Tulu-tuloy Kari Paga nga Ulian na Biblia i Pattolem?

1-3. (a) Anni ira nga panguli i awayyana tu marigatattam nga kuan kabalin na bawtismo? (b) Nu marigatattam nga manguli, anni ira i ipakkiavu tam? (Innan i letratu ta gafu na artikulo.)

TURI ta nammuan ni Kevin^[1] i kinakurug, awan tu tanakuan nga kayàna nu ari i maddukko kani Jehova. Ngem aru nga dagun nigena yatun, minassugal, minassigariliu, minaggillellaw, anna maddroga yaya. Tapenu malawà ni Kevin i fabor ni Jehova, mawag tu iyemmanna yaw ira nga annangngua nga mekontra ta Biblia. Nakuana yatun gukaban na pattalona kani Jehova anna ta pakapangngua na Biblia nga ulian i pattolay.—Heb. 4:12.

² Kabalin na bawtismona, nagimmang ngana kari nga manguli si Kevin? Ari, megafu ta mawag tu pakastanna paga i kualidadna ira bilang Cristiano. (Efe. 4:31, 32) Angngariganna, nammuanna nga kuruga mariga nga gaggaddan i papporena. Inamin ni Kevin, “Mas mariga para niakan nga fugaddan i pappatu na ulù, anne ta pangiyemmakku ta bisiù ira!” Nanguli yaya gukaban na napafutuan nga pakimallo anna malappo nga paggigiammu ta Biblia.

³ Kagitta ni Kevin, aru nittam i daka-dakal i inulina ta pattolena nige na bawtismo tapenu mattolay nga mekunnay ta importante ira nga ikikkiddaw na Biblia. Kabalin na bawtismo, nalippawa tam nga kawagan nga tulu-tuloy i panguli tam ta mas baraddi nga ganna-gannug—tapenu mas maparigattam i Dios anna si Cristo. (Efe. 5:1, 2; 1 Ped. 2:21) Awayyana nga natageno tam nga minakkritika tam, maganassing ittam ta tolay, egga tendensia tam nga mangi-tsismis, onu tanakuan paga nga pakkafiattam. Mas mariga kari anne ta pagabbo tam i panguli meyannung taw ira nga gannug? Nu wan, baka manonomu: ‘Nu dakal ngana i kingnguà nga panguli, ngatta marigatannà nga mangitulu-tuloy nga ulian i baraddi ira nga gannug? Kunnasì nga mas mapamavulunan i Biblia nga ulian i pattolè?’

MABBALIN TU REALISTIKO

4. Ngatta ariattam mapagayaya si Jehova ta ngamin nga kukukuattam?

⁴ Sittam nga makannammu anna mangaya kani Jehova, karagatattam nga napafutuan nga kuan i anni laman nga makapagayaya sa. Ngem maski nu kurug tu napafutuan yatun nga pakkaraga, ariattam kanayun nga mapagayaya i Dios megafu ta imperfekto tam. Kagitta tam i situasion ni Pablo nga nattura: “Ta maski nu karagatak-ku i mangngua ta mapia, ariaku-ku makua.”—Roma 7:18; Sant. 3:2.

5. Anni ira i inuli tam nige nga nabawtisowattam, ngem anni ira nga pakkafian i awayyana nga tulu-tuloy nga labanattam?

⁵ Inalsa tam ngana i marake ira nga annangngua nga makefugag nittam nga mabbalin tu Cristiano. (1 Cor. 6:9, 10) Maski nu kunnatun, imperfekto tam lagapa. (Col. 3:9, 10) Yari tu ari nga realistiko nga ekspektan nga kabalin na bawtismo—onu ta pappasa na aru nga dagun ta kinakurug—ari tam ngana makaliwa, mapproblema, onu mapeggan tu marake nga motibo anna pakkaraga. Awayyana nga mattulu-tuloy i karuan nga tendensia maski ta pappasa na daga-ragun.

6, 7. (a) Ngatta posible nga makikofuttam kani Jehova maski nu imperfekto tam? (b) Ngatta ariattam nakuan mabbabang nga makkiddaw tu pamakoma ni Jehova?

