Ngatta Ikassing Tam Nakuan si Jehova?

1-2. Segun ta Salmo 25:14, anni i mawag tu kuattam nu kayà tam nga mabbalin tu madukko nga kofun ni Jehova?

PARA ta niko, anni ira i mawag nga ipasingammu tapenu kanayun nga mabbalikka tu madukko nga kofun na tadday nga tolay? Magga ikagim tu makka-aya anna makkasuporta i mapia nga makkofun. Baka ari mu manono nga mawag tu mangipasingan gapa tu assing i mapia nga makkorofun. Ngem kagitta na ipasingan na tema nga teksto taw nga artikulo, mawag tu “maganassing kani Jehova” danuri maya nga mabbalin tu madukko nga kofun na.​—Bibbigan i Salmo 25:14, NW.

² Maski nabayag ittam ngana nga massesserbi kani Jehova, mawag lagapa tu kanayuttam nga ipasingan i paganassing ta nisa. Ngem anni i kayà kagian na paganassing ta Dios? Kunnasi tam magigiammu nga ikassing si Jehova? Anni i magigiammu tam ta doroban nga si Obadias, ta Atannang nga Pari nga si Jehoiada, anna kani Patul Jehoas meyannung ta paganassing ta Dios?

ANNI I KAYÀ KAGIAN NA PAGANASSING TA DIOS?

3. Ngatta makatageno ittam tu assing, anna anni i efekto natun ta nittam?

³ Makatageno ittam tu assing nu manono tam nga baka matakitan ittam. Makasta yatun nga klase na assing megafu ta maduffunan ittam tapenu makasta ira i piliattam. Angngarigan na, megafu ta ikassittam i mataga, ari ittam nga umaranni ta dugu na gatag. Megafu gapa ta ikassittam i madisgrasia, arayyuattam i delikadu nga situasion. Nu ikassittam nga madaral i pakikkofuttam ta tadday nga tolay nga iddu tam, ari ittam nga makkagi onu mangngua tu marake ta nisa.

4. Anni nga klase na assing i kayà ni Satanas nga matageno tam kani Jehova?

⁴ Kayà ni Satanas nga mamippig i totolay gafu ta assing kani Jehova. Kayà ni Satanas nga kurugattam i kagitta na kinagi ni Elifaz nga kitapporay si Jehova anna ikaya na nga kastiguan ittam anna ari tam kanu yayya vuluvuga nga mapagayayya. (Job 4:18, 19) Kayà ni Satanas nga fermi ngana mabba nga mamippig ittam ta arubang ni Jehova anna magimmang ngana nga masserbi ta nisa. Silu yatun. Ngem malillitattam yatun nu mangipasingan ittam tu mepangngo nga klase na paganassing ta Dios.

5. Anni i kayà kagian na paganassing ta Dios?

⁵ Nu egga i mepangngo nga assing na tadday nga tolay ta Dios, iddeddukan na i Dios anna manaki na nga mangngua tu maski anni nga makadaral ta relasion na ta Dios. Nangipasingan si Jesus tu kunnatun nga “makadios nga assing.” (Heb. 5:7, NW ) Ari yayya nga namippig gafu ta assing kani Jehova. (Isa. 11:2, 3) Dakal i pangaya ni Jesus kani Jehova anna kayà na nga makimoray ta nisa. (Juan 14:21, 31) Kagitta ni Jesus, dakal i pangikakua tam kani Jehova megafu ta minaggiddu yayya, ma-uto, patas, anna makapangngua. Kuruga iddeddu ittam ni Jehova anna mafektan i panageno na depende ta pattuppal tam ta ituddu na. Awayya tam nga matakitan yayya onu mapagayayya i futu na.​—Sal. 78:41; Prov. 27:11.

GIGIAMMUAN NGA IKASSING I DIOS

6. Anni i kuattam tapenu magigiammu nga ikassing i Dios? (Salmo 34:11)

⁶ Ari ittam nga neyana nga dati ngana nga ikakua onu ikassing tam si Jehova. Mawag tu gigiammuattam nga ipasingan yatun. (Bibbigan i Salmo 34:11.) Kunnasi? Obserbattam i pinaratu ira. Nu obserbattam i ‘ganna-gannug ira nga naparatu,’ masingattam nga ma-uto, makapangngua, anna kuruga ayatan ittam na Dios. Habang mas masingattam danatun nga kualidad na, mas gapa nga ikakua anna iddukattam yayya. (Roma 1:20) Kinagi ni Sister Adrienne, “Nu obserbakku i pinaratu ira, mabbilib ngà ta ka-uto ni Jehova. Yayya nga kurugakku nga ammu na i kapianan para ta niakan.” Megafu ta ninonono na yatun, nakagi na, “Ngatta gapa mangngua ngà tu gannug nga mangisina ta nio kani Jehova, i Paggafuan na inango ku?” Puede ka kari nga mangiskediul tu tiempo sangawe nga ligguan tapenu mapannonopan tu mapia i tadday nga pinaratu? Nu kuammu yatun, mas nga ikakua anna iddukammu si Jehova.​—Sal. 111:2, 3.

