Parigannu i Madukko nga Kokkofun ni Jehova

1-3. (a) Ngatta siguradu ittam nga awayya tam mabbalin tu kokkofun na Dios? (b) Sinni ira i ikonsidera tam taw nga artikulo?

NAMITTALLU nga nekagi ta Biblia nga kofun na Dios si Abraham. (2 Cron. 20:7; Isa. 41:8; Sant. 2:23) Kakuruganna, yaya laman i matalo nga tolay nga espesipiko nga nekagi ta Biblia nga kofun na Dios. Kayana kari gafu kagian nga si Abraham laman i tolay nga nabbalin tu kofun ni Jehova? Ari, megafu ta ipasingan na Biblia nga awayya tam ngamin makikofun ta Dios.

² Aru nga rekord ta Biblia i meyannung ta matalo ira nga lallaki anna babbay nga maganassing ta Dios, nattalo sa, anna nabbalin tu madukko nga kokkofunna. (Bibbigan i Salmo 25:14.) Nitura ni Pablo nga “napakaru nga totolay” i siguradu nga nabbalin tu kokkofun na Dios. (Heb. 12:1) Masingattam nga nadduruma i klaseda nga totolay.

³ Gigiammuattam i tallu ta madukko nga kokkofun ni Jehova nga nekagi ta Biblia. Ikonsidera tam si (1) Ruth, i matalo anna mabbing nga balu na Moab; (2) Hezekias, i matunung nga patul na Juda; anna (3) Maria, i napakalinno nga yena ni Jesus. Anni i magigiammu tam ta pakikofun na kada-tadday nira ta Dios?

NANGIPASINGAN YAYA TU MATALO NGA AYA

4, 5. Anni nga desision i mawag tu kuan ni Ruth, anna ngatta mariga yatun? (Innan i letratu ta gafu na artikulo.)

⁴ Iyilustram ta nonomu i tallu nga balu, nga mepadda-paddag i sinnudda ta pallaka-lakagda ta dalan na tana-tana na Moab. Yatun si Noemi anna i dua nga manuganna, si Ruth anni Orpa. Masingattam nga nappange ta tanakuan nga dalan si Orpa, megafu ta naddesision nga lubbe ta balena ta Moab. Determinado si Noemi nga mattoli ta lugarna ta Israel. Kavuluna si Ruth, nga mepa-arubang sa i awayyana tu pinaka-importante nga desision ta pattolena. Awayyana tu lubbe yaya ta lugarna ta Moab onu mevulu kani Noemi nga katuganganna, nga mabbiahe mappange ta Betlehem.—Ruth 1:1-8, 14.

⁵ Mabi na laman nakuan irason nga egga familiana ta Moab—i yenana anna i parientesna nga mangalawa anna makoffun sa. Moab i naggafuanna. I kultura na Moab i kulturana, i lengguaheda ay lengguahena, i totoleda ay totolena. Awan tu mepromesa ni Noemi nga kunnatun nga bentaha ta Betlehem. Kakuruganna, sinabarangnganna si Ruth nga maddian ta Moab. Ikassing ni Noemi nga ari na nga meddan tu atawa onu paddianan i manuganna ira. Anni i kuan ni Ruth? Masingattam i naddumadda ni Orpa, nga “nanoli ta totolena anna ta diosna ira.” (Ruth 1:9-15) Kayà kari ni Ruth i mattoli ta falso ira nga dios na totolena? Siguradu nga manakina.

6. (a) Anni i masirib nga desision ni Ruth? (b) Ngatta nakagi ni Boaz nga nagaleg tu pakiyegutan ta payà ni Jehova si Ruth?

⁶ Awayyana tu nammuan ni Ruth i meyannung kani Jehova nga Dios ta atawana nga natay onu kani Noemi. Ari tu kagitta na dios na Moab si Jehova. Ammu ni Ruth nga mepangngo si Jehova ta aya anna paddayarayawna. Ari nga makalanno i basta pakannammu sa. Mawag tu maddesision si Ruth. Pilianna kari si Jehova tu Diosna? Masirib i desisionna. “I totolem ay mabbalin noka tu totolè, anna i Diosmu ay mabbalin tu Dios ku,” kunna kani Noemi. (Ruth 1:16) Makatukkal tu futu nga nonopan i aya ni Ruth kani Noemi, ngem mas paga i ayana kani Jehova. Zinayaw gapa na makaddavvun nga si Boaz si Ruth ta pakiyeguna ta payà ni Jehova. (Bibbigan i Ruth 2:12.) Yatun i mangiperaddam nittam ta piyyo nga makiyegu ta makapangngua anna minapprotekta nga payà na yenana. (Sal 36:7; 91:1-4) Kunnatun si Jehova kani Ruth. Binendisionanna yaya ta pangurugna, anna awan vuluvuga tu rason nga pabbabawyanna i desisionna.