⁶ Ari tu makefugag ta makapagayaya nga pakikofuttam onu passerbi kani Jehova i narensia tam nga kina-imperfekto. Ikonsidera yaw: Turi ta pinamavulunan ni Jehova nga makikofuttam sa, ammuna nga egga tiempo nga makaliwa ittam. (Juan 6:44) Megafu ta ammu na Dios i ugu-ugali anna naddian na futu tam, siguradu nga ammuna nu anni nga imperfekto nga tendensia i talaga papproblemattam. Ammuna nga egga tiempo nga makaliwa ittam. Maski nu kunnatun, ari nga nakefugag yatun sa nga makikofun nittam.

⁷ Aya i namaguyu ta Dios nga mangiyawa nittam tu nabalor nga regalu—i sakrifisio nga tavvu na ideddukanna nga Ana. (Juan 3:16) Megafu taw nga nabala-balor nga probision, siguradu nga ari magatta i pakikofuttam kani Jehova nu mabbabawi anna kiddawattam i pamakomana. (Roma 7:24, 25; 1 Juan 2:1, 2) Ariattam kari kayà nga malawà i benefisio na tavvu megafu ta matageno tam nga madaping anna minakkaliwa tam? Siempre ari! Ta nu kunnatun, gittana manaki tam i mabbaggaw nu nadapingan i lima tam. Neyawa gamma gapa i tavvu para ta mabbabbabawi ira nga nakaliwa. Megafu ta tavvu, awayya tam makikofun kani Jehova maski nu imperfekto tam.—Bibbigan i 1 Timoteo 1:15.

8. Ngatta mawag tu ariattam pagurayan ngana laman i pakkafiattam ira?

⁸ Siempre, ariattam nakuan pagurayan ngana laman i pakkafiattam. Kasali ta pakikofun kani Jehova i pappursigi tam nga parigan yaya tu mapia anna si Cristo, nga mabbalin tu klase na tolay nga kayàda nga pabbalinattam. (Sal. 15:1-5) Kasali gapa tatun i pappursigi tam nga kontrolan i kina-imperfekto tam, onu interamente nga pawanan yatun nu posible. Maski nu nabayag onu bagu tam laman nabawtisowan, mawag tu tulu-tuloy nga ‘kuattam i adde na awayya tam nga mabbalin tu awan tu pakkurangan.’—2 Cor. 13:11.

9. Ngatta makagi tam nga tulu-tuloy nga mesinnuttam i bagu nga personalidad?

⁹ Kawagan i tulu-tuloy nga pappursigi tapenu ‘mabbalittam nga awan tu pakkuranganna’ anna ‘matalibagu i kata-katoletam.’ Niperaddam ni Pablo ta kapangngurugna: “Arian nu gafu i dana nga kata-katolay nu, nga negafuan na marakay nga pangnga-pangngua nu anna nangilogo nikamu megafu ta marakay ira nga kinaragatan nu. Talibaguan nu i appana-panono anna affutu-futu nu. Mawag tu egga nikamu i natalibagu nga kata-katolay nu nga naparo ta kasissinnan na Dios. Yaw ay mepasingan ta kurug nga attolay nga matunung anna masanto.” (Efe. 4:22-24) Kawagan i tulu-tuloy nga proseso tapenu ‘matalibagu i appana-panono anna affutu-futu.’ Makapagaram yaw ta ipasiguraduna nittam nga maski nu kunnasi kabayag tam ngana massesserbi kani Jehova, awayya tam paga nga mapprogreso ta pangipasingan anna ta pappakasta ta kualidad tam bilang Cristiano. Yatun i makoffun tapenu matalibagu i kata-katoletam. Wan, mawayya na Biblia nga tulu-tuloy nga ulian i pattoletam.

NGATTA KURUGA MARIGA YATUN?