7. Kunnasi nga makaduffun i pakimallo tapenu mapeggan ittam tu mepangngo nga assing kani Jehova?

⁷ I tadday paga nga makua tam tapenu mapeggan tu assing ta Dios ay gukaban na kanayun nga pappakimallo. Kada makimallo ittam kani Jehova, mas makilala tam yayya. Kada gare makkiddaw ittam ta nisa tu sikan tapenu maattamman i tadday nga kapurueba, mepanono ta nittam i makapabbaw nga pakapangngua na. Tapus kada mappabalo ittam ta pangiregalu ni Jehova ta Ana na, manono tam i pangaya na ta nittam. Kada gapa ipakimemallo tam kani Jehova nga duffunan na ittam ta tadday nga problema, mepatalatto ta futu tam nga kuruga ma-uto yayya. Megafu ta kuddanatun nga pakimallo, mas ikakua tam si Jehova. Mas determinadu ittam gapa nga ari mangngua tu maski anni nga manaral ta pakikkofuttam ta nisa.

8. Anni i kuattam tapenu ari mawawan i assing tam ta Dios?

⁸ Ari tam nga mawawan i assing tam ta Dios nu gigiammuattam i Biblia. Parefu nakuan nga gigiammuattam i makasta anna i marake ira nga angngarigan tatun. Gigiammuattam i dua nga matalo nga aripan ni Jehova—si Obadias nga doroban ta tangabbalayan ni Patul Ahab anna i Atannang nga Pari nga si Jehoiada. Tapus ammuattam i magigiammu tam kani Patul Jehoas na Juda nga matalo bi ta ollu, ngem turi kua, pinanawan na si Jehova.

MAGGUTU KAGITTA NA MINAGGANASSING TA DIOS NGA SI OBADIAS

9. Anni i efekto kani Obadias na paganassing na kani Jehova? (1 Patul Ira 18:3, 12)

⁹ Ta Biblia, nepakilala si Obadiasb nga kunnaw: “Dakal i assing ni Obadias kani Jehova.” (Bibbigan i 1 Patul Ira 18:3, 12.) Anni i efekto kani Obadias natun nga paganassing? Nabbalin yayya tu mapattalakkan, yari tu nitalo ta nisa na patul i interu nga tangabbalayan na. (Ikumpara i Nehemias 7:2.) Megafu gapa ta ikassing ni Obadias i Dios, napeggan yayya tu gutu, tadday nga kualidad nga talaga kawagan na. Ngatta? Nattolay gare yayya ta pammaguray na marake nga si Patul Ahab nga “mas marake ta paningan ni Jehova kumpara ta ngamin nga [patul nga] nappollu nisa.” (1 Pat. 16:30) Fuera paga tatun, maddayaw kani Baal i atawa ni Ahab nga si Jezebel. Kala-kalussaw na si Jehova yayya nga pinurueban na nga alsan i kurug nga paddayaw ta pappatulan na Israel. Pinatena paga lagu i aru ta profeta na Dios. (1 Pat. 18:4) Talaga mariga gafu i tiempo tagga ta naddayaw si Obadias kani Jehova.

10. Kunnasi nga nipasingan ni Obadias nga magutu-gutu yayya?

¹⁰ Kunnasi nga nipasingan ni Obadias nga magutu-gutu yayya? Turi ta ala-alegan ni Jezebel i profeta ira na Dios tapenu ipapatay ira, ina ni Obadias i 100 ta nira anna nitagu na ira nga ‘sinaggi-50 ta kueba anna niddan na ira tu pan anna danum.’ (1 Pat. 18:13, 14) Nu nagafu si Obadias tatun nga kingngua na, siguradu nga pinateda yayya. Tolay laman si Obadias yayya nga manaki na gapa i matay. Ngem mas ayatan ni Obadias si Jehova anna danuri massesserbi ta nisa anne ta mismu nga inango na.

