Nainfluwensiakka Kari na Pangireruma?

Duma i pattratu na totolay ta karuan ari laman nga gafu ta tanakuan i nasionalidad, lahi, tribu, onu lengguaheda, nu ari, gafu gapa ta tanakuan i relihion, sekso, onu estado na pattolayda. Husgan na karuan i tanakuan gafu ta edad, edukasion, itchura, onu diferensiada. Ngem abboda lapa nga ari ira nga mangireruma.

Awayyam kari mainfluwensian na pangireruma? Mabi tam nga masingan nu mangireruma i tanakuan. Ngem awayyana nga ari tam masingan nu kunnatun ittam. I kurug, mangireruma ittam gapa nu karuan. Nu negatibo ngana i paningan na totolay ta tadday nga grupo anna nakilalada i tadday tatun nga grupo, kagian na sociology professor nga si David Williams nga “duma ngana saw i pattratuda tatun nga tolay ngem ariadda ammu nga kunnari i kingnguada.”

Angngariganna, egga i etniko nga grupo ta tadday nga nasion ta Balkan nu sitaw maddian si Jovica. “Abbo ku nga awan tu maski tadday nira nga masippo,” kunna. “Ngem ariakku nanono nga mangireruma ngà ngana. ‘Tutal, kurug mabba,’ kukku ta baggì.”

Aru nga gobiernu i magangngua tu dob kontra ta pangireruma ta lahi anna karuan paga nga klase na pangireruma. Ngem maski nu kunna, ari lagapa nagimmang i pangireruma. Ta ngatta? Megafu ta fugaddan laman natun ira nga dob i kukukuan na tolay. Ariadda makontrol i nono anna panageno na tolay. Ta nono anna futu paga mabba mamegafu i pangireruma. Mawawan paga kari i pangireruma? Masolusionan paga kari yatun?