Daralan i Kada Falsu nga Parrasa-rason nga Kontra ta Pakannammu ta Dios!

1. Anni i nitabarang ni apostol Pablo ta nazelugan ira nga Cristiano?

“ARIAN nu nga tuttulan i annangngua na totolay toye ta utun na davvun.” (Roma 12:2) Nitura ni apostol Pablo danatun nga uvovug ta ollu-siglo ira nga Cristiano. Ngatta kunnatun ngana laman kadammo i tabaranna ta lallaki anna babbay nga dedikadu ngana ta Dios anna nazelugan tu masanto nga espiritu?​—Roma 1:7.

2-3. Kunnasi ittam iyarayyu ni Satanas kani Jehova, ngem kunnasi tam mabattul i gannug ira nga ‘maladda i nikepataddagna’ ta nono tam?

² Mavurung si Pablo megafu ta iinfluwensian ngana na makadaral nga ideya na mundo nga kontroladu ni Satanas i karuan nga Cristiano. (Efe. 4:17-19) Posible gapa nga mesimmu yatun ta maski sinni nittam. Desperadu ngana i dios naw nga sistema na ganna-gannug nga si Satanas nga iyarayyu ittam kani Jehova, yari tu usanna i ngamin nga taktika tapenu influwensian ittam. Angngariganna, nu kayà tam i mabbalin tu importante onu sikat, usanna yatun tapenu iyarayyu ittam kani Jehova. Awayyana gapa usan i karuan nga aspeto na naggafuattam, kultura, onu edukasion tapenu megitta i appana-panono tam nisa.

³ Posible kari nga mabattul i gannug ira nga ‘maladda i nikepataddagna’ ta nono tam? Innan i tabbag ni Pablo: ‘Daralammi i falso ira nga parrasa-rason; ariammi i anni laman nga pappara-parayag nga makagurun ta pakannammu ta Dios, anna patulukammi ngamin i appana-panono tapenu makimoray ira kani Cristo.’ (2 Cor. 10:4, 5) Wan, gukaban na uffun ni Jehova matalibagu tam i mali ira nga appana-panono. Nu kunnasi nga malsa na uru i marake nga efekto na zita, uffunan ittam gapa na Uvovug na Dios tapenu malsa i marake nga efekto na mundo ni Satanas.

‘TALIBAGUAN I APPANA-PANONO NU’

4. Anni ira i inuli tam turi ta nagigiammu tam nu anni talaga i ituttuddu na Biblia?

⁴ Nonopan i gannug ira nga inulim turi ta nagigiammum nu anni talaga i ituttuddu na Biblia anna turi ta naddesisiokka nga masserbi kani Jehova. Tapenu makapasserbi kani Jehova, mawag tu iyemmang na aru nittam i pangngua ta marake nga gannug. (1 Cor. 6:9-11) Kuruga mappabalo ittam megafu ta zinuffunan ittam ni Jehova nga iyemmang danaw nga marake nga gannug!

5. Anni i dua nga gannug nga mawag tam kuan segun ta Roma 12:2?

⁵ Ngem, ariattam nakuan vuluvuga nga makkampante. Maski paga niyemmattam ngana i pagangngua ta madammo ira nga liwa nga dati nga kukukuattam nige na bawtismo, mawag tam lagapa nga mappursigi nga lillitan i maski anni nga manenta nittam nga manoli ta dati ira nga kukukuattam. Kunnasi tam makua yatun? Kinagi ni Pablo: “Arian nu nga tuttulan i annangngua na totolay toye ta utun na davvun. Ngem ipamavulun nu tu ulian na Dios i affutu-futuan nu gafu ta katalibagu na appana-panono nu.” (Roma 12:2) Yari tu dua i mawag tam nga kuan. Ollu, mawag tu ‘ariattam nga tuttulan’ i mundo onu mappa-influwensia tatun. Mekadua, mawag tu ‘uliattam i affutu-futuattam’ gukaban na pattalibagu ta appana-panono tam.

