Kabataan ira—Anni Noka i Kayà Nu nga Pabbalinan?

1. Ngatta narigatan da Jehoas, Uzias, anna Josias?

NONOPAMMU nga nabbalikka tu patul na totolay na Dios turi ta allabbing ka pagalaman onu tinedyer. Kunnasim nga usan i autoridad mu? Mabibbig ta Biblia i meyannung ta kabataan ira nga nabbalin tu patul na Juda. Angngarigan na, 7 laman i dagun ni Jehoas turi ta nappatul yayya, 16 gapa si Uzias, anna 8 si Josias. Siguradu nga mariga yatun para ta nira! Ngem maski paga kunnatun, nakalawa ira tu uffun nga kawagadda tapenu ammu da i kuadda anna aru i makasta nga metuppal da.

2. Ngatta mawag tu gigiammuattam i ehemplo da Jehoas, Uzias, anna Josias?

² Ari ittam nga patul onu reyna, ngem makagigiammu ittam ta pinattolay da Jehoas, Uzias, anna Josias. Egga ira i mapia nga desision nga kingngua da, ngem egga gapa ira i marake. Masingattam ta pinattoleda nu ngatta mawag tam i mappili tu mapia nga kokkofun, kanayun nga mappakalinno, anna tulu-tuloy nga alegan si Jehova.

MAPPILI TU MAPIA NGA KOKKOFUN

3. Anni i kingngua ni Patul Jehoas megafu ta panuddu nisa na Atannang nga Pari nga si Jehoiada?

³ Parigan i fustu ira nga desision ni Jehoas. Megafu ta awan tu yama na, sinuttul na i pangigiya na matalo nga Atannang nga Pari nga si Jehoiada. Sinudduan natun nga pari i abbing nga si Jehoas nga gitta na sarili na nga ana. Megafu tatun, nakangngua tu fustu nga desision si Patul Jehoas nga irolluan i marenu nga paddayaw anna passerbian si Jehova. Niyunnug paga lagu ni Jehoas nga mapakappian i templo ni Jehova.—2 Cro. 24:1, 2, 4, 13, 14.

4. Kunnasi ittam mabbenefisio nu kakayà tam nga tuttulan i dorob ni Jehova? (Proverbio 2:1, 10-12)

⁴ Nu tuttudduan naka na magana mu onu na tanakuan nga ayatan si Jehova anna tuttulan i dorob na, makasta yatun nga regalu ta niko. (Bibbigan i Proverbio 2:1, 10-12.) Aru i makua na mappagana tapenu matudduadda i ána da. Kunnatun i kingngua na yama ni Sister Katya tapenu makangngua yayya tu fustu ira nga desision. Kadaggaw, nu itulug na si Katya ta eskuela, pabbidadda dua i daily text. Kagian ni Katya, “Nakoffun yatun ira nga pabbirida mi tapenu ammù i fustu nga kuakku nu egga i mesimmu nga problema tatun nga aggaw.” Ngem kunnasi nu egga ira i ibawal na magana mu nga nebase mabba ta Biblia, ngem matageno mu nga gitta na fugaddan naka natun tapenu makuam i ikaya mu? Anni i makoffun ta niko tapenu tuttulan lagapa ira? Niyistoria ni Sister Anastasia nga siguraduan na magana na nga iyesplika da labbi ta nisa tu mapia nu ngatta ibawal da i tadday tu gannug. Kinagi na, “Nakoffun yatun tapenu matanggap ku nga proteksion i pangibawal da megafu ta iddukaddà, ari tu megafu ta fugaddaddà nga kuan i ikaya ku.”

5. Anni i efekto na kukukuammu ta magana mu anna kani Jehova? (Proverbio 22:6; 23:15, 24, 25)

⁵ Mapagayayya mu i magana mu nu iyaplikam i tabarang ira ta Biblia nga malawa mu. Ngem i pinaka-importante, mapagayayya mu i Dios anna mas maddukko i pakikkofummu ta nisa. (Bibbigan i Proverbio 22:6; 23:15, 24, 25.) Yatun i makasta ira nga rason nu ngatta parigammu si Jehoas turi ta kabbinna.

