mawayya na suddaluna ira nga arubangan i kalabadda. (Bibbigan i Lucas 14:27-33.) Ammu gapa ni Jesus nga nu kayà na tadday nga tolay i mabbalin tu disipulona, mawag tu nonopanna tu mapia nu anni i kebalinan na panuttul kani Jesus. Megafu tatun, mawag tu pagarammattam i Bible study tam ira nga makipaggigiammu nittam kada ligguan. Kunnasi tam nga makua yatun?

6. Anni i kuammu tapenu mapprogreso i Bible studym ira?

⁶ Ammungammu i oras na pangi-Bible studym nga agga-taddag ta lawan na balay. Baka puede nga dua nga teksto i ipakiyuvovug mu imbes tu tadday laman ta kada passinolim. Sonu napenam ngana i makabbalay ta mas apaddu nga oras na pabbisitam, iyavu nisa nu egga i lugar nga awayyanu nga magitubang anna ituloy i pab-Bible study. Depende ta tabbag na makabbalay, mammuammu nu kunnasi ka-importante nisa i pab-Bible study. Sonu kua, tapenu mas alistu i papprogreso na Bible study, puedem nga iyavu nisa nu kayàna i mab-Bible study tu mamiddua ta kada ligguan. Ngem fuera paga tatun nga paggigiammuna, mawag paga tu egga i kuanna.

MAPPREPARA KADA MAB-BIBLE STUDY

7. Kunnasi nga makapapprepara tu mapia i mangistudy ta kada pab-Bible study-na?

⁷ Mawag tu mapprepara tu mapia i mangistudy ta kada paggigiammu. Bibbigan tu mapia i gigiammuannu anna innammu i teksto ira. Manawag nakuan nikaw i punto ira. Nonopammu tu mapia i titulo na leksion, subtitulo ira, pakkiavu ira ta paggigiammu, mabibbig ira nga teksto, letratu, anna maski anni nga video nga makoffun tapenu mangiyesplika ta topiko. Datim ngana nga pannonopan nu kunnasim nga ibagay i pangipakanawag mu ta pakawagan na Bible studym. Simple anna manawag nakuan yatun tapenu alistuna nga makomprendi anna meyaplika.​—Neh. 8:8; Prov. 15:28a.

8. Anni i ituddu nittam na Colosas 1:9, 10 meyannung ta pangipakimallo ta Bible study tam ira?

⁸ Nu mapprepara ka, ipakimallo mu kani Jehova i Bible studym anna i pakawaganna ira. Ikiddom tannisa nga uffunan naka nga madde i futuna nu tudduammu yayya tu Biblia. (Bibbigan i Colosas 1:9, 10.) Datim ngana nga pannonopan i gannug ira nga posible nga mariga nga alippawatan onu alawatan na Bible studym. Nonopammu nga i gakkag mu ay uffunan yayya nga mapprogreso ta bawtismo.

9. Kunnasi nga uffunan na mangistudy i Bible study-na nga mapprepara? Iyesplika.

⁹ Iddanamattam nga gukaban na regular nga pab-Bible study, appresian na estudiante i kingngua ni Jehova anna ni Jesus anna kayàna paga i mas maggigiammu. (Mat. 5:3, 6) Tapenu mabenefisiowan tu mapia i Bible studym, kawaganna i maffokus ta giggigiammuanna. Tapenu makua tam yatun, mawag tu ipakanawag tam nisa nga importante nga mapprepara yayya ta kada pab-Bible study gukaban na dati nga pabbibbig ta leksion anna pannono nu kunnasina nga iyaplika i magigiammuna. Kunnasi nga makoffun i mangistudy? Ipreparanu nga dua i tadday nga leksion tapenu masingan na Bible studym nu kunnasi nga makua yatun.d Ipasingan tannisa nu kunnasi alegan i direkta nga tabbag ta pakkiavu ira anna ipasingan nu kunnasi nga makoffun i paggallina ta importante ira nga termino onu punto tapenu arianna nga mattaman i tabbag. Tapus ikagim nisa nga tubbag ta sarilina nga uvovug. Nu kuammu yatun, mammuammu nu talaga nalippawana i giggigiammuannu. Ngem egga paga i puedem nga ipagaram ta estudiantem nga kuanna.

