Pakurugammu nga Matalo Ka Kani Jehova

1, 2. Ngatta kuruga makasta nga ehemplo na kinamatalo i pakkofun ni Jonatan anni David?

SIGURADU nga nappabbaw si Jonatan ta pinangarubang na abbing nga si David ta higante nga si Goliat. Agga-taddag si David ta arubang ni Patul Saul na Israel, “nga agga-tammina i ulu na Filisteo.” (1 Sam. 17:57) Siguradu nga nagustuan ni Jonatan i sikan na nono ni David. Manawag nga ufu-uffunan ni Jehova si David, anna nabbalin ira nga madukko nga makkofun. Kakuruganna, “nakkasinabban da Jonatan anni David megafu ta ayatan ni Jonatan si David nga kagitta na baggina.” (1 Sam. 18:1-3) Matalo yaya kani David adde ta patena.

² Ari nagatta i pakikkofun ni Jonatan kani David maski nu pinili na Dios si David nga tumunug nga patul na Israel. Navurung si Jonatan kani David turi ta kayà ni Saul nga ipapatay yaya. Nabbiahe yaya ta disierto na Juda adde ta Hores tapenu pagaramman i kofunna. Inuffunan ni Jonatan si David nga “makaleg tu sikan kani Jehova.” Kinagina: “Ariammu maganassing . . . ; mabbaling ka tu patul ta Israel, anna mabbaling ngà tu mekarua nikaw.”​—1 Sam. 23:16, 17.

3. Anni i mas importante kani Jonatan anne ta kinamatalona kani David, anna kunnasi tam nammuan yatun? (Innan i letratu ta gafu na artikulo.)

³ Kanayun nga magustuan na magaru i kinamatalo. Ngem ari tam mala i importante nga leksion nu ini-innattam laman i kinamatalo ni Jonatan kani David, nga ariattam ngana nonopan i kinamatalona ta Dios. Ngatta minammatan ni Jonatan nga kofun si David, ari nga kalaban? Megafu ta egga mas importante para sa anne ta pammakapiananna mismu. Daddammattam nga inuffunan ni Jonatan si David nga “makaleg tu sikan kani Jehova.” Manawag nga kinamatalo kani Jehova i mas importante ta pattolena. Kakuruganna, i kinamatalona kani Jehova i nakebaseyan na kinamatalona kani David. Parehu ira nga nattalo ta nakkasinabbadda: “Egga paray si Jehova ta nallatanatta anna ta nallatanan na gakam anna na gakà ta mannanayun.”​—1 Sam. 20:42.

4. (a) Anni kuattam tapenu kurug nga magayaya anna kontento ittam? (b) Anni i gigiammuattam taw nga artikulo?

⁴ Bilang Cristiano, ari nga makalanno nga ini-innattam laman i kinamatalo na tanakuan; matalo tam gapa mismu ta kafamilia, kokkofun, anna ta kapangngurug tam. (1 Tes. 2:10, 11) Ngem i pinaka-importante ta ngamin, matalo tam kani Jehova megafu ta yaya i nangiyawa tu inango tam! (Nep. 4:11) Nu matalo tam sa, kurug nga magayaya tam anna makontento. Mapakurug tam nga matalo tam sa nu ariattam yaya panawan maski ta mariga ira nga situasion. Taw nga artikulo, gigiammuattam nu kunnasi makoffun nittam i ehemplo ni Jonatan tapenu mapakurug tam nga matalo tam kani Jehova ta appa nga mariga nga situasion: (1) nu ari tu mepappangngo nga merespeto i egga ta autoridad, (2) nu mariga pilian nu sinni i pammakatalokattam, (3) nu mali pangantindida nittam, anna (4) nu mariga nga tuppalan i nipromesa tam.

