Ipammakatalo Kani Jehova Ngamin nga Kavurungannu

1, 2. (a) Ngatta ariattam ngana mattaka nu mavvuru-vurung ittam? (Innan i letratu ta gafu na artikulo.) (b) Anni i ikonsidera tam taw nga artikulo?

MATTOLAY ittam ta mariga ira nga tiempo. Sobra i gazzi ni Satanas anna “mallelevu nga kagitta na mangngana-nganangngar nga leon nga magaleg ta kanan na.” (1 Ped. 5:8; Nep. 12:17) Yatutta ariattam ngana mattaka nu maski sittam nga aripan na Dios ay mavvuru-vurung. Nu mittan, egga ira i aripan na Dios ta nappasa kagitta ni Patul David, nga “mavuru-vurung” i futuna. (Sal. 39:3) Daddamman gapa si apostol Pablo nga ‘ari makapagimammo ta agga-nonona ngamin i iglesia onu kongregasion ira.’ (2 Cor. 11:28) Ngem anni i kuattam nu matavvunan ittam na pavvuru-vurung?

² Inuffunan na nelangitan nga Yama tam i aripanna ira gari, anna posible gapa nga mabanna-bannayattam ta maddaggun ta ziga-riga anna pakavurungan. Ipagaram na Biblia nittam: ‘Ipammakatalo nu sa ngamin i kavurungan onu problema nu ta yaya i manangngal nikamu.’ (1 Ped. 5:7) Ngem kunnasim makua yatun? Innattam i appa nga gannug tapenu marubang i pakavurungan—napafutuan nga pakimallo, pabbibbig ta Biblia anna monag nga pannono tatun, pakkiddaw tu masanto nga espiritu ni Jehova, anna pangikagi ta mataga-matageno ta mapammakatalakkan nga kofummu. Ta pangusito tam taw ira, innan i praktikal ira nga makuam tapenu mapprogreso.

IPAMMAKATALONU KANI JEHOVA I VURU-VURUNNU IRA

3. Kunnasim ‘mepammakatalo ta Yafu’ nga Jehova i vuru-vurummu?

³ I ollu nga dakkua tapenu mepammakatalo kani Jehova i vuru-vurung ay gukaban na sinsero nga pakimallo. Nu meparubakka ta situasion ira nga kannerbios, kappaganassing, onu kavvuru-vurung, ivuvvumu i futum ta meddu nga nelangitan nga Yamam. Nakimemallo si David kani Jehova: “O Dios, ginnam-mu i pakimallo ku.” Kinagina paga ta parehu nga salmo: “Ipammakatalo mu ta YAFU i vuru-vurung mu ira, ay mala mu i pangiyegu na.” (Sal. 55:1, 22) Kabalimmu kingngua ngamin nga mawayyam, mas aru i metuppal na napafutuan nga pakimallo anne ta pavvuru-vurung. Ngem kunnasi makoffun nikaw i pakimallo tapenu malillitan i aru nga pakavurungammu anna nononopammu?—Sal. 94:18, 19.

4. Nu mavuru-vuruttam, ngatta importante i pakimallo?

⁴ Bibbigan i Filipos 4:6, 7. Tabbagan ni Jehova i sinsero, napafutuan anna pursigidu ira nga pakimallo. Kunnasi? Gukaban na pangiyawa nittam tu kurug nga imammo nga mangalsa ta pavvuru-vurung na nono at futu tam. Aru nga ekspiriensa i mamakurug tatun. Imbes nga mavvuru-vurung anna maganassing, uffunan ira na Dios tapenu mabbalin tu kalmadu anna mapeggan tu dakal nga imammo nga ari malippawa na tolay. Maekpiriensam gapa i kunnatun. Yatutta makoffun i ‘imammo na Dios’ tapenu malabanammu i maski anni nga meparubang nikaw. Makapattalo ka ta promesa ni Jehova: “Ari ka nga mavurung, ta sakan i Diosmu. Patuyaggattaka, wan, uffunattaka.”—Isa. 41:10.

IMAMMO NA NONO NGA NAGGAFU TA UVOVUG NA DIOS

5. Kunnasi mangiyawa tu imammo na nono i Uvovug na Dios?

⁵ I pabbibbig tu teksto ira ta Biblia anna monag nga pannonono tatun i mekadua nga kuan tapenu mapeggan tu imammo na nono. Ngatta importante yatun? Egga ira i pratikal nga giya ta espiritual nga makoffun tapenu malillitan, mapakarianan, onu marubang i kavurungan. Ariattam kattamman nga makabenefisio anna makapabannay i Uvovug na Dios megafu ta mabibbig tatun i masirib nga uvovug na Namaratu. Durante nga nononopammu i pagimamma na Dios—aggaw onu gabi—anna ikonsidera nu kunnasi kapianan nga usan i praktikal nga giya na Biblia, mapasikakka tu mapia. Nipasingan ni Jehova i koneksion na pabbibbig ta Uvovugna ta pabbalin tu ‘magutu anna masikan i nono’ imbes nga “makaddag onu maganassing.”—Jos. 1:7-9.

