Faboran na Dios Danuri Matalo

1, 2. Anni i mariga nga situasion nga inarubang ni Jefte anna na anana?

ARI ngana nga mavuru-vurung i mabbing nga babay. Nabanna-bannayan yaya nga masingan nga awan tu marake nga nesimmu ta yamana nga naggafu ta gerra. Nakkarela yaya tapenu makipagayaya ta yamana megafu ta pinangaffuna. Ngem imbes nga makipakkansion anna makipattala onu makipabbayle, pinisil na yama i sinnunna nga egga paga mantsa na gerra anna nikullena: “Ay afu ana ku! Pinarraddammu i futù.” Tapus kinagina i uvovug ira nga manguli ta pattolay na anana, anna manaral ta iddanamana nga mapeggan tu normal nga pattolay. Ngem, makakkasta i tabbag na ana anna pinagaramna i yamana nga talakkurugan i nipromesana kani Jehova. Masingan ta uvovugna ira i dakal nga pangurugna. Nammakatalo yaya nga nu anni laman i kiddawan ni Jehova, yatun i kapianan para sa. (Uk. 11:34-37) Talaga magaya-ayaya i futu na yamana ta pakannammuna nga sigga-paran i anana nga suportan i desisionna nga marresulta ta fabor ni Jehova.

² Nammakatalo anna nakkomfiansa ta unnug ni Jehova si Jefte anna i minagganassing ta Dios nga anana, maski nu mariga nga kuan yatun. Kumbinsidu ira nga sulit i anni laman nga sakrifisio tapenu malawàda i fabor ni Jehova.

3. Kunnasi nga makoffun nittam i ehemplo ni Jefte anna na anana?

³ Ammu tam nga ari kanayun nga mabi i mammakatalo kani Jehova. Kakuruganna, mawag tam i ‘makibakal para ta angngurug.’ (Jud. 3) Tapenu makua tam yatun, innattam i mariga ira nga situasion nga mapia i pinangarubang ni Jefte anna na anana. Kunnasi ira nga nakapammakatalo kani Jehova?

MATALO MASKI NU EGGA I INFLUWENSIA NA MUNDO

4, 5. (a) Anni i nibilin ni Jehova ta Israelita ira turi ta siminallung ira ta Nepromesa nga Davvun? (b) Segun ta Salmo 106, anni i nesimmu ta Israelita ira megafu ta ariadda pattuppal?

⁴ Awayyana tu kagaggaw nga nononopan ni Jefte anna na anana i marake nga resulta na ari nga pammakatalo kani Jehova. Ma-300 dagun ngana i nappasa, nebilin ta ginafuadda ira nga patayan ngamin i pagano ta Nepromesa nga Davvun. (Deut. 7:1-4) Megafu ta ari nga sinuttul na Israelita yaw, aru nira i nainfluwensian ta Canaanita, naddayaw ira ta falso nga dios anna pinarigadda i marake anna immoral nga annangnguada.—Bibbigan i Salmo 106:34-39.

⁵ Megafu tatun nga rebelyon, nawawadda i fabor ni Jehova; arianna ngana ira pinrotektan. (Uk. 2:1-3, 11-15; Sal. 106:40-43) Talaga mariga para ta familia ira nga minagganassing ta Dios i mammakatalo kani Jehova tatun nga mariga ira nga tiempo! Ngem, kagian na Biblia nga egga ira i nammakatalo, kagitta ni Jefte anna i anana, si Elkana, Hana, anna si Samuel, nga determinadu nga malawàda i fabor na Dios.—1 Sam. 1:20-28; 2:26.