NU ARI NGA MEPAPPANGNGO NGA MERESPETO I EGGA AUTORIDADNA

5. Ngatta mariga para ta totolay nga mammakatalò ta Dios durante nga patul paga laman si Saul?

⁵ Maski nu sinullo ni Jehova si Saul nga yama ni Jonatan nga mabbalin tu patul, ari yaya nabbalin tu matalo kani Jehova yari tu nawawan i fabor ni Jehova sa. (1 Sam. 15:17-23) Megafu ta ari insigida nga inalsan ni Jehova si Saul ta trono, napurueban i kinamatalo na sakupna ira anna danuri madukko sa. Yari tu mariga para ta totolay nga mammakatalo ta Dios megafu ta marake i kukukuan na patul nga egga ta “trono ni Jehova.”​—1 Cro. 29:23.

6. Anni i mangipasingan nga matalo lagapa si Jonatan kani Jehova?

⁶ Turi ta ollu nga nipasingan ni Saul i kawan na kinamatalona kani Jehova, pinakurug na anana nga si Jonatan nga matalo yaya kani Jehova. (1 Sam. 13:13, 14) Kinagi ni profeta Samuel: “Megafu ta marayaw nga ngaganna, ari nga pagurayan ni Jehova i totolena.” (1 Sam. 12:22) Nipasingan ni Jonatan nga nangurug yaya tatun turi ta umatake ta Israel i dakal nga armada na Filisteo nga 30,000 karuahe. Egga laman i 600 nga suddalu ni Saul​—yaya anna si Jonatan laman i egga armasna! Ngem sinallung ni Jonatan i kampu na Filisteo kavulu laman i taga-tammi tu pananggana. “Awan tu makefugag ta pamaliag ni Jehova gukaban na aru onu baddi,” kunni Jonatan. Nakapatay ira dua tu 20 ta kampu. Kabalinna, “namegafu nga nallunig i davvun anna egga paganassing naggafu ta Dios.” Ta anassidda, napparatay lagapa i Filisteo ira. Nattuppal ta pangaffu i pangurug ni Jonatan kani Jehova.​—1 Sam. 13:5, 15, 22; 14:1, 2, 6, 14, 15, 20.

7. Kunnasi i pinattratu ni Jonatan ta yamana?

⁷ Maski nu ari ngana makasta i relasion ni Saul kani Jehova, nakikoopera lagapa yaya ta yamana adde ta posible. Angngariganna, makkavulu ira nga nakillaban tapenu defensan i totolay ni Jehova.​—1 Sam. 31:1, 2.

8, 9. Ngatta mawag nga irespeto tam i egga ta autoridad?

⁸ Kagitta ni Jonatan, mapakurug tam nga matalo tam kani Jehova gukaban na pakimoray ta egga autoridadna adde ta posible, maski nu para nittam, i karuan ay ari mepappangngo nga merespeto. Awayyana tu kurakut i tadday nga ofisial na gobierno, ngem mawag lagapa nga irespeto tam i autoridadna megafu ta egga tam ta relatibo nga pakimoray ta “mammaguray ira nga egga ta gubiernu.” (Bibbigan i Roma 13:1, 2.) Mepasingattam nga matalo tam kani Jehova gukaban na pangirespeto ta iniddanna ira tu autoridad.​—1 Cor. 11:3; Heb. 13:17.

⁹ Ta South America, napakurug ni Olga^[1] nga matalo yaya kani Jehova gukaban na pangirespetona ta atawana maski ta mariga ira nga situasion. Nabayag nga kala-kalussona yaya megafu ta Saksi ni Jehova yaya. Inabusona yaya ta emosional, ininsulto, arianna kayà makiyuvovug sa, anna Iyana-anassinna nga panawanna yaya kavulu i dua nga ánada. Ngem ari vuluvuga nangibalo tu marake si Olga. Kingnguana i adde na mawayyana nga mabbalin tu mapia nga atawa gukaban na pallutu tu kananna, pangibabbalna tu sinnunna anna na familiada. (Roma 12:17) Nu posible, vulunanna yaya nu egga okasion na familia onu katrabahuna. Turi ta kayàna nga umay ira ta tarag na yamana ta tanakuan nga siudad, niprepara ni Olga i anáda anna i ngamin nga kawagadda ta biahe. Iniddagganna ta lawan na kapilya i atawana adde ta kabalin na seremonia. Ta pappasa na dagun, nallapo gabbalaman i futuna megafu ta pasensia anna respeto ni Olga sa. Itulu-tulugna ngana si Olga ta Kingdom Hall, ipeperaddamna nga maki-study, anna mevulu-vulu saggi-mittan sa.​—1 Ped. 3:1.