6. Anni i magigiammu tam ta kinagi ni Jesus ta Mateo 12:43-45?

⁶ I panguli nga tukuyan ni Pablo ay ari laman tu i panguli na itchura. Afektan natun i interu nga kata-katoletam. (Innan i kahon nga “Nanguli onu Nammaskara?”) Mawag tu talibaguattam i appana-panono tam​—i kononaggan nga disposisiottam, mataga-tageno, anna pakkaraga tam. Yayya nga mawag tu iyavu tam ngamin ta baggi tam, ‘I panguloli kari nga kukukuakku tapenu mabbalin tu Cristiano ay afektanna laman i masingi-singan na tolay niakan ta lawan, onu talaga Cristiano ngà ta futù anna ta appana-panono ku?’ Ta rekord na Mateo 12:43-45, kinagi ni Jesus nu anni i mawag nga makua. (Bibbigan.) Tudduan ittam natun tu importante nga leksion: Kurang i basta pangalsa ta marake nga appana-panono; mawag tam talianan danatun tu makadios nga appana-panono.

“TALIBAGUAN NU I APPANA-PANONO ANNA AFFUTU-FUTU NU”

7. Kunnasi tam ulian i appana-panono anna affutu-futu tam?

⁷ Posible kari nga ulian i negagangay ira nga pakkaraga tam onu i kata-katoletam? Wan. Kagian na Biblia: “Talibaguan nu i appana-panono anna affutu-futu nu. Mawag tu egga nikamu i natalibagu nga kata-katolay nu nga naparo ta kasissinnan na Dios. Yaw ay mepasingan ta kurug nga attolay nga matunung anna masanto.” (Efe. 4:23, 24) Yari tu posible nga moli i kata-katoletam ngem ari tu mabi yatun. Ari laman tu pallilli ta mali ira nga pakkaraga anna pangiyemmang ta pagangngua tu marake i mawag tam nga kuan. Mawag tu uliattam i ‘appana-panono anna affutu-futu tam.’ Nelagum tatun i panguli ta pakkaraga tam ira, i ugu-ugali tam anna i motibo tam nu ngatta kuattam i ganna-gannug. Mawag i kanayun nga pappursigi tatun.

8-9. Kunnasi nepasingan na ekspiriensa na tadday nga brother i pakawagan nga ulian i kata-katoletam?

⁸ Angngariganna, egga i tadday nga brother nga dati nga vayolente. Minaggillellaw yayya anna mahilig ta gulu, ngem nanguli yayya anna nappabawtiso. Makasta nga pamakurug i nepasinganna ta lugarda. Ngem tadday nga gabi, ari nabbayag kabalinna nga nabawtisowan, neparubang yayya ta kapurueba. Egga i nellaw nga lalaki nga minay ta balena anna inararuna yayya nga makissuntu. Ta gafu, gaggaggaddanna i baggina. Ngem turi ta dara-daralan ngana na lalaki i ngagan ni Jehova, arianna ngana nakontrol i porena. Nallawan yayya anna binubbugna i lalaki. Anni i problema? Maski paga noffunan yayya na paggigiammuna tu Biblia tapenu makontrol i tendensiana nga mabbalin tu vayolente, arianna paga noli i appana-panonona anna affutu-futuna. Kayàna kagian, arianna paga talaga noli i kata-katolena.

⁹ Ngem, nappursigi yaw nga brother nga manguli. (Prov. 24:16) Gukaban na uffun na elder ira, nattulu-tuloy i papprogresona. Nakualipika gabbalaman yayya nga mabbalin tu elder. Tapus tadday nga gabi, ta lawan na Kingdom Hall, neparubang mangana yayya ta parehu nga kapurueba gitta na naekspiriensana piga ragun ngana i nappasa. Egga i tadday nga nellaw nga lalaki nga maggi bubbuganna ngana i tadday ta elder ira. Anni i kingngua natun nga brother? Kalmadu anna masippona nga kinibbida i nellaw nga lalaki, pinakkalmana yayya, anna nitulugna paga ta baleda. Ngatta kunnatun ngana i reaksion natun nga brother? Noli ngana na brother i appana-panono anna affutu-futuna. Talaga nabbalin ngana yayya tu memammo anna minappakalinno nga tolay. Nakeyawa yatun tu dayaw kani Jehova!

