Mabbalin tu Masirib ta Pangusa ta Literatura ira ta Biblia

Nituddu ni Jesus nga nu inalawa tu libre, iyawa gapa tu libre. (Mt 10:8) Tapenu matuttul yatun nga manawag nga direksion, ariattam ipapaga i Biblia onu i nebase-Biblia ira nga literatura. (2Co 2:17) Nabalor ira nga kinakurug ta Uvovug na Dios i naddianna yaw ira nga publikasion. Dakal i bannag anna gastu ta pangiyimprenta anna pangipatulug tu literatura ta kongregasion ira ta interu mundo. Manga tam laman gafu tu mawag tam.

Pannonopan tu mapia nu mangiyawa tu literatura ta tanakuan, maski ta lugar ira na publiko nga pallayyagayya. (Mt 7:6) Imbes tu basta iyawa laman i literatura ta mattalebag ira, makiyuvovug nira tapenu mammuan nu interesadu ira. Matabbagmu kari tu wan i maski tadday laman nga pakkiavu ta kahon? Nu ariammu ammu nu interesadu onu ari i tadday, mas makasta tu tract i iyawamu. Siempre nu makkiddaw tu magazina onu tanakuan nga publikasion, magayaya ittam nga iddan yaya tu kopia.​—Pr 3:27, 28.