I Magigiammu Tam ta Matalo ira nga Aripan ni Jehova

1, 2. Kunnasi nga nipasingan ni David nga matalo yaya ta Dios? (Innan i letratu ta gafu na artikulo.)

TA TANGNGA na gabi, ari mataga-tageno nga siminallung si David anni Abisai ta kampu na 3,000 nga suddalu. Nasingadda si Patul Saul ta tangnga na kampu nga agga-katurug. Nabbiahe yaya ta tana-tana na Judea tapenu alegan anna patayanna si David. Niyananibig ni Abisai: “Pamavulunannà nga pikan [si Saul] ta davvun mittan laman, anna ariakku ngana pamidduan.” Kattaka-taka i tabbag ni David! “Ariammu yaya nga dannalan, megafu ta sinni i maketayag ta limana kontra ta nazelugan ni Jehova anna awan tu pakaliwatanna? . . . Arayyu nga mesimmu ta pagimamma ni Jehova nga itayag ku i limà kontra ta nazelugan ni Jehova!”​—1 Sam. 26:8-12.

² Nalippawa ni David nu anni i kasali ta kinamatalo kani Jehova. Awan tu intensionna nga takitan si Saul. Ngatta? Megafu ta si Saul i sinullo na Dios nga patul na Israel. Irespeto na matalo ira nga aripan ni Jehova danuri sinullona. Kakuruganna, ikikkiddaw ni Jehova ta ngamin nga totolena nga ‘tagibaloradda i kinamatalo.’​—Bibbigan i Mikias 6:8.

3. Kunnasi nga nammakatalo si Abisai kani David?

³ Nirespeto ni Abisai si David. Kunnaw i nikegittanna: Tapenu matakkabban i panallawna kani Batseba, zinog ni David si Joab nga wagi ni Abisai nga iyunnugna i kapatay ni Urias nga atawa ni Batseba ta gerra. (2 Sam. 11:2-4, 14, 15; 1 Cro. 2:16) Awayyana tu egga ammu ni Abisai meyannung tatun, ngem nirespetona lagapa si David nga sinullo ni Jehova. Ari gapa vuluvuga nga niyusa ni Abisai i pakapangnguana bilang lider na militar tapenu malana i trono na Israel. Dinefensanna lallagu si David kontra ta traidor anna ta kalabanna ira.​—2 Sam. 10:10; 20:6; 21:15-17.

4. (a) Ngatta makasta nga ehemplo na kinamatalo ta Dios si David? (b) Anni paga i gigiammuattam taw nga artikulo?

⁴ Ipasingan na pammanaki ni David nga dannalan si Saul nga tadday yaya nga matalo nga aripan ni Jehova. Ta kabbinna, inarubanna i higante nga Filisteo nga si Goliat, nga awan tu anassinna nga “inuyaw i armada na sigga-matolay nga Dios”! (1 Sam. 17:23, 26, 48-51) Turi ta nabbalin nga patul si David anna nakaliwa tu panallaw anna pamapatay, inalawana i panunung sa ni profeta Natan anna nabbabawi. (2 Sam. 12:1-5, 13) Ta pallakena, nibala-balayunna nga nammakatalo ta Dios. Angngariganna, nangiyawa yaya tu daka-dakal nga kontribusion ta pamataddag tu templo ni Jehova. (1 Cro. 29:1-5) Fustu nga madammo i liwi-liwa ni David, ngem matalo yaya ta Dios. (Sal. 51:4, 10; 86:2) Durante nga gigiammuattam i karuan paga meyannung kani David anna ta kakontemporariona, tabbagattam yaw ira nga pakkiavu: Kunnasi tam nga makapammakatalo kani Jehova nige na tanakuan? Anni ira nga kualidad i makoffun tapenu makua tam yatun?

MAMMAKATALO KA KARI KANI JEHOVA?