7. Anni i makoffun ta duda ira nga maddedika kani Jehova?

⁷ Aru i makannammu meyannung kani Jehova ngem duda ira nga makiyegu sa. Duda ira nga mabbalin tu dedikadu, bawtisado nga aripanna. Nu duda ka nga maddedika kani Jehova, niyavumu ngana kari ta baggim nu ngatta? Masserbi ta dios onu ta tanakuan i kada tadday nga matolay. (Jos. 24:15) Ngatta ari ka makiyegu ta Dios nga mepangngo laman nga passerbian? I paddedika kani Jehova i kakastan nga pangipasingan tu pangurug sa. Uffunannaka ni Jehova tatun nga desisiommu anna ta anni laman nga mepa-arubang nikaw nga problema. Kunnatun i kingnguana kani Ruth.

“NATTALUPADDIAN YAYA KANI JEHOVA”—MASKI MARAKE I NAGGAFUANNA

8. Iyistoria i naggafuanan ni Hezekias.

⁸ Ari nga kagitta ni Ruth, neyana i abbing nga si Hezekias ta nasion nga dedikadu kani Jehova. Ngem ari nga sinuppal na ngamin nga Israelita yatun nga dedikasiodda. I yama ni Hezekias nga si Patul Ahaz i tadday tatun. Niyorolluna yatun nga marake nga tolay i pappatulan na Juda ta idolatria, anna zinaralna paga i templo ni Jehova ta Jerusalem. Mariga nga nonopan i nesissimmu ta kabbing ni Hezekias, ta kananassing i nipappatay na karuan ta wawwaragina nga natuggi ira nga sigga-matolay nga sakrifisio ta falso nga dios!—2 Pat. 16:2-4, 10-17; 2 Cron. 28:1-3.

9, 10. (a) Ngatta awayyana nakuan nga mataki i nono ni Hezekias? (b) Ngatta ari nakuan nga mattaki i nono tam kani Jehova? (c) Ngatta ariattam nonopan nga nu anni i naggafuan na tadday ay yatun ngana gapa i pappangetanna?

⁹ Awayyana nakuan tu ziminakal si Hezekias nga mataki i nonona anna makaporay ta Dios. Nonopan na karuan nga nagattam ta ziga ngem ari nga kagitta na ziga ni Hezekias, nga egga rasodda nga “mapporay kani Jehova” onu mattaki i nonoda ta organisasionna. (Prov. 19:3) Kombinsidu ira nga megafu ta marake i nekapadakalda, siguradu nga marake gapa i pattuppaladda, nga uliadda laman i nakaliwatan na maganada. (Eze. 18:2, 3) Fustu kari yatun nga pagimamma?

¹⁰ Segun ta rekord na pattolay ni Hezekias, manawag i tabbag: Ari tu fustu! Awan vuluvuga tu rason nga mattaki i nono tam kani Jehova, megafu ta ari tu yaya i naggafuan na kinadake nga mesissimmu ta totolay taw nga mundo. (Job 34:10) Kurug nga dakal i influwensia na magana ta ánada, makasta onu marake. (Prov. 22:6; Col. 3:21) Ngem arianna kaya kagian nga nu anni i naggafuan na tadday ay yatun ngana gapa i pappangetanna. Ta kakuruganna, iniddan ittam ngamin ni Jehova tu nabalor nga regalu—i abilidad nga pilian nu anni i kuattam anna nu anni i pabbalinattam. (Deut. 30:19) Kunnasi nga niyusa ni Hezekias yatun nga regalu?