6. Anni i positibo nga efekto nikaw na uvovug ni Jesus?

⁶ Malegattam i makarefresko ira nga uvovug ni Jesus ta Biblia. Paggafuan na pamanna-bannay i uvovug anna tudduna ira ta maggigginna sa. Aru i minaranni sa megafu ta pinakalmana i mavuru-vurung nga giffutuan, pinasikan i makafi, anna binanna-bannayan i maraddam. (Bibbigan i Mateo 11:28-30.) Nangipasingan yaya tu meddu nga konsiderasion ta espiritual, emosional, anna pisikal ira nga kawagan na tanakuan. (Mar. 6:30-32) Meyaplika lagapa i nipromesa ni Jesus nga suporta. Kurug gapa yatun para nikaw kunne na gapa ta apostolesna nga nevulu-vulu sa. Ari kawagan nga aktual nga makavulu si Jesus tapenu mabenefisiowakka. Bilang nelangitan nga Patul, tulu-tuloy nga egga i empatia ni Jesus anna ipasinganna yatun. Yatutta nu mavurung ittam, sigga-allo nga “manguffun nittam ta tiempo na pagawag tam.” Wan, uffunannaka ni Jesus tapenu malampasammu i ziga-riga, anna pannuanna i futum tu iddanama anna sikan na nono.—Heb. 2:17, 18; 4:16.

MAKADIOS IRA NGA KUALIDAD NGA VUNGA NA MASANTO NGA ESPIRITU

7. Anni i kuan na Dios nu makkiddaw ka tu masanto nga espiritu sa?

⁷ Nipromesa ni Jesus nga ari maffaliu i nelangitan nga Yama tam nga mangiyawa tu masanto nga espiritu ta makkiddaw sa. (Luc. 11:10-13) Yaw i mekatallu nga gannug tapenu mapakarianan i pavvuru-vurung—i aspeto na vunga na masanto nga espiritu. Masingan i personalidad na makapangngua nga Dios taw nga positibo ira nga kualidad nga vunga na aktibo nga fuersa na Dios. (Bibbigan i Galacia 5:22, 23; Col. 3:10) Durante nga ipasa-pasingammu i vunga na masanto nga espiritu, mas makkasta i relasiommu ta tanakuan. Yatutta, mebitam i situasion ira nga posible nga mamavvurung nikaw. Nonopan nu kunnasi makoffun nikaw i vunga na masanto nga espiritu.

8-12. Kunnasi makoffun nikaw i aspeto ira na vunga na masanto nga espiritu nga arubangan onu malillitan i kavvuru-vurung ira nga situasion?

⁸ “Pangaya, pagayaya, imammo.” Nu mappursigi ka nga marespeto nga makilallang ta totolay, siguradu nga mas marubammu tu mapia i negatibo ira nga emosiommu. Kunnasi mesimmu yatun? Durante nga ipasingammu i aya, pattagibalor, anna dayaw ta wawwaragi, mebitam i kavvuru-vurung ira nga situasion.—Roma 12:10.

⁹ “Pappasensia, pia na affutu-futu, pia na pangnga-pangngua ta ikattolay.” Mapeggakka tu memammo nga relasion nu tuppalammu i tabarang: “Makka-alla-allo kamu lallagu, makka-iddu-iddu kamu, anna makkapaka-pakoma kamu.” (Efe. 4:32) Nu kuammu yatun, malillitammu i situasion ira nga mamavvurung. Mas marubammu tu mapia i situasion ira megafu ta kina-imperfekto na totolay.

¹⁰ “Kapasikkal” onu Pangurug. Ta maddaggun, maruddu nga mavurung ittam ta kuartu anna material ira nga pakkukua. (Prov. 18:11) Makoffun i masikan nga pangurug ta meddu nga panangngaw ni Jehova tapenu malabanan onu mebita i kunnatun nga kavurungan. Kunnasi mesimmu yatun? Malillitammu i kuruga pavvurung gukaban na nainspiran nga tabarang ni Pablo nga “makkontento kamu ta anni laman nga egga nikamu.” Kunna paga: “Ta kinagi na Dios, ‘Ariat-taka vuluvuga nga panawan ni et-taka nga pagurayan.’ Yatun tu awayya tam nga kagian nga sigga-ammakatalo, ‘I Yafu i manguffun niakan, awan tu ek-ku nga paganassingan. Anni i makua na tolay niakan?’”—Heb. 13:5, 6.