5. Anni i magigiammu tam ta kingngua ni Abisai?

⁵ Turi ta ginakkag ni Abisai nga patayan si Saul, kayàna ipasingan nga matalo yaya kani David. Ngem ammu ni David nga mali nga patayan i “nazelugan ni Jehova,” yari tu finugaddanna si Abisai. (1 Sam. 26:8-11) Egga itudduna yaw nittam nga importante nga leksion: Nu mawag tam i maddesision nu sinni i ollu nga pammakatalokattam, mawag tu nonopattam i prinsipio ira na Biblia nga makoffun ta situasiottam.

6. Maski nu natural nga matalo tam ta kofun onu kafamilia tam, ngatta mawag nga magimmugug tam?

⁶ Maggafu ta futu i kinamatalo tam, ngem minangngilogo i futu na tolay. (Jer. 17:9) Yari tu i tadday nga matalo ta Dios, awayyana tu mas matalo yaya ta madukko nga kofun onu kafamiliana maski nu marake i kuadda. Yatutta nu nakaliwa i tadday nga meddu nittam anna pinanawanna i kinakurug, mawag nga nonopattam nga mas importante i kinamatalo kani Jehova anne ta tanakuan.​—Bibbigan i Mateo 22:37.

7. Kunnasi nga nammakatalo ta Dios i tadday nga sister ta mariga nga situasion?

⁷ Mapurueban i kinamatalo na tadday nu egga na-disfellow nga kafamiliana. Angngariganna, nagagal ta telefono i na-disfellow nga yena ni Anne ^[1] . Kayà na yenana nga bisitan yaya megafu ta matakitan ta awan tu mayà ta kafamiliana nga makiergo onu makibbida sa. Narraddam si Anne ta kinagi na yenana tapus nipromesana nga mattura yaya sa. Nigena nga nattura, nikonsiderana labbi i prinsipio ira na Biblia. (1 Cor. 5:11; 2 Juan 9-11) Nattura si Anne anna marespeto nga niperaddamna ta yenana nga yaya mismu i minarayyu ta familiada turi ta nakaliwa anna ari yaya nga nabbabawi. “Magayaya ka laman uli nu mattoli ka kani Jehova,” nitura ni Anne.​—Sant. 4:8.

8. Anni ira nga kualidad i makoffun nittam nga makapammakatalo kani Jehova?

⁸ Mapakalinno, masippo, anna magutu i matalo ira nga kakontemporario ni David. Gigiammuattam nu kunnasi nga makoffun nittam yaw ira nga kualidad tapenu makapammakatalo tam kani Jehova.

MAPPAKALINNO TAM NAKUAN

9. Ngatta kayà ni Abner nga patayan si David?

⁹ Turi ta agga-tammi ni David i ulu ni Goliat anna nakiyuvovug yaya kani Patul Saul, egga dua nga nakasingan. Tadday tatun si Jonatan nga ana ni Saul nga nakipassinabban kani David. Si Abner nga panakallan na armada gapa i tadday. (1 Sam. 17:57–18:3) Ari nabbayag, inuffunan ni Abner si Saul turi ta kayàna patayan si David. “I manattazzi ira ay ikaya dà nga papatayan,” kunni David. (Sal. 54:3; 1 Sam. 26:1-5) Ngatta neruma i reaksion ni Jonatan kani Abner meyannung kani David? Kagitta ni Jonatan, ammu ni Abner nga si David i pinili na Dios nga mappatul ta Israel. Kabalin na patay ni Saul, nappakalinno nakuan si Abner anna pinakurugna nga matalo yaya kani Jehova gukaban na passuporta kani David, ari tu kani Isboset nga ana ni Saul. Ngem turi ta sinaddena i tadday ta atawa ni Patul Saul, awayyana tu kayàna talaga i mabbalin tu patul.​—2 Sam. 2:8-10; 3:6-11.