6. Makattabarang ta gininna ni Jehoas, anna anni i resulta na? (2 Cronicas 24:17, 18)

⁶ Makagigiammu ta marake ira nga desision ni Jehoas. Turi ta natay si Jehoiada, pinili ni Jehoas i marake ira nga kokkofun. (Bibbigan i 2 Cronicas 24:17, 18.) Nagginna yayya ta tabarang na prinsipe ira na Juda nga ari nga mangiddu kani Jehova. Magga umanugu ka nga makasta nakuan nu nilisian ni Jehoas yatun ira nga marake nga kokkofun. (Prov. 1:10) Ngem nagginna lallagu yayya ta tabarang da. Turi ta pinurueban yayya nga itunung na kapitta na nga si Zacarias, nipapatena yayya. (2 Cro. 24:20, 21; Mat. 23:35) Anni mabba i dake natun nga kingngua na! Matalo si Jehoas ta kabbinna, ngem nabbalin yayya tu apostata anna minammapatay. Turi kua, pinatay yayya na mismu nga aripan na ira. (2 Cro. 24:22-25) Fugurammu yatun! Makasta nakuan i nattuppalan na nu nitulu-tuloy na i magginna kani Jehova anna tari ira ta mangaya ta Nisa. Anni i magigiammum tatun nga nesimmu ta nisa?

7. Sinni nakuan i piliammu nga kokkofun? (Innan gapa i letratu.)

⁷ Egga i magigiammu tam ta marake nga desision nga kingngua ni Jehoas. Mawag tu piliattam i kokkofun ira nga makasta i influwensia da ta nittam—danuri kokkofun nga ayatadda si Jehova anna kayà da nga mapagayayya yayya. Awayya tam gapa i makikkofun tari ira ta mas manakam onu mas mabbing anne nittam. Daddamman nga allabbing si Jehoas kumpara ta kofun na nga si Jehoiada. Pannonopammu gapa danaw ta pinilim ira nga kokkofun: ‘Uuffunaddà kari nga mapasikan i pangurug ku kani Jehova? Uuffunaddà kari nga tuttulan i dorob na Dios? Meyannung kari kani Jehova anna ta nagigiammu da ira ta Biblia i istoriadda? Irespeto da kari i dorob na Dios? Ikagi da laman kari ta nio i kayà ku nga maginna? Onu magutu nga itunung dà nu kawagakku yatun?’ (Prov. 27:5, 6, 17) Daddammammu yaw: Nu ari nga iddukan na kokkofummu si Jehova, ari mu ira nga mawag. Ngem nu egga ira i kokkofummu nga mangiddu kani Jehova, ari mu nakuan ira vuluvuga nga panawan megafu ta pammakapiammu i pakikkofummu nira.—Prov. 13:20.

8. Nu mas-social media ittam, anni nakuan i nonopattam?

⁸ Makoffun i social media tapenu makumusta tam i kafamilia anna kokkofuttam. Ngem aru nga totolay i mangusa tatun tapenu mappasikat. Map-post ira tu picture anna video ira na ginatang onu kingngua da. Nu mas-social media ka, iyavu mu ta baggim, ‘I motibò kari ay mappasikat? Kayà ku kari laman nga mangi-share tu makasta nga gannug onu ikaya ku nga dayawan nà na tanakuan? Pagurayakku kari nga marake ngana i efekto na ta appana-panono ku, pabbibidà, anna kukukuakku na opinion na tanakuan?’ Kunnaw i nitabarang ni Brother Nathan Knorr nga nasserbi bilang miembro na Manangngal nga Baggi: “Ari nakuan tu tolay i pagayayyatammu. Ta nu kunnatun, awan tu mapagayayya mu. Si Jehova i pagayayyatammu. Ta nu kunnatun, mapagayayya mu i ngamin nga mangaya kani Jehova.”

MAWAG TU KANAYUN ITTAM NGA MAPPAKALINNO

9. Anni i netuppal ni Uzias megafu ta uffun ni Jehova? (2 Cronicas 26:1-5)

⁹ Parigan i fustu ira nga desision ni Uzias. Mapakalinno si Patul Uzias ta kabbinna. Nagigiammu na i “maganassing ta kurug nga Dios.” Nagadde ta 68 nga dagun i pinattolena anna mamikkaru yayya nga binendisionan ni Jehova tatun ira nga tiempo. (Bibbigan i 2 Cronicas 26:1-5.) Inaffu ni Uzias i aru nga kalaban na nasion anna siniguradu na nga protektadu i Jerusalem. (2 Cro. 26:6-15) Siguradu nga magayayya si Uzias nga aru i netuppal na megafu ta uffun na Dios.—Ecl. 3:12, 13.

10. Anni i nattuppalan ni Uzias?

¹⁰ Makagigiammu ta marake ira nga desision ni Uzias. Napenam si Patul Uzias nga doban i tanakuan ta ikaya na ira nga ipakua. Megafu kari tatun nanono na nga puede na ngana nga kuan i maski anni nga ikaya na? Tadday nga aggaw, simillung si Uzias ta templo ni Jehova anna naguroray yayya nga nattuggi tu insensu ta altar. Megamma yatun ta patul ira. (2 Cro. 26:16-18) Pinurueban yayya nga itunung na Atannang nga Pari nga si Azarias, ngem nappata-patu lallagu si Uzias. Ari nga nabbalin tu matalo si Uzias yatutta pinallepproso yayya ni Jehova. (2 Cro. 26:19-21) Ari nakuan tu kunnatun i nattuppalan na nu nappakalinno yayya!