11. Anni i rason nu ngatta tadday si Hezekias ta kapianan nga patul na Juda?

¹¹ Maski nu ana na tadday ta kitaddake ira nga patul ta Juda si Hezekias, ziminakal lagapa yaya nga tadday ta kapianan. (Bibbigan i 2 Patul Ira 18:5, 6.) Kurug nga kitaddake nga influwensia i yamana sa, ngem egga lagapa tanakuan nga influwensia nga pappilianna. Nasserbi bilang profeta si Isaias tatun nga tiempo kunne na gapa kani Mikias anni Hoseas. Awayya tam nonopan nga napafutuan nga inalawa ni Patul Hezekias i nainspiran nga kinagi na matalo nga lallaki, nga pinamavulunanna i tabarang anna pangitunung ni Jehova nga memula ta futuna. Yari tu pinegafuanan ni Hezekias nga itunung i kinamarake nga kingngua na yamana. Pinakarennuanna i templo, nakkiddaw tu pamakoma na Dios ta liwi-liwa na totolay, anna zinaralna i pagano ira nga idolo ta interu nga nasion. (2 Cron. 29:1-11, 18-24; 31:1) Turi ta nepa-arubang yaya ta madammo nga kapurueba kagitta na pangatake ni Patul Senakerib na Asirya ta Jerusalem, nipasingan ni Hezekias i sikan na nono anna pangurugna. Naddepende yaya ta Dios para ta kapaliag anna pinasikanna i totolena gukaban na uvovug anna ehemplona. (2 Cron. 32:7, 8) Nappakalinno anna nabbabawi yaya turi ta mawag nga metunung i pappakatannanna. (2 Cron. 32:24-26) Manawag nga ari nipamavulun ni Hezekias nga madaral i pattolena onu i mappangena megafu ta nappasanna. Ngem nipasinganna lallagu nga kofunna si Jehova anna makasta nga ehemplo yaya nga parigan.

12. Kagitta ni Hezekias, kunnasi nga napakurug na magaru nga kofun ira ni Jehova?

¹² Megafu ta mattoletam ta vayolente anna awan tu ayana nga mundo, ari nga kakkadda-kaddag nga aru ta abbarabbing i dumakal nga ariadda matageno i benefisio na kegga na minaggiddu anna minapprotekta nga magana. (2 Tim. 3:1-5) Aru ta Cristiano ta kaggawattam i ari tu makasta i neyabbingadda, ngem madukko nga nakikofun ira kani Jehova. Kagitta ni Hezekias, ipasingadda nga ari kaya kagian nga nu anni i naggafuan na tadday ay yatun ngana gapa i pappangetanna. Iniddan ittam ni Jehova tu lallaguray, anna pribilehio tam nga usan yatun tapenu mattalupaddian kani Jehova anna mangiyawa tu dayaw anna gloria sa, kagitta ni Hezekias.

KINAGINA: “DOROBAN NÀ NA YAFU”

13, 14. Ngatta kuruga mariga i annungan ni Maria, ngem anni i tabbagna ta pakiyuvovugna kani Gabriel?

¹³ Nappasa i piga siglo kabalin na tiempo ni Hezekias, nakangngua tu espesial nga pakikofun i minappakalinno nga Judio nga babay nga taga Nazaret. Awan tu keyarigan na nalawana nga annungan. Yaya i mangibussi, mangiyana, anna mamadakal ta tattadday nga Ana na Dios! Siguradu nga iniddu anna nattalo si Jehova kani Maria yari tu iniddanna yaya tu kunnatun kadakal nga dayaw. Anni tamma i reaksion ni Maria ta gafu turi ta naginnana yatun nga annungan?

¹⁴ Baka manono tam laman i makapabbaw nga pribilehio ni Maria ngem ariattam manono i madammo ira nga pakavurunganna. Kinagi ni anghel Gabriel sa nga mirakulo nga mabussi yaya—nga awan tu seksual nga relasionna ta lalaki. Ari na niyesplika ta familia anna karruba ni Maria nu kunnasi yaya nga mabussi. Anni tamma i manonoda? Awayyana nga mavurung paga si Maria ta nonopan ni Jose nga nobiona. Kunnasina iyesplika kani Jose nga matalo lagapa yaya sa, maski nu nabussi yaya? Dakal paga nga responsibilidad i mamadakal, manangngal, anna massanay ta tattadday nga Ana na Katannangan! Ari tam ammu i ngamin nga pakavurungan ni Maria turi ta nakiyuvovug si Gabriel sa. Ngem ammu tam i nitabbagna: “Doroban nà na Yafu. Makua paray niakan yatun nga kinagim.”—Luc. 1:26-38.

