Meraddammammu Kari?

Nabibbigmu kari tu mapia i nappasa ira nga isyu na Passifusifutan? Innammu nu matabbagmu yaw ira nga pakkiavu:

Nu makalawa tu direksion ta organisasion na Dios, anni nakuan i kuan na brother ira gittana manangngal ta sirkito anna elder ta kongregasion?

Insigida nakuan nga tuttuladda yatun. Iyavuda ta baggida: ‘Makoffun ngà kari ta espiritualidad na totolay ta pallevu ku? Akseptan anna suportakku kari i pangigiya na mangiyorollu ira nga brother?’​—w16.11, p. 14.

Kanni nga naaripan na Babilonia i kurug ira nga Cristiano?

Nesimmu yatun ari nabbayag kabalin na patay na apostoles. Tatun nga tiempo, namegafu nga luttuag i grupo na papari. Nipagaram na Iglesia anna na Gobiernu i apostata nga Cristianismo anna pinuruebadda nga ari ipaginna i ngaral na alle-trigu ira nga Cristiano. Ngem piga dekada nige na 1914, namegafu ngana nga makalawan ta Babilonia i nazelugan ira.​—w16.11, p. 24-26.

Ngatta importante i nakua ira ni Lefèvre d’Étaples?

Durante ta dekada na 1520, nitransleyt ni Lefèvre i Biblia ta French tapenu mabibbig yatun na ordinario nga totolay. Naka-influwensia i pakanawagna ta teksto ira na Biblia kada Martin Luther, William Tyndale, anna John Calvin.​—wp16.6-TG, p. 10-12.

Anni i nadduman na “pakimoray ta kata-katolay nga neravvunan” anna “pakimoray ta espiritu”? (Roma 8:6)

I ollu ay nakafokus ta pakkaraga anna gustu na imperfekto nga baggi, nga kanayun nga maguvovug anna mangidayaw ta ganna-gannug na baggi. I mekadua ay mangisentro ta pattolena ta ganna- gannug nga meyannung ta Dios anna ta appana-panonona; madomina na masanto nga espiritu yatun nga Cristiano. I ollu ay mattuppal ta patay, i mekadua ay ta inango anna imammo.​—w16.12, p. 15-17.

Anni i praktikal ira nga makua tapenu ari kuruga mavurung?

Magangngua tu prayoridad, mapeggan tu realistiko ira nga ekspektasion, egga nakuan tiempo para ta baggim, magayaya ta pinaratu ira na Dios, mappagalo anna gumalo, regular nga ma-ehersisio, anna makkatrug tu mapia.​—w16.12, p. 22-23.

“Neyali si Enoc tapenu arianna masingan i patay.” (Heb. 11:5, NW) Kunnasi?

Awayyana tu sesenu nga ina na Dios i inango ni Enoc tapenu arianna maekspiriensa i mataka-taki nga patay.​—wp17.1, p. 12-13.

Ngatta importante lagapa i pappakalinno?

Nelagum ta pappakalinno i mepangngo nga pattantia ta baggi tam anna pakannammu ta limitasiottam. Kawagan nga ammuattam nu kunnasi afektan na ugali tam i pattratu ta tanakuan anna ari nakuan atannang i paningattam ta baggi tam.​—w17.01, p. 18.

Anni i mamakurug nga nigiya na Dios i manangngal nga baggi ta ollu-siglo, kagitta na pangigiyana ta Manangngal nga Baggi ta maddaggun?

Ta uffun na masanto nga espiritu, nalippawada i kinakurug ira ta Katurakan. Niyorolluda i trabahu nga pallayyagayya ta uffun na anghel ira, anna nattalo ira ta Uvovug na Dios nga mangigiya. Kunnatun gapa i mesissimmu ta maddaggun.​—w17.02, p. 26-28.

Ngatta kuruga nabalor nittam i tavvu?

Egga i appa nga gannug: Nu sinni i nangiyawa taw, ngatta niyawana yaw, anni i nesakrifisio, anna nu anni i neyawana nga talaga kawagan. Monag nakuan nga nonopattam nu anni i nelagum taw ira nga gannug.​—wp17.2, p. 4-6.

Kabalin nga nadesisionan na tadday nga Cristiano i tadday nga gannug, ngatta awayyana tu ulian i desisionna?

Mawag tu tuppalattam i kinagi tam. Ngem, egga ira tiempo nga mawag tu nonopattam uli i desisiottam ira. Kabalin nga nabbabawi i totolay, inuli na Dios i desisionna meyannung ta Nineve. Nu mittan, megafu ta bagu nga sirkumstansia onu informasion, mekiddaw nga uliattam i desisiottam.​—w17.03, pp. 16-17.

Ngatta makadaral i tsismis?

Mariga nga makontrol i problema megafu ta tsismis, anna mamaggrabe yatun. Maski nu sittam i fustu onu mali, i pakisali ta makapataki nga paguvovug ay ari vuluvuga mamappipia ta ganna-gannug.​—w17.04, p. 21.