11. Anni i napparehuan ni Obadias ta massesserbi ira kani Jehova ta tiempo tam? (Innan gapa i letratu.)

¹¹ Ta tiempo tam, aru nga massesserbi kani Jehova i maddian ta lugar ira nga megamma i trabahu tam. Ikakua lagapa natun ira nga meddu nga wawwaragi tam i gobiernu. Ngem kagitta ni Obadias, ari ira magimmang nga masserbi kani Jehova. (Mat. 22:21) Ipasingadda i assing da ta Dios gukaban na panuttul ta nisa imbes tu ta tolay. (King. 5:29) Tulu-tuloy ira nga mallayyagayya anna pasekreto nga magistudy. (Mat. 10:16, 28) Siguraduadda gapa nga malawa na wawwaragi da i kawagadda ira nga espiritual nga makan. Kunnatun i kingngua ni Henri turi ta ne-ban i trabahu tam ta nasiodda ta Africa. Turi ta maddaggun paga i ban, nabboluntariu si Henri nga mangitaneg tu espiritual nga makan para ta kapangngurug na ira. Nitura na: “Talaga minappasiran ngà. Yayya nga makagì nga nassikan laman i nono ku megafu ta dakal nga pangikakuà kani Jehova.” Makuam kari gapa nga mabbalin tu magutu kagitta ni Henri? Makuam yatun nu mapeggakka tu assing ta Dios.

MABBALIN TU MATALO KAGITTA NA MINAGGANASSING TA DIOS NGA SI JEHOIADA

12. Kunnasi nga nipasingan na Atannang nga Pari nga si Jehoiada anna na atawa na nga matalo ira kani Jehova?

¹² Nikassing na Atannang nga Pari nga si Jehoiada si Jehova anna yatun i namaguyu ta nisa nga mabbalin tu matalo anna ipoppollu i kurug nga paddayaw. Masingan yatun turi ta nammaguray i ana ni Jezebel nga si Atalia bilang reyna ta Juda, maski nu ari nakuan nga mepangngo tu kuan na yatun. Maganassing i totolay kani Atalia. Awan gare tu allo na anna gafu ta aya na nga mabbalin tu reyna, plinano na nga patayan i ngamin nga afu na! (2 Cro. 22:10, 11) Ngem ari nga napatay si Jehoas nga tadday ta afu na, megafu ta ina yayya na atawa ni Jehoiada nga si Jehoshabet. Nitagu natun nga magatawa i abbing anna pinadakal da yayya. Megafu tatun nga kingngua ni Jehoiada anna ni Jehoshabet, ari nagappo i pammaguray na patul ira nga naggafu ta gaka ni David. Matalo si Jehoiada kani Jehova anna ari yayya nga naganassing kani Atalia.​—Prov. 29:25.

13. Turi ta pitu i dagun ni Jehoas, kunnasi mangana nga nipasingan ni Jehoiada nga matalo yayya?

¹³ Turi ta pitu i dagun ni Jehoas, nipasingan mangana ni Jehoiada nga matalo yayya kani Jehova. Egga i pinadday ni Jehoiada nga plano. Nu matuloy yatun nga plano, mabbalin tu patul si Jehoas, i mepangngo nga mammana ta trono ni David. Ngem nu ari nga mesimmu yatun, magga mapatay si Jehoiada. Ta uffun ni Jehova, natuloy i plano. Megafu ta suporta na panakallan anna na Levita ira, pinabbalin ni Jehoiada tu patul si Jehoas anna pinapatena si Atalia. (2 Cro. 23:1-5, 11, 12, 15; 24:1) Tapus, “namadday si Jehoiada tu pakkasinabban ni Jehova anna na patul anna na totolay, nga tulu-tuloy ira nga mabbalin tu totolay ni Jehova.” (2 Pat. 11:17) “Nangipuestu gapa yayya tu mabbantay ta trangka ira na balay ni Jehova, tapenu awan tu makatallung tu maski sinni nga madaping.”​—2 Cro. 23:19.

14. Kunnasi nga nedayaw si Jehoiada megafu ta pangidayona kani Jehova?

¹⁴ Dati ngana nga kinagi ni Jehova: “Danuri mangidayaw niakan ay dayawakku.” Binendisionan ni Jehova si Jehoiada. (1 Sam. 2:30) Angngarigan na, nipetura na i mapia ira nga kiningngua natun nga atannang nga pari tapenu makagigiammu ittam tatun. (Roma 15:4) Tapus turi ta natay si Jehoiada, neddan yayya tu espesial nga pribilehio nga metanam “ta Siudad ni David kavulu i patul ira, megafu ta mapia nga kiningngua na ta Israel para ta kurug nga Dios anna ta balay Na.”​—2 Cro. 24:15, 16.

