Ngatta Mawag tu Maggarammammung Tam nga Maddayarayaw?

1-3. (a) Kunnasi nga nepasingan na Cristiano ira nga kakayàda i maggarammammung? (Innan i letratu ta gafu na artikulo.) (b) Anni i gigiammuattam taw nga artikulo?

DISI-SIETE anios paga laman si Corinna turi ta naaresto i yenana tapus fuersadu nga napattrabahu ta tadday nga kampo ta Soviet. Turi kua, neyangay gapa si Corinna ta Siberia, rinivu nga kilometro i karayyuna ta balena. Gittana aripan i pinattratuda sa tari. Nu karuan fuersadu nga napattrabahu yaya ta lawan maski nu sobra lammin anna awan tu makannag nga sinnunna nga pangontra. Maski nu kunnatun, determinadu si Corinna anna i tadday paga nga sister nga magatende ta study.

² “Manaw kami ta trabahumi ta gabi anna lumakag adde ta istasion na tren nga 25 kilometro i karayyuna,” kinagina. “Manaw i tren ta alas dos ta umma. Annam nga oras i biahemi tapus lumakag kami paga tu 10 kilometro tapenu makadde ta passirimmuammi.” Sayang kari i pabbiaheda? Kunni Corinna: “Ta study, gigiammuammi i Passifusifutan anna makkansion kami tu kansion ira na Pappatulan. Makapasikan anna makapagaram ta pangurugmi yaw nga ekspiriensa.” Maski nu tallu-aggaw nga awan ta trabahu si Corinna anna i kavuluna, ari nga napansin yatun na katiwala na farm.

³ Kanayun nga tagibaloran na totolay ni Jehova i paggarammammudda. Kabalin nga nabuu i kongregasion Cristiano, i disipulos ni Jesus ay “kaggaggaw nga nattaradday ta Templo.” (King 2:46) Awayyana tu egga gapa i pakkaragamu nga regular nga magatende ta study. Ngem egga ira makefugag ta ngamin nga Cristiano. Baka marigatattam umay ta study megafu ta trabahu, okupadu nga iskediul, onu nababbannag tam ta inaggaw nga rutina. Anni i mamaguyu nittam tapenu ariattam mefugag ta regular nga pagatende ta study?^[1] Kunnasi tam moffunan i tuttudduattam ta Biblia anna i tanakuan tapenu masingadda i importansia na paki-study? Taw nga artikulo, innattam i walu nga rason nu ngatta maggarammammung tam ta paddayaw. Magrupo tam yatun nga rason ira ta tallu nga kategoria: efektona nikaw, efektona ta tanakuan, anna efektona kani Jehova nu magatende ta study ira.^[2]

I EFEKTONA NIKAW

4. Kunnasi makoffun i study tapenu makannammuattam si Jehova?

⁴ Matudduattam ta study. Makoffun i study ira tapenu makannammuattam i Dios tam nga si Jehova. Angngariganna, ta nappasa laman nga maggi dua ragun, inusa na magaru nga kongregasion i libru nga Maging Malapít Kay Jehova ta Paggigiammu na Kongregasion ta Biblia. Ari kari nga mas napasikan i pangayàmu kani Jehova megafu ta paggigiammu ta kualidad ira na Dios, kunne na gapa ta napafutuan ira nga komento na kapangngurugmu? Mapakaru tam paga i pakannammu tam ta Uvovug na Dios gukaban na pagginna tu mapia ta palappa ira, demonstrasion, anna ta pabbibbig tu Biblia. (Neh. 8:8) Nonopammu ngana laman i espiritual nga minas nga madiskubrem kada ligguan ta pappreparam anna pagginna ta leksion ira ta pabbibbig tu Biblia!

5. Kunnasi ka noffunan na study ira tapenu meyusa i nagigiammum ira ta Biblia anna mapakastam i pallayyagayyam?

⁵ Makoffun i study ira tapenu meyaplika tam i prinsipio ira na Biblia ta ngamin nga aspeto na pattoletam. (1 Tes. 4:9, 10) Angngariganna, i Paggigiammu ta Passifusifutan ay nakadepende ta kawagan na totolay na Dios. Napagaram ka kari na Paggigiammu tu Passifusifutan nga innan uli i kayàmu nga gawatan ta espiritual, pakoman i wagim, onu pakastan paga i akkimallomu? Makoffun i study ta midweek ta ministerio tam. Magigiammu tam nu kunnasi ilayyagayya i mapia nga dumug anna nu kunnasi i efektibo nga panuddu ta prinsipio ira na Biblia.—Mat. 28:19, 20.

6. Kunnasi nga mamagaram anna mamasikan nittam i study ira?

⁶ Mapagaram tam ta study. Pakkafian ittam na sistema na ganna-gannug ta mental, emosional, anna espiritual. Ngem pagaramman anna pasikannan ittam na study. (Bibbigan i Kingngua 15:30-32.) Ta kakaruan na pagistudy tam, gigiammuattam i ketuppalan na profesiya na Biblia. I resultana, mas massikan i pangurug tam nga matuppal i promesa ira ni Jehova ta mappange. Siempre, ari laman nga danuri manaddag ta plataporma i mamagaram nittam. Mapagaram tam gapa ta wawwaragi ira nga napafutuan nga makkomento anna makkansion. (1 Cor. 14:26) Kada makiyuvovug tam ta wawwaragi ira nige anna kabalin na study, matageno tam nga ari ittam mefe-fuera anna kurug nga mabanna-bannayattam.—1 Cor. 16:17, 18.