10. Anni i mawag tu kuattam tapenu ulian i kata-katoletam?

¹⁰ Ari tu gavva onu automatiko nga mesimmu danaw nga panguloli. Baka mawag tu ‘kuattam i adde na awayya tam’ ta piga ragun. (2 Ped. 1:5) Ari nebase yaw nga panguli ta kabayag tam ngana nga massesserbi kani Jehova. Mawag tu kuattam i adde na mawayya tam tapenu ulian i kata-katoletam. Egga i importante ira nga gannug nga mawag tam kuan tapenu manguli ittam. Gigiammuattam i karuan taw.

NU KUNNASI TAM ULIAN I APPANA-PANONO ANNA AFFUTU-FUTU TAM

11. Kunnasi ittam uffunan na pakimallo nga ulian i appana-panono anna affutu-futu tam?

¹¹ Pakimallo i tadday ta importante nga makua tam. Parigattam i pakimallo na salmista: “Paratuammu niakan, O Dios, i marenu nga futu, anna iddammà tu bagu nga espiritu, yari i matuyag.” (Sal. 51:10, NW) Mawag tu rekunnisiattam nga mawag tam ulian i appana-panono anna affutu-futu tam anna mappoffun kani Jehova. Kunnasi ittam makasiguradu nga uffunan ittam ni Jehova tapenu manguli? Mapagaram ittam ta promesa ni Jehova ta matagga i uluda ira nga Israelita ta tiempo ni Ezekiel: “Iddakku ira noka tu napakatadday nga futu, anna ipè nira i bagu nga espiritu . . . anna iddakku ira tu pattag nga futu, [kebalinanna, futu nga alistu nga mappegiya ta Dios].” (Eze. 11:19; ftn.) Sigga-paran nga uffunan ni Jehova danatun nga Israelita nga manguli, anna sigga-paran gapa yayya nga uffunan ittam.

12-13. (a) Segun ta Salmo 119:59, anni i mawag tu monag nga pannonopattam? (b) Anni ira i iyavu tam ta baggi tam?

¹² Monag nga pannono i mekadua ta importante nga makua. Durante nga inaggaw nga bibbigattam tu mapia i Uvovug na Dios, mawag tu egga gapa i tiempo tam nga monag nga pannonopan danatun tapenu mammuattam i appana-panono anna panageno nga mawag tu uliattam. (Bibbigan i Salmo 119:59; Heb. 4:12; Sant. 1:25) Mawag tu ammuattam i maski anni nga tendensia tam nga mainfluwensian na kinasirib na tolay. Mawag tu akseptattam i pakkafiattam ira anna mappursigi nga alsan danatun.

¹³ Angngariganna, iyavu mu ta baggim: ‘Egga paga kari i maski baddi nga seniales na passil ta futù?’ (1 Ped. 2:1) ‘Matageno ku kari nga mas atannang ngà anne ta tanakuan megafu ta naggafuakku, edukasiokku, onu ta karu na kuartù?’ (Prov. 16:5) ‘Tagibadditakku kari i karuan megafu ta mas aru i material nga pakkukuà anne nira onu tanakuan i lahida?’ (Sant. 2:2-4) ‘Kakayà ku kari i gannug ira nga iyayawa niakan na mundo ni Satanas?’ (1 Juan 2:15-17) ‘Guggustù kari i imoral anna vayolente ira nga dibersion?’ (Sal. 97:10, ftn.; 101:3; Amos 5:15) I tabbag mu tatun ira nga pakkiavu ay awayyana nga mangipasingan tu gannug ira nga mawag mu nga ulian. Gukaban na panaral ta ‘maladda ira i nikepataddagna’ nga parrasa-rason ta futu tam, mapagayayya tam i nelangitan nga Yama tam.​—Sal. 19:14.

