Pisikal nga Gawa-gawayyan

Ari tu libru ta medisina i Biblia. Ngem egga i prinsipiona ira nga makaduffun tapenu makkasta i gawa-gawayyattam. Innan i karuan nga prinsipio ta Biblia nga makaduffun ta pisikal nga gawa-gawayyammu.

IMMUGURAMMU I BAGGIM

PRINSIPIO NA BIBLIA: “Awan tu tolay nga mangikalussaw ta baggi na, nu ari pakanan anna immuguran na.”—Efeso 5:29.

I KEBALINANNA: Ipagaram naw nga prinsipio na Biblia nga kuattam i mawayya tam tapenu memmuguran i pisikal nga gawa-gawayyattam. Ipasingan na tadday nga report nga aru nga problema ta gawa-gawayyan i resulta na kukukuattam. Nu makasta gafu i kukukuattam, makasta gapa i gawa-gawayyattam.

I MAKUAM:

Nutrision. Kuman tu masustansia nga makan anna minum tu aru nga danum.
Ehersisio. Maski anni edad mu, maski egga pisikal nga diferensiam onu limitadu i makuam megafu ta taki, mapakasta na pagehersisio i gawa-gawayyammu. Makoffun gapa i kafamilia anna doktor ira ta pagehersisiom, ngem mawag nga sikaw lagapa i mangitrabahu tatun!
Pakkatrug tu Mapia. Nu kanayun nga kurang i katrug mu, awayyam i mattaki tu grabe. Aru nga totolay i kurang i katrugda megafu ta aru paga i kukukuadda ta oras nakuan na pakkatrug. Ngem nu kumpleto i katrug mu, makkasta i gawa-gawayyammu.

IYEMMANG I MARAKE IRA NGA BISIU

PRINSIPIO NA BIBLIA: “Pakarennuat-tam i baggi anna espiritu tam ta anni laman nga makaparitta nittam.”—2 Corinto 7:1.

I KEBALINANNA: Pammakapianattam nu ariattam mangusa tu delikadu ira nga substansia kagitta na tabaku, nga primeru nga kegafuan na taki anna patay.

I MAKUAM: Mappili tu fetcha nga iyemmang mu ngana i bisium. Ta aggaw nige natun, itabbo mu ngana i sigarilium, i pagipayyanammu tu avu, lighter, anna i tanakuan paga ira nga usu-usammu tatun nga bisiu. Lillitan i lugar ira nu sitaw aru i massigariliu. Ikagim ta familiam anna kokkofummu i desisiommu.

KARUAN PAGA NGA PRINSIPIO TA BIBLIA

Lalaki nga mabbibbig tu Biblia — Makala ka tu kopiam ta Biblia gukaban na pakkiddaw ta Saksi ira ni Jehova ta lugarnu

KANAYUN NGA MAGIMMUGUG.

“Nu mangipataddag kamu tu balay, mawag nga mangipay kamu tu barandilias [onu, alinno nga harang] ta atona, tapenu ari kamu makaliwa ta daga nu egga mataga tatun.”—DEUTERONOMIO 22:8.

KONTROLAMMU I POREM.

“Monag i pakalippawa na tolay nga ari tu mabi mapporay, ngem ari nga nannono i awan tu pasensiana.”—PROVERBIO 14:29.

ARI NAKUAN TU SOSSOBRA I KANAMMU.

“Ari ka makikavulu . . . turi ira ta vutu.”—PROVERBIO 23:20.