1 | Pakimallo—“Ipammakatalo Nu Sa Ngamin i Kavurungan Nu”

KAGIAN NA BIBLIA: “Ipammakatalo nu [ta Dios] ngamin i kavurungan nu ta yaya i manangngal nikamu.”—1 PEDRO 5:7.

I Kayà Na Kagian

Ikaya ni Jehova nga Dios nga kagiattam ta nisa i anni laman nga kavurungattam. (Salmo 55:22) Awayya tam nga ipakimallo nisa i darakal onu baraddi nga problema tam. Nu importante yatun ta nittam, importante gapa yatun kani Jehova. Daka-dakal i makua na pakimallo tapenu mabbalin tu memammo i nono tam.—Filipos 4:6, 7.

Nu Kunnasi Yaw Makaduffun

Nu egga i mental nga taki tam, baka matageno tam nga magitetadday ittam. Nu mittan, ari nga malippawa tu mapia na totolay i pappasa-pasattam. (Proverbio 14:10) Ngem nu ipakimallo tam ta Dios i mataga-tageno tam, masippo yayya nga magginna anna malippawa na ittam. Masingi-singan ittam ni Jehova. Ammu na i taki nga mataga-tageno tam anna i ziga nga pappasa-pasattam, yari tu ikaya na nga ipakimallo tam nisa i anni laman nga pakavurungattam.—2 Cronicas 6:29, 30.

Nu makimallo ittam kani Jehova, massikan i pattalo tam nga iddeddukan na ittam. Matageno tam gapa i gitta na kinagi na salmista ta pakimallo na: “Ngamin i ziga-riga ku ay masingam-mu, anna ammum gapa i avvuru-vurung ku.” (Salmo 31:7) Gafu ta ammu tam nga masingi-singan ni Jehova i situasiottam, mas maattammattam i problema tam ira. Ngem ari na laman basta masingan i ziga-riga tam. Malippawa na i pappasa-pasattam anne ta maski sinni, yari tu banna-bannayan anna pasikannan na ittam gukaban na Biblia.

Naduffunan na Biblia si Julian

I Efekto Niakan na Anxiety Disorder Ku

“Egga i anxiety disorder ku anna obsessive-compulsive disorder (OCD). Gavva-gavva ngana laman nga makkubra i anxiety disorder ku. Angngarigan na, okay ngà sangawe ngem bibbinnay, gavva ngana laman saw nga mavuru-vurung ngà ngem kakku ammu nu ngatta. Mavuru-vurung ngà mas ngana nu egga ira i tolay. Mavurung ngà gare ta makagi da nio.

“Kanayun nga nakasuporta niakan i friends ku ira nga makannammu ta taki ku. Nu mittan, ari nga makaduffun i kakkagiadda, ngem appresiakku lapa i pangikavurung da.

“Marigatan ngà nu karuan nga makimallo megafu ta OCD anna anxiety disorder ku. Mappakariga ngà nga mac-concentrate anna makibbida kani Jehova ta pakimallo. Kakkaru nukua i manonono ku adde ta maguluan ngà ngana. Nu kakku ngana makontrol i nono ku, kakku ngana ammu i kagiakku kani Jehova.”

Nu Kunnasi Nà Naduffunan na Biblia

“Nagigiammù ta Biblia nga ari tu mawag nga apipiddu i pakimallo ku tapenu akseptan yatun na Dios. Nu mittan, nu kakku ngana ammu i kagiakku, ipakimallo ku ngana laman: ‘Jehova, duffunammà bi.’ Ngem maski nu kunnatun, ammù lapa nga malippawa nà ni Jehova anna tabbagan na i pakimallo ku. Fuera paga ta pakimallo, nappa-checkup ngà gapa. Gafu ta pakimallo anna uffun na doktor, nagimprove i kondisiokku. Pia ngana laman ta nappaduffun ngà ta nelangitan nga Yamà maski nu narigatan ngà. Natageno ku i pagiddu na anna nalawa ku i uffun na.”