6. Ta kaggawattam, anni ira i influwensia na mundo, anna anni nakuan i kuattam?

⁶ Egga ittam ta mundo nga kagitta na Canaan gari i appana-panono anna kukukuan na totolay—sussuportadda i sex, kinavayolente anna materialismo. Nangiyawa si Jehova tu manawag ira nga pamappalan—kagitta na kingnguana ta Israelita ira—tapenu melilli tam tatun ira nga influwensia. Anni i magigiammu tam ta nakaliwatan na Israelita ira? (1 Cor. 10:6-11) Mappursigi tam nakuan tapenu malsa nittam i kagitta na Canaanita nga appana-panono. (Roma 12:2) Matalo kari nga kukukuattam yatun?

MATALO MASKI NU EGGA PAKKADISMAYA

7. (a) Anni i kingngua na mismu nga totolay ni Jefte sa? (b) Anni i kingngua ni Jefte?

⁷ Ta tiempo ni Jefte, inaripan na Filisteo anna Amonita ira i Israelita megafu ta ariadda pinattuppal. (Uk. 10:7, 8) Ngem, narigatan si Jefte ari laman nga megafu ta kalabadda ira nga nasion, nu ari, maski paga ta wawwaragina anna na lider ira na Israel. Megafu ta passil anna lussaw na wawwaragina ta yama, pinapanawda yaya, anna niyetuda sa i kepangngattan nga mangirensia bilang kaka. (Uk. 11:1-3) Ari nipamavulun ni Jefte nga mafektan yaya na marake nga pattratuda sa. Turi ta nakkiddaw tu uffun i manakam ira ta nasion, gininna anna inuffunanna lagapa ira. (Uk. 11:4-11) Anni i namaguyu kani Jefte tapenu mepasinganna nga nespirituan yaya?

8, 9. (a) Anni ira nga prinsipio ta Mosaiko nga Dob i nakoffun kani Jefte? (b) Anni i pinaka-importante kani Jefte?

⁸ Ari laman nga malalaki nga suddalu si Jefte, ammuna gapa nu kunnasi i pattratu na Dios ta totolena. Kabisadu ni Jefte i historia na Israel yari tu manawag i pakalippawana nu anni i mapia anna marake kani Jehova. (Uk. 11:12-27) I prinsipio ira na Dios nga nelagum ta Mosaiko nga Dob i nassanay ta nono anna ta futu ni Jefte. Ammuna nga manaki ni Jehova i mangimula tu taki na nono; ngem, kayàna nga egga aya na totolena ta kataggi-tadday. Ituddu paga na Dob nga ari nakuan balewalaan na tadday i kawagan na tanakuan, maski paga danuri “mangikalussaw” sa.—Bibbigan i Exodo 23:5; Levitico 19:17, 18.

⁹ I ehemplo na matalo ira kagitta ni Jose, nga nangipasingan tu allo ta wawwaragina—maski nu “nikalussaw da yaya”—i nanginfluwensia paga kani Jefte. (Gen. 37:4; 45:4, 5) Nakoffun kani Jefte i monag nga pannonona tatun ira nga ehemplo tapenu makuana i mamagayaya kani Jehova. Siguradu nga natakitan yaya megafu ta kondukta na wawwaragina, ngem awan tu makefugag sa nga masserbi kani Jehova anna ta totolena. (Uk. 11:9) Mas importante kani Jefte i pangidefensa ta ngagan ni Jehova anne ta personal ira nga ari pakkarantindian. Determinadu yaya nga mammakatalo kani Jehova, para ta pammakapiananna anna na tanakuan.—Heb. 11:32, 33.

10. Kunnasi nga makoffun i prinsipio ira nga naggafu ta Dios tapenu mepangngo i kondukta tam bilang Cristiano?

¹⁰ Maparigattam kari i ehemplo ni Jefte? Awayyana nga nadismaya tam ngana onu marake i pinattratu nittam na tadday nga wagi. Nu kunnatun, ariattam ipamavulun nga yatun i mangifugag nittam nga maki-study onu masserbi kani Jehova anna makikavulu ta kongregasion. Bilang pamarig kani Jefte, ipamavuluttam gapa i estandarte ira na Dios nga manguffun nittam tapenu malabanan i negatibo nga situasion anna kanayun nga mabbalin tu mapia nga influwensia.—Roma 12:20, 21; Col. 3:13.