NU MARIGA PILIAN NU SINNI I PAMMAKATALOKATTAM

10. Ngatta mas pinili ni Jonatan nga mammakatalo kani David anne kani Saul?

¹⁰ Megafu ta determinado si Saul nga patayan si David, narigatan si Jonatan nga pilian nu sinni i pammakatalokanna. Maski nu egga nipromesa ni Jonatan kani David, minakkimoray yaya ta yamana. Ngem ammu ni Jonatan nga ufu-uffunan na Dios si David, ari nga si Saul. Yatutta mas pinilina nga mammakatalo kani David anne kani Saul. Kinagiananna si David nga mattagu anna makasta i kinagina kani Saul meyannung kani David.​—Bibbigan i 1 Samuel 19:1-6.

11, 12. Kunnasi nga makoffun i aya tam ta Dios tapenu makapammakatalo tam sa?

¹¹ Nakoffun ta sister nga taga-Australia nga si Alice, i kinamatalo ta Dios tapenu mapilina nu sinni i pammakatalokanna. Turi ta namegafu yaya nga maggigiammu tu Biblia, i-istorianna ta familiana i makasta ira nga nagigiammuna. Turi kua, kinagi ni Alice nira nga arianna ngana makipasselebra nira tu Krismas anna nipakanawagna nu ngatta. Ta ollu, nadismaya laman ira ngem mapporay lallagu ngana ira. Abboda nga awan ngana tu pakialam ni Alice nira nga kafamiliana. Kinagi ni Alice: “Kinagi na yenà nga manakìna ngana nga masingannà. Nakaddag ngà anna talaga natakitannà megafu ta ideddukakku i familià. Ngem determinado ngà tu mammakatalo kani Jehova anna ta Anana, yari tu nappabawtiso ngà ta tumunug nga asembli.”​—Mat. 10:37.

¹² Nu ariattam magimmugug, baka mas ipoppollu tam ngana i kinamatalo ta nasion, ta eskuela, onu ta sports team anne ta kinamatalo ta Dios. Angngariganna, kakayà ni Henry i maggayang tu chess. Kanayun nga champion i eskuelada yari tu kayàna gapa nga kuan i adde na mawayyana. Ngem inaminna: “Sesenu nga mas importante ngana i kinamatalo ku ta eskuelà anne ta Dios. Ariakku ngana makalawan megafu ta egga labammi ta chess kada weekend. Naddesisionnà gafu nga mappalsa ngana ta chess team.”​—Mat. 6:33.

13. Anni i makoffun nittam nga makapaddesision tu makasta nu mepa-arubang ittam ta problema?

¹³ Nu mittan, mariga gapa nga pilian nu sinni ta kafamilia tam i pammakatalokattam. Angngariganna, kinagi ni Ken: “Kayàku nga kanayun nga bisitan i yenà anna aggi-mittan nga paddianan yaya ta balemi. Ngem ari da makkasundu na atawà.” Kagianna paga: “Ariakku ira mapagustuan parehu.” Ninono ni Ken nu anni i kagian na Biblia anna nalippawana nga tatun nga situasion, mawag tu ipoppolluna i kayà na atawana anna mammakatalo sa. Yari tu nakanono yaya tu posible nga solusion nga mamagayaya sa. Kabalinna, niyesplikana ta atawana nu ngatta mawag tu masippo nakuan yaya ta katuganganna. Niyesplikana gapa kani yenana nu ngatta mawag tu irespetona i manuganna.​—Bibbigan i Genesis 2:24; 1 Corinto 13:4, 5.

