Ayatan i Totolay

I Problema

Ari tu mabi malsa i pangireruma. Nu kunnasi nga kawagan i tiempo anna pangikaguman tapenu malsa i taki, kawagan gapa i tiempo anna pangikaguman tapenu malsa i pangireruma. Kunnasim malsa i pangirerumam?

Prinsipio na Biblia

Letratu Ira: 1. Lalaki nga taga-Asia nga pinavvukana tu puerta i ngisi nga lalaki nga agga-tammi tu kafe. 2. I ngisi gabbalaman nga lalaki nga mangiyawa tu kafe ta katrabahuna ira, kasali i babay nga Indian nga nakagi ta gafu.

“Ilanno nu paga taw ira i pakka-aya-aya nu, ta yaw i mamattaradday nikamu ta meggo nga pavvurulun.”—COLOSAS 3:14.

Anni i kayà kagian na teksto? Mamattaradday i pagangngua tu mapia ta tanakuan. Nu mas kana-kanayummu nga ipasingan i aya ta totolay, mapakarianan i pangirerumam ta nira. Nu mas ayatammu i totolay, malsam i lussom ta nira.

I Makuam

Letratu Ira: 1. I bako nga Caucasian nga zinuffunan na babay nga Indian nga iyune i ginatangna. 2. I bako nga Caucasian nga mangiyawa tu biscuit ta karrubana nga lalaki nga taga-Asia nga nakagi ta gafu.

Mannono tu makuam ira tapenu mepasingammu i aya mu ta totolay nga negatibo i paningammu ta nira. Awayyana nga ta simple laman ira nga gannug. Puruebammu yaw ira:

Kada mangipasingakka tu aya, sisinu nga malsam i pangirerumam

Mangngua tu mapia ta nira gukaban na pavvuka ta puerta onu pangiyawa ta itubammu ta nira ta pampubliko nga transportasion.
Maki-istoria ta nira tu manganannuan maski nu ariadda ammu kuruga i lengguahem.
Pasensiammu ira nu egga i kuadda nga ariammu matindian.
Makisimpatia nu kagiadda i problemada.