Masippo Kokkofun ni Josias

Para nikaw mariga kari nga kuan i mapia?— Abbo na aru nga totolay nga mariga talaga yatun. Estorian na Biblia nittam nga egga abbing nga mangngagan Josias nga narigatang nga kuan i mapia. Ngem egga masippo nga kokkofunna nga nanguffun sa. Ammuatta i estoria ni Josias kunne gapa ta kokkofunna.

Si Josias ay ana ni Amon nga patul na Juda. Kuruga marake si Amon anna maddayarayaw ta imahen. Turi ta natay ngana yayya, si Josias i nappatubba nga patul na Juda. Ngem walu laman i dagunna! Marake kari yayya kagitta na yamana?— Ari!

Maski nu mabbing paga si Josias, ikayana i mattuppal kani Jehova. Yari tu pinilina nga kokkofun danuri laman mangiddu kani Jehova. Inuffunan na kokkofunna yayya nga kuan i mapia. Sinni karuan ta kokkofun ni Josias?

Tadday ta kokkofunna si profeta Zefanias. Sinabarangngan ni Zefanias i taga-Juda nga nu maddayarayaw ira ta imahen, marake i mesimmu nira. Nagginna si Josias kani Zefanias yari tu naddayarayaw yayya kani Jehova, ari ta imahen.

Si Jeremias i tadday paga ta kokkofun ni Josias. Maggi makkadagun ira dua anna makkaaranni laman i paddianadda. Kuruga madukko i pakkofudda. Yari tu nangitura si Jeremias tu makakkasta nga kansion turi ta natay si Josias. Meyannung yatun nu kunnasi fermi pagidduna ta kofunna. Nakkauffung da Jeremias anna Josias nga kuan nu anni mapia tapenu matuppalda si Jehova.

Anni magigiammum ta kingngua ni Josias?— Maski nu mabbing paga laman si Josias, ikayana nga kuan i mapia. Ammuna nga makikofun laman yayya ta totolay nga mangaya kani Jehova. Yari tu nu mappilika tu kokkofummu, danuri laman mangaya kani Jehova tapenu moffunaddaka nga kuan i mapia!