¹¹ “Pappakasippo, pangifugag ta baggi.” Nonopan nu kunnasi kapraktikal anna ka-efektibo para nikaw i pangipasingan tatun ira nga kualidad. Siguradu nga malillitannu i pagguyu ira nga personal nga makavurung nikamu, anna mabenefisiowakkamu gukaban na pangari ta “taki na nono nu, lussaw anna poray nu.” Kunna paga: “Ari kamu ngana nga makkakukkulle anna makkapara-parake.”—Efe. 4:31.

¹² Ngem kawagan i kinapakalinno tapenu meparipan ta “makapangngua nga Dios” anna ‘mekatalo sa ngamin i kavurungan nu.’ (1 Ped. 5:6, 7) Durante nga ipasa-pasingammu mapakalinno ka, siguradu nga marresulta yatun tu fabor anna suporta na Dios. (Mik. 6:8) Gukaban na realistiko nga pakannammu ta pisikal, mental, anna emosional ira nga abilidadmu, baddi i tiansa nga matavvunannaka na kavurungan, megafu ta mattalo ka ta Dios.

“ARIAN NU NGA KAVURUNGAN”

13. Anni i kayà kagian ni Jesus ta pakkagi: “Arian nu nga kavurungan?”

¹³ Ta Mateo 6:34 (bibbigan), mabibbig tam i tabarang ni Jesus: “Arian nu nga kavurungan.” Ngem, awayyana nga mariga kuan yatun nga tabarang. Anni i kayà kagian ni Jesus ta pakkagi tatun? Arianna kinagi nga ari maka-ekspiriensa tu kavurungan i aripan ira na Dios ta pattoleda; ammu tam nga nesimmu yatun kada David anna Pablo. Ngem uffunan ni Jesus i disipulosna nga malippawa nga ari makasolba tu problema i ari mepangngo, onu sobra nga pavvuru-vurung. Egga lagapa i problema ta kada aggaw, yari tu arianna kawagan na Cristiano ira nga ammungan i pavvuru-vurudda meyannung ta nappasa onu ta mappange ira nga problema. Kunnasim maekspiriensa i banna-bannay nu iyaplikam i tabarang ni Jesus ta sumosobra nga pavvurung?

14. Kunnasim arubangan i pakavurungammu ta nappasa?

¹⁴ Mavurung i tadday megafu ta nappasa ira nga kingngua onu kamalina. Awayyana nga makokkonsensia yaya maski ta kingnguana piga dagun ngana i nappasa. Egga i tiempo nga natageno ni Patul David nga ‘malaggabban yaya ta katagarulianna.’ Inaminna: “Maddaging ngà ta mataki i futù ngana.” (Sal. 38:3, 4, 8, 18) Tatun nga situasion, anni i masirib nga kuan ni David? Anni i kingnguana? Nattalo yaya ta allo anna pamakoma ni Jehova. Kumbinsidu yaya ta pakkagina: “Mapalag i tolay nga napakoma ta katagarulian na.”—Bibbigan i Salmo 32:1-3, 5.

15. (a) Ngatta ariammu nakuan pakavurungan i maddaggun? (b) Anni ira i kuammu tapenu ari kuruga mavurung? (Innan i kahon nga “Praktikal nga Makua Tapenu Ari Kuruga Mavurung.”)

¹⁵ Egga gapa i tiempo nga mavurukka ta maddaggun. Angngariganna, turi ta nitura ni David i Salmo 55, naganassing yaya ta peligro na inangona. (Sal. 55:2-5) Ngem, arianna nipamavulun nga madaral i pakkomfiansana kani Jehova. Maski nipakimemallo ni David i problemana ira, matindianna lagapa nga mawag tu egga ira i praktikal nga kuanna tapenu marubanna i paggafuan na pakavurunganna. (2 Sam. 15:30-34) Matudduan ta ehemplo ni David. Imbes nga ipamavulun nga matavvunan na pakavurungan, mangngua tu dakkua ira tapenu arubangan i situasion tapus ipammakatalo ngana i ganna-gannug kani Jehova.