TUDDUAN YAYYA NGA MAKIKOMUNIKA KANI JEHOVA KADAGGAW

10. Ngatta importante nga inaggaw nga bibbigan na Bible study i Biblia, anna anni i kuanna tapenu mas mabbenefisio tatun?

¹⁰ Fuera paga ta paggigiammu kada ligguan, mabenefisiowan paga i estudiante nu egga ira i kuanna ta kagaggaw nga yayya lagapa. Mawag tu makikomunika yayya kani Jehova. Kunnasi? Gukaban na pagginna anna pakiyuvovug kani Jehova. Magginna yayya ta Dios nu inaggaw nga bibbiganna i Biblia. (Jos. 1:8; Sal. 1:1-3) Ituddum nisa nu kunnasi usan i “Iskediul ta Pabbibbig tu Biblia” nga puede nga meyimprenta nga egga ta jw.org.e Siempre, tapenu mas mabenefisiowan yayya ta pabbibbigna tu Biblia, pagarammammu yayya nga pannonopanna tu mapia nu anni i ituttuddu na Biblia meyannung kani Jehova anna nu kunnasina nga meyaplika i magiggigiammuna ta pattolena.​—King. 17:11; Sant. 1:25.

11. Kunnasim nga matudduan i estudiantem ta fustu nga pappakimallo, anna ngatta importante nga kanayun yayya nga makimallo kani Jehova?

¹¹ Ipagaram ta estudiantem nga makiyuvovug kani Jehova gukaban na inaggaw nga pappakimallo. Napafutuan nga makimallo ka ta gafu anna ta ultimu na paggigiammunu anna ilavu mu yayya ta pakimallo mu. Nu maginnana i pakimallo mu, matudduammu yayya nu kunnasi i napafutuan nga makimallo anna nu ngatta mawag tu makimallo yayya kani Jehova nga Dios ta ngagan ni Jesu-Cristo. (Mat. 6:9; Juan 15:16) Nonopammu ngana laman nu kunnasi nga makoffun ta estudiantem nga mas maddukko ta Dios nu inaggaw nga bibbiganna i Biblia (pagginna kani Jehova) anna makimallo yayya (pakiyuvovug kani Jehova). (Sant. 4:8) Nu kuanna yatun kagaggaw, moffunan yayya nga mapprogreso mappange ta dedikasion anna bawtismo. Anni paga i makoffun nisa?

UFFUNAN YAYYA NGA MAPEGGAN TU PERSONAL NGA RELASION KANI JEHOVA

12. Kunnasi nga moffunan na mangistudy i estudiantena nga mapeggan tu relasion kani Jehova?

¹² Mawag nga magadde ta futu na estudiante i ngamin nga magiggigiammuna ta Biblia ari laman ta nonona. Ngatta? Megafu ta nelagum ta futu tam i pakkaraga anna panageno tam anna yatun i mamaguyu nittam. Mamappanono ta totolay i panuddu ni Jesus. Ngem sinuttulda yayya megafu ta naddena gapa i futuda. (Luc. 24:15, 27, 32) Mawag tu imammatan na estudiantem nga kurug nga Persona si Jehova anna awayyana i mapeggan tu relasion nisa anna imammatanna yayya nga Yama, Dios, anna Kofunna. (Sal. 25:4, 5) Ta paggigiammu tam, mawag tu mammuan na estudiante i makasta ira nga kualidad na Dios tam. (Ex. 34:5, 6; 1 Ped. 5:6, 7) Maski anni paga i topiko, kuammu yatun ta kada paggigiammunu. Uffunan i estudiantem nga appresian i makasta ira nga kualidad ni Jehova​—i aya, kinasippo, anna allona. Kinagi ni Jesus nga i “ollu anna kuruga importante ta ngamin nga dorob” ay “ayatam-mu i Yafu nga Dios mu.” (Mat. 22:37, 38) Uffunan i estudiantem nga mapeggan tu monag nga aya kani Jehova.