MASINGAN I PANGURUG TAM TA SIGGA-PARAN NGA PASSAKRIFISIO

11, 12. Anni i nitabba ni Jefte, anna anni i kebalinanna yatun?

¹¹ Nalippawa ni Jefte nga mawagna i uffun ni Jehova tapenu mapalubbangan i Israel ta pangaripan na Amonita ira. Nipromesana kani Jehova nga nu pangaffutanna yaya, isakrifisiona bilang “matuggi nga tavvung” i ollu nga tolay nga mallawan ta balena sonu mallabbe nga naggafu ta gerra. (Uk. 11:30, 31) Anni i kebalinanna yatun nga pangitavvung?

¹² Kala-kalussaw ni Jehova i passakrifisio tu totolay. Yatutta, ari nga intension ni Jefte nga mangisakrifisio tu tolay. (Deut. 18:9, 10) Segun ta Mosaiko nga Dob, interamente nga meyawa kani Jehova i matuggi nga tavvung, yatutta manawag nga kaya kagian ni Jefte nga iyawana yatun nga tolay nga meyusa para laman ta passerbi ta Dios. Permanente nga passerbi ta tabernakulo i kayana kagian yaw nga promesa. Inalawa ni Jehova i kondision ni Jefte anna binendisionanna yaya. Nangaffu yaya anna nofu i kalabanna. (Uk. 11:32, 33) Ngem sinni i meyawa nga “matuggi nga tavvung” ta Dios?

13, 14. Kunnasi nga nipasingan ni Jefte i pangurugna ta kinagina ta Ukum 11:35?

¹³ Nonopammu i eksena ta gafu na artikulo. Turi ta nattoli si Jefte naggafu ta gerra, awan tu tanakuan nga ziminafung sa nu ari i tattadday nga anana! Tatun ngana yaya nga mapurueban. Talakkuruganna kari i nitabbana anna iyawana i anana tapenu masserbi ta tabernakulo ta interu nga pattolena?

¹⁴ Negiya mangana yaya na prinsipio ira na Biblia tapenu makapaddesision tu fustu. Awayyana nga nanonona i Exodo 23:19, nga nangituddu ta totolay na Dios tu sigga-paran nga iyawada i ngamin nga mawayyada kani Jehova. Nelagum gapa ta Dob nga nu nangitabba i tadday nga tolay, obligadu nga tuppalanna yatun. Kagianna: “Nu nappromesa i tadday nga tolay kani Jehova . . . , arianna nakuan ibabawi i kinagina. Kuanna nakuan i ngamin nga nipromesana.” (Num. 30:2) Kagitta na matalo nga si Hana, nga awayyana tu kakontemporariona, mawag nga talakkurugan ni Jefte i tabbana, maski ammuna i mesimmu sa anna ta anana. Tattadday i anana; yatun nga anana ngana laman i iddanamana tapenu maggaka yaya anna ari mawawan i ngaganna anna i rensiana ta Israel. (Uk. 11:34) Ngem mabibbig ta Ukum 11:35 nga kinagi ni Jefte: “Nevuka ku ngana i simu ku kani Jehova, anna ariakku ngana mawayya nga ibabawi.” Megafu ta pammakatalona, nalawana i fabor anna i bendision ni Jehova maski nu dakal i nisakrifisiona. Kunnatun kari gapa i kuammu?

15. Anni i nitabba na aru nittam, anna kunnasi tam mapakurug nga matalo tam?

¹⁵ Turi ta naddedika tam kani Jehova, nitabba tam nga napafutuan nga kuattam i urena. Kawagan i sakrifisio tapenu matuppal tam yatun nga promesa. Ngem, mapurueban nu talaga sigga-paran ittam nu mekiddaw nga kuattam i ganna-gannug nga manaki tam ta gafuna. Ngem nu massakrifisio tam anna masserbi kani Jehova maski nu mariga, mapakurug tam nga matalo tam. Mas dakal i bendision nga malawà tam anne ta nisakrifisio tam, maski nu anni zigana yatun. (Mal. 3:10) Ngem kunnasi gapa ta ana ni Jefte?

