MATTOLAY NGA CRISTIANO
Itaddaggan i Moral ira nga Estandarte ni Jehova
Si Jehova nga Dios i mangiyawa tu estandarte ta moralidad para ta totolay. Angngariganna, nibilinna nga i pagatawa ay permanente nga pattadday na lalaki anna babay. (Mt 19:4-6, 9) Ikalussona i ngamin nga klase na seksual nga imoralidad. (1Co 6:9, 10) Nangiyawa paga yaya tu prinsipio ira meyannung ta assinnun anna itsura nga mangisina ta ilina.—De 22:5; 1Ti 2:9, 10.
Ta kaggawattam, aru i ari manuttul ta estandarte ira ni Jehova. (Ro 1:18-32) Nappa-influwensia ira ta assinnun anna itsura anna ta kondukta na magaru. Iparayag na magaru i marake nga kukukuadda anna ikalussoda danuri egga tanakuan nga estandarteda.—1Pe 4:3, 4.
Bilang Saksi ira ni Jehova, mawag tu magutu nga itaddaggattam i moral ira nga estandarte na Dios. (Ro 12:9) Kunnasi? Mataktika tam nakuan nga ipakannammu i gannug nga akseptanna. Ngem mawag gapa tu pattalupaddianattam i atannang nga estandarte ta pattoletam. Angngariganna, nu mappili tu istilo na sinnun anna itsura, iyavu ta baggi tam: ‘Masingan kari ta pili-piliakku i estandarte ni Jehova onu na mundo? Makilala ngà kari nga makadios nga Cristiano ta sinnun anna itsurà?’ Onu nu mappili tu programa onu pelikula, iyavu ta baggi tam: ‘Apruban kari ni Jehova yaw nga programa? Makà-estandarte ta moralidad i suportan naw? Posible kari nga pakkafian na pinilì ira nga dibersion i moralidad ku? (Sal 101:3) Makesiddukal kari yaw ta kafamilià onu ta tanakuan?’—1Co 10:31-33.
Ngatta kuruga importante nga itaddaggattam i moral ira nga estandarte ni Jehova? Aranni ngana daralan ni Jesu-Cristo i nasa-nasion anna i ngamin nga marake. (Eze 9:4-7) Danuri laman magangngua ta uray na Dios i mapaliag. (1Jn 2:15-17) Itaddaggattam gafu i moral ira nga estandarte ni Jehova tapenu dayawan danuri makasingan ta makasta nga kondukta tam i Dios.—1Pe 2:11, 12.
Anni i ipasingan na pili-piliakku nga sinnun anna itsura meyannung ta moral nga estandartè?
GIRAWAN I VIDEO NGA MABBALIN TU KOFUN NI JEHOVA—TADDAY NGA LALAKI, TADDAY NGA BABAY, TAPUS TABBAGAN I TUMUNUG IRA NGA PAKKIAVU:
Ngatta masirib i mattolay segun ta estandarte ira ni Jehova?
Ngatta mawag tu pegafuanan ngana na magana ira nga ituddu ta ánada i moral ira nga estandarte ni Jehova maski nu abbing paga laman ira?
Kunnasi moffunan na abbarabbing anna na manakam ira i totolay tapenu mabenefisiowan ta pia na Dios?