11. Anni i makoffun tapenu kanayun ittam nga mappakalinno? (Innan gapa i letratu.)

¹¹ Turi ta nabbalin tu makapangngua si Uzias, nakattaman na nga si Jehova i Paggafuan na sikan na anna ngamin nga egga ta nisa. Anni i magigiammu tam tatun? Daddammattam nakuan tu naggafu kani Jehova i ngamin nga bendision anna pribilehio tam. Imbes tu iyopopog tam i netuppal tam ira, iyawa tam nakuan kani Jehova i dayaw.b (1 Cor. 4:7) Mapakalinno nakuan nga nonopattam nga imperfekto ittam anna kawagattam i mevuya. Kunnaw i nitura na 60-anios nga brother: “Nagigiammù nga ari ngà nakuan nga mallussaw nu pansinan na tanakuan i pakkamaliakku ira. Nu ivuya nà na tanakuan megafu ta nu mittan egga ira i pakkamaliakku nga ari ku kuruga napannonopan, ikagumakku i manguli anna itulu-tuloy ku lagapa nga iyawa kani Jehova i kapianakku.” I kurug, nu maganassing ittam kani Jehova anna kanayun ittam nga mappakalinno, makasta i pattuppalattam.—Prov. 22:4.

TULU-TULOY NGA ALEGAN SI JEHOVA

12. Turi ta katinedyer ni Josias, kunnasi na nga inaleg si Jehova? (2 Cronicas 34:1-3)

¹² Parigan i fustu ira nga desision ni Josias. Turi ta tinedyer si Josias, namegafu na nga inaleg si Jehova. Ikaya na nga makilala si Jehova anna kuan i urena. Ngem mariga i pattolay natun nga mabbing nga patul. Mawag na nga itaddaggan i marenu nga paddayaw turi ta magaru nga totolay i maddayaw ta falsu ira nga dios. Talaga magutu-gutu yayya! Nige nga magedad tu 20 si Josias, pinegafuanan na nga alsan i falsu nga paddayaw ta nasion.—Bibbigan i 2 Cronicas 34:1-3.

13. Kunnasi nga mafektan na dedikasiommu kani Jehova i pattolem?

¹³ Maski nu abbing ka pagalaman, maparigammu si Josias nu alegammu si Jehova anna gigiammuammu nga appresian i kualidad na ira. Nu kuammu yatun, mapaguyu ka nga idedika i baggim ta nisa. Kunnasi nga makafekto yatun nga desision ta pattolem? Kunnaw i kinagi ni Luke turi ta na-baptize yayya ta edad nga 14, “Mamegafu sangawe, pagolluakku ngana i passerbi kani Jehova anna mappursigi ngà nga pagayayyatan yayya.” (Mar. 12:30) Siguradu nga magayayya ka nu kunnatun gapa i kuammu!

14. Mangiyawa tu angngarigan nu kunnasi nga pinarigan na karuan nga kabataan si Patul Josias.

¹⁴ Anni ira nga problema i meparubang ta niko bilang kabataan nga massesserbi kani Jehova? Istorian ni Johan nga na-baptize turi ta 12 i dagun na nga i-pressure yayya na kaklase na ira nga mav-vape. Tapenu ari nga ma-pressure si Johan, nonopan na i marake ira nga efekto na pav-vape ta gawa-gawayyan na anna ta relasion na kani Jehova. Istorian gapa ni Rachel nga na-baptize turi ta 14 i dagun na nu anni i nakoffun ta nisa tapenu ammu na i kuan na nu egga ira i problema na ta eskuela. Kunna: “Ikagumakku nga magaleg tu gannug ira nga mangipanono ta nio meyannung ta Biblia anna kani Jehova. Angngarigan na, nu egga i history lesson mi, ikagumakku i mannono tu istoria ta Biblia onu profesiya nga konektadu tatun. Nu makistoria ngà gapa ta eskuela, mannono ngà tu teksto ira nga awayyà nga i-share ta tanakuan.” Awayya na nga makkaduma i problema nu ni Patul Josias ngem awayyam i mabbalin tu ma-uto anna matalo kagitta na. Nu ammum ngana i kuammu ta problemam habang kabataan ka paga, makoffun yatun ta niko tapenu ammum gapa saw i kuammu ta problemam ira ta mappange.