NU MALI I PATTRATU NITTAM

14. Kunnasi i pinattratu ni Saul kani Jonatan?

¹⁴ Makapattalo tam kani Jehova maski nu ari tu patas i pattratu na tadday nga brother nga mangiyorollu nittam. Awayyana nga kunnatun gapa i situasion nga nepa-arubang kani Jonatan. Ammu ni Patul Saul i pakkofun da Jonatan anni David, ngem arianna matindian nu ngatta. Napporay anna pinasirananna si Jonatan. Ngem nirespeto lagapa yaya ni Jonatan. Nattalupaddian gapa si Jonatan nga matalo kani Jehova anna kani David nga pinili na Dios nga mabbalin tu tumunug nga patul na Israel.​—1 Sam. 20:30-41.

15. Anni nakuan i reaksiottam nu ari patas i pattratu nittam na tadday nga mangiyorollu?

¹⁵ Ta kongregasion ira na aripan ni Jehova, tallutaggi nga ari tu patas i pattratu nittam. Ngem imperfekto danuri mangiyorollu yari tu awayyana nga mali i pangantindida ta kukukuattam. (1 Sam. 1:13-17) Nu angngariganna nga ari tu patas onu mali i pangantindida nittam, mattalupaddiattam lagapa nga matalo kani Jehova.

NU MARIGA NGA TUPPALAN I NIPROMESA TAM

16. Anni ira nga situasion nga kawagattam i kinamatalo kani Jehova anna ari mabbalin tu makasarili?

¹⁶ Kayà ni Saul nga si Jonatan i tumunug nga mabbalin tu patul. (1 Sam. 20:31) Ngem i kinamatalona kani Jehova i namaguyu sa nga makikofun kani David anne ta ipoppolluna i mismu nga pammakapianna. Mapaguyu tam nga parigan si Jonatan nga ari makasarili nu nonopattam nga i tolay nga paboran ni Jehova ay ‘magga parulattanna i nitabba na, maski nu anni i mesimmu sa.’ (Sal. 15:4) Ari nga nilikuran ni Jonatan i tabbana kani David; kunnatan tam nakuan gapa ta tabba tam ira. Angngariganna, nu mariga para nittam nga tuppalan i nipromesa tam ta tadday nga negosio, i kinamatalo tam kani Jehova anna respeto ta Biblia i mamaguyu nittam nga tuppalan yatun. Kunnasi nu egga problema tam ta pagatawa? I aya tam ta Dios i mamaguyu nittam nga mattalupaddian nga matalo ta atawa tam.​—Bibbigan i Malakias 2:13-16.

17. Kunnasi nga nakoffun nikaw yaw nga nagigiammu?

¹⁷ Nu nonopattam tu mapia i ehemplo ni Jonatan, ariattam kari kayà nga parigan i kinamatalona ta Dios? Ariattam nakuan pagolluan i personal nga pammakapiattam. Kagitta ni Jonatan, pakurugattam nga matalo tam kani Jehova gukaban na pabbalin tu matalo ta totolena, maski danuri makadismaya nittam. Nu matalo tam kani Jehova maski meyarubattam ta mariga ira nga situasion, mapagayaya tam i futuna​—yatun i kurug nga mamagayaya nittam. (Prov. 27:11) Nu mattalupaddiattam nga matalo kani Jehova, masiguradu tam nga kuanna nu anni i kakastan para nittam anna tangngallanna ittam. Ta tumunug nga artikulo, innattam nu anni i magigiammu tam nga leksion ta matalo anna ari matalo nga totolay ta tiempo ni David.