Makipattageno
I Problema
Nu i iinnattam laman ay i neruman na tanakuan ta nittam, baka nonopattam nga egga i defektoda onu problema ta nira. Megafu tatun, awayyana nga alalinno i pattratu tam nira. Nu negatibo ngana i paningattam ta tanakuan, marigatattam nga makipattageno ta nira. Nu ariattam ammu i makipattageno, baka seniales yatun nga mangireruma ittam.
Prinsipio na Biblia
‘Makipappagayayya kamu ta magayayya ira, makipaddaraddam kamu ta maraddam.’—ROMA 12:15.
Anni i kayà kagian na teksto? Ituddu naw nga teksto nga mawag tu makipattageno ittam. Nu makipattageno ittam, gittana ipay tam i baggi tam ta situasion na tanakuan.
Nu Ngatta Importante i Makipattageno
Nu makipattageno ittam ta tadday nga tolay, mammuattam i pakkaparehuattam. Baka masingattam nga kaparehu tam ira tu mataga-tageno anna reaksion. Malippawa tam gapa nga pare-parehu laman ittam maski anni paga i naggafuanattam. Nu i pakkaparehuattam i mas iinnattam, makkasta i paningattam ta nira.
Gafu ta pakipattageno, irespeto tam gapa i tanakuan. Dati, tagibaddikan ni Anne-Marie nga taga-Senegal i totolay nga alinno i paningan na magaru. Kunnaw i nakagina gafu ta pakipattagenona nira: “Turi ta nasingakku i pazziga-rigada, nanono ku, ‘Kunnasi tamma nu sakan i egga ta situasiodda?’ Gafu taw, nalippawa ku gabbalaman nga ari ngà mas atannang ta nira. Awan tu kiningnguà tapenu makagi nga mas atannang ngà anne nira.” Nu ikagumattam gafu nga ammuan i situasion na tadday nga tolay, ariattam yayya nga basta ngana laman nga kritikan.
I Makuam
Nu negatibo i paningammu ta karuan nga totolay, innammu lallagu i pakkaparehuannu. Angngariganna, nonoppammu i mataga-tagenoda nu
Nu makipattageno ittam, malippawa tam nga pare-parehu laman ittam
kumu-kuman ira kavulu i familiada
mabalidda i tangaggaw nga madammo nga trabahuda
kavuluda i kokkofudda
gigginnadda i faboritoda nga musika
Ipem gapa i baggim ta situasiodda. Nonoppammu:
‘Anni tamma i reaksiokku nu egga i mangipatageno nga awan tu sesserbì?’
‘Anni tamma i matageno ku nu husgannà na tanakuan nigenà paga makilala?’
‘Nu tadday ngà nira, anni i kayà ku nga pattratu niakan na tanakuan?’