14. Ngatta importante i pappili tu mapia nga kokkofun?

¹⁴ Pappili tu mapia nga kokkofun i mekatallu nga mawag nga makua. Mapansin tam man onu ari, dakal i influwensia na kokkofuttam. (Prov. 13:20) Ta trabahu onu ta eskuela, awayyana nga napalevutan ittam na totolay nga ari makoffun nittam tapenu mapeggan tu makadios nga appana-panono. Ngem, makaleg ittam tu kapianan nga kakavvulu ta study tam ira. Tatun ay mapaguyu, onu mapagaram ittam ta “pangngua ta mapia.”​—Heb. 10:24, 25.

“PASIKANNAN NU I ANGNGURUG NU”

15-16. Kunnasi nga ulian ni Satanas i appana-panono tam?

¹⁵ Daddamman nga determinadu si Satanas nga ulian i appana-panono tam. Usu-usanna i ngamin nga klase na parrasa-rason tapenu daralan i makasta nga influwensia na Biblia ta appana-panono tam.

¹⁶ Parehu lagapa nga istilo na pakkiavu i usu-usan ni Satanas gitta na pinakkiavuna kani Eva ta hardin na Eden: “Kurug kari nga kinagi na Dios nga . . . ?” (Gen. 3:1) Ta mundo nga kontroladu ni Satanas, maruddu nga makaginna ittam tu pakkiavu nga mamadduda ta kuru-kurugattam, gitta na: ‘Kurug kari nga manaki na Dios i parrelasion na makka-sekso? Kurug kari nga manaki na Dios nga masselebra ka tu Krismas anna birthday ira? Kurug kari nga ekspektan na Dios nga pammanakitammu i pappatubbo tu daga? Kurug kari nga ikiddaw na meddu nga Dios nga ibitam i makikavulu ta nadisfellowship ira nga iddeddukammu?’

17. Anni nakuan i kuattam nu egga i pakkiavu nga mamadduda ta kurugattam ira, anna anni i resultana segun ta Colosas 2:6, 7?

¹⁷ Mawag tu kumbinsidu ittam ta kurugattam ira. Nu ariattam malegan i tabbag ira ta importante nga pakkiavu meyannung ta pangurug tam, awayyana nga madduda ittam ngana nu kurug i pangurug tam. Awayyana nga killuan na kunnatun ira nga padduda i appana-panono tam anna daralanna i pangurug tam. Anni gafu i mawag tam nga kuan? Kagian na Uvovug na Dios nga talibaguattam i nono tam, tapenu mapakurug tam ta baggi tam ‘i mapia, i makapagayayya, anna i awan tu pakkuranganna nga uray na Dios.’ (Roma 12:2) Gukaban na regular nga paggigiammu, mapakurug tam ta baggi tam i kinakurug ira nga nagigiammu tam ta Biblia. Makasiguradu ittam nga fustu i estandarte ira ni Jehova. Megitta ittam gafu ta kayu nga maladda i gamuna, megamu ittam tu mapia, anna ‘massikan i pangurug tam.’​—Bibbigan i Colosas 2:6, 7.

18. Anni i makoffun tapenu maprotektan ittam kontra ta marake nga efekto na mundo ni Satanas?

¹⁸ Sittam lagapa i puede nga mamasikan ta pangurug tam, yari tu itulu-tuloy tam nakuan nga talibaguan i appana-panono anna affutu-futu tam. Kanayun nga makimallo anna ipakimemallo i uffun na espiritu na Dios. Monag nga mannono anna kanayun nga usitakkan i appana-panono mu anna i motibom. Mappili tu mapia nga kokkofun anna palevutammu i baggim tu totolay nga manguffun nikaw nga talibaguan i appana-panono mu. Nu kuammu yatun, malabanammu anna maprotektammu i baggim ta marake nga efekto na mundo ni Satanas anna mavviktoria ka ta panaral ta ‘falso ira nga parrasa-rason anna i anni laman nga pappara-parayag nga makagurun ta pakannammu ta Dios.’​—2 Cor. 10:4, 5.