10. Ngatta ari nammakatalo si Absalom kani Jehova?

¹⁰ Kawan na kinapakalinno i nangifugag kani Absalom nga mammakatalo kani Jehova. Fugurammu, “nangà si Absalom tu karuahe para ta baggina anna kabayu ira anna 50 nga lallaki nga makkarela ta arubanna!” (2 Sam. 15:1) Kinumbinsina paga nga mammakatalo sa i Israelita ira. Kagitta ni Abner, ginakkag ni Absalom nga patayan si David maski nu ammuna nga sinullo yaya ni Jehova tu patul na Israel.​—2 Sam. 15:13, 14; 17:1-4.

11. Anni i magigiammu tam kani Abner, Absalom, anna kani Baruk?

¹¹ Mariga nga mammakatalo ta Dios i ari nga mapakalinno kagitta na ipasingan na ehemplo da Abner anni Absalom. Siguradu nga awan tu aripan ni Jehova i mayà nga mabbalin tu makasarili anna marake. Ngem makafekto ta espiritualidad tam nga Cristiano i pakkaraga nga marriku onu atannang nga karera taw nga mundo. Egga tiempo nga temporario nga nawawan ni Baruk nga sekretario ni Jeremias i fokusna. Kunnaw i mensahe ni Jehova sa: “Innammu! Daralakku nu anni i nipataddagku, anna battulakku i nimulà​—i interu davvun. Ngem magala-aleg ka tu makedayaw nga ganna-gannug para ta baggim. Immangammu ngana yatun nga alegan.” (Jer. 45:4, 5) Nagginna si Baruk kani Jehova. Makasta gapa nu magginna tam ta Dios megafu ta aranni ngana nga daralanna yaw nga marake nga mundo!

12. Ipasingan nu kunnasi nga ari tam makapammakatalo kani Jehova nu makasarili tam.

¹² Mawag ni Daniel nga taga-Mexico, i mappili nu mammakatalo yaya ta Dios onu alegan i pammakapiananna. Kayàna nga atawan i babay nga ari na kapangngurug. Kunni Daniel: “Tulu-tuloy ngà lagapa nga nattura sa maski nu payunir ngà ngana. Ngem turi kua, nappakalinno ngà nga kinagi ta tadday nga elder nga marigatannà nga mappili nu sinni i pammakatalokakku. Inuffunannà nga mepasingan i kinamakatalo ku kani Jehova nu iyemmakku i mattura sa. Kabalin na aru nga pakimallo anna lulua, yatun i kingnguà. Ari nabbayag, mas nagayaya ngà ta ministeriò.” Naka-atawa gabbalaman si Daniel tu mapia kata-katolena nga sister anna massesserbi ngana nga manangngal ta sirkito.

MAKOFFUN I KINAMATALO TAPENU MABBALITTAM TU MASIPPO

13. Maski nakaliwa si David, kunnasi nga nakapattalupaddian nga matalo si Natan ta Dios anna kani David?

¹³ Nu matalo tam kani Jehova, awayya tam gapa nga mammakatalo ta tanakuan anna uffunan ira ta kapianan. Nattalupaddian nga matalo si profeta Natan kani Jehova anna kani David. Nammuan ni Natan nga nakaliwa tu immoralidad si David anna niyunnugna nga mapatay ta gerra i atawa na babay. Turi ta zinog ni Jehova si Natan tapenu panunnutan si David, magutu yaya nga nattuppal maski nu matalo yaya kani David. Masirib anna masippo nga nakiyuvovug yaya kani David. Niyusana i ilustrasion meyannung ta riku nga kinokòna i tattadday nga karneru na pobre, tapenu malippawa ni David i kinaserioso na liwana. Turi ta napporay si David ta kingngua na riku, kinagi ni Natan: “Sikaw yatun nga tolay!” Nalippawa ni David i punto!​—2 Sam. 12:1-7, 13.

