Meraddammammu Kari?

Nabibbigmu kari tu mapia i nappasa ira nga isyu na Passifusifutan? Innammu nu matabbagmu yaw ira nga pakkiavu:

Anni nga klase na liwa i tinukoy ni Jesus ta tabaranna ta Mateo 18:15-17?

Tukuyanna i liwa nga awayyana tu masolba na indibidual nga kasali tatun. Ngem yatun nga liwa ay serioso nga awayyana tu marresulta ta paddisfellow nu ari masolba. Angngariganna, kasali taw nga liwa i pamara-parake, onu i pangilogo.—w16.05, p. 12.

Anni i makuam tapenu mas mebenefisiowakka ta pabbibbig tu Biblia?

Awayyam kuan yaw ira: Palawammu i nonomu nu mabbibbig ka, nga magaleg tu leksion ira nga awayyam iyaplika; iyavumu ta baggim i gittana, ‘Kunnasì meyusa yaw tapenu uffunan i tanakuan?’; anna mar-research meyannung ta material nga nabibbigmu.—w16.05, p. 29-31.

Ugal kari para ta Cristiano nga maddaddam maski nu mangurug yaya ta pamaginnolay?

Ari nga pawanan na pangurug ta pamaginnolay i kuruga paddaddam nga matageno na Cristiano. Narraddam si Abraham ta patay ni Sara. (Gen. 23:2) Mawawan lagapa noka i daddam ta pappasa na tiempo.—w16.05, p. 4.

Ta Ezekiel kapitulo 9, sinni i isimbolo na lalaki nga konsu tinta na sekretario nga nakepay ta taggug, anna i annam nga lallaki nga egga armasda nga panaral?

Nalippawa tam nga isimboloda i armada ta langi nga kasali ta nanaral ta Jerusalem anna kasali gapa ta manaral ta Armagedon. Ta moderno nga ketuppalanna, irepresenta na lalaki nga konsu tinta nga nakepay ta taggug si Jesu-Cristo, nga mammarka ta totolay nga mepaliag.—w16.06, p. 16-17.

Anni ira i namappeligro ta Biblia?

Nakapattalupaddian i Biblia maski nu (1) egga peligro nga mavunno i materiales nga neturakkanna, gitta na papiro anna tabbi na ayam; (2) egga pangokkontra na lider ira na pulitika anna relihion nga mayà manaral tatun; anna (3) pinurueban na tanakuan nga talianan i mensahena.—w16.07, p. 4-7.

Kunnasi pasimpleyan na tadday nga Cristiano i pattolena?

Ammuan nu anni talaga ira i kawagammu, anna lillitan i ari mawag nga paggasto. Magangngua tu realistiko nga badyet. Ilaku onu iyawa i gannug ira nga ari ngana meyusa, anna pagan ngana ngamin i gatu. Pakarianammu i sekular nga trabahum, anna iplanom nu kunnasi nga mas mapalawa i ministeriom.—w16.07, p. 12.

Anni i gannug nga mas nabalor anne ta vulawan onu pirâ?

Ipasingan na Job 28:12, 15 nga mas nabalor i sirib naggafu ta Dios anne ta vulawan onu pirâ. Durante nga alegammu yatun, mattalupaddian nga mapakalinno anna masikan i pangurugmu.—w16.08, p. 18-19.

Mepangngo kari nga mabbarbas i tadday nga brother?

Ta karuan nga kultura, ari mabba nga makefugag ta mensahe na Pappatulan nu marenu anna maayus i barbas na tadday. Ngem egga lagapa i karuan nga mammanaki tatun. (1 Cor. 8:9) Ta karuan nga kultura anna lugar, ari nga mepangngo i mabbarbas ta ministro ira nga Cristiano.—w16.09, p. 21.

Ngatta mapammakatalakkattam i kagian na Biblia meyannung kada David anna Goliat?

I katannang ni Goliat ay annam nga pulgada (15 cm) nga mas atannang anne ta pinaka-atannang nga tolay nga nedokumento ta moderno nga tiempo. Kurug tu tolay si David, gittana ipasingan na inskripsion gari nga tumukoy ta balay ni David anna ta kinagi ni Jesus. I nerekord ira nga detalye ta heograpo ay mekunnay ta kurug ira nga informasion.—wp16.5-TG, p. 13.

Anni i nadduman na pakannammu, pakalippawa, anna kinasirib?

I tolay nga egga pakannammuna ay nakonnug tu informasion, onu kinakurug. I tolay nga egga pakalippawana ay makasingan ta koneksion na kinakurug ira. Ngem i tolay nga egga siribna ay mawayyana nga usan ta mapia i pakannammu anna pakalippawa.—w16.10, p. 18.