15. Ngatta nerumu-ruma i pangurug ni Maria?

¹⁵ Ari kari nga nerumu-ruma i pangurug ni Maria? Doroban yaya nga sigga-paran nga mamarulo ta yafuna. Nattalo yaya nga protektan anna tangngallan yaya ni Jehova. Kayàna i masserbi sa ta anni laman nga ipakuana. Sitaw i naggafuanna pangurugna? Ari tam neyana nga egga ngana insigida pangurug tam. Resulta yaw na appursigi na tadday anna bendision ni Jehova. (Gal. 5:22; Efe. 2:8) Egga kari ebidensia nga nappursigi si Maria tapenu mapaladda i pangurugna? Egga. Gigiammuattam nu kunnasi yaya nagginna anna nu kunnasi yaya naguvovug.

16. Anni i mangipasingan nga sigga-paran nga magginna si Maria?

¹⁶ Nu kunnasi nagginna si Maria. Itabarang nittam na Biblia nga “sigga-parak-kamu nga magginna, memmugug ta paguvovug.” (Sant. 1:19) Sigga-paran kari nga magginna si Maria? Wan. Middua nga nipasingan na Evanghelio ni Lucas nga nagginna tu mapia si Maria ta nekagi ira sa nga egga monag nga espiritual nga kebalinanna anna ninonona tu mapia yatun kabalinna nga naginna. Ta nikeyana ni Jesus, nipakannammu na napakalinno nga pastor ira kani Maria i mensahe na anghel. Ma-12 dagun i nappasa, maski abbing paga laman yaya, egga kinagi ni Jesus nga dakal i espiritual nga kebalinanna. Parehu nga gininna tu mapia, neraddamman, anna pinannonopan tu mapia ni Maria yatun.—Bibbigan i Lucas 2:16-19, 49, 51.

17. Anni i magigiammu tam ta paguvovug ni Maria?

¹⁷ Nu kunnasi nakiyuvovug si Maria. Baddi laman i nakarekord ta Biblia ta kinagi ira ni Maria. Nakarekord ta Lucas 1:46-55 i kapadduan paga laman nga kinagina. Ipasinganna yatun nga aru i ammuna ta Katurakan. I karuan ta kinagina ay kagitta na kinagi ni Ana nga yena ni profeta Samuel ta pakimallona. (1 Sam. 2:1-10) Ta tadday nga pattantia, mamibbente nga niyusa ni Maria i Katurakan ta paguvovugna. Manawag nga kakayana i maguvovug meyannung ta espiritual nga ganna-gannug nga nannammuanna ta katannangan nga Kofunna, si Jehova nga Dios.

18. Kunnasi tam parigan i pangurug ni Maria?

¹⁸ Kagitta ni Maria, awayyana nga makalawa ittam tu annungan kani Jehova nga mariga para nittam. Parigattam yaya nga sigga-pakalinno nga inakseptana yatun, anna nattalo nga uffunan yaya ni Jehova. Maparigattam paga i pangurugna gukaban na pagginna tu mapia ta anni laman nga magigiammu tam meyannung kani Jehova anna ta gakkagna, monag nga pannonono ta espiritual nga kinakurug, anna magayaya nga ikagi ta tanakuan i meyannung ta nagigiammu tam.—Sal. 77:11, 12; Luc. 8:18; Roma 10:15.

19. Durante nga parigattam i nerumu-ruma nga ehemplo na pangurug ta Biblia, anni i masiguradu tam?

¹⁹ Manawag nga kokkofun ni Jehova da Ruth, Hezekias, anni Maria, kagitta gapa ni Abraham. Kavuluda paga danuri “napakaru nga totolay nga nangipasingan ta angngurug da,” nga napeggan tu pribilehio nga mabbalin tu kofun na Dios. Paray nakuan tu ibala-balayuttam nga parigan i ehemplo na pangurugda. (Heb. 6:11, 12) Nu kuattam yatun, masiguradu tam i dakal nga bala-balo—i pabbalin tu madukko nga kofun ni Jehova adde noka!