7. Ngatta importante i maki-study?

⁷ Ta study, malawà tam i uffun na masanto nga espiritu. Kinagi ni Jesu-Cristo: “Nu makalippawa kamu, ginnan nu gafu i kagian na Espiritu ta iglesia [“kongregasion,” NW]!” (Nep. 2:7) Wan, iyorollu ni Jesus i kongregasion Cristiano gukaban na masanto nga espiritu. Mawag tam i masanto nga espiritu tapenu moffunan ittam nga malabanan i tentasion, maggutu anna preparadu ta ministerio anna makapaddesision tu mapia. Ariattam kari approbetsan i ngamin nga probision—kagitta na study ira—tapenu makalawà tu masanto nga espiritu?

I EFEKTONA TA TANAKUAN

8. Nu masingan ittam na kapangngurug tam ta study, maginnada i komento anna pakkansiottam, kunnasi nga makoffun yatun nira? (Innan i kahon nga “Kanayun nga Mabanna-bannayan Yaya Kabalin na Study.”)

⁸ Ta study, mepasingattam ta wawwaragi tam nga ideddukattam ira. Nonopattam i kapurueba na karuan ta wawwaragi tam ta kongregasion nga mawagda attamman. Yatutta nitura ni Pablo: “Ay nonopat-tam nu kunnasi na pakka-uffu-uffut-tam”! Tapus kinagina nga mepasingattam i pangikavuruttam nira nu “ariat-tam nga immangan i paggarammammung tam.” (Heb 10:24, 25) Ipasingan na presensiam ta study ira nga mepangngo i kapangngurugmu ira ta tiempom, atension, anna pangikavurummu. Mapagaram gapa ira ta napafutuan ira nga komentom anna pakkansion.—Col. 3:16.

9, 10. (a) Kunnasi nga makoffun nittam i kinagi ni Jesus ta Juan 10:16 tapenu malippawa tam i importansia na pakipaggarammammung ta wawwaragi? (b) Nu regular tam nga maki-study, kunnasi tam nga moffunan i kapangngurug tam nga pinagurayan na kafamiliada?

⁹ Megafu ta study, mattaradday ittam nga mawwaragi. (Bibbigan i Juan 10:16.) Igitta ni Jesus i baggina ta pastor, anna i disipulosna ira ta karneru ta kural. Ikonsidera tam: Nu egga i dua nga karneru ta bakulug, tapus dua gapa ta tana, anna egga i tadday nga kumu-kumang tu kaddo ta tanakuan mangana nga lugar, makagi tam kari nga tattadday i kuralda? Makkaravulu i karneru ira na tattadday nga kural ta panangngaw na pastorda. Ariattam gapa matuttul i Pastor tam nu isissinna tam i baggi tam. Mawag nga makipaggarammammung tam ta kapangngurug tam ira tapenu mabbalin tam nga parte na “tattadday nga kural” na “tattadday nga mappastor.”

¹⁰ Nu magatende tam ta study, makoffun tam ta pattaradday na wawwaragi. (Sal. 133:1) I karuan ta kapangngurug tam ay ari ngana nga inalawa na kafamiliada. Ngem, nipromesa ni Jesus nga iddanna ira tu espiritual nga familia nga mangiddu anna manangngaw nira. (Mar. 10:29, 30) Nu regular ittam ta study ira, awayyana nga mabbalittam tu yama, yena, onu wagi taw nga kapangngurug tam! Ari kari nga mapaguyu tam tatun nga kuattam i mawayya tam tapenu magatende ta ngamin nga study?

I EFEKTONA KANI JEHOVA

11. Kunnasi makoffun i pagatende tam ta study tapenu meyawa i mepangngo kani Jehova?

¹¹ Nu maki-study tam, iyayawa tam kani Jehova i mepangngo para sa. Megafu ta si Jehova i Namaratu, mepangngo laman sa i dayaw, kekakua, anna pappabalo. (Bibbigan i Nepakannammu 7:12.) Nu makimallo tam, makkansion, anna makkomento ta study ira, iyayawa tam kani Jehova nu anni talaga i mepangngo para sa—i paddayaw tam. Tagibalorattam i pribilehio nga dayawan i Tadday nga napakaru i kingnguana para nittam.

12. Anni i matageno ni Jehova nu tuppalattam i bilinna nga maki-study?

¹² Mepangngo ta pattuppal tam si Jehova. Nibilinna nga ariattam pagurayan i paggarammammuttam, tallugaring ta egga tam ngana ta tiempo na panuppalan. Magayaya si Jehova nu sigga-paran ittam nga tuppalan yatun nga bilin. (1 Juan 3:22) Masingi-singan anna tagibaloranna i appursigi tam nga magatende ta kada study.—Heb. 6:10.

