Ngatta Bibbigan i Biblia?

Ninonomu ngana kari nga bibbigan i Biblia ngem ariammu nituloy megafu ta natagenomu yatun ira? Para ta aru, kagitta na kattalakag bibbigan i Biblia. Ngem kunnasi nu nammuammu nga makoffun nikaw i Biblia tapenu mapeggakka tu mas makapagayaya anna makakontento nga pattolay? Kunnasi nu egga paga makuam tapenu mabbalin tu mas makapa-interes i pabbibbig tatun? Kayàmu kari ammuan nu anni i benefisio nga meyawa nikaw na Biblia?

Ikonsidera i makagi na nakasingan ira ta benefisio nguri ta pinegafuanadda bibbigan i Biblia.

Kunni Ezekiel nga maturu tu 20 anios: “Kagittà dati i mammaneho tu kotse nga awan tu manonoku nga funtan. Nakoffun i Biblia tapenu mapeggan tu direksion i pattolè. Egga ira praktikal nga tabarang nga mosà kadaggaw.”

Kunni Frieda nga ma-20 anios gapa: “Minappata-patu ngà dati. Ngem megafu ta pabbibbigku tu Biblia, nagigiammù nu kunnasi kontrolan i baggì. Pinabbalinnà yatun tu mas mabi nga makisama, yatutta mas aru ngana i kofukku.”

Kinagi na ma-50 anios nga si Eunice ta Biblia: “Uffunannà yatun nga mabbalin tu mas mapia nga tolay, nga ulian i ari makasta nga ugu-ugalì.”

Kagitta na nammuadda anna na minillion paga, makoffun i Biblia tapenu makapattolay tu mas makapagayaya. (Isaias 48:17, 18) Makoffun paga yaw tapenu (1) makapaddesision tu mapia, (2) makaleg tu kurug nga kokkofun, (3) malabanan i stress, anna (4) pinaka-importante, mammuan i kinakurug meyannung ta Dios. Naggafu ta Dios i tabarang na Biblia, yari tu siguradu nga makkasta i pattolem. Ari vuluvuga manabarang tu marake i Dios.

I pinaka-importante nga kuan ay pegafuanan yatun. Anni ira i praktikal nga makua tapenu mabi mapegafuanan anna mas makapagayaya yatun?