15. Anni i nakoffun kani Josias tapenu matalo nga mapasserbian na si Jehova? (2 Cronicas 34:14, 18-21)

¹⁵ Turi ta adulto si Patul Josias, pinegafuanan na nga pakappian i templo. Tatun nga tiempo, nalegan “i libru na Dob ni Jehova nga neyawa gukaban ni Moises.” Turi ta nebibbig ta nisa yatun, napaguyu yayya nga tuttulan i netura tatun. (Bibbigan i 2 Cronicas 34:14, 18-21.) Posible nga mab-Bible reading ka ngana kadaggaw. Ma-enjoy mu kari yatun? Ilillistam kari i teksto ira nga awayya na nga makoffun ta niko? Kunnatun i kukukuan ni Luke nga nakagi ta gafu. Itura na ta notebook na i makasta ira nga punto nga nabibbig na. Nu kunnatun gapa i kuammu, ari mu nga makattaman insigida i teksto onu i punto ira nga ikaya mu. Nu mas aru i ammum ta Biblia anna mas nga iddukammu yatun, mas gapa nga maganassakka nga masserbi kani Jehova. Tapus kagitta ni Patul Josias, paguyuan naka na Uvovug na Dios nga kuan i fustu.

16. Ngatta nakaliwa tu madammo si Josias, anna anni i magigiammu tam tatun?

¹⁶ Makagigiammu ta marake nga desision ni Josias. Turi ta 39 i dagun ni Josias, egga i nakkamalian na nga narresulta ta patena. Nattalo yayya ta baggi na imbes tu kiddawan na i pangigiya ni Jehova. (2 Cro. 35:20-25) Egga i magigiammu tam tatun. Maski nu anni i edad tam onu kunnasi ittam ngana kabayag nga maggigiammu tu Biblia, mawag tu tulu-tuloy tam lagapa nga alegan si Jehova. Kasali tatun i kanayun nga pangipakimallo ta pangigiya na, paggigiammu ta Uvovug na, anna pagginna ta tabarang na manakam ira ta espiritual nga Cristiano. Nu kuattam danatun, malillitattam i makaliwa tu madammo anna mas magayayya ittam.—Sant. 1:25.

KABATAAN IRA—AWAYYA NA TU MAKASTA NOKA I PABBALINAN NU

17. Anni i magigiammu tam ta nesimmu ta tallu nga patul na Juda?

¹⁷ Aru i puede nga makua nu habang abbing kamu paga. Masingan ta nesimmu kadi Jehoas, Uzias, anna Josias nga awayya na nga makangngua tu makasta ira nga desision i abbing anna kabataan ira tapenu mapagayayya da si Jehova. Fustu tu egga ira i nakkamalian danatun nga kabataan nga narresulta ta marake. Ngem nu parigattam i makasta ira nga kingngua da anna lillitattam i nakkamaliadda ira, makasiguradu ittam nga makasta noka i pabbalinattam.

18. Anni ira nga ehemplo ta Biblia i mangipasingan nga awayya na tu makasta noka i pabbalinammu? (Innan gapa i letratu.)

¹⁸ Aru paga i mabibbig tam ta Biblia tu tanakuan ira nga kabataan nga nakiddukko kani Jehova, napagayayya da yayya, anna makasta i nabbalinadda. Tadday tatun si David. Turi ta kabataan yayya, pinili na nga makikkofun ta Dios anna turi kua, nabbalin yayya tu matalo nga patul. Fustu tu egga ira i nakaliwatan na. Ngem matalo lagapa i paningan nisa na Dios. (1 Pat. 3:6; 9:4, 5; 14:8) Nu gigiammuammu i pattolay ni David, mapaguyu naka na ehemplo na nga matalo nga passerbian si Jehova. Awayyam gapa nga kuan tu study project i pattolay da Marcos onu Timoteo. Masingammu nga pinasserbiadda si Jehova namegafu paga ta kabbidda anna nitulu-tuloy da nga matalo nga passerbian yayya. Megafu tatun nga desisiodda, makasta i nabbalinadda.

19. Kunnasi nga makasta i pabbalinammu ta mappange?

¹⁹ Nakadepende ta pangusam ta pattolem sangawe i pabbalinammu saw ta mappange. Nu mattalo ka kani Jehova, ari tu ta sarilim nga pakalippawa, uffunan naka nga makangngua tu makasta ira nga desision. (Prov. 20:24) Awayyam i mabbalin tu magayayya anna makalawa ka tu aru nga bendision. Daddammammu nga appresian ni Jehova i kukukuammu ira para ta nisa. I passerbi ta minaggiddu nga Yama tam nga si Jehova i kapianan nga pangusammu ta pattolem!