13. Mangiyawa tu angngarigan nu kunnasi nga moffunan i Bible study nga magigiammu i kualidad ira ni Jehova.

¹³ Ta pakiyuvovug mu ta estudiantem, ikagim nisa i konag na pangaya mu kani Jehova. Moffunan natun yayya tapenu matindianna nga mawagna gapa i mapeggan tu meddu anna personal nga relasion ta Dios. (Sal. 73:28) Angngariganna, egga kari i punto ta giggigiammuannu onu teksto nga mangipasingan ta aya, sirib, hustisia, onu pakapangngua ni Jehova nga nakatukkal ta futum? Ikagim yatun ta Bible studym anna ipakanawag mu nisa nga tadday yatun ta aru nga rason nu ngatta ayatammu i nelangitan nga Yama tam. Egga paga i mawag nga kuan na Bible study tam tapenu mapprogreso ta bawtismo.

PAGARAMMAN YAYYA NGA MAKISTUDY

14. Anni i ipagaram na Hebreo 10:24, 25 tapenu mapprogreso i Bible study tam?

¹⁴ Kayà tam ngamin nga mapprogreso ta bawtismo i Bible study tam ira. Moffunattam ira nu ipagaram tam nga makistudy ira. Pakurugan na ekspiriensadu ira nga mangistudy nga alistu nga mapprogreso danuri insigida nga magatende ta study ira. (Sal. 111:1) Ipakanawag na karuan nga mangistudy ta estudianteda ira nga egga ira i magigiammuda ta study ta kongregasion nga ariadda magigiammu ta pab-Bible study-da. Ibibbig i Hebreo 10:24, 25 ta Bible studym anna ipakanawag mu nisa nu ngatta makasta nga umay yayya ta study ira. Ipagirom nisa i video nga Anni Kukukuadda ta Kingdom Hall?f Uffunan i estudiantem nga mabbalin tu determinadu nga kanayun nga makistudy.

15. Anni i kuattam tapenu mapagaram i estudiante nga regular nga makistudy?

¹⁵ Anni i kuammu nu ari paga vuluvuga nakistudy i Bible studym onu sinaggi-mittan laman nga umay? Sigga-pagayayya nga iyistoria nisa i tadday nga nagigiammum ta nappasa nga study. Mas mapaguyu yayya nu kuammu yatun anne ta basta pangimbita laman. Iddammu yayya tu kopia na Passifusifutan onu na Workbook ta Study nga Pattolay Anna Ministerio nga magigiammu tatun nga ligguan. Ipasingan nisa nu anni i magigiammu ta tumunug nga study tapus iyavu mu nu anni i makapa-interes tannisa. Siguradu nga i maobserba na Bible studym ta ollollu nga pagatendena ta study ay nerumu-ruma ta maekspiriensana ta maski anni nga tanakuan nga relihion. (1 Cor. 14:24, 25) Makakilala yayya tu makasta ira nga apparigan nga makoffun nisa nga mapprogreso ta bawtismo.

16. Anni i mawag ta pangikondukta tu Bible study nga mappange ta bawtismo, anna anni i gigiammuattam ta tumunug nga artikulo?

¹⁶ Kunnasi tam mangikondukta tu Bible study ira nga mappange ta bawtismo? Moffunattam nga masingan na estudiante nu kunnasi ka-importante i paggigiammu nu pagarammattam yayya nga magistudy kada ligguan anna mapprepara ta kada pagistudy. Ikaya tam gapa nga makikomunika yayya kadaggaw kani Jehova anna mapeggan tu personal nga relasion tannisa. Pagarammattam yayya nga makistudy. (Innan i kahon ta pahina 12 nga “Nu Anni i Mawag tu Kuan na Bible Study Tapenu Mapprogreso ta Bawtismo.”) Ta tumunug nga artikulo, meyesplika paga i lima nga gannug nga makua na mangistudy tapenu mattuppal i estudiantena ta bawtismo.