10. Anni i mawag nga kuattam tapenu tulu-tuloy tam nga manguli gukaban na Biblia, anna anni ira i awayya tam ipakkiavu?

¹⁰ Mawag nga mappursigi tam nu ipamavuluttam nga tulu-tuloy nga ulian ittam na Uvovug na Dios. Ngem ngatta kawagan nga mappursigi tam? Nu bebbendisionan ni Jehova i pappursigi tam, ari kari tu malogon ngana laman i mapprogreso ta espiritual? Arianna kari awayya nga pawanan ngana laman ni Jehova i pakkafiattam ira tapenu ariattam ngana marigatan nga ipasingan i makadios ira nga kualidad?

11-13. Ngatta ekspektan ni Jehova nga mappursigi tam nga labanan i pakkafiattam?

¹¹ Nu innattam i uniberso, malippawa tam nga daka-dakal i pakapangngua ni Jehova. Angngariganna, kada segundo, mabbalin tu enerhiya i lima million nga tonelada nga substansia na bilag. Maski nu baddi laman i makadde ta davvun, makalanno ngana i patuna yatun nga massustini ta inango ta davvun. (Sal. 74:16; Isa. 40:26) Magayaya si Jehova nga mangiyawa tu mepangngo nga pakawayya ta totolay nga aripanna nu kawagan. (Isa. 40:29) Wan, awayyana paga lagu i mangiyawa tu sikan nittam tapenu malabanan i kada pakkafiattam maski nu awan pulus tu kuattam onu maski ari makagigiammu ta nakaliwatattam. Ngem ngatta arianna kuan yatun?

¹² Nangiyawa nittam si Jehova tu awan tu kagittana nga regalu—i lallaguray nga mappili. Nu piliattam nga kuan i uray na Dios anna nu mappursigi tam nga kuan yatun, mepasingattam i konag na aya tam kani Jehova anna i pakkaraga tam nga mapagayaya yaya. Mepasingattam gapa i suporta tam ta pammagurena. Kinuestion ni Satanas i kepangngattan ni Jehova nga mammaguray. Yatutta siguradu nga kuruga appresian na masippo nga Yama tam ta langi i sigga-paran anna mafuersa nga pappursigi tam tapenu suportan i kepangngattanna nga mammaguray. (Job 2:3-5; Prov. 27:11) Ngem nu ipamavulun ni Jehova nga ariattam ngana kawagan i appursigi nga labanan i pakkafiattam tapenu mapagayaya yaya, awan tu serbi na pamakurug tam ta kinamatalo anna i suporta tam ta soberaniana.

¹³ Yatun i rason nu ngatta ikakkagi ni Jehova nga ‘kuattam i adde na awayya tam’ tapenu mepasingan i makadios ira nga kualidad. (Bibbigan i 2 Pedro 1:5-7; Col. 3:12) Ekspektanna nga mappursigi tam nga kontrolan i appana-panono anna i panageno tam. (Roma 8:5; 12:9) Nu napafutuan nga kuattam yatun, magayaya tam nga makasingan nu tulu-tuloy nga ulian paga na Biblia i kata-katoletam.

IPAMAVULUN NGA TULU-TULOY NGA ULIAN ITTAM NA BIBLIA

14, 15. Anni ira i makua tam tapenu mepasingattam i makadios ira nga kualidad nga kayà ni Jehova? (Innan i kahon nga “Inuli na Biblia Anna Pakimallo i Pattoleda.”)

¹⁴ Anni i makua tam tapenu mepasingattam i makadios ira nga kualidad anna mapagayaya si Jehova? Ari makalanno i pappursigi tam laman tapenu mapprogreso. Mawag nga tulu-tuloy nga mappursigi tam anna tuttulan i instruksion ira na Dios. Kagian na Roma 12:2: “Arian nu nga tuttulan i annangngua na totolay toye ta utun na davvun. Ngem ipamavulun nu tu ulian na Dios i affutu-futuan nu gafu ta katalibagu na appana-panono nu. Ay kannammuan nu i uray na Dios—nu anni i mapia, i makapagayaya sa, anna i awan tu pakkurangan na.” Gukaban na Uvovug anna masanto nga espiritu ni Jehova, u-uffunanna ittam nga alippawatan i urena, kuan yatun, anna ulian i pattoletam nu kawagan tapenu makua tam i ikikkiddona ira. Kasali tatun i inaggaw nga pabbibbig tu Biblia, monag nga pannonono ta Katurakan, anna pangipakimallo ta masanto nga espiritu. (Luc. 11:13; Gal. 5:22, 23) Durante nga mappegiya tam ta masanto nga espiritu ni Jehova anna parigattam i pagimammana, mabbalin tu mas makadios i appana-panono, kakkagian, anna kukukuattam. Ngem kawagan lagapa nga mappursigi tam nga labanan i pakkafiattam.—Prov. 4:23.

