Anni Ekspektammu ta Cristiano nga Paggigiammu?

Aru nga totolay i ari ngana makimisa ta ari gamma matabbag i pakkiavuda anna ariadda mabannabannayan. Ngatta vu tu makasta nga umeka ta study na Saksi ni Jehova? Anni i ma-ekspiriensam tari?

Magayayyaka nga makikavulu ta minaggiddu anna mangikavurung nga totolay. Ta ollu nga siglo, naorganisa ta kongregasion i Cristiano tapenu maddayarayaw ta Dios, gigiammuan i Biblia anna pasikannan i kataggitadday. (Hebreo 10:24, 25) Megafu ta egga i aya nira, matagenoda nga egga ira ta naddaratanan na kurug nga kokkofun—i wawwagida ta naespirituan. (2 Tesalonica 1:3; 3 Juan 14) Kunnatun gapa i kuammi, yari tu makapagayayya i pattaraddaymi.

Mammuammu nu kunnasi meyaplika i prinsipio ira na Biblia. Kagitta na ta tiempo na Biblia, magarammammung i lallaki, babbay anna ana ira. Usan na kualipikadu ira nga mestru i Biblia tapenu moffunattam nu kunnasi meyaplika i prinsipiona ira ta inaggaw. (Deuteronomio 31:12; Nehemias 8:8) Puede nga makipartisipa anna makkansion ngamin. Megafu ta, mekagimi i Nacristianuan nga iddanamami.​—Hebreo 10:23.

Mapaladda i pangurugmu ta Dios. Nekagi ni apostol Pablo ta tadday nga kongregasion turi ta tiempona: “Ikakaya takamu nga masingan ngana, . . . tapenu makkapasa-pasikan ittam ta angngurug na kataggitadday, i angngurugnu kunne gapa ta angngurugku.” (Roma 1:11, 12) I regular nga pakikavulu ta wawwagimi ta study, paladdanna i angngurug anna i determinasiommi nga mattolay bilang Cristiano.

Ikayamu kari nga ma-ekspiriensa yaw ira? Umeka ta tumunug nga studymi. Kuruga maapresia i keggam. Libre i umatende anna awan vuluvuga tu makolekta.

• Anni nga ehemplo i tuttulammi ta studymi?

• Kunnasi ittam nga mabenefisiowan ta pagatende ta Cristiano nga paggigiammu?