15. Anni i magigiammu tam kani Jehoiada? (Innan gapa i letratu.)

¹⁵ Makoffun ta nittam ngamin i istoria ni Jehoiada tapenu mapeggan ittam tu assing ta Dios. Maparigan na elder ira si Jehoiada nu kanayun ira nga alerto anna nu matalo da nga protektan i karneru na Dios. (King. 20:28) Egga gapa i magigiammu na bako anna lakay ngana ira kani Jehoiada. Nu maganassing ira kani Jehova anna mattalupaddian ira nga matalo, meyusa na ira tapenu metuppal i gakkag na. Tagibaloran ira ni Jehova. Makagigiammu gapa i kabataan ira ta pinattratu ni Jehova kani Jehoiada. Mapia nakuan i pattratu da ta mannakam ira anna irespeto da ira, mas ngana danuri nabayag ngana nga matalo nga massesserbi kani Jehova. (Prov. 16:31) Makagigiammu ittam gapa ngamin ta panakallan anna Levita ira nga nassuporta kani Jehoiada. Matalo tam nakuan nga suportan i “totolay ira nga i trabahu da ay i mangirollu anna mangituddu” gukaban na panuttul tam ta nira.​—1 Tes. 5:12.

ARI MU NGA PARIGAN SI PATUL JEHOAS

16. Ngatta makagi tam nga makafi si Patul Jehoas?

¹⁶ Makasta i influwensia ni Jehoiada kani Patul Jehoas. (2 Pat. 12:2) Megafu tatun, kayà na abbing nga patul nga mapagayayya si Jehova. Ngem turi ta natay ngana si Jehoiada, nagginna si Jehoas ta apostata ira nga prinsipe. Anni i efekto natun? Namegafu yayya anna i totolena nga “masserbi ta sagradu ira nga poste anna ta idolo ira.” (2 Cro. 24:4, 17, 18) Maski nu fermi nga natakitan si Jehova ta kingngua da, ‘pakatotoli yayya nga nangidog tu profeta ta nira tapenu manoli ira, ngem manaki da i magginna.’ Ari paga lagu ira nga nagginna ta ana ni Jehoiada nga si Zacarias. Yayya paga mabba i profeta anna pari ni Jehova anna kapitta paga ni Jehoas. Awan gapa tu pappabalo ni Patul Jehoas ta familia nga nanguffun anna nanangngaw ta nisa megafu ta nipapatena si Zacarias.​—2 Cro. 22:11; 24:19-22.

17. Makasta kari i nattuppalan ni Jehoas?

¹⁷ Nawawan ni Jehoas i assing na kani Jehova, yatutta ari nga makasta i nattuppalan na. Kinagi ni Jehova: “Danuri mangikalussaw niakan ay mekalussaw.” (1 Sam. 2:30) Inaffu na baddi nga armada na Siria i “daka-dakal nga armada” ni Jehoas anna “nabigi-bigaran” yayya. Turi ta nanaw ngana i Siriano ira, pinatay si Jehoas na mismu nga doroban na megafu ta pamatena kani Zacarias. Megafu gapa ta dake natun nga patul, ari yayya nga netanam “ta attanamman na patul ira.”​—2 Cro. 24:23-25; innan i study note nga “anak ni Barakias” ta Mateo 23:35.

18. Base ta Jeremias 17:7, 8, anni ira i kuattam tapenu ari ittam nga mabbalin tu kagitta ni Jehoas?

¹⁸ Anni i magigiammu tam kani Jehoas? Megitta yayya ta tadday nga kayu nga ari tu aralam i nikegamu na anna nakadepende ngana laman ta tuku nga massuporta ta nisa. Turi ta nalsa i tuku nga megitta kani Jehoiada anna nassikan gapa i paddag nga megitta ta kakkagian na apostata ira, natomba si Jehoas. Ituttuddu natun nga ilustrasion nga ari laman nakuan nga nakadepende i paganassing tam ta Dios ta makasta nga influwensia na kapangngurug tam, nelavu ngana i kafamilia tam. Tapenu kanayun gafu nga maladda i espiritualidad tam, mawag nga padakallattam i pangaya anna i paganassing tam kani Jehova gukaban na kanayun nga paggigiammu, pannono tu mapia, anna pappakimallo.​—Bibbigan i Jeremias 17:7, 8; Col. 2:6, 7.

19. Anni i ikikkiddaw ni Jehova ta nittam?

¹⁹ Ari mabba gapa tu sossobra i ikikkiddaw ni Jehova ta nittam. Kakurugan na, nakagi ta Eclesiastes 12:13 nu anni laman i ikikkiddona: “Maganassing ka ta kurug nga Dios anna tuppalammu i bili-bilin na, ta yaw i interu nga obligasion na tolay.” Nu maganassing ittam ta Dios, matalo ittam maski nu anni paga i mesimmu ta mappange, kagitta ni Obadias anna ni Jehoiada. Awan vuluvuga tu makadaral ta pakikkofuttam kani Jehova.