14. Kunnasi ka nga parehu nga makapammakatalo kani Jehova anna ta kofun onu parientesmu?

¹⁴ Makapammakatalo tam tu ollu kani Jehova tapus ta tanakuan gapa gukaban na pabbalin tu masippo. Angngariganna, nu siguradu ka nga nakakua tu madammo nga liwa i kapangngurugmu. Matalo ka sa mas ngana nu madukko nga kofun onu kafamiliam yaya. Ngem nu ilimagmu i nakaliwatanna, ipasingammu nga ari ka matalo ta Dios. Siempre mawag tu pagoluammu nga pammakatalokan si Jehova. Kagitta ni Natan, masippo ka nakuan ngem ari ka makikompromiso. Pagarammammu i kofun onu i kafamiliam nga mappoffun ta elder ira. Nu arianna kuan yatun ta rasonable nga tiempo, paguyuan naka na kinamatalomu kani Jehova nga kagian yatun ta elder ira. Nu kunnatun i kuammu, ipasingammu nga matalo ka kani Jehova anna masippo ka ta kofun onu kafamiliam, megafu ta uffunan yaya na elder nga metoli i makasta nga relasionna kani Jehova.​—Bibbigan i Levitico 5:1; Galacia 6:1.

MAGGUTU TAM TAPENU MAKAPAMMAKATALO

15, 16. Ngatta mawag ni Husai i maggutu tapenu makapammakatalo ta Dios?

¹⁵ Kawagan ni Husai i maggutu tapenu makapammakatalo yaya ta Dios. Matalo yaya nga kofun ni Patul David. Ngem napurueban yatun nga kinamatalona turi ta nala ni Absalom i fabor na magaru anna ginakkagna nga mammaguray ta Jerusalem. (2 Sam. 15:13; 16:15) Pinanawan ni David i siudad, ngem anni gafu i kuan ni Husai? Suportanna kari ngana laman si Absalom, onu daddananna i lakay ngana nga patul ta nattaguanna? Determinadu yaya nga mammakatalo ta sinullo na Dios nga patul yari tu inangngayanna si David ta Vukig na Olibo.​—2 Sam. 15:30, 32.

¹⁶ Pinattoli ni David si Husai ta Jerusalem tapenu magappappe tu kofun ni Absalom tapenu makumbinsina yaya nga ginnan i tabaranna, ari tu i tabarang ni Ahitofel. Maski nu nappeligro i mismu nga inangona, pinakurug ni Husai nga matalo yaya kani Jehova gukaban na pangngua ta nidob ni David. Kagitta na nipakimallo ni David, mas kinurug ni Absalom i tabarang na magutu nga si Husai anne kani Ahitofel.​—2 Sam. 15:31; 17:14.

17. Ngatta mawag tam maggutu tapenu makapammakatalo tam?

¹⁷ Mawag nga maggutu tam tapenu makapammakatalo tam kani Jehova. Aru nittam i magutu nga nangarubang ta influwensia na kafamilia, katrabahu, onu sekular ira nga autoridad tapenu mapakurug tam nga matalo tam kani Jehova. Angngariganna, kanayun nga matalo anna minattuppal ta maganana si Taro nga taga-Japan. Kingnguana yatun ari laman nga megafu ta obligasion. Kayàna talaga nga mapagayaya i maganana. Ngem turi ta kontradda i pakikavuluna ta Saksi ira ni Jehova, mataki para sa nga ipakannammu i desisionna nga magatende ta study. Kunni Taro: “Talaga napporay ira yari tu piga ragun nga manakida nga bisitakku ira ta balay. Nipakimalloku nga maggutu ngà nga mattalupaddian ta desisiokku. Nallapo i futuda niakan anna awayyà ngana ira regular nga bisitan ta balay.”​—Bibbigan i Proverbio 29:25.

18. Kunnasi ka nabenefisiowan taw nga nagigiammu?

¹⁸ Kagitta ni David, Jonatan, anni Husai, maekspiriensa tam nakuan i kurug nga pagayaya anna pakkakontento ta pamakurug tam nga matalo tam kani Jehova. Makagigiammu tam nakuan gapa ta ari nga kinamatalo da Abner anni Absalom. Siguradu nga kayà tam i mattalupaddian nga matalo kani Jehova, kagitta ni David. Megafu ta imperfekto tam, ariattam malisian i makaliwa. Ngem mapakurug tam nga si Jehova i pagoluattam ta kinamatalo tam.