16. Kunnasi makoffun i kebalinan na ngagan na Dios tapenu mapatuyag i pangurugmu?

¹⁶ Maruddu nga marresulta tu ari mepangngo nga pavvuru-vurung nu agga-nono na tadday nga Cristiano i posible ira nga problema ta mappange. Ngem ari kawagan nga malaggabbakka na vuru-vurung, onu konsumision, ta ganna-gannug ira nga ariammu ammu. Ngatta? Megafu ta ari gapa tu kunnari karake i mesimmu ta gittana inekspekta tam. Awan gapa tu situasion nga ari kontroladu na Dios nga pangitabbakkattam tu vuru-vurung. I kebalinan na ngagan na ay “Mawayyana nga Pabbalinan.” (Ex. 3:14) Alawa i kebalinan na ngagan na Dios, nga mamasiguradu nittam nga egga i kapasidadna nga tuppalan ngamin i gakkagna para ta aripanna ira. Makasiguradu ka nga bendisionan na Dios i matalo ira anna uffunan ira tapenu arubangan i vuru-vurudda ta nappasa, ta maddaggun, anna ta mappange.

NAPAFUTUAN NGA PAGUVOVUG

17, 18. Kunnasi makoffun i mapia nga paguvovug tapenu marubammu i vuru-vurung?

¹⁷ I meka-appa nga makua tapenu malabanan i pavvuru-vurung ay mapia nga paguvovug—i pangikagi ta mataga-matagenomu ta mapattalakkan nga kofun. Makoffun i atawam, madukko nga kofun, onu elder ta kongregasion tapenu malippawamu i problemam. “I pavvuru-vurung ta futu na tolay i mamakkummag sa, ngem i mapia nga uvovug i mamagayaya tatun.” (Prov. 12:25) Dakal i meyuffun nikaw na pakkagi tu kurug nga mataga-matagenomu tapenu malippawa anna marubammu i vuru-vurummu. Kagian nittam na Biblia: “Ari matuppal i plano nu awan tu paggararubang, ngem egga i metuppal gukaban na aru nga gumattabarang.”—Prov. 15:22.

¹⁸ Uffunan gapa ni Jehova i Cristiano ira nga arubangan i vuru-vurung gukaban na kada ligguan nga study ira. Tatun, maka-istoriam i kapangngurugmu ira nga mangikavurung nikaw anna mayà nga mamagaram ta kataggi-tadday. (Heb. 10:24, 25) Maketoli ta nawawan ira nga espiritual nga sikan i kunnatun nga ‘pakkapasa-pasikan ta angngurug’ anna mas alistum nga marubang i maski anni nga kavurungan.—Roma 1:12.

I RELASIOMMU TA DIOS —KADAKALLAN NGA SIKAMMU

19. Ngatta makapakkomfiansa ka nga pasikannannaka na relasiommu kani Jehova?

¹⁹ Ikonsidera tam nu kunnasi nagigiammu na tadday nga elder ta Canada i balor na pangitabbo tu vuru-vurung kani Jehova. I trabahuna bilang mestru anna guidance counselor ay makapa-stress anna mawag paga nga arubanganna i anxiety disorder-na. Kunnasina yaw nalabanan? “Pinaka-importante ta ngamin,” kunna, “nasingakku nga i pappursigi tapenu paladdan i relasion kani Jehova i pinakamasikan tapenu malabanan i emosional ira nga problema. Importante i suporta na kurug ira nga kofun anna wawwaragi ta tiempo na ziga-riga. Kakkagiakku ta atawà i fustu nga mataga-tageno ku. Dakal gapa i uffun na kasi-elder ku anna manangngal ta sirkito tapenu malippawa ku i ganna-gannug. Nappadoktor ngà, inulì i pangusa tu tiempo, anna nangiskediul ngà tu tiempo nga marrelaks anna ma-exercise. Sesenu nga kontroladù ngana i pattolè. Nu egga ira i gannug nga ariakku makontrol, ipammakatalo ku ngana yatun kani Jehova.”

20. (a) Kunnasi tam mepammakatalo ta Dios i vuru-vuruttam? (b) Anni i gigiammuattam ta tumunug nga artikulo?

²⁰ Nammuattam ngana i balor na pammakatalo tu vuru-vurung ta Dios gukaban na napafutuan nga pakimallo anna pabbibbig ta Uvovugna anna monag nga pannonono tatun. Nikonsidera tam gapa i importansia na pangipasingan tu aspeto na vunga na masanto nga espiritu, pakkagi ta mataga-tageno tam ta mapammakatalakkan nga kofun, anna pangà tu sikan ta study ira. Paguvovugan gapa ta tumunug nga artikulo nu kunnasi ittam paga nga moffunan ni Jehova gukaban na pangiyawa tu iddanama nga bendision.—Heb. 11:6.