Mabendisionan Danuri Manguffun ta Makawag

Aru nga totolay ta interu mundo i magawag tu makan anna paddianan. Kawagan gapa na karuan i makasta nga iddanama ta mappange. Nu duffunattam ira, bendisionan ittam na Dios.

I KAGIAN NA MASANTO NGA TURA

“I mangipasingan tu fabor ta pobre ay mappappagatu kani Jehova, anna bala-balakkanna yayya megafu ta kukukuanna.”​—PROVERBIO 19:17.

I KAYÀ KAGIAN NA PANGUFFUN TA MAKAWAG

Inistoria ni Jesus i meyannung ta tadday nga lalaki nga nakokotan anna pinanawan nga magimmamatay na nakkoko ira. (Lucas 10:29-37) Zinuffunan anna sinangngaw na tadday nga estrangheru yaw nga magimmamatay nga lalaki. Kingnguana yaw maski nu ari ira nga makka-lahi.

Inuru yayya na masippo nga lalaki anna niddanna tu finansial nga uffun. Binanna-bannayanna yayya anna zinuffunanna yayya ta mariga nga situasionna.

Anni i magigiammu tam taw nga istoria? Nipasingan ni Jesus nga mawag tu kuattam i ngamin nga mawayya tam ta panguffun ta makawag. (Proverbio 14:31) Ituddu na Masanto nga Tura nga aranni ngana nga alsan na Dios i pazziga-riga. Ngem baka manono tam, kunnasi anna kanni nga kuan yatun na Dios? Mammuattam ta tumunug nga artikulo i bendision ira nga iyawa na minaggiddu nga Namaratu para nikaw.