13, 14. Kunnasi nga maddukko tam kani Jehova anna kani Jesus nu maki-study tam?

¹³ Nu maki-study tam, ipasa-pasingattam kani Jehova nga kayà tam i maddukko sa anna ta Anana. Ta study tam ira, tudduan ittam na Katannangan nga Instruktor gukaban na Uvovugna, i Biblia. (Isa. 30:20, 21) Maski danuri awan tu pangurugda nga magatende ta study ira makagida: “Kurug nga egga nikamu i Dios.” (1 Cor. 14:23-25) Bebbendisionan ni Jehova i study ira gukaban na masanto nga espirituna anna aktibo nga igiggiyana i programa na panuddu ta Biblia. Ta study tam ira, maggigginna tam kani Jehova anna matageno tam i pangidduna. Yatutta maddukko tam sa.

¹⁴ Kinagi ni Jesus: “Nu mattaradday i dua onu tallu nga makimallo ta Yama megafu niakan, egga ngà ta tangnga da.” (Mat. 18:20) Meyaplika i prinsipio na kinagi ni Jesus ta study. Megafu ta yaya i ulu na kongregasion, “lumaka-lakag [si Cristo] ta nallalatan” na kongregasion ira na totolay na Dios. (Nep. 1:20–2:1) Fugurammu! Aktibo si Jehova anna si Jesus ta pamasikan nittam ta study ira. Para nikaw, anni tamma i matageno ni Jehova nu masinganna nga kakayà tam nga maddukko sa anna ta Anana?

15. Kunnasi nga ipasingan na paki-study tam nga kayà tam mattuppal ta Dios?

¹⁵ Gukaban na paki-study, masuportattam i kepangngattan ni Jehova nga mammaguray. Maski nibilin ni Jehova nga maki-study ittam, ari na ittam fuersan nga mattuppal. (Isa. 43:23) Yatutta, egga nittam nu kunnasi tam mepasingan kani Jehova nu talaga napafutu i aya tam sa anna nu kunnasi kadeterminadu i passuporta tam ta pammagurena. (Roma 6:17) Angngariganna, awayyana nga fuersan ittam na amo tam nga isakrifisio i study megafu ta trabahu. Baka kokkontran ittam na gobierno anna ananassingadda ittam nga mammulta, mefuku, onu mas grabe paga nu maggarammammung ittam tapenu maddayaw. Onu matenta tam nga maddibersion anne ta maki-study. Taw ira nga situasion, mawag tu mappili tam: Sinni i passerbiattam? (King. 5:29) Nu piliattam nga suportan i kepangngattan ni Jehova nga mammaguray, mapagayaya tam i futuna.​—Prov. 27:11.

ITULU-TULOYMU NGA USAN I TIEMPOM NGA MAKIPAGGARAMMAMMUNG

16, 17. (a) Kunnasi tam makagi nga kuruga importante i paggarammammung ta ollu siglo ira nga Cristiano? (b) Kunnasi i panageno ni Brother George Gangas ta study ira?

¹⁶ Ari nga basta laman naggarammammung i Cristiano gari ta ababba nga tiempo kabalin na milagro turi Pentecostes 33 C.E. ‘Ay inusa da i tiempo da ta pakituddu da ta apostol ira, anna ta kaggaggaw ay nattaradday ira ta Templo.’ (King. 2:42,46) I Griego nga termino nga netransleyt tu “inusa da i tiempo da,” kebalinanna nga inufùda i tiempoda onu ariadda inimmangan nga kuan i tadday nga gannug. Narigatan i Cristiano ira nga magatende ta study ira megafu ta pammaguray na Romano anna ta pangokkontra na lider ira na relihion na Judio. Maski kunnatun, nagattam ira.

¹⁷ Aru ta moderno ira nga aripan ni Jehova i nangipasingan nga talaga appresiadda i study ira. Kinagi ni George Gangas, nasserbi nga Manangngal nga Baggi ta muturu nga 22 dagun: “Para niakan, i pakipaggarammammung ta wawwaragi i tadday ta pinakamakapagayaya anna paggafuanan na pamagaram. Kakayà ku i magollu ta Kingdom Hall anna urian nga manaw nu posible. Makakkasta i panageno ku nu makiyuvovug ngà ta totolay na Dios. Nu kavulu ku ira, gittana kavulu ku i familià, ta espiritual nga paraiso.” Kunna paga: “Kagitta na kompas nga kanayun nga agga-tuddu ta sigaran, kunnatun gapa i kononaggan nga appana-panono anna pakkaraga ku nga maki-study, ari manguli.”

18. Anni i matagenomu ta study tam ira, anna anni i determinasiommu?

¹⁸ Kunnatun kari gapa i panagenomu ta paggarammammung tapenu maddayaw kani Jehova? Determinadu ka nakuan nga magattam anna mappursigi nga regular nga magatende ta study ira. Mepasingammu nga umanugu ka ta kinagi ni Patul David: “Iddukak-ku, O AFU, i paddianam-mu nga templom.”​—Sal. 26:8.