TA MUNDO NGA NAPANNU TU PROBLEMA

3 | Tagibalorammu i Relasiommu ta Totolay

NU NGATTA IMPORTANTE

Megafu ta umara-aru nga problema ta mundo, mapagurayan na aru nga totolay i relasiodda ta iddeddukadda ira.

Isisina na totolay i baggi da ta kokkofudda.
Egga ira i magatawa nga kanayun nga mapporfia.
Ari nga matangngaw na magana ira i problema ira na ána da.

I Mawag nga Mammuammu

Daka-dakal i meyuffun na kokkofummu ta pisikal anna emosional nga gawa-gawayyammu, jebi ngana ta mariga ira nga tiempo.
Awayya na nga gavva nga makkaproblema i familiam megafu ta stress nga resulta na problema ira ta mundo.
Awayya na nga maganassing i ána mu nu makaginna ira onu makagiraw tu marake ira nga balita.

I Makuam

Kagian na Biblia: “I kurug nga kofun ay mangipasingan tu aya ta ngamin nga tiempo, anna wagi nga meyana ta tiempo na ziga.”—Proverbio 17:17.

Umaranni ka ta kokkofummu nga minangnguffun nga makeyawa tu makasta ira nga tabarang. Nu ammum nga egga i mangikavurung ta niko, mas nga maattammammu i problema.

I MAKUAM—Makaduffun ira nga Suhestion

Ta mariga ira nga tiempo, mepasingammu nga tagibalorammu i relasiommu ta totolay nu kuammu danaw ira nga praktikal nga suhestion

PALADDAMMU I RELASIOMMU TA ATAWAM

Paladdammu i relasiommu ta atawam

Kagian na Biblia: “Mas makasta i dua anne ta tadday . . . Ta nu matomba i tadday nira, moffunan na tadday paga i kavulu na nga tumaddag.” (Eclesiastes 4:9, 10) I magatawa ay mawag nga gitta na pilot anna copilot nga makkavulu nga mappakagag tu eroplano, ari tu dua nga fighter jet nga makkalaban.

Ariannu nga itulu nga ta kataggi-tadday nu nga melawan i patu na ulu nu. Makkapasa-pasensia kamu.
Maski mittan ta tanga-ligguan, pabbidan nu na atawam nu egga i problema. Puntirian nu i problema—ari tu i kataggi-tadday.
Kuan nu i gannug ira nga parehu kamu nga magenjoy.
Nonopan nu i tiempo ira nga masaya kamu. Angngarigan na, innan nu i letratu ira ta kasal nu onu ta karuan paga nga masaya nga nesimmu.

“Makka-team lapa i magatawa maski nu ari ira nga makkasundu ta ngamin nga gannug. Ira dua i maddesision tapus madduffun ira tapenu makasta i pattuppalan na desisiodda.”—David.

MAKIDDUKKO KA TA KOKKOFUMMU

Makiddukko ka ta kokkofummu

Pannonopammu nu kunnasi ka nga makeyawa tu uffun ta kokkofummu, ari laman tu siko i mangalawa tu uffun. Mapasikakka gapa ta pamasikammu ta tanakuan.
Kumustammu i karuan nga kofummu kadaggaw.
Iyavutammu ta kokkofummu nu anni i kiningngua da ta problema ira nga mepaparubang gapa ta niko.

“Ta mariga ira nga situasion, i kokkofummu i manguffun ta niko tapenu masingammu i fustu nga direksion. Awayya na nga ipanono da ta niko i gannug ira nga dati ngana nga ammum. Ikavurungaddaka anna ammu da nga ikavurungammu gapa ira.”—Nicole.

SUPORTAMMU I ÁNA MU

Suportammu i ána mu

Kagian na Biblia: “Mawag tu sigga-parak-kamu nga magginna, memmugug ta paguvovug.” (Santiago 1:19) Ta gafu na, awayya na nga maggaggag i ána nu nga ikagi i paganassingadda anna pakavurungadda, ngem nu pasa-pasensian nu ira nga ginnan, awayya na nga ikagi da gabbalaman i matageno da.

Duffunan nu i ána nu nga mabbalin tu komfortable ta pakistoria ta nikamu. Mas magistoria i ána ira nu relaks ira, kagitta na nu maddaggun kuman, egga ta takay, onu lumaka-lakag, anne nu agga-itubang ira nga kaarubadda i magana da.
Siguraduan nu nga ari nga sossobra i maginna onu magiraw na ána nu nga marake nga balita.
Kagian nu ta nira nu anni i kukukuan nu tapenu maimmuguran nu i familia nu.
Mapplano kamu para ta emergency ira, anna praktisan nu yatun kavulu i ána nu.

“Makibbida kamu ta ána nu, anna pagurayan nu ira nga magistoria. Awayya na nga itatagu da i assing, vuru-vurung, onu taki na nono da. Kagian nu ta nira nga makatageno kamu gapa tu kunnatun, anna istorian nu gapa i kiningngua nu tapenu marubang nu danatun.”—Bethany.