Nu Kunnasi Igafu i Pakiyuvovug Gukaban na Tract Ira

Namegafu ta Enero 2018, mabibbig ta arubang na Workbook ta Study nga Pattolay Anna Ministerio i sampol ira nga pakiyuvovug. Nepagaram nittam nga maffokus ta pakiyuvovug ta totolay imbes nga mangipresenta laman tu literatura. Tapenu maduffunan i publisher ira, magiraw ta video ira na sampol nga pakiyuvovug nu kunnasi igafu i pakiyuvovug gukaban laman na Biblia. Ngem kayàna kari kagian nga ariattam ngana mangiyusa tu literatura nu mallayyagayya? Ari gapa! Angngariganna, efektibo i tract ira ta pangigafu tu pakiyuvovug. Meyusa tam i tumunug nga metodo nu usattam i maski anni ta tract ira:

1. Usan i pakkiavu anna i pappilian ira nga tabbag ta arubang.

2. Ipasingan i tabbag na Biblia gukaban na teksto ira ta utun na mekadua nga pahina. Nu egga paga oras, bibbigan anna ipakanawag i karuan nga informasion ta unag na tract.

3. Iyawa i tract ta makabbalay, anna pagaramman yayya nga bibbiganna yatun sonu egga tiempona.

4. Nige mu manaw, ipasingan i pakkiavu nga egga ta “Nonoppammu” anna kagiammu nga ipakanawag mu i tabbag na Biblia sonu tumunug.

Ta panolim, ipakanawag mu i tabbag anna mangibattakka uli tu pakkiavu nga tabbagammu ta tumunug. Awayyam mappili tu pakkiavu nga egga ta website tam onu ta publikasion nga masingan ta likug nga pahina. Ta mepangngo nga tiempo, iyarubang i brosiur nga Makakkasta nga Balita Naggafu ta Dios! onu i tadday nga publikasion ta paggigiammu nga egga ta Teaching Toolbox.