16. Anni i reaksion na ana nga babay ta promesa na yamana nga si Jefte? (Innan i letratu ta gafu na artikulo.)

¹⁶ Awayyana nga mariga para ta ana ni Jefte nga alawatan i resulta na nitabba na yamana. Neruma yaw ta nitabba ni Hana, nga nidedikana si Samuel nga anana tapenu masserbi nga Nazareo ta tabernakulo. (1 Sam. 1:11) Awayya mangatawa anna maffamilia i tadday nga Nazareo. Ngem interu nga “matuggi nga tavvung” i ana ni Jefte yari tu arianna ngana vuluvuga mapurueban yatun ira nga pagayaya. (Uk. 11:37-40) Megafu ta ana yaya na malalaki nga lider na Israel, awayyana nga meyatawa nakuan yaya ta pinakamalalaki ta lugarda. Ngem masserbi ngana laman yaya ta tabernakulo. Anni i kingngua na maginganay? Nipoppolluna i passerbi kani Jehova. Kinagina: “Ammò, nu vinukatammu i simùmu kani Jehova, kuammu niakan i kagitta na nipromesam.” (Uk. 11:36) Nisakrifisiona i negagangay nga pakkaragana nga makitawa anna magana para ta paddayarayaw. Kunnasi tam maparigan yatun nga passakrifisio?

17. (a) Kunnasi tam maparigan i pangurug ni Jefte anna na anana? (b) Kunnasi ka mapagaram na Hebreo 6:10-12 nga massakrifisio?

¹⁷ Rinivu nga bagitolay anna maginganay nga Cristiano i nassakrifisio nga ari labbi nga maki-atawa onu makka-ana tapenu makapasserbi tu mapia kani Jehova. Awayyana gapa nga isakrifisio na manakam ira i tiempo na pakikavuluda ta anada anna ta afù onu afukuda tapenu makapattrabahu ta proyekto ira ta konstruksion ta organisasion onu magiskuela ta School for Kingdom Evangelizers anna masserbi ta lugar nga dakal i pakawagan. Isakrifisio na tanakuan i personal nga interesda tapenu makapasserbi ira ta kampania ta tiempo na Memorial. Mamagayaya kani Jehova i kunnatun nga napafutuan nga passerbi, anna arianna vuluvuga nga kattamman i kingnguada anna i aya nga nipasingadda para sa. (Bibbigan i Hebreo 6:10-12.) Egga kari paga i mawayyam nga isakrifisio tapenu mas makapasserbi ka tu mapia kani Jehova?

LEKSION IRA

18, 19. Anni nagigiammu tam meyannung kani Jefte anna ta anana, anna kunnasi tam ira maparigan?

¹⁸ Maski nu aru i mariga nga nappasan ni Jefte, nipamavulunna nga igiya ni Jehova i paddesisionna. Nilillitanna i influwensia ira ta pallevuna. Ari nga nakkafi i determinasionna nga mattalupaddian nga matalo megafu ta pakkadismaya nga kingngua na tanakuan. Nabendisionan yaya megafu ta sigga-paran nga passakrifisiona anna na anana. Inusa ira ni Jehova para ta marenu nga paddayarayaw. Ta tiempo nga pinanawan na karuan i estandarte na Dios, pinattalupaddian yatun ni Jefte anna na anana.

¹⁹ Ipagaram na Biblia nittam nga ‘parigan lallagu danuri i maninaga noka ta nitabba na Dios, megafu ta angngurug anna pasensia da.’ (Heb. 6:12) Parigattam nakuan si Jefte anna i anana gukaban na pattolay mekunnay ta importante nga kinakurug nga masingan ta pattoleda: Faboran na Dios danuri matalo.