¹⁵ Fuera ta inaggaw nga pabbibbig tu Biblia, kawagan nga gigiammuattam i Uvovug na Dios anna i publikasiottam ira nga gakkag tam nga parigan i makakkasta ira nga kualidad ni Jehova. Nasingan na karuan nga praktikal i makkolekta tu artikulo ira ta Passifusifutan onu Gumising! anna sinaggi-mittan nga repasuan yatun anna i teksto ira nga makoffun tapenu mepasingan i kualidad ira na Cristiano onu tapenu malabanan i partikular nga pakkafian.

16. Ngatta ari nakuan makkafi i nono tam nu ariattam insigida makakua tu panguli?

¹⁶ Nu gittana mabayag i papprogresom ta espiritual, daddammammu nga kawagan i aru nga tiempo. Tulu-tuloy nga proseso i pangipasingan tu nespirituan nga kualidad. Mappasa-pasensia tam nakuan nu ipamavuluttam nga tulu-tuloy nga ulian na Biblia i pattoletam. Ta ollu, awayyana tu kawagan nga disiplinattam i baggi tam tapenu makua i fustu segun ta Biblia. Ngem sonu kua, ariattam ngana marigatan anna normal ngana laman i mappanono anna magguyu mekunnay ta estandarte ni Jehova nga Dios.—Sal. 37:31; Prov. 23:12; Gal. 5:16, 17.

DADDAMMAN I MAKAKKASTA IRA NGA IDDANAMA TAM

17. Nu matalo tam kani Jehova, anni i makakkasta nga iddanama tam?

¹⁷ Mapeggan noka i matalo ira nga aripan ni Jehova tu pribilehio nga mabbalin tu perfekto anna mannanayun nga maddayarayaw sa. Tatun nga tiempo, ari ngana nga mariga i pangipasingan tu makadios ira nga kualidad—kanayun ngana noka nga makapagayaya nga kuan yatun. Mapia ngana laman ta egga i tavvu. Megafu tatun, napamavulunattam nga dayawan i minaggiddu nga Dios tam. Maski nu imperfekto tam, makua tam lagapa yatun nu ipamavuluttam nga ulian na Biblia i kata-katoletam.

18, 19. Ngatta makasiguradu tam nga tulu-tuloy nga ulian na Biblia i pattoletam?

¹⁸ Si Kevin nga nakagi ta gafu, ay nappursigi tapenu makontrolna i gazzina. Monag nga pinana-panono anna niyaplikana i prinsipio ira na Biblia. Inalawàna gapa i uffun anna tabarang na kapangngurugna ira. Kabalin na piga ragun, dakal ngana i nangulian ni Kevin. Turi kua, nabbalin yaya tu ministerial nga aripan, anna ta nappasa nga 20 dagun, massesserbi ngana yaya nga elder. Maski nu kunnatun, umanugu yaya nga kawagan i kanayun nga pappursigi tapenu ari nga makkafi i espiritualidadna.

¹⁹ Ipasingan na ekspiriensa ni Kevin nga makoffun i Biblia tapenu mapakasta na aripan ira na Dios i pattoleda. Ariattam gafu magimmang nga mangipamavulun ta Uvovug na Dios nga ulian i kata-katoletam anna mas iyaranni ittam kani Jehova. (Sal. 25:14) Nu masingattam nga bebbendisionan ni Jehova i pappursigi tam, mas masiguradu tam nga tulu-tuloy paga nga ulian na Biblia i pattoletam.—Sal. 34:8.